ཁུ་རུ།
ཁུ་རུ། ཁུ་རུ་ཟེར་མི་འདི་ ང་བཅས་རའི་འབྲུག་རྒྱལ་ཁབ་ནང་ དང་ཕུ་ཕམ་རྒན་ཤོས་ཚུ་གི་ངོ་བསྒང་ལས་ར་ རྩེ་སྲོལ་ཡོད་པའི་རྩེདམོ་ རྙིང་ཤོས་ཅིག་ཨིན། རྩེདམོ་འདི་ ང་བཅས་རའི་འབྲུག་རྒྱལ་ཁབ་ཀྱི་ མཐའ་དབུས་མེད་པའི་ས་གནས་ཚུ་ནང་ གཞུང་གཡོག་རྐྱབ་མི་དང་ གཡུས་སྒོ་ཚུ་ནང་ སོ་ནམ་ཞིང་ལཱ་འབད་མི་ལ་སོགས་པ་ མི་སེར་ཆེ་འབྲིང་ཆུང་གསུམ་ ག་ར་གིས་སྤྲོ་བ་སྦོམ་བསྐྱེད་ཐོག་ལས་ རྩེ་དོ་ཡོདཔ་ཨིན།
རྩེདམོ་འདི་ དང་ཕུ་འབད་བ་ཅིན་ མང་ཤོས་རང་ ལོ་གསར་དང་ ཁྲུས་བབས་ ཉིན་ལོག་ ངན་པ་དགུ་འཛོམས་ལ་སོགས་པའི་དུས་སྟོན་ཚུ་གི་སྐབས་ལུ་ རྩེ་དོ་ཡོདཔ་ཨིན། དེ་མ་ཚད་ རེས་གཟའ་ཉིམ་དང་ ཟླཝ་ལ་སོགས་པ་བདུན་ཕྲག་ངལ་གསོ་ཚུ་གི་སྐབས་ལུ་ཡང་ རྩེ་དོ་ཡོདཔ་ཨིན། ཨིན་རུང་ ད་རེས་ནངས་པར་ འགོ་འདྲེན་འཐབ་མི་ཚུ་གིས་ དུས་སྟབས་བཟོ་ཞིནམ་ལས་ རྩེ་བའི་སྲོལ་ཡང་དར་ཏེ་ཡོད།
ཁུ་རུ་འདི་ ཧེ་མ་འབད་བ་ཅིན་ ཤིང་གི་ཁུ་རུ་གུ་ བྱའི་སྒྲོ་བཙུགས་ཏེ་ རྩེ་དོ་ཡོདཔ་ཨིན་རུང་ ད་རེས་ནངས་པར་འབད་བ་ཅིན་ མང་ཤོས་ར་ ལྕགས་ཀྱི་ཁུ་རུ་གུ་ སྒྲོ་གི་ཚབ་གྱིབ་དང་ཤོག་གུ་ཚུ་བཙུགས་ཏེ་ རྩེ་དོ་ཡོདཔ་ཨིན། ཁུ་རུའི་ཤིང་/ལྕགས་འདི་ རིང་ཚད་ དཔྱ་མཐོ་གང་དེ་ཅིག་འོང་ནི་དང་ འདི་གི་མཇུག་ལུ་ལྕགས་འཛེར་དང་ མགུ་ལུ་བྱའི་སྒྲོ་/གྱིབ་ཀྱི་སྒྲོ་བཙུགས་དགོཔ་ཨིན།
ཁུ་རུའི་འབའ་འདི་ རིང་ཚད་ཁྱུ་གང་དེ་ཅིག་འོངམ་ཨིན། རྩེདམོ་འདི་ རྩེ་ནི་ལམ་ལུགས་དང་ སྡེ་ཚན་བཟོ་ཐངས་ སྐུགས་བརྩི་ཐངས་ འཆམ་རྐྱབ་ཐངས་ཚུ་མདའ་རྩེད་དང་ཅོག་འཐདཔ་ཨིན། རྩེདམོ་འདི་ ཧེ་མ་འབད་བ་ཅིན་ མང་ཤོས་ར་ ཕོ་སྐྱེས་ཚུ་གིས་ རྩེཝ་ཨིན་རུང་ ད་རེས་ནངས་པར་ ཨམ་སྲུ་ཚུ་གིས་ཡང་ རྩེ་དོ་ཡོདཔ་ཨིན།