གྷི་ནི།

གྷི་ནི།

སའི་རྒྱ་ཚད་དང་ཆགས་རབས། གྷི་ནི་འདི་ ནུབ་ཕྱོགས་ཨཕ་རི་ཀ་ལུ་ཆགས་ཡོད་པའི་རྒྱལ་ཁབ་ཅིག་ཨིནམ་དང་ ནུབ་བྱང་ཁ་ཐུག་ལུ་ གྷི་ནི་བྷི་སཱའུ་དང་ བྱང་ཕྱོགས་ལུ་ སེ་ནི་གྷལ་ བྱང་ཤར་ཁ་ཐུག་ལུ་ མཱ་ལི་ ཤར་ལྷོ་ཁ་ཐུག་ལུ་ ཀོཊ་ཌི་ཝཱ་ ཤར་ལྷོ་ཁ་ཐུག་ལུ་ ལཱའི་བེ་རི་ཡ་ ལྷོ་ཕྱོགས་ལུ་ སི་ར་ལི་འོན་ཚུ་གིས་མཐའ་བསྐོར་ཏེ་ཡོདཔ་ཨིན། རྒྱལ་ཁབ་འདི་གི་ནུབ་ཁ་ཐུག་ལུ་ ཨེཊ་ལཱན་ཊིག་རྒྱ་མཚོ་ཡོདཔ་ཨིན། གྷི་ནི་འདི་ སའི་རྒྱ་ཚད་ ཨིས་ཀོ་ཡར་ཀི་ལོ་མི་ཊར་༢༤༥,༨༥༧ དེ་ཅིག་ ཡོདཔ་ཨིན། གྷི་ནི་འདི་ བདག་སྐྱོང་ལུང་ཕྱོགས་བརྒྱད་ལུ་ཁག་དབྱེ་སྟེ་ཡོདཔ་ཨིན། ལུང་ཕྱོགས་འདི་ཚུ་ དོ་རུང་ མངའ་སྡེ་༣༠ ལྷགཔ་ཅིག་ལུ་ ཁག་དབྱེ་སྟེ་ཡོདཔ་ཨིན། རྒྱལ་ས་ལྟེ་བ་ ཀོ་ན་ཀྲྀ་འདི་ རྒྱལ་ཁབ་ཀྱི་སྲིད་དོན་དང་དཔལ་འབྱོར་ དེ་ལས་ ལམ་སྲོལ་གྱི་ལྟེ་བ་ཅིག་ཨིན། ས་ཆའི་གནས་སྟངས་ཀྱི་ཐད་ལུ་ གྷི་ནི་འདི་ མཚོ་མཐའི་ཐང་དང་ རི་ དེ་ལས་ རྩྭ་ཐང་དང་ ཆར་ལྡན་ནགས་ཚལ་སྟུག་དྲགས་ཚུ་ཡོད་པའི་ རྒྱལ་ཁབ་ཅིག་ཨིན། རྒྱལ་ཁབ་འདི་ནང་ རང་བཞིན་ཐོན་སྐྱེད་ལེ་ཤ་ཡོདཔ་དང་ དམིགས་བསལ་དུ་ བཱའུ་ཟའིཊ་ ཟེར་མི་རྡོ་གཏེར་འདི་ཁྱབ་ཆེ་དྲགས་སྦེ་ཡོདཔ་ཨིན། དེ་ལས་ ཕའུ་ཊ་ཇཱལ་ལོན་ཧའི་ལེནཌ་ཟེར་མི་ གངས་རི་འདི་ཡང་ རྒྱལ་ཁབ་འདི་ནང་ཆགས་ཏེ་ཡོདཔ་ཨིན། རྒྱལ་ཁབ་ཀྱི་གནམ་གཤིས་འདི་ ཊོ་པི་ཀཱལ་གྱི་གནམ་གཤིས་ཟེར་མི་འདི་ཨིནམ་ལས་ སྤྱི་ཟླ་༥ པ་ལས་༡༠ པ་ཚུན་ཚོད་ ཆརཔ་རྐྱབ་དོ་ཡོདཔ་དང་ སྤྱི་ཟླ་༡༡ པ་ལས་༤ པ་ཚུན་ སྐམ་ཀྲོག་ཀྲོ་སྦེ་སྡོད་དོ་ཡོདཔ་ཨིན། གྷི་ནི་ལུ་ སྤྱིར་སྙོམས་དྲོད་ཚད་འདི་ ༢༤°C དང་ ༣༢°C གི་བར་ན་སྡོད་དོ་ཡོདཔ་ཨིན།

