བློ་སྦྱོང་ཚིག་དོན་བརྒྱད་མ་

༧གོང་ས་མཆོག་གིས་གསུངས།

རང་བཞིན་ངན་པའི་སེམས་ཅན་རྣམས།། སྡིག་སྡུག་དྲག་པོས་ནོན་མཐོང་ཚེ།། རིན་ཆེན་གཏེར་དང་འཕྲད་པ་བཞིན།། རྙེད་པར་དཀའ་བས་གཅེས་འཛིན་ཤོག།

ཅེས་གསུངས་པ་ནི་ང་རང་ཚོས་སེམས་ཅན་རང་བཞིན་ངན་པ༑གཤིས་ཀ་ངན་པའི་རིགས་ལ་སྐབས་རེ་བྱམས་པ་དང༌།སྙིང་རྗེ་སྐྱེ་རྒྱུ་ཅུང་ཟད་དཀའ་བ་དང༌།དེ་བཞིན་དེ་དག་ལ་གཏོང་ལེན་གྱི་དམིགས་པ་བྱེད་རྒྱུར་ཡང་ཅུང་ཟད་དཀའ་བ་ཡོང་སྲིད་པ་རེད།ཡང་སྤྱོད་ལམ་རྩུབ་པོ་དང༌།དེ་མིན་ཉོན་མོངས་ཧ་ཅང་རགས་པ་ཡོད་པ་དེ་འདྲར་སྐབས་རེ་བྱང་ཆུབ་སེམས་སྦྱོང་གི་དམིགས་པའི་ཡུལ་ལ་བདེ་པོ་དེ་ཙམ་མི་ཡོང་བ་དེ་འདྲ་ཡོད་པས།དེ་སྒེར་བརྡུང་བཏང་ནས་བསམ་བློ་གཏོང་རྒྱུ་རེད། རང་བཞིན་ངན་པའི་སེམས་ཅན་རྣམས།། སྡིག་ལྟུང་དྲག་པོས་ནོན་མཐོང་ཚེ།། རིན་ཆེན་གཏེར་དང་འཕྲད་པ་བཞིན།། རྙེད་པར་དཀའ་བས་གཅེས་འཛིན་ཤོག།ཅེས་གསུངས་སོ།། བདག་ལ་གཞན་གྱིས་ཕྲག་དོག་གིས།། གཤེ་བསྐུུར་ལ་སོགས་མི་རིགས་པའི།། གྱོང་ཁ་རང་གིས་ལེན་པ་དང༌།། རྒྱལ་ཁ་གཞན་ལ་འབུལ་བར་ཤོག། ཅེས་པ་ནི།ང་རང་ཚོས་བློ་སྦྱོང་དཀའ་བའི་ཡུལ་གཅིག་ནི།རང་ཉིད་ཀྱིས་བསམ་པ་རྣམ་དག་བྱས་ཀྱང༌།གཞི་མེད་པ་དང༌།གཞི་ཅུང་ཟད་ཡོད་པ་དེ་འདྲར་སྒྲོ་བཏགས་པ་དང༌།ཡང་ན་འཁྱོག་བཤད་ཀྱི་ཐོག་ནས་རང་ལ་སྐྱོན་འདོགས་བྱས་པ་དང༌།སྙོན་བཙུགས་པ་སོགས་ཡོང་སྐབས་སྤྱིར་བཏང་འཇིག་རྟེན་ཡ་རབས་ཀྱི་ཁྲིམས་ཐོག་ནས་བཤད་ན།རང་ལ་ཉེས་པ་མེད་བཞིན་དུ་གཞན་གྱིས་སྙོན་བཙུགས་ནས་ཉེས་པ་བཤད་ན་དེ་མ་འོས་པ་རེད། རང་ལ་བདེན་པ་ཡོད་ཅིང༌།ཕ་རོལ་པོར་བདེན་པ་མེད་པས་ཁྲིམས་ས་ལྟ་བུར་གཏུགས་ན་ཕལ་ཆེར་གཏུགས་ཆོག་པ་ཞིག་ཡིན་ནའང་བློ་སྦྱོང་ཉམས་ལེན་བྱེད་མཁན་གྱིས་དེ་འདྲ་བྱེད་མི་རུང་ཞིང༌།གཞན་གྱིས་རང་ལ་གཤེ་བ་དང་བསྐུུར་བ་ལ་སོགས་པ་གང་ཞིག་བྱས་ཀྱང་དེ་དང་དུ་བླངས་ནས།ཁེ་དང་རྒྱལ་ཁ་གཞན་ལ་སྦྱིན།གྱོང་དང་བུག་པ་རང་གིས་བླངས་དགོས་ཞེས་གསུངས་པ་ལྟར་དགོས་ཤིང༌།དེས་ན་གྱོང་ཁ་རང་གིས་ལེན་པ་དང༌།།རྒྱལ་ཁ་གཞན་ལ་འབུལ་བར་ཤོག།ཅེས་གསུངས་སོ།། དེ་ནས་ལྷག་པར་དུ་བློ་སྦྱོང་དཀའ་བའི་ཡུལ་གཅིག་ནི། གང་ལ་བདག་གིས་ཕན་གདགས་པའི།། རེ་བ་ཆེ་བ་གང་ཞིག་གིས།། ཤིན་ཏུ་མི་རིགས་གནོད་བྱེད་ནའང༌།། བཤེས་གཉེན་དམ་པར་བལྟ་བར་ཤོག། ཅེས་པ་ནི་ལྷག་པར་དུ་རང་གིས་སྔར་ཕར་ཕན་མང་པོ་བཏགས་ཤིང༌།རང་གིས་དྲིན་གྱིས་བསྐྱངས་པའི་སེམས་ཅན་ཞིག་གིས་རང་ལ་མི་འོས་མི་འཚམས་པ་དེ་འདྲ་བྱས་ན་དེ་ལ་ལྷག་པར་དུ་ཡང་བསམ་བློའི་ནང་དུ་ཁོས་དྲིན་ལན་ལོག་འཇལ་བྱས་བྱུང་བསམ་པ་བསམ་བློའི་ནང་ལ་འཁོར་བ་ནི་རྒྱུ་མཚན་ལྡན་པ་ཞིག་ཆགས་ཡོད་ཀྱང༌།བློ་སྦྱོང་ཉམས་ལེན་བྱེད་མཁན་གྱིས་དེ་འདྲའི་སྐབས་ལ་ལྷག་པར་དུ་ཡང་དེར་བཟོད་པ་སྒོམ་པའི་རྟེན་མཆོག་ཏུ་གྱུར་པ།རྣམ་མཁྱེན་ཐོབ་པ་ལ་སྙིང་རྗེ་ཆེན་པོ་དང་བྱམས་པ་དགོས་པ་རེད། དེའི་ལྡོག་ཟླའམ་འགལ་རྐྱེན་ཆེ་ཤོས་དེ་ཞེ་སྡང་རེད།ཞེ་སྡང་ལ་ཐད་ཀར་གདོང་ཐུག་བྱས་ཏེ་ཞེ་སྡང་ལ་གདོང་ལེན་བྱེད་མཁན་དེ་བཟོད་པ་ཆགས་ཡོད།བཟོད་པ་ཉམས་ལེན་བྱེད་པར་རང་ལ་གནོད་པ་བྱེད་མཁན་གྱི་དགྲ་ཞིག་དགོས།དེས་ན་རང་ལ་ཤིན་ཏུ་མི་འོས་མི་འཚམས་པ་དེ་འདྲའི་ཐོག་ནས་རང་ལ་གནོད་པ་བྱེད་མཁན་གྱི་དགྲ་བོ་འདི་ལྷག་པར་དུ་ཡང་བཟོད་པའི་རྟེན་མཆོག་ཏུ་གྱུར་པ་རེད་ལ།དེ་ཡིན་པ་ཤེས་པར་བྱས་ཏེ་བཤེས་གཉེན་དམ་པར་བལྟ་བར་ཤོག་གསུངས་སོ།། མདོར་ན་དངོས་སམ་རྒྱུད་པ་ཡི།། ཕན་བདེ་མ་རྣམས་ཀུན་ལ་འབུལ།། མ་ཡི་གནོད་དང་སྡུག་བསྔལ་ཀུན།། གསང་བས་བདག་ལ་ལེན་པར་ཤོག། ཅེས་པ་འདིས་གཏོང་ལེན་གསུངས་པ་རེད།དེ་ལྟར་གཏོང་ལེན་བྱས་ནས་དངོས་སུ་གཞན་གྱི་སྡུག་བསྔལ་རང་གིས་བླངས་རྒྱུ་ཞིག་དང༌།རང་གི་བདེ་དགེ་གཞན་ལ་སྦྱིན་ནས་གཞན་ལ་ཕན་ཐོགས་པ་དེ་ཧ་ཅང་ཁག་པོ་རེད།དམིགས་བསལ་རང་ཉིད་དང་ལས་སྨོན་གྱི་འབྲེལ་བ་ཧ་ཅང་ཡོད་པ་དེ་འདྲ་རེ་ཟུང་ཡོང་སྲིད་པ་ལས་དེ་མིན་ཧ་ཅང་ཁག་པོ་རེད།ལག་ལེན་གྱི་ཐོག་ནས་དངོས་སུ་ཡོང་རྒྱུ་ཡོད་མེད་མི་ཤེས་ཏེ།གང་ལྟར་རང་གི་སྙིང་སྟོབས།རང་གཅེས་པར་འཛིན་པའི་གཅེས་འཛིན་ལ་མགོ་ལྕག་ཞུ་རྒྱུ་དང༌།གཞན་གཅེས་པར་འཛིན་པའི་གཅེས་འཛིན་གོང་ནས་གོང་དུ་འཕེལ་བའི་སྤྲོ་ཤུགས་འཕེལ་བ་ལ་གཏོང་ལེན་གྱི་དམིགས་པ་བྱེད་རྒྱུ་དེ་ནུས་པ་ཆེན་པོ་ཡིན་ས་རེད། མདོར་ན་དངོས་དང་རྒྱུད་པས་རང་གིས་དུས་གསུམ་དུ་བསགས་པའི་དགེ་བའི་རྩ་བ་ཐམས་ཅད་ཞེ་ཐག་པ་ནས་དེའི་འབྲས་བུ་བདེ་བ་དང༌།བཟང་པོའི་ནུས་པ་ཡོད་པ་དེ་དག་ཇོ་བོ་སེམས་ཅན་རྣམས་ལ་ཞེ་ཐག་པ་ནས།ནམ་མཁའི་མཐས་གཏུགས་པའི་སེམས་ཅན་གྱི་རྒྱུད་ལ་ཡོད་པའི་འབྲས་བུ་སྡུག་བསྔལ།དེའི་རྒྱུ་ལས་དང་ཉོན་མོངས་བག་ཆགས་དང་བཅས་པ་དེ་དག་རང་གཅེས་འཛིན་གྱི་མགོ་ཐོག་ཏུ་བླངས་པའི་སྒོ་ནས་གཏོང་ལེན་སྦྱང་རྒྱུ་དེ་རེད།དེ་ཡང་སྙིང་རྗེའི་དམིགས་པ་རྩལ་དུ་བཏོན་ནས་ལེན་པ་དེ་སྔོན་དུ་གཏོང་བ་རེད། དེ་ནས་སྡུག་བསྔལ་མཐའ་དག་རང་གིས་བླངས་ཟིན་པ་ཡིན་བསམ་པའི་རྗེས་སུ་སྡུག་བསྔལ་བྲལ་བ་ཙམ་གྱིས་མི་ཆོག་པར།དེ་ཐམས་ཅད་བདེ་བ་མཐའ་དག་དང་ལྡན་པ་ཞིག་བྱ་བསམ་པ་དང༌།བདེ་བ་མཐའ་དག་དང་ལྡན་ན་ཅི་མ་རུང༌།བདེ་བ་མཐའ་དག་དང་ལྡན་པ་བདག་གིས་བྱ་སྙམ་པ།བདག་གིས་ཇི་ལྟར་བྱ་དགོས་སམ་ཞེ་ན།རང་གི་དགེ་བའི་རྩ་བ་དགེ་ཚུལ་སློང་གི་སྡོམ་པ་བླངས་པ།བྱང་ཆུབ་ཀྱི་སེམས་ལ་བློ་སྦྱངས་པ།སྟོང་ཉིད་ཀྱི་ལྟ་བ་བསྒོམས་པ།ལྷ་ཡི་རྣལ་འབྱོར་བསྒོམས་ནས་དེ་ལྟ་བུའི་དགེ་རྩ་ཇི་ལྟར་མི་འདུག་ཅེས་བརྗོད་ཀྱང་ལུས་ཀྱི་སྒོ་ནས་བསགས་པའི་དགེ་བ་དང༌།ངག་གི་སྒོ་ནས་བསགས་པའི་དགེ་བ༑ཡིད་ཀྱི་སྒོ་ནས་བསགས་པའི་དགེ་བ་ཡོད་པ་དེ་དག་ཐམས་ཅད་རང་དོན་ཡིད་བྱེད་ཀྱི་བསམ་པས་མ་འདྲེས་པར་ཞེ་ཐག་པ་ནས།སྙིང་ཁོང་རུས་པའི་གཏིང་ནས།དགའ་བཞིན་སྤྲོ་བཞིན་ཕངས་པ་མེད་པའི་ཐོག་ནས་གཞན་ལ་བཏང༌།དེ་ནས་རང་གི་ལུས་ཀྱང་བཏང༌།ལོངས་སྤྱོད་ཀྱང་གཏོང་བའི་སྒོ་ནས་གཏོང་ལེན་གྱི་དམིགས་པ་བྱེད་རྒྱུ་དེ་གསུངས་པ་རེད། གསང་བས་བདག་ལ་ལེན་པར་ཤོག།ཅེས་གསང་བས་བདག་ལ་ལེན་པ་ནི་རིམ་བཞིན། གཏོང་ལེན་གཉིས་པོ་སྤེལ་མར་སྦྱར།། ལེན་པའི་གོ་རིམ་རང་ལས་བརྩམས།། དེ་ཉིད་རླུང་ལ་སྐྱོན་པར་བྱ།། ཞེས་གསུངས་པ་བཞིན་དབུགས་ཚུར་རྔུབ་པའི་སྐབས་སུ་གཞན་གྱི་སྡུག་བསྔལ་ཚུར་བླངས་པ་དང༌།དབུགས་ཕར་གཏོང་བའི་སྐབས་རང་གི་བདེ་དགེ་གཞན་ལ་སྦྱིན་པ་དེ་ལྟ་བུའི་སྒོ་ནས་བློ་སྦྱོང་འགྲོ་ཞོར་འདུག་ཞོར་གང་གི་སྐབས་སུ་ཡིན་ནའང་ཉམས་ལེན་བྱེད་རྒྱུ་གསུངས་པ་རེད། དེ་དག་ཀུན་ཀྱང་ཆོས་བརྒྱད་ཀྱི།། རྟོག་པའི་དྲི་མས་མ་སྦགས་ཤིང༌།། ཞེས་པའི་རྐང་པ་གཉིས་པོས་སྤྱིར་དགེ་བ་གང་བསགས་པ་རྣམས་འཇིག་རྟེན་ཆོས་བརྒྱད་ཀྱི་རྣམ་རྟོག་དང་འདྲེས་པའི་ཉེན་ཁ་ཆེན་པོ་ཡོད།ངས་བྱང་ཆུབ་ཀྱི་སེམས་བསྒོམས་ཏེ་དེ་ལ་བརྟེན་ནས་གཞན་གྱིས་བསྟོད་ར་བཏང་མི་ཡོང་ངམ་བསམ་པ་དང༌།ཡང་ན་བྱང་ཆུབ་ཀྱི་སེམས་བསྒོམས་ན་ཚེ་རིང་པོ་ཡོང་བ་དང༌།བསོད་ནམས་འཕེལ་ནས་ལོངས་སྤྱོད་ཆེན་པོ་ཡོང་གི་རེད་བསམ་པ་དང༌།དེ་ལ་བརྟེན་ནས་མི་ཚེ་འདི་སྐྱིད་པོ་ཡོང་གི་རེད་བསམ་ན་ལྟས་ངན་ཡིན་པ་རེད།དེ་འདྲའི་བསམ་བློ་གཏོང་རྒྱུ་མེད། མདོར་ན་ཚེ་འདི་དང་འབྲེལ་ནས་རང་བདེ་བ་ཞིག་བྱུང་ན་བསམ་པ་དང༌།བསྟོད་ར་བྱུང་ན་བསམ་པ།ང་ལ་སྙན་གྲགས་བྱུང་ན་བསམ་པ་སོགས་དེ་འདྲའི་འཇིག་རྟེན་ཆོས་བརྒྱད་ཀྱི་བློས་མ་འདྲེས་པ་ཞིག་དང༌།ཆོས་བརྒྱད་དཀར་ནག་ཁྲ་གསུམ་ཞེས་གསུངས་པ་ལྟར་ཆོས་བརྒྱད་དང་མ་འདྲེས་པ་ཞིག་བྱེད་དགོས་པ་རེད་ཅེས་གསུངས་སོ།། ཆོས་ཀུན་སྒྱུ་མར་ཤེས་པའི་བློས།། ཞེན་མེད་འཆིང་བ་ལས་གྲོལ་ཤོག། ས་གསུངས་པ་ནི་གོང་ཞུས་ལྟར་ང་ཞེས་པ་དེ་ཕུང་པོའི་གསེབ་ནས་མེད་ལ།ཡོད་ས་ཕུང་པོ་ཡོད་ས་དེར་ང་དེ་ཡང་ཡོད་ཅིང༌།འོན་ཀྱང་ཡོད་ས་དེ་ནས་ང་དེ་བཙལ་ན་རྙེད་རྒྱུ་མེད།མེད་པ་མིན་ཞིང༌།ཕུང་པོ་ལ་བརྟེན་ནས་བཏགས་པ་རེད། དེ་ཙམ་མ་ཟད་ཕུང་པོ་ལྔ་པོ་དེ་དག་ཀྱང་རང་བཞིན་གྱིས་སྟོང་པར་རྣམ་པར་ཡང་དག་པར་རྗེས་སུ་བལྟའོ་ཞེས་གསུངས་པ་ལྟར་གདགས་གཞི་ཕུང་པོ་དེ་ཉིད་ཀྱང་རྙེད་རྒྱུ་མེད་པ་ཞིག་ཆགས་ཀྱི་ཡོད།དེར་བརྟེན་སྤྱིར་ཕུང་པོ་རྫས་ཡོད་དང་གང་ཟག་བཏགས་ཡོད་ཅེས་བཤད་ཀྱི་ཡོད།བཏགས་ཡོད་གང་ལ་བཏགས་སའི་རྫས་ཡོད་ཕུང་པོ་དེ་ཉིད་ཀྱང་རྙེད་རྒྱུ་མེད་པ་ཞིག་ཆགས་པས།དེ་ལ་བརྟེན་ནས་བཏགས་པའི་གང་ཟག་དེ་ཡང་ལྟ་ཅི་སྨོས།དེས་མཚོན་པའི་བདེ་སྡུག་ལོངས་སྤྱོད་པ་པོའི་བདག་ཅེས་པ་དེ་ཡང་ཐ་སྙད་བཏགས་ཙམ་ཡིན་ཞིང༌།མིང་གི་དབང་གིས་ཡོད་ཙམ་དང༌།གདགས་གཞི་ལ་བརྟེན་ནས་བཏགས་ཙམ་ཡིན།གདགས་གཞི་རང་ཉིད་ཀྱང་རང་གི་ཆ་ཤས་ཚོགས་པ་ལ་བརྟེན་ནས་ཡོང་དགོས་པ་དང༌།ཤེས་པ་ལྟ་བུ་ཡིན་ན་རྒྱུན་གྱི་ཚོགས་པའི་སྟེང་ནས་ཡོང་དགོས། དེ་བཞིན་གཟུགས་ཅན་ཞིག་ཡིན་ཀྱང་ཕྱོགས་ཀྱི་ཆ་ཅན་ཡིན་པས་ན།དེ་ལ་བརྟེན་ནས་བཏགས་པ་ཞིག་ཡིན་སྟབས་མཐར་གཏུགས་ན་ཕྱི་དང་ནང༌།བདེ་སྡུག་ལོངས་སྤྱོད་པ་པོ་དང༌།བདེ་སྡུག་ལོངས་སྤྱད་བྱའི་ཕུང་སོགས་ཀྱིས་མཚོན་པའི་ཆོས་གང་དང་གང་ཡིན་ཡང༌།དེ་ཐམས་ཅད་བརྟག་ཅིང་དཔྱད་ན་རྙེད་རྒྱུ་མེད་ཅིང༌།མ་བརྟག་མ་དཔྱད་པར་འཇོག་རྒྱུ་ཙམ་ཞིག་ལས་བརྟག་ཅིང་དཔྱད་ན་མེད་པ་རེད།མ་བརྟག་མ་དཔྱད་པའི་ངང་ལ་ཡོད་ལུགས་དེ་ཡང་དོན་གྱི་ངོས