གསོལ་ཁ་བསྡུས་པ་འཕྲིན་ལས་མྱུར་འགྲུབ་མ།

༄༅། །ཆོས་སྐྱོང་སྤྱིའི་གཏོར་བསྔོ་བསྡུས་པ་ཕྲིན་ལས་མྱུར་འགྲུབ་མ་བཞུགས་སོ།།

༄༅། །དཔལ་ཧེ་རུ་ཀ་ལ་ཕྱག་འཚལ་ལོ། _{།འདིར་བསྟན་སྲུང་དམ་ཅན་རྒྱ་མཚོའི་ཚོགས་ལ་གཏོར་བསྔོ་རྒྱུན་དུ་བྱ་བར་འདོད་པས་རྒྱས་པ་བློས་མི་ལྕོགས་པའམ་བསྙེན་སྒྲུབ་ཀྱི་སྐབས་ལྟ་བུར་ལོངས་ཁྱབ་མེད་ན། །གཏོར་མ་རིན་ཆེན་སྤུངས་གཏོར་དང་། མཆོད་པ་ཆུ་གཉིས་ཉེར་སྤྱོད་ལྔ། བསངས་ཆབ་སྨན་རཀ་སོགས་ལག་ལེན་ལྟར་བཤམས་ནས། །ཐོག་མར་སྐྱབས་སུ་འགྲོ་བ་ནི།} སངས་རྒྱས་ཆོས་དང་དགེ་འདུན་དང་། །བླ་མ་ཡི་དམ་མཁའ་འགྲོ་ལ། །བདག་དང་མཁའ་མཉམ་སེམས་ཅན་རྣམས། །བྱང་ཆུབ་བར་དུ་སྐྱབས་སུ་མཆི། _{།ལན་གསུམ། སེམས་བསྐྱེད་ནི།} མ་གྱུར་མཁའ་མཉམ་སེམས་ཅན་རྣམས། །བྱང་ཆུབ་ཆེན་པོར་འགོད་པའི་ཕྱིར། །སྨོན་འཇུག་བླ་མེད་བྱང་ཆུབ་སེམས། །དམ་པ་བདག་གིས་བསྐྱེད་པར་བགྱི། _{།ལན་གསུམ། ཚད་མེད་བཞི་ནི།} སེམས་ཅན་བདེ་ལྡན་སྡུག་བསྔལ་ཀུན་བྲལ་ཞིང་། །བདེ་དང་མི་འབྲལ་ཆགས་སྡང་ཀུན་བྲལ་བྱ། _{།བདག་བསྐྱེད་ནི།} སྭ་བྷ་ཝ་_{བརྗོད།} བདག་དང་ཆོས་ཀུན་མི་དམིགས་སྟོང་པར་གྱུར། །སྟོང་པའི་ངང་ལས་རི་རབ་ཆེན་པོའི་སྟེང་། སྣ་ཚོགས་པདྨ་ཉི་མའི་གདན་གྱི་ཁར། །རང་ཉིད་ཧེ་རུ་ཀ་དཔལ་ཁྲོ་ཆགས་མཐིང་། །ཕྱག་གཉིས་རྡོར་དྲིལ་འཛིན་ཅིང་ཕག་མོ་དམར། །རྡོ་རྗེ་ཐོད་ཁྲག་ཁ་ཊྭཾ་འཛིན་ལ་འཁྱུད། །སྤྱན་གསུམ་ཐོར་ཚུགས་སྟག་ཤམ་མི་མགོས་སྤྲས། །ཕྱག་རྒྱ་དྲུག་ལྡན་གཡས་བརྐྱངས་པད་ཉིའི་སྟེང་། །འཇིགས་དུས་བརྫིས་ཏེ་ཡེ་ཤེས་མེ་དབུས་བཞུགས། །སྤྱི་བོར་བླ་མ་མི་བསྐྱོད་གཟུགས་ཀྱིས་བརྒྱན། ཐུགས་ཀར་ཉི་སྟེང་ཧཱུཾ་མཐར་སྔགས་ཀྱིས་བསྐོར། །འོད་འཕྲོས་འཕགས་པ་མཆོད་ཅིང་འགྲོ་ཀུན་སྦྱངས། །འཁོར་ལོ་སྡོམ་པའི་གོ་འཕང་ལ་བཀོད་ནས། །བྱིན་རླབས་འོད་ཟེར་ཚུར་བསྡུས་སྙིང་ཁར་ཐིམ། །ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ། _{ཅེས་བརྒྱ་རྩ་བཟླས་པས་བདག་བསྐྱེད་དོ། །དེ་ནས་བསངས་ཆུ་ལ་དམིགས་ནས་}སུམྦྷ་ནི་_{ལན་གསུམ་བརྗོད།} ཐུགས་ལས་ཁྲོ་བོའི་ཚོགས་སྤྲོས་སྤོས་ཆུརཐིམ། །ཉེས་སྐྱོན་བགེགས་བསངས་ཡེ་ཤེས་ཆུ་བོར་གྱུར། །ནང་མཆོད་སྟེང་དུ་ལྷན་སྐྱེས་དཀར་དམར་སྔོའི། །ཐུགས་ཀར་ཧ་ཧོ༔ཧྲཱིཿམཚན་འོད་ཟེར་གྱིས། །ཡེ་ཤེས་བདུད་རྩི་བཀུག་བསྟིམས་ལྷ་བཅས་ཞུ། །ཁ་དོག་དྲི་རོ་ནུས་ལྡན་བདུད་རྩིར་གྱུར། །ཨོཾ་ཨཱཿཧཱུྃ་ཧ་ཧོ༔ཧཱི༔ _{ལན་གསུམ་གྱིས་མཆོད་གཏོར་སོགས་བྱིན་གྱིས་བརླབས་ནས། བགེགས་གཏོར་གཏོང་ན།} ཕཊཿ དཀོན་མཆོག་བདེན་པའི་བཀའ་བསྒོ་ཡིས། །བགེགས་རྣམས་ཉོན་ཅིག་བདག་ཅག་འདིར། །མཧཱ་ཀཱ་ལར་མཆོད་པ་དང་། །ཕྲིན་ལས་གཉན་པོ་བཅོལ་བའི་དུས། །འབྱུང་པོ་སྔགས་དང་ཕྱག་རྒྱ་ལ། །ཉན་དང་ལྟ་བར་མི་དབང་བས། །ཁྱེད་རྣམས་གཏོར་མ་འདི་ཁྱེར་ལ། །མྱུར་བ་ཉིད་དུ་ཕྱིར་དེངས་ཤིག། །གང་དག་མི་འགྲོ་དེ་དག་ནི། །ཡེ་ཤེས་རྡོ་རྗེ་འབར་བ་འདིས། །མགོ་བོ་ཚལ་པ་བརྒྱར་འགས་པ། །གདོན་མི་ཟ་བར་གྱུར་ཏ་རེ། _{།སུམྦྷ་ནིས་བསྐྲད་ནས། སྲུང་འཁོར་ནི།} ཧཱུྃ༔ བདག་ཉིད་དཔལ་ཆེན་སྐུར་བསྒོམས་ཏེ། །དཔལ་འབར་ཁྲོས་པའི་ཐུགས་ཀར་ནས། །འོད་འཕྲོས་སྟེང་འོག་ཕྱོགས་མཚམས་ཀུན། །རྡོ་རྗེ་ས་གཞི་རྭ་བ་གུར། །བླ་རེས་དྲྭ་བ་ཡེ་ཤེས་མེ། །རྣམ་ལྔ་འབར་བའི་འཁོར་ལོར་གྱུར། _{།ཞེས་མཚམས་བཅད་ནས། མདུན་བསྐྱེད་སྤྱན་འདྲེན་པ་ནི།} ཧཱུྃ༔ བདག་ཉིད་ཧེ་རུ་ཀ་ཡི་སྐུར་གསལ་བའི། །ཐུགས་ཀའི་ཧཱུཾ་ལས་འཕྲོས་པའི་འོད་ཟེར་གྱིས། །ཕྱོགས་བཅུའི་རྒྱལ་བ་རྒྱ་མཚོའི་ཐུགས་དམ་བསྐུལ། །ཐུགས་རྗེས་གང་འདུལ་སྒྱུ་མའི་སྐུར་བཞེངས་ཏེ། །རང་བཞིན་གནས་དང་གྲུབ་པའི་གནས་སོགས་ནས། །སངས་རྒྱས་ཀུན་གྱི་མཐུ་སྟོབས་ནུས་པའི་གཟུགས། །ཁྲག་འཐུང་མཧཱ་ཀཱ་ལ་ཐམས་ཅད་ཀྱི། །འཁོར་ལོས་བསྒྱུར་བ་ཆེན་པོ་ཕྱག་བཞི་པ། །ནག་པོ་དུ་མའི་ཚོགས་ཀྱི་གཙོ་བོ་སྟེ། །ཡེ་ཤེས་མགོན་པོ་བྱ་རོག་མཚན་ཅན་ལ། །གཡས་སུ་ཕོ་བརྒྱུད་མགོན་པོ་ཀུན་གྱི་གཙོ། །དཔལ་ལྡན་འཇིགས་