མི་རློབས་དང་མི་རིགས།

གྷི་ནི་ལུ་ མི་རློབས་ས་ཡ་༡༤.༥ དེ་ཅིག་ཡོད་པའི་ ཚོད་རྩིས་བཏོན་ཏེ་འདུག། མི་རློབས་འདི་གི་གྲལ་ཁར་ མི་རིགས་མ་འདྲཝ་ལེ་ཤ་ཡོདཔ་ཨིན། དེ་ཡང་ མང་ཤོས་ཅིག་རང་ ཕུ་ལ་ནི་ ཟེར་བའི་མི་རིགས་འདི་ཨིནམ་དང་ མི་རློབས་ཡོངས་བསྡོམས་ལས་ བརྒྱ་ཆ་༤༠ དེ་ཅིག་ ཕུ་ལ་ནི་གི་མི་རིགས་འདི་ཡོདཔ་ཨིན། དེ་ལས་ མཱན་ཌིན་ཀ་ ཟེར་བའི་མི་རིགས་ བརྒྱ་ཆ་༣༠ དེ་ཅིག་ཡོདཔ་དང་ སུ་སུ་ ཟེར་བའི་མི་རིགས་བརྒྱ་ཆ་༢༠ དེ་ཅིག་ཡོདཔ་ཨིན། གཞན་མི་སྡེ་ཚན་ཆུང་ཀུ་ཚུ་ཡང་ ཀེ་པེལ་དང་བཱ་ག་ ལ་སོགས་པའི་མི་རིགས་ཚུ་ཨིན་པས།

ཧེ་མ་ཕྲནས་གི་དབང་འོག་ལུ་སྡོད་པའི་ཤུལ་བཟུང་སྟེ་ ཕེརནཆ་གི་ཁ་སྐད་འདི་ གྷི་ནི་གི་གཞུང་འབྲེལ་ཁ་སྐད་ཨིནམ་སྦེ་ངོས་འཛིན་འབད་དེ་ཡོད་རུང་ ས་གནས་ཀྱི་ཁ་སྐད་གཞན་ཡང་ ལེ་ཤ་ཅིག་རང་ སླབ་སྲོལ་ཡོདཔ་ཨིན། ས་གནས་ཀྱི་ཁ་སྐད་ཁྱབ་ཆེ་དྲགས་ཚུ་ཡང་ ཕུ་ལ་ནི་དང་ མན་ཌིན་ཀ་ དེ་ལས་ སུ་སུ་ཚུ་ཨིན།

གཞུང་སྐྱོང་དང་སྲིད་དོན་ལམ་ལུགས།

གྷི་ནི་འདི་ སྲིད་འཛིན་གྱི་གཞུང་ལུགས་ཡོད་པའི་ མི་སེར་རྒྱལ་ཁབ་ཅིག་ཨིན། གྷི་ནི་གི་སྲིད་འཛིན་འདི་ རྒྱལ་ཁམས་དང་ གཞུང་གཉིས་ཆ་རའི་དབུ་ཁྲིད་ཨིནམ་དང་ ལོ་ལྔ་གི་གནས་ཡུན་གྱི་དོན་ལུ་ བཙག་འཐུ་འབདཝ་ཨིན། གྷི་ནིའི་སྲིད་དོན་ལམ་ལུགས་འདི་ སྲིད་ཚོགས་སྣ་མང་སྦེ་ཡོད་པའི་ལམ་ལུགས་ཨིནམ་དང་ སྲིད་འཛིན་འདི་ མང་མོས་ཀྱི་ཚོགས་རྒྱན་ཐོག་ལས་ བཙག་འཐུ་འབདཝ་ཨིན། ཁྲིམས་བཟོའི་ལྷན་སྡེ་འདི་ ཚོགས་ཁང་གཅིག་རྐྱངམ་གཅིག་ཡོད་པའི་ལམ་ལུགས་འདི་ཨིནམ་དང་ ཚོགས་ཁང་འདི་ལུ་ རྒྱལ་ཡོངས་ཚོགས་འདུ་ ཟེར་སླབ་ཨིན། ཚོགས་ཁང་འདི་ནང་ ལོ་༥ གི་དོན་ལུ་ བཙག་འཐུ་གྲུབ་པའི་ འཐུས་མི་༡༡༤ ཡོདཔ་ཨིན།

སྤྱི་ལོ་༡༩༥༨ ལུ་ གྷི་ནི་འདི་ ཕྲནས་ལས་ རང་དབང་ཐོབ་ཡོདཔ་དང་ དེའི་ཤུལ་ལས་ དབང་ཤུགས་ཅན་གྱི་དབུ་ཁྲིད་དང་ དམག་མི་ཚུ་གིས་བཙན་དབང་གཞུང་བཟུང་ དེ་ལས་ ཞི་བའི་ངོ་རྒོལ་ ལ་སོགས་པའི་ དུས་སྐབས་འཚུབས་དྲགས་ ལེ་ཤ་རང་ཐོན་ཡོདཔ་ཨིན། སྤྱི་ལོ་༢༠༠༨ ལུ་ རྒྱལ་ཁབ་འདི་ དམག་སྡེ་གིས་ བཙན་དབང་གཞུང་བཟུང་འབད་ཞིནམ་ལས་ གནས་སྐབས་ཀྱི་གཞུང་གཞི་བཙུགས་འབད་བའི་ཤུལ་ལས་ རྒྱལ་ཁབ་འདི་ནང་ སྲིད་དོན་གྱི་ལེགས་སྒྱུར་སྦོམ་སྦེ་ར་ བྱུང་ཡོདཔ་ཨིན། དུས་དེ་ལས་ཚུར་ གྷི་ནི་གིས་ དམངས་གཙོའི་རིང་ལུགས་ལུ་ གོམ་པ་མདུན་དུ་སྤོ་སྟེ་ཡོད་རུང་ གཞུང་སྐྱོང་སྒྲིང་སྒྲིང་མེད་མི་དང་ངན་ལྷད་ དེ་ལས་ སྲིད་དོན་ལམ་ལུགས་བརྟན་ཏོག་ཏོ་མེད་པའི་ གདོང་ལེན་ཚུ་ ད་ལྟོའི་བར་ན་ཡང་ འབྱུང་དོ་ཡོདཔ་ཨིན།

ལམ་སྲོལ་དང་ཆོས་ལུགས།

གྷི་ནི་ལུ་ མི་རིགས་མ་འདྲཝ་ལེ་ཤ་ཡོདཔ་ལས་ སྡེ་ཚན་རེ་རེ་ལུ་ རང་སོའི་ལམ་སྲོལ་དང་སྒྱུ་རྩལ་ དེ་ལས་ སྙན་ཆ་དང་ བཞེས་སྒོ་ཚུ་མ་འདྲཝ་སྦེ་ཡོདཔ་ལས་ རྒྱལ་ཁབ་འདིའི་ལམ་སྲོལ་ཡང་ལེ་ཤ་ཡོདཔ་ཨིན། རྒྱལ་ཁབ་ཀྱི་ལམ་སྲོལ་ཚུ་གི་གྲལ་ལས་ རང་ལུགས་ཀྱི་སྙན་ཆ་དང་ཞབས་ཁྲ་ཚུ་ཁག་ཆེ་བའི་ལམ་སྲོལ་སྦེ་བརྩི་དོ་ཡོདཔ་དང་ རྔ་གི་སྒྲ་དབྱངས་འདི་ མཛད་སྒོའི་ལས་རིམ་ཚུ་ནང་ གལ་ཆེ་ཤོས་ཅིག་ཨིན། དེ་མ་ཚད་ གྷི་ནི་ལུ་ ངག་ཐོག་ལས་སྲུང་གཏང་ནི་གི་ལམ་སྲོལ་ཡང་ མ་ཉམས་པར་ དར་ཁྱབ་ཆེ་ཏོག་ཏོ་སྦེ་ཡོདཔ་ཨིན།

