ཤ་ཨ་ལམ། མ་ལེ་ཤི་ཡ། Sha alam, Malaysia

ཤ་ཨ་ལམ་གྱི་གྲོམ་སྡེ་ཡིག་ཚང་།

༉ ཤ་ཨ་ལམ་འདི་མ་ལེ་ཤི་ཡ་གི་མངའ་སྡེ་སེ་ལེང་གོར་གྱི་མངའ་སྡེའི་ལྟེ་བ་ཅིག་ཨིན། ཤ་ཨ་ལམ་འདི་ པེ་ཏ་ལིང་གི་རྫོང་ཁག་ནང་ཁྱབ་ཆེཝ་སྦེ་ཆགས་ཏེ་ཡོདཔ་དང་ ཁྱབ་ཆུང་སུ་ཅིག་ ཀལང་རྫོང་ནང་ལུ་སྦེ་ཡང་ཆགས་ཏེ་ཡོདཔ་ཨིན། སྤྱི་ལོ་ ༡༩༥༧ ལུ་བིརི་ཊིཤ་ལས་རང་དབང་ཐོབ་ཞིནམ་ལས་ཚུར་ ཤ་ཨ་ལམ་འདི་མ་ལེ་ཤི་ཡ་གིས་ འཆར་གཞི་བརྩམས་ཏེ་གྲུབ་པའི་་འགོ་ཐོག་གི་ཚུལ་མཐུན་གྱི་ཁྲོམ་ཅིག་ཨིན། ཤ་ཨ་ལམ་འདི་ སྤྱི་ལོ་ ༡༩༦༣ ལུ་ སེ་ལེང་གོར་གྱི་བདག་སྐྱོང་གི་ས་གོ་ལྟེ་བ་གསརཔ་སྦེ་འགོ་བཙུགས་ཡོདཔ་ཨིན།  སྤྱི་ལོ་ ༡༩༧༤ ལུ་ཀོོ་ལ་ལམ་པུར་འདི་དབུས་གཞུང་གི་ས་ཁོངས་ཅིག་སྦེ་གྱུར་ཞིནམ་ལས་ཚུར་ ཤ་ཨ་ལམ་གྱི་ཁྲོམ་ཚོགས་འདི་ སྤྱི་ལོ་ ༡༩༧༨ སྤྱི་ཟལ་ ༡༢ པའི་ཚེས་ ༧ ལུ་ཤ་ཨ་ལམ་གྱི་ཁ་ཆེའི་དབུ་ཁྲིད་ཀྱི་གནང་བ་དང་འཁྲིལ་ཏེ་ སེ་ལེང་གོར་གྱི་ལྟེ་བ་སྦེ་ཆ་འཇོག་གྲུབ་གནང་ནུག། ཁྲོམ་དེ་གི་འགོ་ཐོག་གི་སའི་རྒྱ་ཁྱོན་འདི་ ཀི་ལོ་མི་ཊར་གྲུ་བཞི་ ༤༡.༦༨ ཨིནམ་དང་ དེ་ཡང་ཁྲོམ་སྡེའི་ཚོགས་སྡེ་གིས་སྐྱོང་གནང་ཡོདཔ་ཨིན། ཤ་ཨམ་འདི་ ཁྲོམ་ཚོགས་སྦེ་ སྤྱི་ལོ་ ༢༠༡༠ སྤྱི་ཟླ་ ༡༠ པའི་ཚེས་ ༡༠ ལུ་ ཁྲོམ་དཔོན་ ད་ཏོ་ཧ་ཇི་ཨ་བུ་སུ་ཇག་ཧ་ཇི་མ་ཧུད་གིས་ ཆ་འཇོག་གནང་ཡོདཔ་ཨིན།

ལུང་པ་འདི་ ལོ་ངོ་བཅུ་ཕྲག་གི་རིང་ ཏ་ལའི་ཤིང་གི་མར་ཁུ་དང་ འགྱིབ་ཤིང་འཐོན་སའི་ཡུལ་ཅིག་སྦེ་ཡོདཔ་ཨིན། ས་གནས་ཀྱི་མིང་ལུ་ཤ་ཨ་ལམ་ཟེར་བཏགས་དགོ་མི་འདི་ དེ་བསྒང་སེ་ལེང་གོར་དབུ་ཁྲིད་ ཁེ་ཆེའི་ས་གནས་ཀྱི་དབུ་ཁྲིད་ ས་ལ་ཧུ་ཌི་ཨབ་དཱུལ་ཨ་ཟིཟ་ཤ་གིས་ ཁོ་རའི་ཡབ་བཤགས་མི་ ཁ་ཆེའི་དབུ་ཁྲིད་ཨ་ལམ་ཤ་ལུ་ གུས་བཏུད་ཀྱི་ཚུལ་སྦེ་ ཁོ་གི་མཚན་ལས་ལྟ་འདྲངས་ཏེ་བཏགས་ཡོདཔ་ཨིན། ཁྲོམ་འདི་ ཀོོ་ལ་ལམ་པུར་ལས་ཀི་ལོ་མི་ཊར་ ༢༥ གི་ས་ཁར་ཆགས་ཏེ་ཡོདཔ་ཨིནམ་དང་ འགྲོ་འགྲུལ་འབད་ཅིན་ སྐར་མ་ ༢༠ དེ་ཅིག་ནང་ལྷོད་ཚུགས་དོ་ཡོདཔ་ཨིན།  

