འབྲུག་གཞུང་འཕྲུལ་རིག་ལས་སྡེ། Ι GovTech Agency
ངོ་སྤྲོད།
[ཞུན་དག]
༉ འབྲུག་གཞུང་འཕྲུལ་རིག་ལས་སྡེ་འདི་ སྤྱི་ལོ་ ༢༠༢༢ ཀྱི་སྤྱི་ཟླ་ ༡༢ པའི་སྤྱི་ཚེས་ ༢༡ ལུ་ གཟའ་སྐར་རྟེན་འབྲེལ་བསྒྲིགས་ཏེ་གཞུང་འབྲེལ་སྦེ་གཞི་བཙུགས་འབད་ཡོདཔ་ཨིན། འབྲུག་གཞུང་འཕྲུལ་རིག་ལས་སྡེའི་ལཱ་འགན་གཙོ་བོ་ར་ འཕྲུལ་རིག་གི་ཐོག་ལས་ འབྲུག་རྒྱལ་ཁབ་ནུས་ཤུགས་ཡོདཔ་བཟོ་ནི་དང་། མི་སེར་གྱི་དགོས་མཁོ་དང་སྟབས་བདེ་དོག་ཚུ་ གཙོ་བོ་བཏོན་ཏེ་ བརྡ་དོན་འཕྲུལ་རིག་དང་ཡོངས་འབྲེལ་ལ་ལོགས་པའི་ འཕྲུལ་རིག་གི་མཐུན་རྐྱེན་ཕན་ནུས་ཅན་ཚུ་གི་སྒོ་ལས་ མི་སེར་ལུ་ཞབས་ཏོག་དང་ ཞབས་ཏོག་བྱིན་ཐངས་ཚུ་ལེགས་སྒྱུར་འབད་ནི། ཉེན་སྲུང་ཅན་དང་ གོང་འཕེལ་ལྡན་པའི་ ཨང་ཅན་དཔལ་འབྱོར་གསར་གཏོད་དང་རྒྱ་སྐྱེད་ཀྱི་ ལས་སྣ་དང་ཐབས་ལམ་ཚུ་བསྒྲིག་ནི། གཞུང་གི་ལས་སྡེ་ཁག་ལུ་ཡོད་པའི་ བརྡ་དོན་འཕྲུལ་རིག་གི་རིམ་ལུགས་དང་སྤྱོད་མཉེན་ཚུ་ གཅིག་ཁར་བསྡུ་ཞིནམ་ལས་ གཅིག་མཐུན་དང་གཅིག་སྒྲིལ་གྱི་སྒོ་ལས་ རིམ་ལུགས་ག་ར་ནུས་ཤུགས་ཅན་དང་གྲུབ་འབྲས་ཅན་སྦེ་བཟོ་ནི་ལ་སོགས་པའི་འགན་དབང་ཚུ་འབགཔ་ཨིན།
འཆར་སྣང་།
[ཞུན་དག]ལྕོགས་གྲུབ་ཅན་གྱི་མི་སེར་དང་ ཨང་ཅན་དཔལ་འབྱོར་གོང་འཕེལ་ལྡན་པའི་ཐོག་ལས་ འཕྲུལ་རིག་ཡར་རྒྱས་ཡོད་པའི་རྒྱལ་ཁབ་ཅིག་སྦེ་བཟོ་ནི།
དམིགས་ཡུལ།
[ཞུན་དག]- འཕྲུལ་རིག་གི་ཐོག་ལས་ ཕན་ནུས་ཅན་དང་ནུས་ཤུགས་ཅན་གྱི་ གཞུང་གཞི་བཙུགས་འབད་ནི།
- མི་སེར་གྱི་སྟབས་བདེ་དོག་གཙོ་བོ་བཟུང་སྟེ་ མི་སྡེའི་ཞབས་ཏོག་ལེགས་སྒྱུར་འབད་ནི།
- ཉེན་སྲུང་ཅན་དང་གོང་འཕེལ་ལྡན་པའི་ ཨང་ཅན་དཔལ་འབྱོར་གསར་གཏོད་འབད་ནི།
འབྲུག་གཞུང་འཕྲུལ་རིག་ལས་སྡེའི་འོག་ལུ་ཡོད་པའི་ ལས་ཁུངས་དང་སྡེ་ཚན་ཚུ་ཡང་།
[ཞུན་དག]ཀ༽ དྲུང་ཆེན་ཡིག་ཚང་འོག་ལུ།
[ཞུན་དག]༡༽ གློག་ལམ་ཉེན་སྲུང་སྡེ་ཚན།
༢༽ བརྒྱུད་འཕྲིན་དང་གནམ་སྟོང་སྡེ་ཚན།
༣༽ གནས་སྡུད་ཚན་རིག་དང་བཅོས་རིག་སྡེ་ཚན།
༤༽ ཡིག་ཚང་རྒྱབ་སྐྱོར་ཞབས་ཏོག
ཁ༽ ཨང་ཅན་གཞི་རྟེན་ལས་ཁུངས་ཀྱི་འོག་ལུ།
[ཞུན་དག]༡༽ འབྲུག་གཞུང་གློག་འབྲེལ་སྡེ་ཚན།
༢༽ སྤྲིན་མཛོད་ཞབས་ཏོག་སྡེ་ཚན།
༣༽ གཞུང་ཡོངས་རིམ་ལུགས་སྡེ་ཚན།
ག༽ ཨང་ཅན་ལེགས་སྒྱུར་ལས་ཁུངས་ཀྱི་འོག་ལུ།
[ཞུན་དག]༡༽ ཨང་ཅན་ཞབས་ཏོག་ལེགས་སྒྱུར་སྡེ་ཚན།
༢༽ ཨང་ཅན་ཞབས་ཏོག་བཟོ་སྐྲུན་སྡེ་ཚན།