གྷི་ནི་གི་མི་ཚུ་གི་དོན་ལུ་ ཆོས་ལུགས་འདི་ ཁག་ཆེ་ཤོས་ཅིག་ཨིནམ་དང་ ཁ་ཆེའི་ཆོས་ལུགས་འདི་ རྒྱལ་ཁབ་འདིའི་ཆོས་ལུགས་གཙོ་བོ་ཅིག་ཨིན། མི་རློབས་བརྒྱ་ཆ་༨༥ དེ་ཅིག་གིས་ ཁ་ཆེའི་ཆོས་ལུགས་ལུ་དད་པ་བསྐྱེད་དོ་ཡོདཔ་དང་ མང་ཤོས་ཅིག་གིས་རང་ སུ་ནི་ཨིསི་ལཱམ་ཟེར་མི་ ཁ་ཆེའི་ཆོས་ལུགས་འདི་ བསྟེན་དོ་ཡོདཔ་ཨིན། དེ་མ་ཚད་ ཡེ་ཤུའི་ཆོས་ལུགས་འཛིན་མི་ཡང་ བརྒྱ་ཆ་༨ དེ་ཅིག་ཡོདཔ་དང་ འདི་ཡང་ ངོ་མ་རང་ རོ་མཱན་ཀེ་ཐོ་ལིག་གི་ཡེ་ཤུ་པ་ཚུ་ཨིན་པས། དེ་གུ་ ཨཕ་རི་ཀའི་ཡུལ་བྱུང་གི་ཆོས་ལུགས་འཛིན་མི་ཡང་ སྡེ་ཚན་ཆུང་ཀུ་རེ་ཡོདཔ་ཨིན།

གྷི་ནི་ལུ་ ལམ་སྲོལ་དང་ཆོས་དོན་གྱི་དུས་སྟོན་ལེ་ཤ་ཅིག་རང་བརྩི་སྲུང་འབད་དོ་ཡོདཔ་དང་ འདི་གི་ནང་ལས་ ཡོངས་གྲགས་ཅན་འདི་ ཏ་བསི་ཀི་ དང་ ར་མ་དཱན་ དེ་ལས་ ཡེ་ཤུའི་འཁྲུངས་སྐར་ཚུ་ཨིན། དེ་མ་ཚད་ རྒྱལ་ཁབ་ནང་ རང་ལུགས་ཀྱི་ལས་རིམ་ དཔེར་ན་ ངོ་ ཟེར་མིའི་དུས་སྟོན་ལ་སོགས་པ་ཚུ་ བརྩི་སྲུང་འབད་དོ་ཡོདཔ་དང་ དུས་སྟོན་འདི་གི་ཐོག་ལས་ མཱན་དིང་གི་ཁ་སྐད་སླབ་མི་ཚུ་གི་ནང་འཁོད་ལུ་ ངོ་ གི་གསལ་བྱེད་ཡི་གུ་ལག་ལེན་འཐབ་ནི་དེ་ དར་ཁྱབ་བཏང་དོ་ཡོདཔ་ཨིན།