་ནས་ཡོད་པ་མིན་པ།གང་ལྟར་ཐ་སྙད་ཀྱི་དབང་གིས་བཏགས་ཙམ་ཞིག་ཡིན་པ།དེ་འདྲ་བློ་ལ་ཤར་བ་ཞིག་བྱུང་ན་མ་བརྟག་མ་དཔྱད་པའི་བློ་ལ་ཆོས་དེ་དང་དེའི་ཐ་སྙད་བློ་ལ་ཤར་སྐབས་དོན་གྱི་ངོས་ནས་ཡོད་པ་ཞིག་སྣང་གི་ཡོད་པ་རེད་དེ།སྣང་བ་ལྟར་དུ་གྲུབ་པ་མེད་བསམ་པ་ཞིག་རང་གི་ངང་གིས་ཡོང་བ་རེད།དེ་ལྟ་བུ་ཞིག་བྱུང་ན་སྒྱུ་མ་ལྟ་བུའི་ཉམས་ལེན་ཡོང་གི་ཡོད་པ་རེད། ཆོས་ཀུན་སྒྱུ་མར་ཤེས་པའི་བློས།། ཞེན་མེད་འཆིང་བ་ལས་གྲོལ་ཤོག། ཅེས་བདག་ཏུ་ཞེན་པའམ་བདག་ཏུ་འཛིན་པའི་འཛིན་པ་དེ་རིམ་གྱིས་ཆུང་དུ་ཕྱིན་ཏེ་མདོར་ན་སྲིད་པ་འཁོར་བར་འཆིང་བྱེད་ཀྱི་བདག་འཛིན་དེ་ལས་གྲོལ་བར་ཤོག་ཅེས་གསུངས་སོ།། ཅེས་པ་འདི་ནི་དགེ་བཤེས་གླང་ཐང་པ་རྡོ་རྗེ་སེངྒེའི་གསུང་ངོ༌།། གླང་ཐང་ཚིག་བརྒྱད་འདི་ཉུང་ངུ་ཞིག་ལས་མེད་སྟབས་ཡང་ཡང་བཏོན་ན་ཡག་པོ་ཡོད་ཅིང༌།ལྷག་པར་ལྷོད་ལྷོད་དང་སྐྱིད་པོ་ཡོད་པའི་སྐབས་སུ་བཏོན་ན་ཡག་པོ་ཡོད་པ་རེད།ལྟོ་འགྲངས་ཉི་མས་དྲོས་ཚེ་ཆོས་པའི་གཟུགས།།ཞེས་གསུངས་པ་རེད།སྐྱིད་པོ་ཡོད་ན་གླང་ཐང་ཚིག་བརྒྱད་འདྲ་བཏོན།སྡུག་པོ་འདུག་ན་གླང་ཐང་ཚིག་བརྒྱད་དེ་ཕར་གཡུགས་ནས་རྒྱག་རེས་རྒྱབ་དགོས་བྱུང་ན་རྒྱག་རེས་རྒྱབ།ཕྲག་དོག་བྱེད་དགོས་བྱུང་ན་ཕྲག་དོག་བྱས།མི་མི་གོ་ཆོད་པ་ཞིག་བྱས།སྐྱིད་པོ་ཞིག་ཡོད་ན༑ བདག་ནི་སེམས་ཅན་ཐམས་ཅད་ལ།། ཡིད་བཞིན་ནོར་བུ་ལས་ལྷག་པའི།། ཞེས་འདོན་ན་མེད་པ་ལས་དྲག་གི་རེད།གླང་ཐང་ཚིག་བརྒྱད་ཀྱིས་བཤད་ལུང་མདོར་བསྡུས་འདིས་འཐུས་པ་དང༌།ང་ཆུང་ཆུང་སྐབས་ནས་བཟུང་ཉིན་ལྟར་གླང་ཐང་ཚིག་བརྒྱད་འདི་འདོན་གྱི་ཡོད།སེམས་ལ་ཕན་པོ་འདུགའདི་ཡང་ཡང་བཏོན་ན་ཡག་པོ་ཡོད་པ་རེད།སེམས་ལ་ཡང་ཡང་གོམས་འདྲིས་བསྟེན་ན་བློ་ལ་འགྱུར་བ་ཐེབས་ཀྱི་རེད།དེ་འདྲ་རེད་ཅེས་བཀའ་བསྩལ་ཏོ།། །།