༣༽ ཨང་ཅན་ཞབས་ཏོག་ལག་ལེན་དང་རྒྱུན་སྐྱོང་སྡེ་ཚན།
༤༽ འཕྲུལ་རིག་བཟོ་གྲྭ་གོང་འཕེལ་སྡེ་ཚན།
༥༽ གསར་ཐོན་འཕྲུལ་རིག་སྡེ་ཚན།
ད་ལྟོ་འབྲུག་གཞུང་འཕྲུལ་རིག་ལས་སྡེའི་འོག་ལུ་ཡོད་པའི་ ལས་སྣ་ཆེ་བའི་ལས་འགུལ་ཚུ་ཡང་།
[ཞུན་དག]༡༽ རྒྱལ་ཡོངས་ཨང་ཅན་ངོ་རྟགས། (NDI)
༢༽ གློག་ཐོག་ནད་པའི་བརྡ་དོན་རིམ་ལུགས། (EPIS)
༣༽ གནམ་སྟོང་དང་འཕྲུལ་སྐར། (Space & Satellite)
༤༽ འབྲུག་གཅིག་སྡེབ་འོང་འབབ་འཛིན་སྐྱོང་རིམ་ལུགས། (BIRMS)
༥༽ གཅིག་སྡེབ་ཚོང་ལཱའི་ཆོག་ཐམ་རིམ་ལུགས། (IBLS)
༦༽ རྒྱལ་ཡོངས་རྒྱ་ཆེར་བརྒྱུད་ལམ་འཆར་གཞི་ཨམ་གྱི་ལས་འགུལ། (NBMP)
༧༽ ཨང་ཅན་རིག་རྩལ་ལས་རིམ།
༨༽ བརྡ་དོན་དང་བརྒྱུད་འབྲེལ་འཕྲུལ་རིག་གི་བཟོ་གྲྭ་དང་འཕྲུལ་རིག་འགོ་བཙུགས་ཀྱི་དོན་ལུ་ མཐུད་འབྲེལ་རིམ་ལུགས་བཟོ་ནི་ཚུ་ཨིན།
འབྲུག་གཞུང་འཕྲུལ་རིག་ལས་སྡེ་གི་དྲུང་ཆེན་དང་པ་འདི་འཇིགས་མེད་བསྟན་འཛིན་་བསྐོ་བཞག་གནང་ནུག།
༼སྲོལ་འཛིན་དང་རྫོང་ཁ་གོང་འཕེལ་ལས་ཁུངས་ཀྱི་སྐད་ཡིག་ཞིབ་འཚོལ་དང་ལས་རིམ་སྡེ་ཚན་གྱི་ཞལ་འདེབས།༽
Source : Department of Culture and Dzongkha Development.
རྒྱབ་རྟེན་དཔེ་ཐོ།
[ཞུན་དག]༡༽ འབྲུག་གཞུང་འཕྲུལ་རིག་ལས་སྡེ། Government Technology Agency https://tech.gov.bt/projects
༢༽ རྒྱལ་གཞུང་ཞི་གཡོག་ལྷན་ཚོགས། https://www.ecb.bt/elections/
༣༽ འབྲུག་གི་སྤྱི་ཚོགས།༼གནམ་ལོ་མེད་༢༠༢༣༽ འབྲུག་གི་རྒྱལ་ཡོངས་ཨང་ཅན་ངོ་རྟགས་བཅའ་ཁྲིམས་༢༠༢༣ ཅན་མ། https://web.archive.org/web/20240329043536/https://www.nab.gov.bt/assets/uploads/docs/acts/2023/National_Digital_Identity_Act_of_Bhutan_2023F.pdf
༤༽ འབྲུག་གི་སྤྱི་ཚོགས།༼གནམ་ལོ་མེད་༢༠༢༢༽ འབྲུག་གི་ཞི་གཡོག་ལེགས་སྒྱུར་བཅའ་ཁྲིམས་༢༠༢༢ ཅན་མ། https://web.archive.org/web/20240329043537/https://www.rcsc.gov.bt/wp-content/uploads/2022/12/Civil-Service-Reform-Act-of-Bhutan-2022.pdf
༥༽ བརྡ་དོན་བརྒྱུད་འབྲེལ་དང་བརྡ་བརྒྱུད་དབང་འཛིན༼གནམ་ལོ་མེད་༢༠༡༨༽ འབྲུག་གི་བརྡ་དོན་བརྒྱུད་འབྲེལ་དང་བརྡ་བརྒྱུད་བཅའ་ཁྲིམས་༢༠༡༨ ཅན་མ། https://www.bicma.gov.bt/bicmanew/data/publications/act/+BICM_Act_2018_English.pdf