འཕགས་མ་རྒྱལ་མཚན་རྩེ་མོའི་བསངས་མཆོད།

༄༅། །འཕགས་མ་རྒྱལ་མཚན་རྩེ་མོའི་བསང་མཆོད་བཞུགས་སོ།།

༈ ཧཱུྃ༔ བཅོམ་ལྡན་མ་ལ་ཕྱག་འཚལ་ལོ། །བདེ་བར་གཤེགས་པ་ཀུན་གྱི་ཡུམ། །མཐུ་དང་ནུས་པའི་མངའ་བདག་མོ། །འཕགས་མ་རྒྱལ་མཚན་རྩེ་མོ་བསང་། །སྐུ་མདོག་གཙོ་མ་གསེར་གྱི་མདོག །ཞལ་བཞི་དབུས་སེར་གཡས་དཀར་ལ།། གཡོན་དམར་གསུམ་ག་ཁྲོ་མོའི་ཞལ། །མཆེ་བ་གཙིགས་ཤིང་སྤྱན་གསུམ་འབར། །ཕྱག་བཞི་གཡས་ཀྱི་དང་པོ་ན། །རལ་གྲི་འཛིན་ཅིང་ཕྱག་གཡོན་གྱིས། །རྡོ་རྗེས་མཚན་པའི་ཞགས་པ་དང་། །འོག་མ་འཁོར་ལོ་གཏུན་ཤིང་བཟུང་། །ཐོད་སྐམ་དབུ་རྒྱན་རིན་ཆེན་དང་། །རུས་པའི་རྒྱན་ཆ་སྐུ་ལ་གསོལ། །དར་གྱི་ཆས་ཀྱིས་ཡོངས་སུ་བཀླུབས།།སྟག་ཤམ་མི་མགོའི་དོ་ཤལ་གསོལ། །གཡས་བརྐྱངས་གཡོན་བསྐུམས་རོལ་པས་བགྱིང་། །པདྨ་ཟླ་བའི་གདན་ལ་བཞུགས། །འོག་མིན་གནས་སོགས་གར་བཞུགས་ནས། །སྐད་ཅིག་ཉིད་ལ་གཤེགས་སུ་གསོལ། །དྷ་པེ་ཧཱུཾ་གི་ཏིང་འཛིན་ལས། །སྔགས་དང་ཕྱག་རྒྱས་བྱིན་བརླབས་པའི། །ངོ་མཚར་མི་གཙང་སེལ་བའི་རྫས། །གསང་གི་མཆོད་པ་འབུལ་ལོ་བཞེས། །ཙན་དན་དཀར་དམར་ཨ་དཀར་ནག། །ག་བུར་སི་ལ་ན་གི་སོགས། །དྲི་ལྡན་སྤོས་སྨན་བརྒྱ་ཕྲག་གིས། །འཇིག་རྟེན་རྨོངས་པ་གསལ་གྱུར་ཅིག །ཁྱད་པར་བདུད་རྩི་རཱ་ས་ཡ། །རྩ་བ་བརྒྱད་ལ་ཡན་ལག་སྟོང་། །ཤ་ལྔ་བདུད་རྩི་ལྔ་དང་སྦྱར། །མཆོག་གི་བསང་མཆོད་དམ་པས་བསངས། །བདག་གི་འཇིགས་པ་ཀུན་ལས་སྐྱོབས། །ནད་དང་གནོད་པ་མ་ལུས་སྲུངས། །འཁྲུགས་པ་ཀུན་ལས་རྣམ་པར་རྒྱལ། །སྲུངས་ཤིག་སྲུངས་ཤིག་རྒྱལ་བའི་བཀའ། །ཕ་རོལ་ངན་པའི་སྤ་བཀོང་ལ། །གཞན་སྡེ་དགྲ་ཚོགས་ཟིལ་གྱིས་གནོན། །རང་སྡེ་ཕྱོགས་ལས་རྣམ་པར་རྒྱལ། །བསམ་དོན་འགྲུབ་པར་མཛད་དུ་གསོལ། _{།དཔལ་གྱི་བསམ་ཡས་རྡོ་རྗེ་གདན་གྱི་མགུལ། །ངག་གི་དབང་པོས་སྦྱར་བ་དགེ་གྱུར་ཅིག། །།}