འབྲུག་མཁལ་རྡོག་གཞི་ཚོགས། Bhutan Kidney Foundation
ངོ་སྤྲོད།
[ཞུན་དག]མཁལ་རྡོག་གི་ནད་གཞི་འདི་སྤྱི་ལོ་ ༡༩༩༨ སྤྱི་ཟླ་ ༡༡ པའི་སྤྱི་ཚེས་ ༡༨ ལུ་ འབྲུག་རྒྱལ་ཁབ་ནང་ལུ་ཁྲག་སེལ་འགོ་དང་པ་འགོ་འདྲེན་མ་འཐབ་ཚུན་ཚོད་དང་ མཁལ་རྡོག་དང་འབྲེལ་བའི་ནད་གཞི་འདི་གི་སྐོར་ལས་གོ་བ་བརྡ་སྤྲོད་འབད་ནི་དང་བརྟག་དཔྱད་འབད་ནིའི་མཐུན་རྐྱེན་དང་འཕྲུལ་ཆས་ཚུ་ག་ཅི་ཡང་མེདཔ་ལས་ འབྲུག་མི་ཚུ་ལུ་མཁལ་རྡོག་གི་ནད་གཞི་འདི་དེ་ཅིག་ར་ཡོངས་གྲགས་མེདཔ་སྦེ་སྡོད་ཡོདཔ་ཨིན་མས། ཨིན་རུང་མཁལ་རྡོག་གི་ནད་གཞི་ཡོདཔ་སྦེ་བདའ་ཟུན་མི་མི་ངོམ་ཚུ་ དེ་བསྒང་ལས་ར་རྒྱ་གར་ཊ་མིལ་ན་དུ་གི་ཝི་ལོར་ཀེརི་ཤཱན་མི་ཊི་ཀཱལ་ཀོ་ལེཆ་དང་ རྒྱ་གར་ཀཱོལ་ཀ་ཊ་ལུ་ཡོད་པའི་མི་ཌི་ཀ་སུ་པར་ཧཱོསི་པི་ཊལ་ཟེར་འབྲུག་གཞུང་གི་ངོས་འཛིན་འབད་དེ་ཡོད་པའི་ ཡོངས་གྲགས་ཅན་གྱི་སྨཁང་གཉིས་ནང་ལུ་བཏང་དོ་ཡོདཔ་ཨིན་མས། སྤྱི་ལོ་ ༡༩༩༤ ལུ་མཁལ་རྡོག་གི་ནད་གཞི་ཡོདཔ་སྦེ་ངོས་འཛིན་བྱུང་མི་ འབྲུག་པའི་ཕོ་སྐྱེས་འགོ་དང་པ་འདི་སི་ཨེམ་སི་སྨན་ཁང་ནང་ལུ་མཁལ་རྡོག་སྤོ་བཙུགས་འབད་བར་བཏང་སྟེ་ འབྲུག་མི་ཅིག་མཁལ་རྡོག་སྤོ་བཙུགས་ཀྱི་སྨན་བཅོས་འགོ་དང་པ་འབད་ཡོདཔ་ཨིན་མས།
ཆགས་རབས།
[ཞུན་དག]སྤྱི་ལོ་ ༢༠༠༥ ལུ་འབྲུག་གི་མཁལ་རྡོག་གཞི་ཚོགས་གཞི་བཙུགས་འབད་མི་བཀྲིས་རྣམ་རྒྱས་འདི་ སྐྱེས་ལོ་ ༢༡ ལུ་མཁལ་རྡོག་མེདཔ་འགྱོ་ཡོདཔ་སྦེ་ངོས་འཛིན་བྱུང་ནུག། དེ་ལས་ཁོ་ཟླ་ངོ་གཉིས་དེ་ཅིག་གི་རིང་ཁྲག་སེལ་འབད་དེ་བཞག་ཞིན་ན་ མཁལ་རྡོག་སྤོ་བཙུགས་འབད་ནི་ཨིན་རུང་ཁོ་གི་ཕམ་སྤུན་ཚུ་གི་ཁྲག་གིས་ཁོ་གི་ཁྲག་དང་མ་མཐུན་པར་བྱ་ཐབས་ར་མེད་པར་ གཞན་གྱི་ཁྲག་གི་རྒྱབ་སྐྱོར་འཚོལ་དགོཔ་བྱུང་ནུག། བཀྲིས་རྣམ་རྒྱས་ཁོ་རའི་ལོ་ཚད་དང་འཁྲིལ་བའི་ཁྲག་འདི་འཚོལ་མ་ཐོབ་པར་ལཱ་ཁག་རྐྱབ་སྟེ་ མཐའ་མཇུག་ལུ་ཁོ་རའི་ཨམ་ཅུང་སྒྲོལ་མ་གིས་ཁོ་རའི་ལོ་ཚད་དང་འཁྲིལ་མི་ཁྲག་ཞལ་འདེབས་བྱིན་མི་ཅིག་ཐོབ་ཡོདཔ་ཨིན་མས། དེ་ལས་སྤྱི་ལོ་ ༢༠༠༦ སྤྱི་ཟླ་ ༤ པའི་སྤྱི་ཚེས་ ༡༢ པ་ལུ་འབྲུག་གཞུང་གི་མ་དངུལ་རྒྱབ་སྐྱོར་ཐོག་ལས་ བཀྲིས་རྣམ་རྒྱས་ཀྱིས་མཐའ་མཇུག་ལུ་རྒྱ་གར་སི་ཨེམ་སི་ཨེཆ་གི་སྨན་ཁང་ནང་ལུ་སྦེ་ མཁལ་རྡོག་སྤོ་བཙུགས་འདི་མཐར་འཁྱོལ་ཅན་སྦེ་འབད་དེ་ལེགས་ཤོམ་སྦེ་དྲག་ཞིན་ན་ དེ་གི་ཤུལ་ལས་ཁོ་ར་གཞུང་གཡོག་ནང་ལས་ཡང་དགོངསམ་ཞུ་ནུག། བཀྲིས་རྣམ་རྒཡལ་ཁོ་ར་གཞུང་གཡོག་ནང་ལས་དགོངསམ་ཞུ་དགོ་པའི་རྒྱུ་མཚན་ཡང་ ཁོ་ར་མཁལ་རྡོག་གི་ནད་གཞི་ཐོབ་སྟེ་དེ་གིས་ན་ཟུག་རྐྱབ་མི་འདི་བཟོད་་ར་མ་ཚུགས་མི་ལུ་བརྟེན་ཏེ་ གཞན་མཁལ་རྡོག་ཐོབ་མི་ཚུ་དེ་བཟུམ་གྱི་ན་ཟུག་དང་དཀའ་ངལ་ལས་སེལ་ཐབས་སྒྲིག་ནིའི་དོན་ལུ་ འ་ནཱི་མཁལ་རྡོག་གཞི་ཚོགས་ཀྱི་ཞབས་ཏོག་ཐོབ་ཐབས་བཟོ་ནི་ལུ་གཙོ་བོར་བཏོན་ཏེ་སྡོད་ནུག།
ཁོ་རའི་མཁལ་རྡོག་གི་ལཱ་གི་དམིགས་ཡུལ་ཡང་སེམས་ཅན་ག་རའི་ཕན་བདེའི་དོན་ལུ་ཚེ་སྲོག་སྲུང་སྐྱོབ་འབད་ ཟེར་མི་ལུ་གཙོ་བོར་བཏོན་ཏེ་འབད་དོ་ཡོདཔ་ཨིན་མས། མི་ག་ར་གོ་སྐབས་གཉིས་པ་ཐོབ་དགོཔ་ལས་རང་གི་མི་ཚེ་ལེགས་ཤོམ་སྐྱོང་དགོ་ཟེར་བའི་ཡིད་ཆེས་བརྟན་པོའི་ཐོག་ལས་ ལཱ་འབད་དོ་ཡོདཔ་ཨིན་མས། དེ་ལས་སྤྱི་ལོ་ ༢༠༠༧ ལུ་ ཁོ་མཁལ་རྡོག་སྤོག་བཙུགས་འབད་དེ་སྨན་བཅོས་མཐར་འཁྱོལ་ཅན་སྦེ་སོང་སྟེ་ ལོག་འབྲུག་ལུ་ལྷོདཔ་ཅིག་མཁལ་རྡོག་སྤོ་བཙུགས་དང་ཁྲག་སེལ་རྒྱབ་སྐྱོར་སྡེ་ཚན་ཟེར་མི་ཅིག་བཟོ་ཞིན་ན་ སྡེ་ཚན་དེ་ནང་འཐུས་མི་ཚུ་ཡང་མཁལ་རྡོག་གི་ནད་གཞི་ལས་དྲག་མི་ཙང་ཙ་མི་ངོམ་ ༢༣ ཡོད་མི་སྡེ་ཚན་ཅིག་བཟོ་ནུག། སྡེ་ཚན་དེ་གིས་ད་ལྟོ་འཇིགས་མེད་རྡོ་རྗེ་དབང་ཕྱུག་གི་སྦོ་ལོགས་ཁར་ཡོད་པའི་མཁལ་རྡོག་གི་མགྱོན་ཁྱིམ་ནང་ལུ་ མཁལ་རྡོག་གི་ནདཔ་ཚུ་ལུ་མཁལ་རྡོག་གི་ཁྲག་སེལ་དང་མཁལ་རྡོག་སྤོ་བཙུགས་གྱི་བསླབ་བྱ་ཚུ་བྱིན་ཏེ་ ཁོང་རའི་གཟུགས་ཁམས་སྒྲིང་སྒྲི་དང་འཕྲོད་བསྟེན་ཅན་སྦེ་བཞག་དགོ་པའི་བསླབ་བྱ་ཚུ་བྱིན་དོ་ཡོདཔ་ཨིན་མས།
ཞི་བའི་ལས་ཚོགས།
[ཞུན་དག]
དེ་ལས་སྤྱི་ལོ་ ༢༠༠༩ ལུ་སྡེ་ཚན་འདི་ནང་འགྲོས་ཀྱིས་སྦེ་འཐུས་མི་ཚུ་ཡང་ཉུང་སུ་ཅིག་སྦེ་སོང་ཞིན་ན་ མཐའ་མཇུག་ལུ་སྡེ་ཚན་འདི་ཆ་མེད་བཏང་སྟེ་མེདཔ་སྦེ་ཡར་སོ་ནུག། དེ་ལས་བཀྲིས་རྣམ་རྒྱས་ཀྱིས་སེམས་ཤི་མ་སྡོད་པར་མཁལ་རྡོག་གི་ནད་གཞི་དེ་ལས་མི་སེར་ཉམ་ཆུང་ཚུ་སྲུང་སྐྱོབ་འབད་ནིའི་དོན་ལུ་ ཁོ་གིས་སྤྱི་ལོ་ ༢༠༡༡ ལུ་མི་དབང་མངའ་བདག་རིན་པོ་ཆེའི་སྐྱིད་སྡུག་གི་ཡིག་ཚང་གིས་རྒྱབ་སྐྱོར་ལུ་བརྟེན་ཏེ་ མི་སྡེ་ཞི་བའི་ལས་ཚོགས་དབང་འཛིན་ལུ་ཡིག་ཆ་ཚུ་ཕུལ་ནུག། དེ་ལས་སྤྱི་ལོ་ ༢༠༡༢ སྤྱི་ཟླ་ ༨ པའི་སྤྱི་ཚེས་ ༡༥ ལུ་འབྲུག་མཁལ་རྡོག་གཞི་ཚོགས་ཟེར་མི་སྡེ་ཞི་བའི་ལས་ཚོགས་ཅིག་སྦེ་ཆ་འཇོག་གྲུབ་ནུག། ད་ལྟོ་འབྲུག་མཁལ་རྡོག་གཞི་ཚོགས་འདི་རྒྱལ་ཁབ་ནང་ལུ་ཁྲིམས་མཐུན་གྱི་མི་སྡེ་ཞི་བའི་ལས་ཚོགས་གཅིག་སྦེ་གནས་ཏེ་ཡོདཔ་ཨིན།