བྱེད་ལས་ཀྱི་མགོན་པོ་དང་། །གཡོན་དུ་མོ་བརྒྱུད་ལྷ་མོ་ཡོངས་ཀྱི་གཙོ། །དཔལ་ལྡན་ཟ་བྱེད་དུད་སོལ་ལྷ་མོ་བཅས།།དེ་ལྟར་གཙོ་བོ་གསུམ་གྱི་མཐའ་བསྐོར་དུ། །ཐུགས་གསུང་སྐུ་ཡི་ལྷ་ཚོགས་ཐམས་ཅད་དང་། །ཁྱད་པར་གསང་བ་སྔགས་ཀྱི་བདག་མོ་དང་། །ཆོས་ནོར་གཏེར་གྱི་བདག་པོ་རྣམ་ཐོས་སྲས། །ཚེ་དཔལ་ཀུན་སྩོལ་བཀྲ་ཤིས་ཚེ་རིང་མ། །བོད་སྐྱོང་བསྟན་མའི་གཙོ་མོ་གཡུ་སྒྲོན་མ། །ཁྱབ་འཇུག་ཆེན་པོ་གཟའ་མཆོག་རཱ་ཧུ་ལ། །རྒྱལ་ཆེན་ཚངས་པ་དུང་གི་ཐོར་ཚུགས་ཅན། །འཛམ་གླིང་སྐྱེས་མཆོག་རྡོ་རྗེ་ལེགས་པ་རྩལ། །དགེ་བསྙེན་ཆེན་པོ་ཇག་པ་མེ་ལེན་དང་། །དམ་ཅན་སྒོ་བདུད་ཆེན་པོ་ལྕགས་རལ་ཅན། །ཕ་མེས་བརྒྱུད་ཀྱིས་བསྟེན་པའི་ལྷ་རྣམས་དང་། །ས་འདིར་གཉུག་མར་གནས་པའི་གཞི་ཡི་བདག །མཆོད་ཅིང་བསྟོད་འོས་སྲུང་མའི་ཚོགས་ཀུན་དང་། །གཞན་ཡང་ཕྱོགས་སྐྱོང་བཅུ་དང་རྒྱལ་ཆེན་བཞི། །གཙང་རིས་མགོན་པོ་བདུན་ཅུ་རྩ་ལྔ་དང་། །བོད་ཁམས་སྐྱོང་བའི་བསྟན་མ་བཅུ་གཉིས་སོགས། །སྣང་སྲིད་ལྷ་སྲིན་དྲེགས་པའི་ཚོགས་ཐམས་ཅད། །རང་རང་བཀའ་ཉན་སྡེ་དཔུང་མཐའ་ཡས་པ། །གནམ་ས་བར་སྣང་ལྟེམ་མེར་གང་བ་བཅས། །རྣལ་འབྱོར་བདག་གི་དད་པས་སྤྱན་འདྲེན་གྱིས། །རྫུ་འཕྲུལ་མཐུ་སྟོབས་ཆེན་པོས་གཤེགས་སུ་གསོལ། །ཨོཾ་ཤྲཱི་བཛྲ་དྷརྨ་པཱ་ལ་ས་པཱ་རི་ཝ་རེ་བཛྲ་ས་མ་ཡ་ཛ་ཛ༔ _{ཞེས་སྤྱན་དྲངས་ནས། བཞུགས་སུ་གསོལ་བ་ནི།} ཧཱུྃ༔ ཕྱི་རོལ་སྣང་བ་རྣམ་དག་འོག་མིན་ཞིང་། །ནང་དུ་གནས་ཁང་དྲག་པོའི་གཞལ་ཡས་འདིར། །རང་རང་དགྱེས་པའི་གདན་ཁྲི་སྣ་ཚོགས་སུ། །བརྟན་པར་བཞུགས་ལ་གུས་པས་ཕྱག་འཚལ་ལོ། _{།ཞེས་བཞུགས་ཕྱག་འཚལ་ནས། དམ་ལ་བཞག་པ་ནི།} ཧཱུྃ༔ སྔོན་ཚེ་རྒྱལ་བའི་སྤྱན་སྔར་ཞལ་བཞེས་བཞིན། །སངས་རྒྱས་བསྟན་པ་གཉན་པོ་བསྲུང་བ་དང། །བདག་ཅག་བླ་མེད་བྱང་ཆུབ་སྒྲུབ་པ་ལ། །རྐྱེན་སེལ་མཐུན་སྒྲུབ་ཕྲིན་ལས་མ་གཡེལ་ཞིག། _{།ཅེས་དམ་བསྒྲགས་གསོལ་ནས། མཆོད་པ་འབུལ་བ་ནི།} མཆོད་རྫས་རྣམས་ཨོཾ་ཨཱཿཧཱུྃ་ཧ་ཧོ་ཧྲཱིཿ _{ལན་གསུམ་གྱིས་བྱིན་གྱིས་བརླབས་ནས།} ཧཱུྃ༑ ཁྲག་སྣའི་ཡོན་ཆབ་དུག་ཆུའི་ཞབས་བསིལ་དང་། །དབང་པོའི་མེ་ཏོག་གསུར་ཆེན་སྤོས་ཀྱི་དུད། །ཞུན་ཆེན་མར་མེ་མཁྲིས་པའི་དྲི་ཆབ་དང་། །སྙིང་སྣའི་ཞལ་ཟས་རྐང་གླིང་རོལ་མོ་འབུལ། །ༀ་ཤྲཱི་བཛྲ་དྷརྨ་པཱ་ལ་ས་པཱ་རི་ཝ་རེ་ཨརྒྷཾ་_{སོགས་ཀྱིས་མཆོད།} ཧཱུྃ༑ འཆི་མེད་བདུད་རྩི་བྱང་ཆུབ་སེམས་རྒྱུན་དང་། །ཆགས་རྟོག་ཀུན་བསྒྲལ་རཀྟ་བྷ་གའི་མཚོར། །འཛོམས་པའི་མཉམ་སྦྱོར་བདེ་བའི་སྒྲ་ཆེན་པོས། །ཆོས་དབྱིངས་མཁའ་ལ་ཁྱབ་པ་བླ་མེད་མཆོད། །ཨོཾ་ཤྲཱི་བཛྲ་དྷརྨ་པཱ་ལ་ས་པཱ་རི་ཝ་རེ་ཨ་མྲི་ཏ་པཱུ་ཛ་ཁཱཧི། _{དེ་བཞིན་དུ་}རཀྟ་_ནས་སུ་ར་ཏེསྟྭཾ་_{གྱི་བར་གྱིས་མཆོད་ནས། །གཏོར་མ་བྱིན་གྱིས་བརླབ་པ་ནི།} མདུན་དུ་རླུང་མེ་ཐོད་སྐྱེད་བཅས་པའི་སྟེང་། །མཚན་ལྡན་བྷནྡྷར་གོ་ཀུ་ད་ཧ་ན། །བི་མུ་མ་ར་ཤུ་སྟེ་ཡི་གེ་བཅུ། རིམ་ཞུ་ཤ་ལྔ་བདུད་རྩི་ལྔ་རུ་གྱུར། །རླུང་གིས་མེ་འབར་རྫས་རྣམས་ཞུ་ཞིང་ཁོལ། །དྭངས་མ་འབྲུག་གསུམ་གྱུར་པའི་འོད་ཟེར་གྱིས། །ཡེ་ཤེས་བདུད་རྩི་བཀུག་བསྟིམས་སྦྱངས་རྟོགས་སྦར། །གཏོར་མ་ཁ་དོག་དྲི་རོ་ནུས་ལྡན་གྱུར། ཨོཾ་ཨཱཿཧཱུྃ་ཧ་ཧོ༔ཧཱི༔ _{ལན་གསུམ་གྱིས་བྱིན་གྱིས་བརླབས་ནས། གཏོར་འབུལ་ནི།} ཨཿ ཐོད་ཆེན་བྷན་དྷ་ཡངས་པའི་སྣོད་ནང་དུ། །གཏོར་རྫས་ཤ་ལྔ་བདུད་རྩི་ལྔའི་ངོ་བོ། །རྣམ་པ་གང་འདོད་ནམ་མཁའི་མཛོད་ཆེན་པོར། །བྱིན་བརླབས་རྨད་བྱུང་དཔལ་གྱི་གཏོར་མ་འདི། །དྲིན་ཅན་རྩ་བ་བརྒྱུད་པའི་བླ་མ་དང་། །ཡི་དམ་བཅོམ་ལྡན་འཁོར་ལོ་སྡོམ་པ་དང་། །གནས་གསུམ་དཔའ་བོ་མཁའ་འགྲོའི་ཚོགས་ལ་འབུལ། །བཞེས་ནས་བྱིན་རླབས་དབང་དང་དངོས་གྲུབ་སྩོལ། །ཁྱད་པར་མཧཱ་ཀཱ་ལ་ཕྱག་བཞི་པ། །ནག་པོ་ཆེན་པོ་ལྕམ་དྲལ་ཐམས་ཅད་ལ། །ལྷ་ཆེན་སྙིང་གི་གཏོར་མ་འདི་འབུལ་ལོ། །བཞེས་ནས་བྱང་ཆུབ་བར་དུ་བསྲུང་ཞིང་སྐྱོངས། །བཀའ་སྡོད་དྲེགས་པའི་སྡེ་དཔོན་ལས་ཀྱི་མགོན།།དཔུང་ཆེན་མགོན་པོའི་དམག་ཚོགས་ཐམས་ཅད་