ས་བཅུད་བུམ་གཏེར། Ι Fertility vase
ས་བཅུད་བུམ་གཏེར་སྐོར།
[ཞུན་དག]
ཕྱི་སྣོད་ཀྱི་འཇིག་རྟེན་དང་ ནང་བཅུད་ཀྱི་སེམས་ཅན་ཆ་མཉམ་ལུ་ མི་མཐུན་པའི་བགེགས་རིགས་སྟོང་ཕྲག་བརྒྱད་བཅུ། དུས་མིན་འཆི་བ་བཅོ་བརྒྱད། ནད་རིགས་བཞི་བརྒྱ་རྩ་བཞི་ལ་སོགས་པ་གྱངས་ཀྱི་མ་ཆོདཔ་སྦེ་འདུག། རྒྱལ་བ་ཚུ་ཐབས་མཁས་ཐུགས་རྗེ་ཅན་འབདཝ་ལས་ རྐྱེན་ངན་ཚུ་དང་བསྟུན་བཟློག་ཐབས་མཛད་གནང་ནུག། ཉེས་པའི་རིགས་ཚུ་ཞི་ཚུགས་མི་དང་ དགེ་བ་དང་ལེགས་པ་ཚུ་འཕེལ་བའི་རྒྱུ་གཅིག་ ས་བཅུད་བུམ་གཏེར་ཨིན། དེའི་རྫས། དགོས་པ། ལག་ལེན། ཕན་ཡོན་ཚུ་གི་སྐོར་ མཁས་པ་ཚུ་གི་གསུངས་ལས་དྲང་ནི་ཨིན།
དེའི་རྫས།
[ཞུན་དག]ས་བཅུད་བུམ་གཏེར་ཟེར་ཀུན་གྱི་མཐོང་སྣང་ལུ་ རྒྱུ་སྣ་ཚོགས་ལས་བསྒྲུབས་པའི་ མཆོད་ཆ་ བུམ་པའི་བཟོ་དབྱིབས་དང་འདྲ་བ་ ཁ་རྒྱན་མེད་པ་ དར་གོས་ཀྱིས་ཁ་དཀྲིས་ཏེ་ཡོད་མི་ཅིག་ལུ་ ངོས་འཛིན་འབད་དེ་ཡོད། ལེགས་ཤོམ་སྦེ་དབྱེ་བ་དཔྱད་དེ་བལྟ་བ་ཅིན་ དེ་ཚུ་ག་ནི་བ་ཟབ་པའི་གཏེར་ཆོས་ལས་བྱུང་བའི་ འགྲོ་བའི་ཕན་བདེ་གི་གཞི་མ་ དགོས་འདོད་ཀྱི་ནོར་བུ་ལས་གཞན་ཅིག་མེན་པས།
དགོས་པ།
[ཞུན་དག]ས་བཅུད་བུམ་གཏེར་གྱི་དོན་ལུ་རྒྱུ་དངོས་ལེ་ཤ་ར་ཚང་སྟེ་འོང་ནི་ཨིན་མི་ཡང་། སྣོད་བཅུད་ཉེས་པ་ཞི་བར་བྱེད་པའི་གཏེར་བུམ་སྒྲུབ་ཐབས་ཀྱི་གཞུང་དང་ལག་ལེན་ནོར་བུ་ཀེ་ཏ་ཀའི་ཕྲེང་བ། (འཇམ་དགོན་ཀོང་སྤྲུལ། གནམ་ལོ་མེད། ༢༠༡༩ ཤོག་གྲངས་༢ ལས) ‘‘ཀུན་ལ་གཅེས་པའི་གསང་སྔགས་འདི གསེར་སོགས་རིན་པོ་ཆེ་ཡིས་བྲི’’ ཟེར་གསུངས་དོ་བཟུམ་ བུམ་གཏེར་གྱི་ནང་ན་ རིན་ཆེན་གསེར་དངུལ། བྱུ་རུ་ཚུ་གིས་བྲིས་པའི་གཟུངས་སྔགས་འོང་། དེ་ལས་སྨན་སྣ། རིན་པོ་ཆེ་གི་རིགས། དར་གོས་བཟང་པོའི་རིགས། འབྲུ་སྣ་གཙང་མའི་རིགས། གནས་ཆེན་ཚུ་གི་ས་སྣ་ཚུ་ བུམ་གཏེར་གྱི་ནང་ གཟུངས་ཀྱི་གྲངས་སུ་ཕུལ་ཏེ་འོང་། བུམ་པ་ཡང་ འབྲུ་བྲེ་གང་ཙམ་ཤོང་མི་ཅིག་དགོཔ་ཨིན་པས། ཀླུ་ཡི་བུམ་གཏེར་ཨིན་པ་ཅིན་ བུམ་པ་ཡང་ལོགས་སུ་དགོཔ་ཡང་། ཀླུའི་བུམ་གཏེར་དགོས་འདོད་བུམ་བཟང་སྐྱེ་དགུ་དགའ་བྱེད། (ཀུན་མཁྱེན་འཇམ་དབྱངས་བཞད་པ། གནམ་ལོ་མེད། ༡༠༡༧ ཤོག་གྲངས་༤ ལས) ‘‘བུམ་པའི་རྒྱུ་སོགས་རྒྱུད་ལྟར་རིན་པོ་ཆེར་བྱས་པ་མཛོད་བུམ་སོགས་ལ་ལེགས་ཀྱང་། ཆུ་གཏེར་དང་ས་གཏེར་ལ་ཅུང་མི་ལེགས་པར་གོ་ཞིང་།’’ ཟེར་གསུངས་དོ་བཟུམ་ དེ་བསྟུན་གྱི་བུམ་པ་དང་ རྫས་སོ་སོ་འོང་དགོཔ་ཨིན་པས།
ལག་ལེན།
[ཞུན་དག]བུམ་གཏེར་གྱི་ལག་ལེན་ཡང་ འགྲོ་བ་སོ་སོའི་དགོས་པ་དང་བསྟུན་ཏེ་ ཁྱིམ་གྱི་རྨང་གཞི། ཆུའི་རྐ། ཟམ་པ། ས་རུད་ཆད་ས། བྱག་དང་རི་ཚུ་ནང་བཙུག་དོ་ཡོདཔ་མས། ད་རུང་མི་མང་ཤོས་ཀྱིས་ར་ མཆོད་པའི་རྫས་སྦེ་རང་སོའི་ཁྱིམ་ནང་ཡང་བཞག་དོ་ཡོདཔ་ཨིན། བུམ་གཏེར་ཚུ་ག་ཏེ་ར་ལག་ལེན་འཐབ་རུང་ ལག་ལེན་གྱི་ལུང་དང་མན་ངག་ལས་ མ་འགལ་བར་བེད་སྤྱོད་འབད་དགོ། འགྲོ་འདུལ་པད་རྒྱལ། (ཨེ་མ་ཧོའི་རིག་མཛོད། https;//awamho.com 2020/3/14། ལས་ བཀྲིས་གཡང་ཆགས་རྒུད་སྐྱོན་མ་འགོད་པའི གཡང་ཀྱི་རྫས་ཀྱིས་ཕྱུར་བུར་བཀང་བ་ཡི བཀྲིས་བུམ་བཟང་བཀྲིས་གཡང་རྭའི་དབུས སྐུ་གསུང་ཐུགས་ཀྱི་རྟེན་བཅས་མཆོད་པས་སྤྲས ཟེར་གསུངས་དོ་བཟུམ་དེ་ཡང་རྒྱུ་རྫས་ཚུ་ཕུན་སུམ་ཚོགས་པའི་ཐོག་ མཚན་ཉིད་ལྡན་པའི་བླ་མ་སློབ་དཔོན་ཚུ་གིས་ རབ་གནས་གནང་སྟེ་འཕུལ་དགོཔ་ཨིན། དེ་ཡང་བུམ་གཏེར་བཞུགས་གསོལ་གྱི་ཆོ་ག་ཚུ་ རང་སོའི་མན་ངག་དང་བརྒྱུད་པའི་ལག་ལེན་ལྟར་ མཛད་དགོཔ་ཨིན།
བུམ་གཏེར་ག་ཅི་ར་ཨིན་རུང་ རྫས་ཚུ་མི་གཙང་བ་དང་སླ་མ་བསྲེསཔ། སེར་སྣ་གི་དྲི་མ་དང་བྲལ་བ། དུག་རིགས་དང་རྩ་བ་ལས་ སླ་བསྲེས་མེདཔ་ཅིག་དགོ། དེ་ལས་རིན་པོ་ཆེ་མིན་པའི་ རག། ཞ་རྩི། ལྕགས་ཀྱི་རིགས་ཚུ་ རྫས་སྦེ་མི་བཏུབ་དོ་མས། ལྷག་པར་དུ་ ཀླུའི་བུམ་གཏེར་གྱི་དོན་ལུ་ ག་དེ་ཟབ་ཟབ་མཛད་དགོཔ་ཨིན་པས། དེ་མིན་ ཀླུ་ཚུ་ལུ་གནོད་ནི་ཨིནམ་ལས་ ནད་དང་དབུལ་ཕོངས་ཀྱི་དཀའ་ངལ་ཚུ་ ངམ་ངམ་ཤུགས་ཀྱིས་འབྱུང་ནི་ཨིན།
ཕན་ཡོན་ཚུ་གི་སྐོར་ལས།
[ཞུན་དག]ས་བཅུད་བུམ་གཏེར་གྱི་ཕན་ཡོན་རྒྱ་ཆེཝ་སྦེ་ཡོད་ཚུལ་ཡང་། སྣོད་བཅུད་ཉེས་པ་ཞི་བར་བྱེད་པའི་གཏེར་བུམ་སྒྲུབ་ཐབས་ཀྱི་ གཞུང་དང་ལག་ལེན་ནོར་བུ་ཀེ་ཏ་ཀའི་ཕྲེང་བ། (འཇམ་དགོན་ཀོང་སྤྲུལ། གནམ་ལོ་མེད། ༢༠༡༩ ཤོག་གྲངས་༢ ལས) ‘‘མཆོད་པའི་གྲལ་ལམ་མཛོད་ཕུགས་བཞུགས འདུལ་ཁྲིམས་དམ་ཚིག་ཉམས་པ་སོར་ཆུད་ཅིང་ རིམ་གཉིས་དགེ་སྦྱོར་ནུས་པ་འཕེལ་བར་བྱེད’’ ཟེར་གསུངས་དོ་བཟུམ་ རང་སོའི་ཁྱིམ་ན་བཞག་རུང་ འདུལ་ཁྲིམས་ཉམས་པ་ལས་སོར་ཆུད་ནི་དང་། དགེ་སྦྱོར་ཚུ་ངང་གིས་འཕེལ་ནིའི་དགོས་པ་ཚུ་ཡོདཔ་ཨིན་པས། དེ་ལས་ཆུའི་རྐ་འགོར་བཞག་པ་ཅིན་ ཆུ་མི་བསྐམ་ནི་དང་། ས་རུད་མི་ཆད་ནི། འདོད་ཡོན་འཕེལ་ནི་ལ་སོགས་པའི་ ཕན་ཡོན་ཚུ་ཡོདཔ་ཨིན་པས།
ང་བཅས་འགྲོ་བ་ག་ར་ལུ་བདེ་བ་དགོཔ་དང་ སྡུག་བསྔལ་མ་དགོཔ་ཨིནམ་བཞིན་དུ་ ཞི་བདེའི་འབྱུང་གནས་ཀྱི་རྒྱུ་ བུམ་གཏེར་ཚུ་མཆོད་པའི་རྫས་སྦེ་ཡི་ཆེས་བསྐྱེད་དགོ། ཆར་ཆུ་དུས་སུ་འབབ་ནི་དང་ ལོ་ཕྱུགས་རྟག་ཏུ་ལེགས་པ་ཚུ་ཡང་ བུམ་གཏེར་ཚུ་ལུ་བརྟེན་ཏེ་འབྱུང་ནི་ཨིན། དེ་འབདཝ་ལས་དགོས་པ་དང་ཕན་ཡོན་ཚུ་ ཧ་གོ་བའི་ཐོག་ལས་ རང་གི་རྒྱུ་སྟོབས་དང་འཁྲིལ་ བུམ་གཏོར་ཚུ་མཁོ་སྒྲུབ་འབད་དེ། མཆོད་པའི་རྫས་སྦེ་བཞག་ནི། དེ་ལས་རང་སོའི་སྡོད་སའི་ཁྱིམ་ཚུ་རྐྱབ་པའི་སྐབས་བཙུག་ནི་ཚུ་ ག་ར་གིས་མཛད་དགོཔ་ཨིན་ནོ།།
༼རྩོམ་ཡིག་འདི་སྲོལ་འཛིན་དང་རྫོང་ཁ་གོང་འཕེལ་ལས་ཁུངས་ཀྱི་སྐད་ཡིག་ཞིབ་འཚོལ་དང་ལས་རིམ་སྡེ་ཚན་གྱི་ཞལ་འདེབས།༽
Source : Department of Culture and Dzongkha Development.
རྒྱབ་རྟེན་དཔེ་ཐོ།
[ཞུན་དག]༡༽ ཀུན་མཁྱེན་འཇམ་དབྱངས་བཤད་པ། (༢༠༡༧) ཀླུའི་བུམ་གཏེར་དགོས་འདོད་བུམ་བཟང་སྐྱེ་དགུ་དགའ་བྱེད། མེད།
༢༽ འཇམ་དགོན་ཀོང་སྤྲུལ། (གནམ་ལོ་མེད། ༢༠༡༩ སྣོད་བཅུད་ཉེས་པ་ཞི་བར་བྱེད་པའི་གཏེར་བུམ་སྒྲུབ་ཐབས་ཀྱི་གཞུང་དང་ལག་ལེན་ནོར་བུ་ཀེ་ཏ་ཀའི་ཕྲེང་བ།