རང་བྱུང་ཁར་ས་པཱ་ནི། Rangjung Kharsapani
ངོ་སྤྲོད།
[ཞུན་དག]རང་བྱུང་ཁར་ས་པཱ་ནི་ཟེར་མི་འདི་རང་བྱུང་གི་སྤྱན་རས་གཟིགས་ཀྱི་སྐུ་འདྲ་ཅིག་ཞབས་དྲུང་རིན་པོ་ཆེ་གིས་བོད་ལས་ འབྲུག་ལུ་བསྣམས་བྱོན་མི་འབྲུག་གི་ནང་རྟེན་གཙོ་ཅན་ཅིག་ཨིན། དེ་ཡང་འགྲོ་མགོན་གཙང་པ་རྒྱ་རས་ཟེར་བོད་ཀྱི་མཁས་གྲུབ་གཉིས་ལྡན་གྱི་བླམ་ཡོངས་གྲགས་ཅན་འདི་ འཕགས་པ་སྤྱན་རས་གཟིགས་དབང་ཕྱུག་མིའི་གཟུགས་སུ་སྤྲུལ་ཏེ་དངོས་སུ་སྦེ་བྱོན་མི་སྤྱི་ལོ་ ༡༡༦༡ ལུ་སྐུ་འཁྲུངས་ཏེ་ སྤྱིར་འཛམ་གླིང་གི་ནང་པའི་བསྟན་པ་རིན་པོ་དང་སྒོས་སུ་བོད་ཀྱི་འབྲུག་པ་བཀའ་བརྒྱུད་ཀྱི་བསྟན་པ་རིན་པོ་ཆེ་ལུ་ ཞབས་ཏོག་འགྲན་ཟླ་མེདཔ་ཅིག་མཛད་པའི་ཤུལ་ལུ་ སྤྱི་ལོ་ ༡༢༡༡ ལུ་འཛམ་གླིང་ནང་ལུ་གདུལ་བྱའི་མཐའ་རྫོགས་ཏེ་དགོངས་པ་ཆོས་ཀྱི་དབྱིངས་སུ་ཐིམ་ཡོདཔ་ཨིན། འགྲོ་མགཅན་གཙང་པ་རྒྱ་རས་མཆོག་དགོངས་པ་ཆོས་དབྱིངས་ལུ་ཐིམ་སྟེ་ བླམ་གི་སྤུར་བྱང་འདི་མེ་མཆོད་ཕུལཝ་ད་ལུ་བར་སྣང་ལུ་འཇའ་སྤུབས་ཏེ་མེ་ཏོག་གི་ཆར་བབས་ཞིན་ན་ རྣ་བ་ལུ་ལྷའི་གླུ་སྙན་དང་དྲི་ཞིམ་གྱིས་ས་གཞི་གང་བའི་ཐོག་ལས་བླམ་གི་ཐུགས། ལྗགས་དང་སྤྱན་ཚུ་ཧ་ལས་སི་སི་སྦེ་མེ་གིས་མ་འཚིག་པར་སྐྱོན་མེད་པར་ལུས་ཡོད་མི་ཚུ་ལས་ རིང་བསྲེལ་ལེ་ཤ་འཁྲུངས་ཏེ་ཡོད་པའི་ནང་ལས་གནམ་མེད་ས་མེད་ཡ་མཚན་ཆེ་ཏོག་ཏོ་སྦེ་འཁྲུངས་ཡོདཔ་ཨིན།
བྱུང་རབས།
[ཞུན་དག]དེ་ཡང་བླམ་འགྲོ་མགོན་གཙང་པ་རྒྱ་རས་ཀྱི་དབུ་ཐོད་ལས་འཕགས་པ་སྤྱན་རས་གཟིགས། འཕགས་པ་འཇམ་དཔལ་དབྱངས་དང་ཕྱག་ན་རྡོ་རྗེ་གི་སྐུ་འདྲ་ཚུ་འཁྲུངས་ཡོད་པའི་ཁར་ བླམ་གི་སྒལ་ཚིགས་ཉི་ཤུ་རྩ་གཅིག་ལས་འཕགས་པ་སྤྱན་རས་གཟིགས་ཀྱི་སྐུ་འདྲ་ཆུང་ཀུ་ཉི་ཤུ་རྩ་གཅིག་རང་བྱུང་སྦེ་འཁྲུངས་ཡོདཔ་ཨིན་མས། འ་ནཱི་རིང་བསྲེལ་ཚུ་ད་ལྟོ་ཡང་འབྲུག་པ་བཀའ་བརྒྱུད་ཀྱི་ལྷ་ཁང་མང་རབས་ཅིག་ནང་ར་ནང་རྟེན་སྦེ་བཞུགས་ཏེ་ཡོདཔ་ལས་ དེ་ཚུ་གིས་འགྲོ་མགོན་གཙང་པ་རྒྱ་རས་ཀྱིས་ས་ལམ་གྱི་ཡོན་ཏན་གྱི་ཁྱད་པར་སྟོནམ་ཨིན་མས། དེ་ཚུ་གི་ནང་ལས་ཧ་ཅང་གིས་ཡ་མཚན་ཆེ་བའི་འགྲོ་མགོན་གཙང་པ་རྒྱ་རས་ཀྱི་སྒལ་ཚིགས་ལས་འཁྲུངས་པའི་རང་བྱུང་ཁར་ས་པཱ་ནི་འདི་ བླམ་ངག་དབང་རྣམ་རྒྱལ་གྱིས་བོད་ར་ལུང་གི་གདན་ས་ལས་ཆིབས་ཁ་ལྷོ་ལུ་བསྒྱུར་ཏེ་བྱོནམ་ད་ལུ་བསྣམས་བྱོན་ཏེ་ འབྲུག་རྒྱལ་ཁབ་ཀྱི་སྤུང་ཐང་རྫོང་གི་ནང་རྟེན་གཙོ་བོ་སྦེ་བཞུགས་ཡོདཔ་ཨིན་མས། ཤུལ་ལས་བོད་གཞུང་གི་རང་བྱུང་ཁར་ས་པཱ་ནི་འདི་ཧེ་མ་ཞབས་དྲུང་བོད་ལས་ཆིབས་ཁ་ལྷོ་ལུ་བསྒྱུར་ཏེ་འབྲུག་ལུ་བྱོན་པའི་སྐབས་ལུ་ བསྣམས་བྱོན་ཡོདཔ་ཤེས་ཏེ་བོད་ཀྱི་ནང་རྟེན་གཙོ་ཅན་འདི་ལོག་ལེན་ནིའི་དོན་ལུ་བོད་ཀྱི་དམག་མི་ཚུ་གིས་ནང་རྟེན་རང་བྱུང་ཁར་ས་པཱ་ནི་འདི་ ལོག་འཕྱོག་ནིའི་རྩིས་རྐྱབ་རུང་ཡང་ འབྲུག་པའི་དམག་མི་ལུ་གླགས་མ་འཁེལ་ནུག། ཞབས་དྲུང་རིན་པོ་ཆེ་གིས་འ་ནཱི་ནང་རྟེན་རང་བྱུང་ཁར་ས་པཱ་ནི་འདི་ནམ་མཁའ་དང་འདྲ་བའི་གཏེར་ཨིན་ཟེར་གསུངས་ཡོདཔ་ལས་ རང་བྱུང་ཁར་ས་པཱ་ནི་འདི་མཇལ་བ་ཅིན་འཕགས་པ་སྤྱན་རས་གཟིགས་སྐུ་དངོས་མཇལ་བའི་ཁྱད་ཆོད་ཟེར་ཨིན་མས།
ནང་རྟེན་དེ་གི་སྐུ་མདུན་ལུ་དད་པ་ཐུན་མོང་མ་ཡིན་པའི་སྒོ་ལས་སྨོན་ལམ་བཏབ་པ་ཅིན་ ཧེ་མ་ལོ་ངོ་མང་རབས་ཅིག་གི་རིང་ལུ་བསགས་ཡོད་པའི་སྡིག་སྒྲིབ་ཚུ་དག་སྟེ་ ཚེ་འདིར་བསོད་ནམས་བསགས་ཏེ་བདེ་སྐྱིད་ཕུན་སུམ་ཚོགས་པའི་རྒྱུ་མ་ནོར་བ་ཨིནམ་མ་ཚད་ ཚེ་ད་རེས་ཕྱི་ནང་གསང་གསུམ་གྱི་འགལ་རྐྱེན་བར་ཆད་ཚུ་ཞི་སྟེ་ མི་ཚེ་བདེ་སྐྱིད་ཀྱི་ངང་ལུ་ཡུན་རིང་འཚོ་སྟེ་ཚེ་ཕྱི་མ་མཐོ་རིས་ལྷ་དང་མའི་གོ་འཕང་ཐོབ་སྟེ་ མཐར་ཐུག་སངས་རྒྱས་ཀྱི་གོ་འཕང་འཐོབ་ཚུགས་ཟེར་ཨིན་མས། དེ་ཡང་ཧ་ལས་སི་སི་སྦེ་སྤྱི་ལོ་ ༢༠༠༠ ལུ་ནང་རྟེན་རང་བྱུང་ཁར་ས་པཱ་ནི་འདི་རྩིསཔ་སངས་ཆུང་དང་ཁོ་གི་སྡིག་གྲོགས་ཀུན་ལེགས་ཀྱིས་སྤུ་ན་ཁ་རྫོང་ལས་ཨརཝ་རྐྱབ་སྟེ་ ཕུན་ཚོགས་གླིང་བརྒྱུད་དེ་རྒྱ་གར་གྱི་ས་མཚམས་ཀྱི་ས་གནས་བརྒལ་ཏེ་བཙོང་པར་འབག་ཡོདཔ་ཨིན། ཨིན་རུང་ཡང་ལྷ་དང་བླམ་དེ་ལས་དཀོན་མཆོག་གསུམ་གྱིས་ཐུགས་རྗེ་དང་ མི་སེར་ཡོངས་ཀྱི་བསོད་ནམས་ལུ་བརྟེན་ཏེ་ནང་རྟེན་རང་བྱུང་ཁར་ས་པཱ་ནི་འདི་ ཨརཝ་གིས་རྩ་ལས་བཙོང་མ་ཚུགས་པར་ལོག་ཚོགས་འཛོམས་ཀྱི་ཁང་མིག་གི་སྐོ་ཁར་གོ་ལ་དམརཔོ་གིས་སྤུར་ཏེ་བཞག་ཡོདཔ་མཐོང་སྟེ་ལོག་ཐོབ་ཡོདཔ་ཨིན་མས། དེ་གིས་འབྲུག་མི་ཆེ་འབྲིང་ཆུང་གསུམ་ལུ་དཀོན་མཆོག་གསུམ་དང་ཆོས་སྲུང་ཚུ་ལུ་བློ་གཏད་དང་ཡིད་ཆེས་ཧེང་སྐལ་ར་སྦོམ་བྱིན་ཡོདཔ་ཨིན་མས།
དེ་ཡང་ཉེས་ཅན་མི་འདི་སྲུང་རྒྱབ་ཨིན་རྫུ་བཏབ་སྟེ་ནང་རྟེན་རང་བྱུང་ཁར་ས་པཱ་ནི་འདི་ དགེ་སློང་ཚུ་ཉལ་སྡོདཔ་ད་ལུ་ཨརཝ་རྐྱབ་འབག་ཡོདཔ་ཨིན་མས། ཉེས་ཅན་འདི་རྒྱལ་ཁབ་ཀྱི་ཕྱི་ཁར་ཡོད་པའི་ཅ་སྙིང་ནག་ཚོང་པ་འབད་སར་ ནང་རྟེན་འདི་ཕྱི་ཁར་བཙོང་ནིའི་ཁ་བཟེད་ཡོད་མི་འབད་སར་ལྟ་བར་འགྱོཝ་ད་ ནག་ཚོང་པ་དེ་གིས་ཁོང་ར་ཆ་ཁྱབ་ཀྱི་ཕྱད་ནིའི་ས་གོ་ཁར་འོང་མ་བཏུབ་ཨིན་མས། ལྷ་དང་བླ་མའི་མཐུ་དང་ནུས་པ་ལུ་བརྟེན་ཏེ་ནང་རྟེན་རང་བྱུང་ཁར་ས་པཱ་ནི་འདི་ གཞན་ཕྱིའི་རྒྱལ་ཁབ་ནང་ལུ་མ་ཤོརཝ་ཨིན་མས།
༼རྩོམ་ཡིག་འདི་སྲོལ་འཛིན་དང་རྫོང་ཁ་གོང་འཕེལ་ལས་ཁུངས་ཀྱི་སྐད་ཡིག་ཞིབ་འཚོལ་དང་ལས་རིམ་སྡེ་ཚན་གྱི་ཞལ་འདེབས།༽
Source : Department of Culture and Dzongkha Development.
རྒྱབ་རྟེན་དཔེ་ཐོ།
[ཞུན་དག]༡. བྷུ་དིསི་ལཕ། གནམ་ལོ་མེད། སྤྱི་ལོ་ ༢༠༢༢། རང་བྱུང་ཁར་ས་པཱ་ནི། མི་སྡེ་བརྡ་བརྒྱུད་ཕེསི་བྷུག།