དཔལ་འབྱོར་དང་ཚོང་འབྲེལ།

གྷི་ནིའི་དཔལ་འབྱོར་འདི་ གཙོ་བོ་རང་ སོ་ནམ་དང་ ས་གཏེར་ དེ་ལས་ ཞབས་ཏོག་ཚུ་ལུ་བརྟེན་པའི་དཔལ་འབྱོར་ཅིག་ཨིན། རྒྱལ་ཁབ་འདི་ འཛམ་གླིང་ནང་ བཱའུ་ཟའིཊ་ཟེར་བའི་རྡོ་འདི་ཐོན་སྐྱེད་འབད་སའི་ རྒྱལ་ཁབ་སྦོམ་ཤོས་ཅིག་ཨིནམ་དང་ རྡོ་འདི་ ཧ་ཡང་བཟོ་སྐྲུན་འབད་ནི་གི་དོན་ལུ་ ལག་ལེན་འཐབ་དོ་ཡོདཔ་ཨིན། དོ་རུང་ རྒྱལ་ཁབ་འདི་ནང་ གསེར་དང་ རྡོ་རྗེ་ཕ་ལམ་ དེ་ལས་ ལྕགས་རིགས་ཚུ་ཡང་ འབོལ་དྲགས་སྦེ་ཡོདཔ་ཨིན། དེ་འབདཝ་ལས་ རྒྱལ་ཁབ་ཀྱི་ཕྱིར་ཚོང་ལས་བརྟེན་པའི་འོང་འབབ་ཀྱི་ཆ་ཤས་སྦོམ་ཤོས་གཅིག་ ས་གཏེར་གྱིས་བཟོ་དོ་ཡོདཔ་ཨིན། དེ་ལས་ སོ་ནམ་གྱི་ལཱ་འདི་ཡང་ ཁོང་གི་དཔལ་འབྱོར་གྱི་དོན་ལུ་ མེད་ཐབས་མེདཔ་ཅིག་ཨིནམ་དང་ ཆུམ་དང་ གེ་ཟ་ ཀེ་བ་ དེ་ལས་ བ་དམ་ཚུ་ ཐོན་སྐྱེད་གཙོ་བོ་ཨིན།

འདས་པའི་ལོ་ཚུ་ནང་ གྷི་ནི་གིས་ ཁོང་རའི་དཔལ་འབྱོར་ཡར་དྲག་གཏང་ནིའི་དོན་ལུ་ གཞི་རྟེན་མཐུན་རྐྱེན་ཚུ་ གོང་འཕེལ་བཏང་ནི་ལུ་ གཙོ་བོར་བཏོན་ཡོདཔ་ཨིན། ཨིན་རུང་ རྒྱལ་ཁབ་ནང་ ད་ལྟོ་ཡང་ དབུལ་ཕོངས་ཀྱི་གནས་ཚད་མཐོ་དྲགས་སྦེ་ཡོད་མི་དང་ གཞི་རྟེན་མཐུན་རྐྱེན་ལངམ་སྦེ་མེད་མི་ དེ་ལས་ གཞུང་སྐྱོང་དང་ ཆབ་སྲིད་བརྟན་ཏོག་ཏོ་མེད་མི་ ལ་སོགས་པའི་གདོང་ལེན་ཚུ་ ལེ་ཤ་ར་བྱུང་དོ་ཡོདཔ་ཨིན། བརྒྱུད་འཕྲིན་དང་ དངུལ་ཁང་ དེ་ལས་ བལྟ་བཤལ་ལས་སྡེ་ལ་སོགས་པའི་ ཞབས་ཏོག་ལས་སྡེ་ཚུ་ཡང་ ཡར་འཕར་འགྱོ་དོ་ཡོད་རུང་ སོ་ནམ་དང་ ས་གཏེར་གྱི་ལཱ་ཚུ་དང་ཕྱདཔ་ད་ གོང་འཕེལ་མ་འགྱོ་བར་ ལུས་ཏེ་ཡོདཔ་ཨིན།