འབྲུག་མཁལ་རྡོག་གཞི་ཚོགས་འདི་གིས་མཁལ་རྡོག་ནད་གཞི་ཡོད་མི་འབྲུག་མི་ག་ར་ལུ་ སྤུས་ཚད་ཅན་གྱི་གསོ་བའི་འཕྲོད་བསྟེན་གྱི་ཞབས་ཏོག་ཚུ་ཕུལ་ནིའི་དམ་བཅའ་ཡོདཔ་མ་ཚད་ མཁལ་རྡོག་གི་ནདཔ་ཚུ་ལུ་སྨན་བཅོས་ཀྱི་རྒྱབ་སྐྱོར་འབད་དེ་ མཐར་ཐུག་ལུ་ཁོང་ཆ་ཁྱབ་ཀྱིས་ཡང་ང་བཅས་རའི་རྒྱལ་ཁབ་ཀྱི་མི་སྡེ་དཔལ་འབྱོར་གོང་འཕེལ་ནང་ལུ་ ཆ་རོགས་དང་རྒྱབ་སྐྱོར་འབད་ནི་ལུ་ཆ་རོགས་ཚུ་འབད་དོ་ཡོདཔ་ཨིན་མས། གཞི་ཚོགས་དེ་གི་དམིགས་ཡུལ་ཡང་ད་ལྟོ་མཁལ་རྡོག་གི་ནད་གཞི་མ་ཐོབ་མི་ཚུ་ལུ་ ཆ་རོགསའབད་དེ་དེ་ཡང་དམིགས་བསལ་གྱིས་འབུ་ནི་མེད་པའི་ནད་གཞི་ཚུ་ལུ་བརྟེན་ཏེ་མཁལ་རྡོག་གི་ནད་གཞི་འདི་ཐོབ་ཨིནམ་ལས་ ནད་གཞི་དེ་གི་སྐོར་ལས་འབྲུག་གི་རྫོང་ཁག་མཐའ་དབུས་མེད་པར་གོ་བ་བརྡ་སྤྲོད་ཚུ་ཁྱབ་ཆེཝ་སྦེ་སྤེལཝ་ཨིན་མས། ཚོགས་པ་དེ་གི་རྒྱལ་ཡོངས་དགའ་སྐྱིད་དཔལ་འཛོམས་ཀྱི་དམིགས་གཏད་སྒྲུབ་ནི་ལུ་ མི་ངོམ་རེ་རེ་བཞིན་གྱི་ཕན་བདེ་འདི་ག་དེམ་ཅིག་ཁག་ཆེཝ་ཨིན་ན་ཚུ་སེམས་ཁར་བཞག་སྟེ་ལཱ་ཚུ་འབདཝ་ཨིན་མས།
༼རྩོམ་ཡིག་འདི་སྲོལ་འཛིན་དང་རྫོང་ཁ་གོང་འཕེལ་ལས་ཁུངས་ཀྱི་སྐད་ཡིག་ཞིབ་འཚོལ་དང་ལས་རིམ་སྡེ་ཚན་གྱི་ཞལ་འདེབས།༽
Source : Department of Culture and Dzongkha Development.
རྒྱབ་རྟེན་དཔེ་ཐོ།
[ཞུན་དག]༡༽ འབྲུག་མཁལ་རྡོག་གཞི་ཚོགས། ང་བཅས་ཀྱི་འདས་པའི་ལོ་རྒྱུས། གནམ་ལོ་མེད། སྤྱི་ལོ་མེད། ཡོངས་འབྲེལ་ཁ་བྱང་། https://bkfbhutan.org/