ཟླ་བ་ ༡༢ པའི་ལོ་གསར་ངལ་གསོ།

རྒྱལ་གྱི་ཟླ་བའམ་ཧོར་ཟླ་བཅུ་གཉིས་པའི་ཚེས་གཅིག་ལུ་ ལོ་གསར་སྦེ་བརྩི་སྟེ་ངལ་གསོ་བཞགཔ་ཨིན། དེ་ཡང་ ཧོར་ཟླ་ ༡༢ པ་འདི་ སྤྱིར་འབྱུང་རྩིས་པའི་ལུགས་དཔྱིད་ཟླ་འབྲིང་པོ་ཡོས་ཀྱི་ཟླ་བ་ཨིན་རུང་ སྐབས་འདིར་ཐུན་མོང་མ་ཡིན་པའི་ལུགས་ རྡོ་རྗེ་མཁའ་འགྲོའི་རྒྱུད་དང་ དགོངས་འདུས་ཀྱི་རྩིས་གཞུང་ནང་ལས་ དཔྱིད་ཟླ་ར་བ་སྟག་གི་ཟླ་བ་འདི་ ཧོར་ཟླ་བཅུ་གཉིས་པ་ལས་བརྩི་སྲོལ་ཡོདཔ་ལས་བརྟེན་ཏེ་ དཔྱིད་ཟླ་ར་བ་སྟག་གི་ཚེས་གཅིག་ལས་ ལོ་འགོ་ངོས་འཛིན་འབད༌དེ༌ བཅུ་གཉིས་པའི་ཚེས་གཅིག་ལུ་ལོ་གསར་ བརྩི་སྲོལ༌ཡོདཔ་ཨིན།

ཟླཝ་བཅུ་གཉིས་པའི་ཚེས་གཅིག་ལུ་ ད་རེས་ནངས་པར་ ཤར་ཕྱོགས་པའི་ལོ་གསར་དང་ ཟླཝ་བཅུ་གཅིག་པའི་ཚེས་གཅིག་ལུ་ ཧཱ་དང་སྤ་རོ་པའི་ལོ་འབག་ཟེར་ སླབ་སྲོལ་ཡོདཔ་ཨིན་རུང་ ཟླ་བ་དང་པའི་ལོ་གསར་འདི་ དུས་རབས་ ༡༣ པའི་ནང་ ཧོར་སོག་གི་དབང་ཤུགས་ལས་བརྟེན་ཏེ་ བརྩི་སྲོལ་བྱུང་བ་མ་གཏོགས་ ལོ་གསར་ངོ་མ་འདི་ ཧོར་ཟླ་བཅུ་གཉིས་པ་དང་ཡང་ན་ ཧོར་ཟླ་བཅུ་གཅིག་པ་ལུ་ཕོགཔ་ཨིན་མས།

དེ་ལས་བརྟེན་ཏེ་ ཟླ་ ༡༢ པའི་ཚེས་ ༡ གི་ཉི་མ་ཡང་གཞུང་གི་ངལ་གསོ་སྦེ་བཞག་དོ་ཡོདཔ་བཞིན་དུ་ དང་ཕུ་ང་བཅས་རའི་ཕམ་ཚུ་གིས་ཡང་ དུས་ཚོད་དེ་ལུ་ལོ་གསར་བརྩིས་ཏེ་ རྒྱལ་ས་སྤུངས་ཐང་ཁ་ལུ་ སྤྱི་བླ་ཚུ་གིས་འབུལ་བ་ཕུལ་ནིའི་དུས་ཚོད་དེ་ཁར་ཨིནམ་མ་ཚད་ ད་ལྟོ་ཡང་དགེ་འདུན་གྲྭ་ཚང་ནང་གི་ ཆོས་ཁྲིམས་པ་དང་གཉེར་ལས་འཛིན་ཚུ་ག་ར་ དེ་ཁ་ལས་གསར་རྙིང་སོར་མཚམས་ཨིནམ་ལས་ སྔར་སྲོལ་འབུལ་བའི་ལོ་གསར་ཟེར་ཆ་བཞག་སྟེ་ གཞུང་འབྲེལ་ངལ་གསོ་བཞགཔ་ཨིན།