རྒྱལ་ས་ལྟེ་བ་ ཀོ་ན་ཀྲྀ།

གྷི་ནི་གི་རྒྱལ་ས་ལྟེ་བ་དང་ ཁྲོམ་ཚོགས་སྦོམ་ཤོས་ ཀོ་ན་ཀྲྀ་འདི་ ཨེཊ་ལཱན་ཊིག་རྒྱ་མཚོའི་མཐའ་མར་ ཀ་ལུམ་པེ་ནིན་སུ་ལ་ ཟེར་བའི་ཕྱོགས་གསུམ་ཆུ་གླིང་ནང་ ཆགས་ཡོདཔ་ཨིན། རྒྱལ་ཁབ་ཀྱི་སྲིད་དོན་དང་དཔལ་འབྱོར་ དེ་ལས་ ལམ་སྲོལ་གྱི་ལྟེ་བ་ཅིག་འབདཝ་ལས་ ཀོ་ན་ཀྲྀ་གིས་ གྷི་ནིའི་གོང་འཕེལ་ནང་ རྒྱབ་སྐྱོར་སྦོམ་སྦེ་འབདཝ་ཨིན། ཁྲོམ་འདི་ནང་ མི་རློབས་ས་ཡ་༢ ལྷགཔ་ཅིག་ཡོདཔ་ལས་ གྷི་ནི་གི་མི་རློབས་ཡོངས་བསྡོམས་ལས་ བརྒྱ་ཆ་༡༥ དེ་ཅིག་ ཁྲོམ་འདི་ནང་སྡོད་དོ་ཡོདཔ་ཨིན། ཀོ་ན་ཀྲྀ་གི་གནམ་གཤིས་འདི་ སྤྱི་ཟླ་༥ པ་ལས་༡༠ པ་ཚུན་ཚོད་ ཆརཔ་རྐྱབ་པའི་དུས་ཚོད་དང་ སྤྱི་ཟླ་༡༡ པ་ལས་༤ པ་ཚུན་ཚོད་ སྐམ་ཀྲོག་ཀྲོ་སྦེ་སྡོད་པའི་དུས་ཚོད་ཨིན། སྤྱིར་བཏང་ལུ་ ལོ་བསྟར་བཞིན་དུ་ དྲོད་ཚད་༢༤°C ལས་༣༠°C ཚུན་གྱི་བར་ན་སྡོད་དོ་ཡོདཔ་ཨིན།

ཀོ་ན་ཀྲྀ་འདི་ གྷི་ནིི་གི་མི་རིགས་མ་འདྲཝ་ཚུ་འཁྱམས་སའི་ས་ཁོངས་ཅིག་ཨིན། ཁྲོམ་ཚོགས་འདི་ནང་ལུ་ མི་རིགས་ཁྱབ་ཆེ་ཤོས་འདི་ ཕུ་ལ་ནི་དང་ མཱན་ཌིན་ཀ་ དེ་ལས་སུ་སུ་ཚུ་ཨིན་རུང་ མི་རིགས་མ་འདྲཝ་གཞན་ཚུ་ཡང་ཡོདཔ་ལས་ ཁྲོམ་ཚོགས་འདི་ ལམ་སྲོལ་གྱི་ཐད་ཁར་ཕྱུགཔོ་ཅིག་ཨིན། ཕེརནཆ་འདི་གཞུང་འབྲེལ་གྱི་ཁ་སྐད་ཨིན་རུང་ ས་གནས་ཀྱི་ཁ་སྐད་སུ་སུ་དང་ཕུ་ལ་ནི་ ལ་སོགས་པའི་ཁ་སྐད་ཡང་ ཁྱབ་ཆེཝ་སྦེ་སླབ་དོ་ཡོདཔ་ཨིན། འདས་པའི་ལོ་ཚུ་ནང་ ཁྲོམ་ཚོགས་ཀྱི་མི་རློབས་འདི་ ཡར་སེང་འགྱོ་སྟེ་ཡོད་མི་འདི་ཡང་ གྲོང་གསེབ་ལས་ཁྲོམ་ཁར་གནས་སྤོ་སྟེ་འོང་མི་དང་ ཁྱིམ་ཚང་རྒྱལ་ཁབ་ཀྱི་མི་ཚུ་ དཔལ་འབྱོར་གྱི་གོ་སྐབས་ལེགས་ཤོམ་འཚོལ་ནིའི་དོན་ལུ་ ཀོ་ན་ཀྲྀ་ལུ་གནས་སྤོ་སྟེ་འོང་མི་འདི་གིས་ཨིན་པས།

