དབུ་ཞ་བྱ་རོག་གདོང་ཅན།
འཛམ་གླིང་རྒྱལ་ཁབ་ནང་ རྒྱལ་ཁབ་རང་སོའི་རྒྱལ་པོ་ཚུ་ལུ་ རྒྱལ་རྟགས་ཀྱི་དབུ་ཞྭ་རེ་ག་ཏེ་ཡང་ ཡོདཔ་བཞིན་དུ འབྲུག་རྒྱལ་ཁབ་ཀྱི་སྤྱི་ནོར་དམ་པ་མི་དབང་རིམ་བྱོད་གྱིས་བཞེས་མི་དབུ་ཞྭ་བྱ་རོག་གདོང་ཅན་གྱི་རྣམ་བཤད་མདོར་བསྡུས་ཅིག་ཞུ་བ་ཅིན།
དབུ་ཞྭ་བྱ་རོག་གདོང་ཅན་གྱི་འབྱུང་ཁུངས་དེ་ ཀྲོང་གསར་དཔོན་སློབ་འཇིགས་མེད་རྣམ་རྒྱལ་གྱིས་ དཔོན་སློབ་ཟུར་པ་ཧྱོན་ཕུན་ཚོགས་ཀྱི་སྲསམོ་པདྨ་ཆོས་སྐྱིད་དེ་ལྕམ་འབད་བཞེས་ཏེ་བཞུགས་ཡོད་རུང་ ཆོས་རྩེ་དཔོན་སློབ་དེ་འབྲུག་ཤར་ཕྱོགས་ཀྱི་འབངས་མི་སེར་ཡོངས་ཀྲི་སྤྱི་བླ་ཨིནམ་ལས་ སྔོན་མ་ཆོས་རྒྱལ་མི་འགྱུར་བརྟན་པ་ལ་སོགས་པ་ནོ་ཚུ་ག་ར་རྟེན་རབ་འབྱུང་ཨིནམ་ལས་ འཇིགས་མེད་རྣམ་རྒྱལ་གྱིས་ ཁོ་ཡང་ཨམ་སྲུ་དེ་བཀོག་བཞག་སྟེ་ རབ་བྱུང་འབད་བཞུགས་པ་ཅིན་གང་འཚམས་ཟེར་ཞུཝ་ད།
སྐཡབས་རྗེ་བྱང་ཆུབ་བརྩོན་འགྲུས་ཀྱིས་ཨམ་སྲུ་འདི་ ལས་སྨོན་མཐུན་པའི་གྲོགས་ཨིནམ་ལས་བཀོག་མ་བཞག སྲས་ལེགས་ཤོམ་ཅིག་འཁྲུངས་ཞིནམ་ལས་ འབྲུག་རྒཡལ་ཁབ་ལུ་ཕན་ཐོགས་འོང་ཟེར་གསུགས་པའི་ཁར་ མ་གཞི་ཞབས་བརྟན་འདི་སློབ་མ་གིས་བླམ་ལུ་ཕུལཝ་ཨིན་རུང་ ད་རེས་མཆོད་གནས་ཀྱིས་སྦྱིན་བདག་ལུ་ཕུལ་དགོས་ཟེར་གསུངས་ཏེ་ འཇིགས་བྱེད་ལུ་བརྟེན་པའི་བྱེད་གྲོལ་དང་ བརྟན་བཞུགས་ཕུལ་གནངམ་མ་ཚད་ མགོན་པོ་བྱང་བདུད་དང་ལས་མགོན་བྱ་རོག་གདོང་ཅན་དབྱེ་བ་མེད་པའི་དགྲ་ལྷའི་རྟེན་འཛུགས་བཙུགས་སྦེ་བྱ་རོག་གི་དབུ་ཞྭ་དེ་ བྱིན་གྱིས་བརླབས་སྦེ་གནང་ནུག། ཤུལ་ལས་ཕྱོགས་གཞན་གྱི་མི་གཅིག་ཞབས་སར་ལྷོད་འོང་ དེ་བདག་འཛིན་འབད་དེ་བཞག་པ་ཅིན་ ཁྱོད་ར་ལུ་ཕན་སྦོམ་ཐོགས་ཟེར་མ་འོངས་ལུང་བསྟན་ཡང་གསུངས་གནང་ནུག།