ལ། །སྙིང་སྣ་སྟོང་གི་གཏོར་མ་འདི་འབུལ་ལོ། །བཞེས་ནས་མཐའ་ཡི་དམག་དཔུང་གཞོམ་པར་མཛོད། །མ་གཅིག་མཁའ་འགྲོའི་དབང་མོ་དུད་གསོལ་མ། །ནག་མོ་འབུམ་སྡེའི་ཚོགས་དང་བཅས་པ་ལ། །ཤ་ཁྲག་དམར་གྱི་གཏོར་མ་འདི་འབུལ་ལོ། །བཞེས་ནས་ཕྱི་ནང་བར་ཆད་དབྱིངས་སུ་སོལ། །སྔགས་ཀྱི་བདག་མོ་ཨེ་ཀ་ཛ་ཏི་དང་། །བྲན་གཡོག་འབུམ་ཁྲི་འབུམ་སྟོང་བཅས་པ་ལ།། དཀར་དམར་རྒྱུན་ལྡན་གཏོར་མ་འདི་འབུལ་ལོ། །བཞེས་ནས་གསང་ཆེན་ལམ་གྱི་སྡོང་གྲོགས་མཛོད། །ཆོས་ནོར་གཏེར་གྱི་བདག་པོ་རྣམ་ཐོས་སྲས། །བཙུན་མོ་མངག་གཞུག་སྡེ་དང་བཅས་པ་ལ། །ལྷུན་ཆགས་བཟང་དགུའི་གཏོར་མ་འདི་འབུལ་ལོ། །བཞེས་ནས་ཅི་འདོད་དངོས་གྲུབ་ཆར་ལྟར་འབེབས། །ཚེ་དཔལ་ཀུན་སྩོལ་བཀྲ་ཤིས་ཚེ་རིང་མ། །མཆེད་ལྔ་འཁོར་དང་བཅས་པ་ཐམས་ཅད་ལ། །ཟག་མེད་བདུད་རྩིའི་གཏོར་མ་འདི་འབུལ་ལོ། །བཞེས་ནས་བསམ་དོན་ཆོས་བཞིན་འགྲུབ་པར་མཛོད། །བསྟན་སྐྱོང་མ་མོའི་གཙོ་མོ་གཡུ་སྒྲོན་མ། །སྨན་བཙུན་འབུམ་སྡེའི་ཚོགས་དང་བཅས་པ་ལ། །བཅུད་ལྡན་མི་བཟད་གཏོར་མ་འདི་འབུལ་ལོ། །བཞེས་ནས་བདེ་ཆེན་ཡེ་ཤེས་རྒྱས་པར་མཛོད། །ཁྱབ་འཇུག་ཆེན་པོ་དུག་གི་སྤུ་གྲི་དང་། །གཟའ་བརྒྱད་གདོང་མོ་བཞི་དང་བཅས་པ་ལ། །དམར་ཆེན་སྙིང་གི་གཏོར་མ་འདི་འབུལ་ལོ། །བཞེས་ནས་བྱད་མ་རང་གཤེད་རང་ལ་ཕོབ། །ཆོས་སྐྱོང་རྒྱལ་པོ་ཆེན་པོ་སྐུ་ལྔ་དང་། །ཡུམ་བློན་རུ་འདྲེན་སྡེ་བཞིའི་ཚོགས་བཅས་ལ། །འདོད་ཡོན་ལྔ་ལྡན་གཏོར་མ་འདི་འབུལ་ལོ། །བཞེས་ནས་རབ་འབྱམས་ལས་བཞི་ཡོངས་གྲུབ་མཛོད། །འཛམ་གླིང་སྐྱེས་མཆོག་རྡོ་རྗེ་ལེགས་པ་དང་། །མཆེད་འཁོར་སུམ་བརྒྱ་དྲུག་ཅུའི་ཚོགས་རྣམས་ལ། །མཐུན་རྫས་རྒྱན་གྱི་གཏོར་མ་འདི་འབུལ་ལོ། །བཞེས་ནས་དམ་ཆོས་གྲུབ་པའི་འགལ་རྐྱེན་གསོལ། །ལས་བྱེད་གཤན་པ་དམར་ནག་ལ་སོགས་པ། །རྟག་ཏུ་བསྟེན་པའི་ལྷ་སྲུང་ཐམས་ཅད་ལ། །མི་ཟད་གཏེར་གྱི་གཏོར་མ་འདི་འབུལ་ལོ། །བཞེས་ནས་གང་བཅོལ་ལས་རྣམས་ཐོགས་མེད་སྒྲུབས། །ལྷག་པར་བདག་ཅག་གང