ཀོ་ན་ཀྲྀ་གི་དཔལ་འབྱོར་འདི་ གཙོ་བོ་རང་ གྷི་ནི་གི་ས་གཏེར་ཐོན་སྐྱེད་ བཱའུ་ཟའིཊ་དང་གསེར་ དེ་ལས་ ལྕགས་རིགས་ཚུ་ ཕྱིར་ཚོང་འབད་སའི་ས་གོ་གཙོ་བོ་ཅིག་ཨིན་མི་ གྲུ་ཆགས་ས་འདི་ལུ་བརྟེན་དོ་ཡོདཔ་ཨིན། དོ་རུང་ སོ་ནམ་དང་བཟོ་གྲྭ་ཚུ་གིས་ ཁྲོམ་སྡེའི་དཔལ་འབྱོར་གྱི་ལཱ་ཚུ་ལུ་ ཕན་ཐོགས་བྱུང་དོ་ཡོདཔ་ཨིན། དཔལ་འབྱོར་གྱི་ལྟེ་བ་ཅིག་ཨིན་རུང་ ཀོ་ན་ཀྲྀ་ལུ་ ལཱ་གཡོག་མེད་མི་དང་ དབུལ་ཕོངས་གནས་ཚད་ཡར་སེང་འགྱོ་མི་ ལ་སོགས་པའི་ གདོང་ལེན་ཚུ་འབྱུང་དོ་ཡོདཔ་ཨིན། མི་རློབས་ཡར་སེང་མགྱོགས་དྲགས་སྦེ་འགྱོ་མི་ལས་བརྟེན་ ལམ་དང་མི་མང་ཞབས་ཏོག་ ལ་སོགས་པའི་ ཁྲོམ་གྱི་གཞི་རྟེན་མཐུན་རྐྱེན་ཚུ་ལུ་ཡང་ བྱེམ་ཕོག་དོ་ཡོདཔ་དང་ ཕྱགས་སྙིགས་འཛིན་སྐྱོང་དང་ ཆུ་དང་གློག་མེ་བཀྲམ་སྤེལ་དང་འབྲེལ་བའི་དཀའ་ངལ་ཚུ་ཡང་ ཐོན་དོ་ཡོདཔ་ཨིན།

ཀོ་ན་ཀྲྀ་ལུ་ ལམ་སྲོལ་ཡང་ སྣ་མང་སྦེ་ཡོདཔ་ཨིན། དེ་ཡང་ རང་ལུགས་གྷི་ནི་གྱི་སྒྲ་དབྱངས་དང་ རེ་གེ་ དེ་ལས་ ཇེ་ཟི་ཚུ་ སླ་བསྲེ་རྐྱབ་སྟེ་བཟོ་བའི་ གཞན་དང་མ་འདྲ་བའི་ སྙན་ཆའི་མཐོང་སྣང་ཚུ་ ཡོངས་གྲགས་ཡོདཔ་ཨིན། ཁྲོམ་སྡེ་འདི་ནང་ལུ་ གྷི་ནི་གི་རང་དབང་ཐོབ་པའི་དུས་སྟོན་བརྩི་སྲུང་འབད་མི་ ཕི་ཊི་དྲུ་ཊུ་ཨོཀ་ཊོ་བཱར་ ལ་སོགས་པའི་ དུས་སྟོན་ལེ་ཤ་ཅིག་འགོ་འདྲེན་འཐབ་དོ་ཡོདཔ་མ་ཚད་ རྒྱལ་ཁབ་ཀྱི་སྒྱུ་རྩལ་གྱི་སྲོལ་རྒྱུན་མ་འདྲཝ་ཚུ་གསལ་སྟོན་འབད་མི་ སྙན་ཆའི་དུས་སྟོན་མ་འདྲཝ་ཚུ་ཡང་ འགོ་འདྲེན་འཐབ་དོ་ཡོདཔ་ཨིན། དེ་ལས་ ཀོ་ན་ཀྲྀ་ལུ་ གྷི་ནི་རྒྱལ་ཡོངས་འགྲེམས་སྟོན་ཁང་ ལ་སོགས་པའི་ ལམ་སྲོལ་གྱི་གཙུག་སྡེ་ཡང་ལེ་ཤ་རང་ཡོདཔ་ལས་ བལྟ་བཤལཔ་ཚུ་གིས་ རྒྱལ་ཁབ་ཀྱི་ རྒྱལ་རབས་དང་ལམ་སྲོལ་ཚུ་ བལྟ་ཚུགས་དོ་ཡོདཔ་ཨིན།

ཀོ་ན་ཀྲྀ་ལུ་ ལྟ་བཤལ་གྱི་ལས་སྡེ་འདི་ གོང་འཕེལ་འགྱོ་བའི་བསྒང་ཨིན་རུང་ ཁྲོམ་འདི་ནང་ ལྟ་བཤལ་པ་ཚུ་བཀུག་ཚུགས་པའི་ མཐོང་སྣང་ལེ་ཤ་ཅིག་རང་ཡོདཔ་ཨིན། མཚོ་འགྲམ་གྱི་ཉེ་འདབས་ལུ་ཡོད་པའི་ ཨི་ལིསི་ཌི་ལོསི་ཟེར་མི་འདི་ཁར་ མཚོ་འགྲམ་མཛེས་ཏོག་ཏོ་དང་ རང་བཞིན་གྱི་ས་ཆའི་གནས་སྟངས་འཇའ་ཆི་ཆི་ཚུ་མཐོང་ཚུགས་དོ་ཡོདཔཨིན། རྒྱལ་ཁབ་ཀྱི་རྒྱལ་ས་ལྟེ་བ་ཅིག་འབདཝ་ལས་ ཀོ་ན་ཀྲྀ་འདི་ དཔལ་འབྱོར་གྱི་ལྟེ་བ་དང་ ནུབ་ཕྱོགས་ཨཕ་རི་ཀ་གི་ལམ་སྲོལ་གྱི་ལྟེ་བ་ཅིག་སྦེ་ གནས་བཞིན་དུ་ར་ཡོདཔ་ཨིན།

རྒྱབ་རྟེན་དཔེ་ཐོ།

CIA World Factbook. (2023). Guinea. Central Intelligence Agency. Retrieved from https://www.cia.gov/the-world-factbook/countries/guinea/
Guinea Government. (2023). Official Government Website. Retrieved from http://www.gouvernement.gov.gn
Climate Data. (2023). Climate of Guinea. Climate-Data.org. Retrieved from https://en.climate-data.org/africa/guinea-195/
World Bank. (2023). Guinea Population. Retrieved from https://data.worldbank.org/country/guinea
Guinea National Institute of Statistics. (2023). Population and Ethnicity Data. Retrieved from http://www.stat-guinee.org
Ethnologue. (2023). Languages of Guinea. Retrieved from https://www.ethnologue.com/country/GN
BBC News. (2023). Guinea: Political History. BBC News. Retrieved from https://www.bbc.com/news/world-africa-13744025
Cultural Survival. (2023). Guinea’s Cultural Heritage. Cultural Survival. Retrieved from https://www.culturalsurvival.org
Pew Research Center. (2023). Religion in Guinea. Pew Research Center. Retrieved from https://www.pewresearch.org
Guinea Cultural Events. (2023). Festivals and Celebrations in Guinea. Retrieved from https://www.guineaculture.com
World Bank. (2023). Guinea's Economic Overview. World Bank. Retrieved from https://www.worldbank.org/en/country/guinea
International Monetary Fund. (2023). Guinea’s Mining Sector. International Monetary Fund. Retrieved from https://www.imf.org

OECD. (2023). Economic Report: Guinea. Organization for Economic Cooperation and Development. Retrieved from https://www.oecd.org