ཤུལ་ལས་ཤར་ཕྱོགས་གདུང་སམ་ཕྱོགས་ལུ་ ཆོས་རྩེའི་དཔོན་སློབ་འཇིགས་འེད་རྣམ་རྒྱལ་དང་ བྱ་དཀར་དཔོན་སློབ་བརྩོན་འགྲུས་རྒྱལ་མཚན་ བླ་མའི་གཟིམ་དཔོན་བསོད་ནམས་དོན་གྲུབ་གསུམ་གྱིས་ དམག་ཁྱད་དེ་བྱོན་པའི་བསྒང་ དཔོན་སློབ་འཇིགས་མེད་རྣམ་རྒྱལ་གྱིས་ དབུ་ཞྭ་བྱ་རོག་གདོང་ཅན་དེ་བཞེས་ཏེ་ ཆོས་རྩེ་ཟེར་ཀྲོང་གསར་རྫོང་ནང་གི་ ལྷ་ཁང་དང་མགོན་ཁང་ཡོད་ཚད་ཅིགཔ་ལུ་གསོལ་ཁ་དང་སྙན་དར་ཕུལ་སྦེ་བྱོན་པའི་སྐབས་འཇིགས་མེད་རྣམ་རྒྱལ་གྱིས་ རྩིས་པའི་སློབ་དཔོན་དང་འབྲེལ་སྲུང་འཁོར་པ་འཁྱིད་དེ་བྱོནམ་ད་ ལམ་བར་ན་ཡང་ལྷ་ཁང་ཡོད་ཚད་ཅིགཔོ་ལུ་ཕྱག་དང་མཆོད་པ་དང་སྙན་དར་ཕུལ་སྦེ་ལས་མགོན་བྱ་རོག་གདོང་ཅན་དང་ མགོན་པོ་བྱང་བདུད་ཀྱི་གསོལ་ཁ་མ་ཆད་པར་ཕུལ་ཏེ་བྱོན་སྦེ་གདུང་བསམ་ཁ་ལུ་ཕེབས་ནུག།
སྔོན་མ་བླ་མ་བྱང་ཆུབ་བརྩོན་འགྲུས་ཀྱིས་ལུང་བསྟན་གནང་མི་ པ་ཆ་ར་ཛཱ་ཟེར་མི་དེ་ ཕྱི་གླིང་པའི་དམག་མིའི་ཁྲིམས་འོག་ལས་བྱོག་ཐལ་ཏེ་ རྐྱང་འཁྱམས་འོང་མི་དེ་ཡང་ ཕྱག་ཞུ་ཏེ་ཡོད་མི་དེ་གིས་ ཕྱི་གླིང་པའི་དམག་དཔོན་སྦོམ་ཤོས་དེ་ངོ་སྦྲགས་བྱིནམ་བཞིན་དུ་ སྲུང་འཁོར་པ་གིས་སྐྱབས་རྗེ་བྱང་ཆུབ་བརྩོན་འགྲུས་ཀྱིས་གནང་མི་དགྲ་ལྷ་མགོན་པོ་བྱང་འདུད་དང་ལས་མགོན་བྱ་རོག་གདོང་ཅན་གྱི་ གསོལ་ཁ་གནང་བའི་བསྐུལ་ཚིག་དང་བསྟུན་ཏེ་ ཆོས་རྩེ་དཔོན་སློབ་འཇིགས་མེད་རྣམ་རྒྱལ་གྱིས་ བསྟན་པ་དང་འགྲོ་བ་སེམས་ཅན་གྱི་དོན་ལུ་ ཐུགས་སྨོན་གང་ཟབ་ཀྱི་དམིགས་པ་ རྩེ་གཅིག་ཁར་བསྐྱེད་ཐོག་མེ་མདའ་རྐྱབ་པའི་བསྒང་ ལྷ་སྲུང་གི་བདེན་པའི་མཐུ་ལས་ དམག་དཔོན་དེ་བསད་དེ་ འཇིགས་མེད་རྣམ་རྒྱལ་གྱིས་རྒྱལ་ཁ་ཐོབ་ནུག། རྟན་འབྲེལ་དེ་གིས་འབད་ ད་རེས་འབྲུག་བརྒྱུད་འཛིན་གྱི་རྒྱལ་པོ་རིམ་བྱོན་ཚུ་གིས་ བྱ་རོག་གདོང་ཅན་གྱི་དབུ་ཞྭ་དེ་བཞོས་དགོས་པའི་ཁུངས་འདི་ལས་བརྟེན་ ཨིན་པས།
ཁུངས་འདི་རྒྱལ་ཡོངས་དཔེ་མཛོད་མདོ་ཆེན་འགྲེས་པ་ སློབ་དཔོན་པདྨ་ལ་མཆོག་གིས་མཛད་པའི་རྒྱལ་རབས་ནང་ལས་བཏོན་ཏེ་རྫོང་ཁའི་ཐོག་འགྲེལ་བཤད་རྐྱབ་སྟེ་ ཉེར་མཁོའི་རྣམ་བཤད་སྣང་བ་གསར་པ་ཟེར་བའིkMTགྱིས་དཔར་བསྐྲུནའབད་མི་དེབ་ནང་ལས་བཏོན་སྟེ་ཡོངས་འབྲེལ་ནང་བཙུགས་ཡོད།[༡]
- ↑ ཉེར་མཁོའི་རྣམ་བཤད་སྣང་བ་གསར་པ་བཞུགས། ISBN-99936-10-08-9