བྱང་བུ་ལི།
གཉིས་པ་ བྱང་བུ་ལི་འདི་རྗེན་ཕྱེ་གི་རྒྱུ་ལས་བཟོ་བའི་ འབྲུག་བུམ་ཐང་ལུ་ཡོངས་གྲགས་ཅན་གྱི་བཞེས་སྒོའི་རིགས་ཅིག་ཨིན། འདི་ནང་ལུ་ཚང་དགོ་པའི་རྫས་སྦྱོར་ཚུ་ཡང་ གོང་གསལ་པུ་ཏ་བཟོ་བའི་སྐབས་དང་འདྲ། བཟོ་ཐངས་འདི་ཡང་དང་ཕུ་འབད་བ་ཅིན་ རྗེན་ཕྱེ་འདི་ལགཔ་གིས་བསྣད། བསྣད་ཚར་བའི་ཤུལ་ལུ་ (ཀོག་ཏོ་) བཟོ་སྟེ་ ལགཔ་གིས་སྒྲིལ་ཤིང་གུར་སྒྲིལ་ནི། དེ་ལས་ ཀ་ཀྲ་ལ་གིས་བཏོག་སྟེ་བཟོ་ནི་ཡོད་རུང་ ད་རེས་ནངས་པ་ དུས་ཀྱི་འགྱུར་བ་དང་བསྟུན་ ཕྱི་རྒྱལ་ལས་ནང་འདྲེན་འབད་དེ་ཡོད་པའི་ འཕྲུལ་ཆས་ཀྱི་རིགས་སྣ་གཉིས་ བྱང་བུ་ལི་བཟོཝ་ད་ལག་ལེན་འཐབ་ཨིན། འཕྲུལ་ཆས་དང་པམ་འདི་ རྗེན་ཕྱེ་བསྣད་དེ་བཞག་མི་ཚུ་ཕྱ་རུ་རུ་སྦེ་ སྒྲིལ་ནི་གི་དོན་ལུ་དང་ འཕྲུལ་ཆས་གཉིས་པམ་འདི་ཕྱེ་སྒྲིལ་ཏེ་ཕྱ་རུ་རུ་བཟོ་མི་ཚུ་ སྦོམ་ཆུང་གི་ཚད་རན་ཏོག་ཏོ་སྦེ་དྲ་ནིའི་དོན་ལུ་ ལག་ལེན་འཐབ་ཨིན་པས། (Singye, ༢༠༡༩)
འདི་ཡང་དང་པ་ར་ ཕྱེ་ཕྱ་རུ་རུ་སྦེ་དྲ་མི་དེ་ཆུ་ཚན་ནང་བླུགས་སྟེ་ ཐོག་ཁར་མ་ལྡིང་ཚུན་བཙོ་དགོ། བཙོ་ཚར་བའི་ཤུལ་ལུ་ རྫས་སྦྱོར་ག་ར་ཚང་བའི་ཚོདམ་ནང་ གཅིག་ཁར་སླ་བསྲེས་དགོ། དེ་གི་ཐོག་ཁར་ མར་ཁུ་ཚ་ཏོམ་བཟོ་སྟེ་བླུགས་དགོ། དེ་ལས་ཟ་ནིའི་དོན་ལུ་ ལ་ལུ་གི་དརཝ་དང་གཅིག་ཁར་ཟ་ནི་དང་ དེ་མེན་པར་བྱང་བུ་ལི་རྐྱངམ་གཅིག་སྦེ་ རང་སོའི་བློ་འདོད་དང་འཁྲིལ་ཟ་ནི་ཡོད། ད་རུང་ལ་ལུ་ཅིག་གིས་ ཨོམ་དང་གཅིག་ཁར་ཡང་ ཐུགཔ་བཟུམ་སྦེ་བཟོ་སྟེ་ཟ་ནི་ཡོདཔ་ཨིན། (འབྲུག་གི་དངོས་མེད་ལམ་སྲོལ་ ༢༠༡༥)
