ཆོས་སྐྱོང་སྤྱིའི་བཤགས་པ།

༈ །ཆོས་སྲུང་སྤྱིའི་བཤགས་པ་བཞུགས་སོ།།

༈ ཀ་ཡེ་དམ་ཅན་རྒྱ་མཚོའི་ཚོགས་རྣམས་དགོངས། །ཁ་ན་མ་ཐོའི་ལས་ཀྱིས་དབང་སོང་ནས། །ག་ནའང་བག་མེད་སྤྱོད་པའི་དུས་འདའ་བས། །ང་ཚོའི་གསང་སྔགས་དམ་ཚིག་ཉམས་པ་ཀུན། །ཅ་རེ་ཆོས་ཉིད་ཀློང་དུ་བཤགས་པར་བགྱི། །ཆ་མེད་དབྱིངས་ལ་རྣམ་རྟོག་མི་མངའ་ཡང་། །ཇ་ཆང་རྨད་རག་ལ་དགྱེས་འཁོར་ཚོགས་ལ། །ཉ་སྟོང་དུ་དྲུག་མཆོད་གཏོར་ཆག་པ་དང་། །ཏ་ན་གཱ་ནའི་སྦྱོར་སྒྲོལ་ལས་མཐའ་ལོག། །ཐ་མལ་པ་ལ་གསང་སྒོ་འཆོལ་ལ་སོགས། །ད་དུང་ཁྱེད་རྣམས་ཐུགས་དང་འགལ་བའི་ལས། །ན་རག་རྒྱུ་བསགས་ཐམས་ཅད་མཐོལ་ལོ་བཤགས། །པཱ་ལ་འདུ་བའི་རྟེན་རྫས་མ་ཚོགས་ཤིང་། །ཕ་རོལ་དམ་ཉམས་རྣམས་དང་ཚོགས་བསྐང་བསྲེས། །བ་གླང་བཞིན་དུ་གྲིབ་ལ་འཛེམས་མ་ཤེས། །མ་རིག་རྨོངས་པས་ཏིང་འཛིན་མི་གསལ་ཞིང་། །ཙ་ཀྲའི་ཚོགས་འབྱོར་ཆུང་ཞིང་ཕུད་ཉམས་ལ། །ཚ་བས་གཟིར་བའི་ཆོ་ག་ལྷག་ཆད་གྱུར། །ཛ་ཡའི་བསྟན་བསྲུང་རྒྱ་མཚོ་ཁྱེད་རྣམས་ཀྱི། །ཝ་ལེར་ཐུགས་དང་འགལ་བའི་ལས་རྣམས་ལ། །ཞྭ་ལྟར་སྤྱོད་པས་བཀའ་ལས་འདས་གྱུར་པས། །ཟ་བྱེད་འཁོར་ཚོགས་རྒྱ་མཚོ་ཆེར་ཁྲོས་ཏེ། །འ་ཅག་ཆད་པའི་གནས་སུ་གྱུར་ལགས་ན། །ཡ་མཚན་ཐུགས་རྗེ་ཅན་ལ་བཟོད་པར་གསོལ། །རྭ་བཞིན་གྱོང་པོའི་ལས་ཅན་སྡིག་ལྟུང་རྣམས། །ལ་འུར་དག་པར་མཛོད་ཅིག་ཐུགས་དམ་ཅན། །ཤ་ཟ་ཁྲག་འཐུང་དྲེགས་པའི་ཚུལ་སྟོན་ཀྱང་། །ས་ལམ་མཐར་ཕྱིན་གདོད་ནས་བྱང་ཆུབ་པས། །ཧ་ཅང་གདུང་བའི་དད་ཅན་བདག་ཅག་ལ། །ཨ་ལ་ལ་ཧོ་སྒྲིབ་མེད་ཚངས་པ་སྩོལ། །ཅེས་པའང་དགེ་རིན་པས་སོ།། །།ཨོཾ་ཤྲཱི་ཧེ་རུ་ཀ་སཏཱ་ས་མ་ཡ་སོགས་ཧེ་རུ་ཀའི་ཡིག་བརྒྱ་དང་། །བདག་གཞན་ལུས་ཀྱི་ལས་ནི་རྣམ་པ་གསུམ།། _{སོགས་བརྗོད་པར་བྱའོ། །}