དམ་ཅན་ཆོས་སྐྱོང་སྤྱིའི་གཉེར་གསོལ།

༈ དམ་ཅན་ཆོས་སྐྱོང་སྤྱིའི་གཉེར་གསོལ་ནི།

ཀྱེེ༑ དཔལ་རྡོ་རྗེ་ཆོས་སྐྱོང་བའི་སྲུང་མ་ཆོས་ནོར་གཏེར་གྱི་བདག་པོ། རྒྱལ་ཆེན་རྣམ་མང་ཐོས་སྲས། བཀྲ་ཤིས་ཚེ་རིང་མཆེད་ལྔ། སྨན་བཙུན་རྡོ་རྗེ་གཡུ་སྒྲོན། ཆོས་སྐྱོང་རྒྱལ་ཆེན་སྐུ་ལྔ། དམ་ཅན་གཤན་པ་དམར་ནག་ལ་སོགས་པ་དཔལ་ལྡན་འབྲུག་པའི་བཀའ་བསྲུང་། རྣལ་འབྱོར་བདག་གི་དཔུང་གཉེན་མངོན་ཤེས་རྫུ་འཕྲུལ་གྱི་མཐུ་དང་ལྡན་པ་ཐམས་ཅད་བདག་ལ་དགོངས་སུ་གསོལ། དེང་འདིར་རྣལ་འབྱོར་པ་བདག་ཅག་གི་ཆོས་སྐྱོང་སྲུང་མ་ཁྱེད་རྣམས་ལ་གཉེར་དུ་གཏད་པ་ནི་འདི་ལྟ་སྟེ། སྤྱིར་ཀུན་མཁྱེན་རྒྱལ་བའི་ལུང་རྟོགས་ཀྱི་བསྟན་པ་རིན་པོ་ཆེ་དང་ཁྱད་པར་དཔལ་ལྡན་འབྲུག་པའི་བཤད་སྒྲུབ་ཀྱི་བསྟན་པ་ལ་གནོད་པར་རྩོམ་པའི་དགྲ་དང་བགེགས་ཀྱི་རིགས་སུ་གཏོགས་པ་ཐམས་ཅད་མངོན་སྤྱོད་དྲག་པོའི་ལས་ཀྱིས་ཚར་གཅོད་པ་དང་། དེ་འཛིན་གྱི་སྐྱེས་བུ་དམ་པ་རྣམས་ཀྱི་སྐུ་ཚེ་དང་འཕྲིན་ལས་སྤེལ། འཇིག་རྟེན་གྱི་ཁམས་ཀུན་ཏུ་ནད་མུག་འཁྲུགས་རྩོད་སོགས་མི་མཐུན་པའི་ངན་དགུ་མཐའ་དག་དབྱིངས་སུ་སེལ། ལྷག་པར་བདག་ཅག་འཁོར་དང་བཅས་པ་རྣམས་ལ་ལུས་དང་གྲིབ་མ་བཞིན་དུ་འགྲོགས་ནས་ཉིན་གྱི་བྱ་ར་དང་། མཚན་གྱི་མལ་ཚེ་གཡེལ་བ་མེད་པར་མཛད་པ་དང་། གནས་སྐབས་འགལ་རྐྱེན་ཕྱི་ནང་གསང་གསུམ་གྱི་བར་ཆད་ཐམས་ཅད་ཞི་བ་དང་། མཐུན་རྐྱེན་སྨོན་པའི་ལེགས་ཚོགས་ཐམས་ཅད་ཡར་ངོའི་ཟླ་ལྟར་འཕེལ་ཞིང་རྒྱས་པ་དང་། མཐར་ཐུག་བདག་ཅག་བྱང་ཆུབ་སྒྲུབ་པའི་ལམ་གྱི་བར་ཆད་ཐམས་ཅད་ཞི་ཞིང་། སྤངས་དང་རྟོགས་པའི་ཡོན་ཏན་ཐམས་ཅད་ཡོངས་སུ་རྫོགས་ཏེ་རྣམ་པ་ཐམས་ཅད་མཁྱེན་པའི་ཡེ་ཤེས་མཆོག་ལ་སྦྱོར་བའི་གྲོགས་དང་དཔུང་གཉེན་དམ་པར་མཛད་དུ་གསོལ།