བྱང་བུ་ལི་འདི་པུ་ཏ་བཟུམ་སྦེ་ ཕྱེ་འཐོབ་མ་ཚུགསཔ་དང་ བཟོ་དགོ་རུང་ཉམས་མྱོང་དགོཔ་མེདཔ་ལས་ ལགཔ་གསརཔ་ཨིན་རུང་ ཞིམ་ཏོང་ཏོ་བཟོ་ཚུགསཔ་ལས་ བཟའ་ཚང་ནང་ལུ་འཕྲལ་འཕྲལ་ར་བཟོ་སྟེ་བཟའཝ་ཨིན་པས། ཨིན་རུང་ པུ་ཏ་བཟུམ་སྦེ་ཚེས་བཅུའི་སྐབས་ལུ་ བཟོ་སྟེ་ཟ་བའི་སྲོལ་མེད་རུང་ ལོ་ཆོག་གཏང་སར་ཉི་མའི་ལྟོ་དང་ ལཱ་སར་འོང་མི་ཚུ་ལུ་ཕྱི་རུའི་ལྟོ་སྦེ་དྲང་སྲོལ་འདུག། (བུམ་ཐང་ལས་ཚེ་དབང་ཕུན་ཚོགས་ ༢༠༢༢)
ད་རེས་ནངས་པ་ ཕྱི་རྒྱལ་ལས་ནང་འདྲེན་འབད་དེ་བཙོང་མི་འདི་ཚུ་ལུ་ ལོངས་སྤྱོད་དེ་སྔར་སྲོལ་གྱི་བཞེས་སྒོ་ལུ་ སྤྲོ་བ་སྐྱེད་མི་ཚད་གཅིག་ལས་ལྷག་སྟེ་མིན་འདུག། དེ་ཡང་ དང་པ་བྱཱོ་དེ་ ཐོག་འཚོ་བར་དཀའ་བའི་གུར་ འཐོབ་ཚུགས་པར་ལཱ་ཁག་ཡོདཔ་ལས་ ལམ་སྲོལ་གྱི་བཞེས་སྒོ་ལས་ ཕྱི་རྒྱལ་གི་བཞེས་སྒོ་ལུ་ལོངས་སྤྱོད་མི་མང་སུ་འཐོན་དོ་ཡོདཔ་ལས་ རང་གི་ལུང་པའི་བཞེས་སྒོ་འདི་མཇུག་ལས་མཇུག་སུ་ ལུང་ཕྱོགས་ཀྱི་མི་ཚུ་གིས་ཡང་བཟོ་མ་ཤེས་པའི་དུས་ལུ་ ཐུག་ནི་གི་ཉེན་ཁ་སྦོམ་འདུག། (Choden, ༢༠༡༡-༢༠༡༢) ལམ་སྲོལ་ཉམས་མ་བཅུག་པར་བཞག་ཐབས་འདི་ཡང་རང་གིས་ར་བཏོན་ཏེ་ ད་རེས་ནངས་པའི་ན་གཞོན་ཚུ་གིས་ རང་སོའི་ལུང་པ་གི་བཞེས་སྒོ་ལུ་གུས་བཀུར་དང་སྤྲོ་བ་བསྐྱེད་ཞིན་ན་ ཉམས་སྲུང་དང་དར་ཁྱབ་གཏང་དགོཔ་འདི་ ག་ནི་ལས་གལ་ཆེ་ཤོས་ཅིག་ཨིན།
རྒྱབ་རྟེན།
པདྨ་ཆོས་སྒྲོན། (༢༠༢༢). པུ་ཏ་དང་བྱང་བུ་ལི།. བུམ་ཐང་།
ཚེ་དབང་ཕུན་ཚོགས། (༢༠༢༢). པུ་ཏ་དང་བྱང་བུ་ལི།. བུམ་ཐང་།
ཚེ་རིང་ལྷ་སྒྲོན། (༢༠༢༢). པུ་ཏ་དང་བྱང་བུ་ལི།. བུམ་ཐང་།