ཟངས་མདོག་དཔལ་རིའི་སྨོན་བསྡུས་པ།
༄༅། །ཟངས་མདོག་དཔལ་རིར་བགྲོད་པའི་སྨོན་ལམ་རིག་པ་འཛིན་པའི་ཤིང་རྟ་བཞུགས་སོ།།
༄༅། །དུས་གསུམ་སངས་རྒྱས་ཐམས་ཅད་ཀྱི་ཐུགས་རྗེ་ཆེན་པོའི་བདག་ཉིད་སློབ་དཔོན་ཆེན་པོ་པདྨ་འབྱུང་གནས་ལ་ཕྱག་འཚལ་ལོ། །མཁའ་ཀློང་རྣམ་དག་འོག་མིན་རྡོ་རྗེའི་དབྱིངས། །རྒྱལ་བའི་ཞིང་མཆོག་རབ་འབྱམས་རྒྱ་མཚོའི་གར། །ངོ་མཚར་འཕྲུལ་གྱི་དབང་པོ་བརྩེགས་པའི་ཏོག། །ཟངས་མདོག་དཔལ་གྱི་རི་བོར་སྐྱེ་བར་ཤོག །སངས་རྒྱས་འོད་སྣང་མཐའ་ཡས་ཡེ་ཤེས་ཀྱི། །སྒྱུ་འཕྲུལ་རྡོ་རྗེའི་དྲྭ་བས་མངོན་སུམ་དུ། །མཛེས་དགུར་བརྒྱན་པ་པདྨའི་གཞལ་ཡས་ཁང་། །ཟངས་མདོག༴ །རྒྱལ་བའི་སྤྱི་གཟུགས་རྡོ་རྗེ་ཐོད་འཕྲེང་རྩལ། །གང་འདུལ་ཕྲིན་ལས་འཁོར་ལོའི་གཟི་བྱིན་གྱིས། །ཀུན་དགར་བརྒྱན་པའི་ཕོ་བྲང་པདྨ་འོད། །ཟངས་མདོག༴། །ནོར་བུའི་བ་གམ་བརྩེགས་པའི་རི་དབང་རྩེར། པདྨ་རཱ་གའི་ཁང་བརྩེགས་ནོར་བུའི་ཏོག །མཁའ་འགྲོའི་སྤྲིན་ཕུང་ཕྱོགས་ཀྱི་བླར་བྲེས་པ། །ཟངས་མདོག༴། །ཨ་ཀརྒྷོ་ཤྲིརྵ་དང་པླཀྵའི། །ནགས་ཚལ་སྟུག་པོར་འཁྲིགས་པའི་དྲྭ་མིག་ནས། །དབང་པོའི་ཤིང་བལ་གཡོ་བའི་ལང་ཚོ་ཅན། །ཟངས་མདོག༴། །ཁམས་གསུམ་དུག་གསུམ་སྣ་ཚོགས་འདུས་པའི་སྲོག། །སྤྱོད་ལ་དགྱེས་མཛད་རྡོ་རྗེའི་མཎྜ་ལར། །མཁའ་སྤྱོད་ལོངས་སྤྱོད་འདུས་པའི་འཁོར་ལོ་ཅན། །ཟངས་མདོག༴། །དཔའ་བོ་རིག་འཛིན་ཚོགས་པའི་གྲལ་དབུས་ན། །པདྨ་རྒྱལ་པོས་སེངྒེའི་སྒྲ་སྒྲོག་པས། །ཕྱོགས་ལས་རྣམ་པར་རྒྱལ་བའི་དཔའ་བརྗིད་ཅན། །ཟངས་མདོག༴ །ཙན་དན་དྲི་ཞིམ་གྱིས་བགོས་འཆི་མེད་ལྷའི། །མེ་ཏོག་ཆར་ཟིམ་འབབ་པའི་དོ་ར་ན། །ཌཱ་ཀིའི་གར་མཁན་རྩེ་བའི་རྒྱང་གླུ་ཅན། །ཟངས་མདོག༴ །མཚུངས་མེད་བློ་ལྡན་ཐུགས་རྗེའི་རང་བཞིན་དང་། །ལྷན་ཅིག་མངོན་པར་མཐོ་བ་ལྷུན་པོའི་དཔལ། །ཉི་མའི་རྒྱན་གྱུར་ཉི་འོད་ཀྱིས་མཛེས་པ། །ཟངས་མདོག་དཔལ་གྱི་རི་བོར་སྐྱེ་བར་ཤོག །འདི་ནས་བཟུང་སྟེ་བྱང་ཆུབ་སྙིང་པོའི་བར། །རྒྱལ་བ་ཀུན་འདུས་པདྨས་རྗེས་འཛིན་ཅིང་། །མཁའ་སྤྱོད་དག་པའི་ཞིང་མཆོག་པདྨ་འོད། །ཟངས་མདོག་དཔལ་གྱི་རི་བོར་སྐྱེ་བར་ཤོག། །།