་དུ་གནས་པ་ཡི། །གནས་གཞི་ཡུལ་གྱི་བདག་པོ་ཐམས་ཅད་ལ། །གང་ལ་གང་འདོད་གཏོར་མ་འདི་འབུལ་ལོ། །བཞེས་ནས་མཐུན་རྐྱེན་ལྷུན་གྱིས་འགྲུབ་པར་མཛོད། །གཞན་ཡང་ཕྱོགས་སྐྱོང་བཅུ་ལ་སོགས་པ་ཡི། །དཀར་ཕྱོགས་སྐྱོང་བའི་སྡེ་དཔུང་ཐམས་ཅད་ལ། །འཛད་མེད་མཆོད་སྦྱིན་གཏོར་མ་འདི་འབུལ་ལོ། །བཞེས་ནས་འཇིག་རྟེན་བདེ་ཞིང་སྐྱིད་པར་མཛོད། །དེ་ལྟར་དམ་ཅན་རྒྱ་མཚོ་ཁྱེད་རྣམས་ལ། །མཆོད་སྦྱིན་འདི་འབུལ་སྤྱི་དང་བྱེ་བྲག་གི། །བསྟན་པ་ཆེར་རྒྱས་བདག་ཅག་འགལ་རྐྱེན་སེལ། །ཞི་སོགས་ལས་དང་དངོས་གྲུབ་རྣམ་གཉིས་སྩོལ། _{།ཅེས་འབུལ་ནས། བསྟོད་པ་ནི།} ཧཱུྃ༑ དབྱིངས་དང་ཡེ་ཤེས་ཟུང་དུ་འཇུག་པའི་སྐུ། །ཆུ་སྣོད་རྙོག་དང་དྭངས་མའི་ཟླ་གཟུགས་བཞིན། །ནག་པོའི་གཤེད་དང་དཀར་པོའི་ལྷར་འཆར་བའི། །དམ་ཅན་ཆོས་སྐྱོང་རྒྱ་མཚོའི་གཙོ་ལ་བསྟོད། །ཁྱོད་ཀྱི་གསང་བ་གསུམ་ལས་འཕྲུལ་བའི་འཁོར། །ཕོ་བརྒྱུད་མོ་བརྒྱུད་སྤྲུལ་དང་ཡང་སྤྲུལ་བཅས། །ཐབས་མཁས་གང་འདུལ་སོ་སོའི་སྐུར་སྟོན་པའི། །བཀའ་སྡོད་དམ་ཅན་རྒྱ་མཚོའི་ཚོགས་ལ་བསྟོད། །ཁྱེད་རྣམས་ལྟར་སྣང་དྲེགས་པའི་ཚུལ་བཟུང་ནས། །ཆ་ལུགས་མ་ངེས་རྣམ་པ་ཅིར་སྣང་ཡང་། །ཐམས་ཅད་ཡེ་ཤེས་གཅིག་གི་རོལ་པ་སྟེ། །གཅིག་པུས་སྣ་ཚོགས་སྟོན་པར་མཛད་ལ་བསྟོད། །མ་དག་སྣང་ངོར་ཅི་ཡང་སྟོན་མཛད་ཀྱང་། །དག་མཉམ་ཆོས་སྐུའི་རྒྱ་ལས་མི་འདའ་བས། །ལྷ་འདྲེ་རིས་སུ་ཕྱེ་བའི་བློ་སྤངས་ཏེ། །གཉིས་མེད་རོ་མཉམ་ཆེན་པོར་ཤེས་པས་བསྟོད། །དེ་ལྟར་གཉིས་མེད་དབྱིངས་ལས་མ་གཡོས་བཞིན། །ཡེ་ཤེས་འཇིག་རྟེན་ལས་ཚུལ་སྣ་ཚོགས་པས། །འགྲོ་བའི་མོས་བསམ་དབང་པོའི་བྱེ་བྲག་དང་། །མཐུན་འཇུག་འགྲོ་དོན་མཛད་ལ་ཕྱག་འཚལ་བསྟོད། །དེས་ན་ཁྱེད་དང་བདག་གི་བསམ་པའི་རྩེ། །བསྟན་དང་འགྲོ་ལ་གཅེས་པ་རོ་གཅིག་པས། །བསྟན་འགྲོར་འཚེ་བའི་མཐའ་དམག་བཟློག་པའི་ཕྱིར། །མཐུ་རྩལ་ནུས་ལྡན་ཁྱེད་ལ་བདག་བསྟོད་དོ། །བདག་ལའང་བྱམས་པའི་གཉེན་དང་འཛའ་བའི་བཤེས། །བསྟེན་པའི་ལྷ་སྲུང་ཁྱེད་ལས་གཞན་མེད་པས། །རྟག་ཏུ་བདག་གི་ལུས་དང་གྲིབ་མ་བཞིན། །འགྲོགས་ནས་བྱང་ཆུབ་བར་དུ་སྲུང་སྐྱོབ་མཛོད། _{།འདོད་དོན་གསོལ་བ་ནི།} ཧཱུྃ༑ སྔོན་ཚེ་བཅོམ་ལྡན་འདས་ཀྱི་སྤྱན་སྔ་རུ། །ཆོས་བཞིན་སྒྲུབ་པ་མཛད་པའི་གང་ཟག་ལ། །བར་ཆད་བསྲུང་ཞིང་སྐྱོང་བར་ཞལ་བཞེས་པའི། །ཐུགས་དམ་གནད་ནས་བསྐུལ་ལོ་གསན་དུ་གསོལ། །ཁྱེད་རྣམས་ཡེ་ཤེས་སྤྱན་དང་ལྡན་པའི་ཕྱིར། །འཕྲིན་ལས་འཇུག་པ་དུས་ལས་མི་ཡོལ་ན། །བདག་གི་གུས་ཤིང་གསོལ་བའི་ལས་འདི་དག། མ་གཡེལ་མ་འགྱངས་མྱུར་དུ་འགྲུབ་པར་མཛོད། །སྤྱིར་ནི་སངས་རྒྱས་བསྟན་པ་བསྲུང་བ་དང་། །དཀོན་མཆོག་རིན་ཆེན་གསུམ་གྱི་དབུ་འཕང་བསྟོད། །བསྟན་པའི་སྒྲོན་མེ་མཆོག་རྣམས་སྐུ་ཚེ་སྲིངས། །དགེ་འདུན་སྡེ་རྣམས་ཉམས་མེད་ཡུན་དུ་སྐྱོངས། །སྒོས་སུ་བདག་ཅག་དཔོན་སློབ་འཁོར་བཅས་ལ། །རྐྱེན་ཞི་ཚེ་སྤེལ་འབྱོར་པ་རྒྱས་པ་དང་། །གཞན་སྣང་དབང་བསྒྱུར་བསྟན་དགྲ་ཚར་གཅོད་པའི། །རྣམ་བཞིའི་འཕྲིན་ལས་ཐོགས་མེད་འགྲུབ་པར་མཛོད། །ཡང་སྒོས་བདག་ཅག་གང་དུ་གནས་པའི་སར། །ནད་མུག་འཁྲུགས་རྩོད་བཙའ་ཐན་སད་སེར་སོགས། །མི་མཐུན་ཉེར་འཚེའི་མིང་ཡང་མི་གྲགས་པར། །ཆོས་འབྱོར་ཕུན་ཚོགས་དཔལ་གྱིས་འཚོ་བར་མཛོད། །གང་གིས་གསོལ་བ་བཏབ་ཀྱང་མི་བསླུ་ཞིང་། །གང་རྣམས་ཡིད་བཞིན་ནོར་ལས་ཆེས་ལྷག་པས། །གང་ཡང་ཡིད་ལ་འདོད་པའི་དངོས་པོ་ཀུན། །གང་བསམ་མོད་ལ་འགྲུབ་པའི་འཕྲིན་ལས་མཛོད། །མདོར་ན་གནས་སྐབས་བྱང་ཆུབ་ལམ་གྱི་གེགས། །ཕྱི་ནང་བར་ཆད་གཡུལ་ལས་རྣམ་རྒྱལ་ནས།། མཐར་ཐུག་རྣམ་མཁྱེན་རྒྱལ་བའི་གོ་འཕང་མཆོག། །སྒྲུབ་པའི་སྟོངས་གྲོགས་མཛོད་ཅིག་མཐུ་མ་ཆུང་། །བསྐང་བ་བསྡུས་པ་ནི། ཧཱུྃ༑ དམ་ཅན་རྒྱ་མཚོའི་ཐུགས་དམ་བསྐང་བ་ནི། །དད་མོས་སྤྱན་འདྲེན་གདུང་བའི་འབོད་རྫས་དང་། །ཁྲིམས་གཙང་མཆོད་རྫས་མང་ཐོས་བསྐང་བའི་རྫས། །བསམ་པའི་རྟེན་རྫས་སྒོམ་བྱུང་སྒྲུབ་པའི་རྫས། །འཆད་པའི་འཕྱར་དར་རྩོད་པའི་རུ་མཚོན་དང་། །རྩོམ་པའི་སྤྱན་གཟིགས་བརྡ་སྤྲོད་སྲོག་ཆགས་གཟུགས། །འདུལ་བའི་རྒྱན་ཆ་མདོ་དོན་དཀོར་ཆའི་མཛོད། །མངོན་པའི་དགྲ་ཆ་གསང་སྔགས་མཐུན་རྫས་དང་། །ལྟ་སྒོམ་སྤྱོད་པའི་ལོངས་སྤྱོད་ཀུན་ཚང་བའི། །བསྟན་པའི་ལུས་རྫོགས་རྒྱན་པའི་མཆོད་སྤྲིན་འདིས། །བསྟན་བསྲུང་དམ་ཅན་རྒྱ་མཚོ་ཁྱེད་རྣམས་ཀྱི། །ཐུགས་དམ་དབྱིངས་སུ་བསྐང་ངོ་དགྱེས་པར་མཛོད། །དེ་ལྟར་བསྐང་བས་ཉམས་ཆགས་སྒྲིབ་པའི་སྤྲིན། །རང་བཞིན་ཡོངས་ཤེས་མཁའ་ལ་སོར་ཆུད་ནས། །བསྐང་བྱ་སྐོང་བྱེད་གཉིས་སུ་མི་ཕྱེད་པར། །ནང་དུ་བསྙེན་ནས་རྩེ་གཅིག་སྒྲུབ་པ་དང་། །གང་ཤར་འཛིན་མེད་གཏོར་བའི་ལས་སྦྱོར་གྱིས། །དུ་མ་རོ་གཅིག་རྟོགས་པའི་རྩལ་རྫོགས་ཏེ། །སྒོམ་མེད་ཆོས་སྐུའི་རྒྱལ་སར་ཚེ་འདི་གར། །གྲུབ་པར་མཛོད་ཅིག་དམ་ཅན་རྒྱ་མཚོའི་ཚོགས། _{།མཆོད་བསྟོད་བསྡུས་པ་ནི།} ཨོཾ་ཤྲཱི་བཛྲ་དྷརྨ་པཱ་ལ་ས་པཱ་རི་ཝ་རེ་ཨརྒྱུ་_{སོགས་ཀྱིས་མཆོད། བསྟོད་པ་ནི།} །ཆོས་ཀྱི་དབྱིངས་ལས་བདུད་སྡེར་ཁྲོས་པའི་སྐུ། །མཧཱ་ཀཱ་ལ་ཡབ་ཡུམ་སྲས་དང་འཁོར། །དམ་ཅན་རྒྱ་མཚོའི་ཚོགས་བཅས་དཀྱིལ་འཁོར་གྱི། །ལྷ་ཚོགས་ཀུན་ལ་དད་པས་ཕྱག་འཚལ་བསྟོད། _{།ཅེས་ཡི་གེ་བརྒྱ་པ་སོགས་ཀྱིས་ལྷག་ཆད་བསྐངས་ནས།} །འདིར་ནི་གཟུགས་དང་_{སོགས་བརྗོད་ནས། །བདག་བསྐྱེད་བསྡུ་རིམ་ནི།} བདག་ནི་འཁོར་ལོ་སྡོམ་པ་ཡབ་ཡུམ་སྐུ། །དག་པ་གཉིས་ལྡན་ཆོས་སྐུའི་ངོ་བོར་ཐིམ། །དེ་ལས་སྨོན་ལམ་ཐུགས་རྗེའི་རྒྱུ་མཐུན་གྱི། །རོལ་པར་ལངས་ཏེ་གཞན་དོན་སྤྱོད་པར་གྱུར། །དགེ་བ་འདི་ཡིས་མྱུར་དུ་བདག། །ཧེ་རུ་ཀ་དཔལ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ།།དེ་ཡི་ས་ལ་འགོད་པར་ཤོག །ཁྱོད་ལ་མཆོད་བསྟོད་གསོལ་བ་བཏབ་པའི་མཐུས། །བདག་སོགས་གང་དུ་གནས་པའི་ས་ཕྱོགས་སུ། །ནད་གདོན་དབུལ་ཕོངས་འཐབ་རྩོད་ཞི་བ་དང་། །ཆོས་དང་བཀྲ་ཤིས་འཕེལ་བར་མཛད་དུ་གསོལ། _{།སྨོན་ལམ་གྲུབ་རྒྱལ་མ་དང་བཀྲིས་བསྡུས་པ་བཅས་བརྗོད་ནས་མཐའ་བརྒྱན་པར་བྱའོ།།}