སེ་ལེང་གོར་གྱི་སྦུག་ལུ་ར་ཡོད་པའི་ཤ་ཨམ་འདི་ ཧ་ལས་སི་སི་དང་དགའ་ཉམས་ཆེ་བའི་ཁྲོམ་ཅིག་ཨིན། ལུང་པའི་ནང་ དེང་སང་དང་དང་ཕུའི་ལམ་སྲོལ་ཚུ་སླ་བསྲེ་རྐྱབ་པའི་ཚོར་བ་དང་ཉམས་མྱོང་ཚུ་སྐོར་སོར་ཡི་ར་ལེན་ཚུགས་ནི་ཨིན་པས། ཁྲོམ་ནང་ ཧ་ལས་སི་སི་གི་གཞི་བཀོད་མ་འདྲཝ་རྣམ་པ་སྣ་ཚོགས་སྦེ་མཐོང་ནི་ཡོདཔ་ཨིན། གཞི་བཀོད་ཡ་མཚན་ཆེ་ཏོག་ཏོ་ཅིག་འདི་ ཁེ་ཆེའི་དབུ་ཁྲིད་ སུ་ལ་ཧུ་ཌིན་ཨབ་དཱུལ་ཨ་ཟིཟ་གི་ཁ་ཆེའི་ལྷ་ཁང་འདི་ཨིན། དེ་བཟུམ་སྦེ་ མ་ལེ་ཤི་ཡ་གི་སའི་ཆགས་ལུགས་མ་འདྲཝ་མ་འདྲཝ་ཚུ་ལྟ་ཚུགས་པའི་ཁར་ ཆགས་ཐངས་མ་འདྲཝ་ལས་བཟོ་སྐྲུན་འབད་བའི་ སེམས་གཡེང་སའི་གཞི་མ་འདྲཝ་ཚུ་ཚུ་མཐོང་ཚུགས་ནི་ཨིན་པས། མཚོ་ཡོད་པའི་ལྡུམ་ར་ དང་ ཆུ་རྩེད་རྩེ་སའི་ས་ཁོངས་ པར་རིས་འགྲོམས་སྟོན་ཁང་ ཚོང་དང་ཅ་ཆས་ཀྱི་མཛོད་ཁང་རྣམ་པ་ས་སྣ་ཚོགས་ ཁ་བའི་རྩེདམོ་རྩེ་སའི་ས་ཁོངས་ ཟ་འཐུང་ཡོད་པའི་ཟ་ཁང་ ཚོན་ཁྲ་སྣ་ཚོགས་སྟོན་པའི་འཕྲུལ་རིག་གི་པར་སྟོན་སའི་ས་ཁོངས་ མཐའ་རྫིང་ རྒྱལ་ཡོངས་སྐྱེ་ལྡན་སྐྱེད་ཚལ་ ཁ་ཆེའི་དབུ་ཁྲིད་སཱུལ་ཏཱན་ཨ་ལམ་ཤ་གི་ལྷ་ཁང་ ཤ་ཨ་ལམ་གྱི་རྩེད་ར་ ནུབ་བོའི་ཚོང་ལམ་ སྤྲོང་སང་དང་ སེམས་ཅན་གུར་བཞོན་ནི་ལ་སོགས་པའི་མཐུན་རྐྱེན་ཚུ་ ཚང་སྟེ་ཡོདཔ་ཨིན།

མ་ལེ་ཤི་ཡ་གི་ཕྱོགས་གསུམ་ཆུ་གླིང་གི་ཁྲོམ་ཚོགས་གཞན་མི་ཚུ་བཟུམ་སྦེ་ར་ ཤ་ཨ་ལམ་ལུ་ཡང་ ཚ་དྲོད་ལྡན་པའི་ཆརཔ་ཡོད་པའི་གནམ་གཤིས་ཚོར་དོ་ཡོདཔ་ཨིན། དྲོད་ཤུགས་ཀྱི་ཐད་ཁར་ ཡུདཔ་ཅིག་ལོ་གཅིག་ར་ ཅོག་འཐདཔ་འཚམས་སྦེ་ར་སྡོད་དོ་ཡོདཔ་དང་ དྲོག་ཤུགས་ཀྱི་སྤྱིར་སྙམས་ཀྱི་ཚད་གཞི་འདི་ མཐོ་ཤོས་ཌིག་རི་སེལ་སིཡསི་ ༣༡.༩ དང་དམའ་ཤོས་ ༢༣.༢  ཨིན་པས། ཁྲོམ་ཚོགས་འདི་གི་དྲོད་དྲོ་ཤོས་ར་ སྤྱི་ཟླ་ ༣ པའི་ནང་ཨིནམ་དང་ ཆརཔ་མང་ཤོས་དང་ཤུགས་སྦེ་རྐྱབ་པའི་དུས་ཚོད་འདི་ སྤྱི་ཟླ་ ༡༡ པའི་ནང་ཕོགཔ་དགོ་མི་དེ་ཡང་ བྱང་ཤར་གྱི་རླུང་ཆར་འདི་སྤྱི་ཟླ་ ༡༠ ལས་ ༣ པའི་ནང་འཁོད་ལུ་འོང་མི་དང་འབྲེལ་ཏེ་ཨིན་པས། ལུང་པ་དེ་ནང་ རློན་གཤེར་འདི་ ཀྲིག་ཀྲི་ཅིག་ཡོདཔ་ཨིན་མས།

༼རྩོམ་ཡིག་འདི་སྲོལ་འཛིན་དང་རྫོང་ཁ་གོང་འཕེལ་ལས་ཁུངས་ཀྱི་སྐད་ཡིག་ཞིབ་འཚོལ་དང་ལས་རིམ་སྡེ་ཚན་གྱི་ཞལ་འདེབས།༽

རྒྱབ་ཁུངས་དཔེ་དེབ།