མར་མེ་སྨོན་ལམ།

༄༅། །མར་མེ་སྨོན་ལམ་བཞུགས་སོ།།

༈ ཨོཾ་ཨཱཿཧཱུཾ། རིན་ཆེན་ཀོང་བུ་སྟོང་གསུམ་འཇིག་རྟེན་གྱི། །ཁོར་ཡུག་ཆེན་པོའི་ཚད་དང་མཉམ་པའི་ནང་། །ཞུན་མར་མཐའ་ཡི་རྒྱ་མཚོ་འཁྱིལ་བའི་ཀློང་། །སྡོང་བུ་རི་རྒྱལ་ལྷུན་དུ་ཆགས་པའི་རྩེར། །ཡེ་ཤེས་རང་མདངས་གསལ་བའི་སྒྲོན་མེ་སྦར། །འོད་ཀྱིས་ཁམས་གསུམ་སེམས་ཅན་ཐམས་ཅད་ཀྱི། །མ་རིག་མུན་པ་བསལ་ཞིང་ཤེས་རབ་ཀྱི། །སྣང་བས་སེམས་ཀྱི་དེ་ཉིད་མཐོང་བར་ཤོག། །གྲངས་ནི་རྡུལ་སྙེད་སངས་རྒྱས་རེ་རེའི་མདུན། །མར་མེ་ཐོགས་པའི་ལྷ་མོ་དེ་སྙེད་དུ། །སྤྲོས་པས་མུ་མེད་ཕྱོགས་བཅུའི་ཞིང་ཐམས་ཅད། །རྒྱས་པར་བཀང་སྟེ་ཚོགས་གཉིས་རྫོགས་པར་ཤོག། །སྣང་གསལ་མར་མེ་འདི་ཡི་བསོད་ནམས་ཀྱིས། །བདག་སོགས་འཁོར་བའི་མུན་པར་ལྷུང་བ་རྣམས། །སྣང་ནས་སྣང་བའི་མཐར་ཐུག་མྱུར་བགྲོད་དེ། །ཀུན་མཁྱེན་ཡེ་ཤེས་སྣང་བ་ཐོབ་པར་ཤོག། _{།ཅེས་པའང་ཁུ་བོ་དབུ་མཛད་ཀྱི་ངོར་དགེ་རིན་པས་སོ།།}