སྒྲོལ་ཆོག་བསྡུས་པ་དོན་གཉིས་ལྷུན་གྲུབ་མ།

༄༅། །སྒྲོལ་ཆོག་བསྡུས་པ་དོན་གཉིས་ལྷུན་གྲུབ་མ་བཞུགས་སོ།།

༄༅། །ན་མོ་ཨརྱ་ཏཱ་རེ་ཡ། _{ཞེས་འཕགས་མ་སྒྲོལ་མ་ལ་ཕྱག་འཚལ་ནས། འདིར་སྒྲོལ་མ་འབུམ་ཐེར་སོགས་ལ་ཉེ་བར་མཁོ་བ་སྒྲུབ་ཐབས་རྒྱ་མཚོ་ལས་བྱུང་བའི་སྒྲོལ་ལྗང་གི་རྒྱུན་ཁྱེར་མདོར་བསྡུས་སུ་དགོད་པ་ལ་ཐོག་མར་སྐྱབས་སེམས་སངས་རྒྱས་ཆོས་ཚོགས་མ་དང་། ཚད་མེད་བཞི་སྔོན་དུ་བཏང་ནས། མདུན་རྟེན་བསྐྱེད་པ་ནི།} རང་གི་མདུན་མཁར་སྐད་ཅིག་གིས། །མཆོད་སྤྲིན་རྒྱ་མཚོ་འཁྲིགས་པའི་དབུས། །པཾ་ལས་པདྨའི་སྡོང་པོ་དང་། །ཨ་ལས་ཟླ་བའི་གདན་གྱི་སྟེང་། །ཏཱཾ་ལས་ཨུཏྤལ་སྔོན་པོ་ཡི། །ལྟེ་བར་ཧཱུྃ་ཡིག་མཚན་པ་ལས། །འོད་འཕྲོས་དོན་གཉིས་ཡོངས་གྱུར་བས། །རྗེ་བཙུན་འཕགས་མ་སྒྲོལ་མ་ནི། །ལྗང་སྔོན་ཞལ་གཅིག་ཕྱག་གཉིས་ཀྱི། །གཡས་པས་བདག་དང་བསྲུང་བྱ་ལ། །མི་འཇིགས་མཆོག་སྦྱིན་ཕྱག་རྒྱ་དང་། །གཡོན་པས་དཀོན་མཆོག་གསུམ་མཚོན་གྱི། །ཕྱག་རྒྱས་ཨུཏྤལ་སྡོང་བུ་འཛིན། །མཚན་དཔེའི་ལང་ཚོ་རྒྱས་པའི་སྐུ། །མཛེས་སྡུག་འཆི་མེད་ན་ཆུང་བཞིན། །རྒྱན་དང་ལྷ་རྫས་དར་གྱིས་ཀླུབས། །ཟླ་བའི་རྒྱབ་ཡོལ་ལ་བརྟེན་ནས། །ཞབས་གཉིས་སྐྱིལ་ཀྲུང་ཕྱེད་སྟབས་ཀྱིས། །པད་ཟླའི་གདན་ལ་དགྱེས་བཞིན་བཞུགས། །མཐའ་བསྐོར་ཉིད་ལས་མི་གཞན་པའི། །འཁོར་ཚོགས་རྣམ་འཕྲུལ་ཉེར་གཅིག་རྣམས། །མ་འདྲེས་གསལ་བའི་གནས་གསུམ་དུ། དེ་ཉིད་གསུམ་གྱིས་མཚན་པ་དང་། །ཐུགས་ཀར་ཟླ་སྟེང་ཧཱུྃ་ལྗང་ཁུ། །དེ་ལས་འཕྲོས་པའི་འོད་ཟེར་གྱིས། །ལྷོ་ཕྱོགས་གཡུ་ལོ་བཀོད་པའི་ཞིང་། །སེང་སྡེང་ནགས་ཀྱི་སྐྱེད་ཚལ་ནས།། འཕགས་མ་འཁོར་བཅས་སྤྱན་དྲངས་གྱུར། །པོ་ཏ་ལ་ཡི་གནས་མཆོག་_{སོགས་ནས།} སྒྲོལ་མ་འཁོར་བཅས་གཤེགས་སུ་གསོལ། _{།ཞེས་སྤྱན་དྲངས་ནས།} བདག་དང་འགྲོ་ལ་_{སོགས་ནས།} པདྨ་ཀ་མ་ལ་ཡེ་ཧཱུཾ་གྱིས་གདན་ཕུལ། རྗེ་བཙུན་འཕགས་མ་སྒྲོལ་མ་དང་སོགས་ནས། འདྲེན་པའི་དཔལ་དུ་བདག་གྱུར་ཅིག། _{ཅེས་པའི་བར་གྱིས་ཕྱག་མཆོད་ཡན་ལག་བདུན་པ་བྱ། དེ་ནས་མཎྜལ་འབུལ་བར་སྤྲོ་ན།} ཞིང་ཁམས་རྒྱ་མཚོ་སོགས་ནས། འཕགས་མ་འཁོར་བཅས་མཆོད་པས་མཉེས་གྱུར་ཅིག། ། ཨོ་ཨརྱ་ཏཱ་རེ་ས་པ་རི་ཝ་ར་རཏྣ་མཎྜ་ལ་པཱུ་ཛ་ཧོ༔ _{ཞེས་བརྗོད། དེ་ནས་}ལྷ་དང་ལྷ་མིན་_{སོགས་སྔོན་དུ་བཏང་ནས་རྩ་བའི་སྔགས་ཀྱི་བསྟོད་པ་བྱ་སྟེ།} ཨོ་རྗེ་བཙུན་མ་_{སོགས་ནས། ཕྱག་འཚལ་ཉེར་གཅིག་མ་གང་འོས་སྐབས་བསྟུན་གྱིས་ཐུན་གྲངས་བཟུང་། དེནས་ཐུན་བསྡུ་བའི་ཚེ།} ལྷ་མོ་ལ་གུས་_{སོགས་ནས།} བགེགས་རྣམས་མེད་ཅིང་སོ་སོར་འཇོམས་གྱུར་ཅིག _{།ཅེས་པའི་བར་གྱིས་ཕན་ཡོན་ལན་གཅིག་བརྗོད་པའི་མཐར། བཟློག་པ་བྱ་བ་འདོད་ན།} ན་མོ༑ འཕགས་མ་སྒྲོལ་མ་འཁོར་བཅས་ལ། །གསོལ་བ་བཏབ་པའི་བྱིན་རླབས་ཀྱིས། །བདག་དང་རྒྱུ་སྦྱོར་ཡོན་བདག་གི། །སྔོན་ལས་ཕྲལ་རྐྱེན་ལས་བྱུང་བའི། །གློ་བུར་བརྒྱད་ཅུ་རྩ་གཅིག་བཟློག །ཡེ་འདྲོག་སུམ་བརྒྱ་དྲུག་ཅུ་བཟློག །བཞི་བརྒྱ་རྩ་བཞིའི་ནད་རྣམས་བཟློག །སྟོང་ཕྲག་བརྒྱད་ཅུའི་གདོན་རྣམས་བཟློག །ཡས་བདུད་གཡོས་དང་མས་སྲི་ལངས། །ཕ་ཚན་རྒྱ་འདྲེ་ཐམས་ཅད་དང་། །མ་སྲུའི་བྱུར་འདྲེ་ཐམས་ཅད་བཟློག །ལོ་ཟླ་ཞག་དུས་ངན་པ་བཟློག །ཕུང་འདྲེ་ཐམས་ཅད་བཟློག་ཏུ་གསོལ། །སྲི་ལ་རྐུ་བ་བཟློག་ཏུ་གསོལ། །བྱིས་པའི་གདོན་རྣམས་ཞི་བར་མཛོད། །མི་ཁ་ཁ་མཆུ་མ་གཏོང་ཞིག། གཞན་གྱི་གཡུལ་ངོ་ཞི་བར་གྱིས། །བདག་གི་དམག་ཐབས་ལེགས་པར་མཛོད། །མྱོས་ཤིང་འཐིབས་པ་བསལ་བ་དང་། །ཉིན་གཅིག་ཉིན་གཉིས་ཉིན་གསུམ་པ། །རིམས་ནད་ཐམས་ཅད་ཞི་བར་མཛོད། །ཉམ་ང་འཚེ་བ་བཟློག་ཏུ་གསོལ། །ཡུལ་ཕྱོགས་དགེ་བར་མཛད་དུ་གསོལ། །དམ་ཆོས་རྒྱས་པར་མཛད་དུ་གསོལ། །འཐབ་རྩོད་ཞི་བར་མཛད་དུ་གསོལ། _{།དེ་ཡན་བཟློག་པ་ལན་གསུམ་བྱས་པའི་མཐར།} ལོ་བརྒྱ་འཚོ་དང་སྟོན་བརྒྱ་མཐོང་བ་དང་། །བཀྲ་ཤིས་རི་བོ་བཞིན་དུ་བརྟན་པ་དང་། །བསོད་ནམས་ཉི་འོད་བཞིན་དུ་འབར་བར་མཛོད། །མི་ཕྱེད་མི་གཞིག་ཀུན་གྱི་དངོས་གྲུབ་སྩོལ། _{།ཞེས་ལན་གཅིག་བརྗོད་པའི་རྗེས་སུ།} རྗེ་བཙུན་བཅོམ་ལྡན་འདས་མ་སོགས་ནས། ཡར་ངོའི་ཟླ་ལྟར་འཕེལ་ཞིང་རྒྱས་པར་མཛོད། །_{ཅེས་པའི་བར་གྱིས་འདོད་དོན་གསོལ་ནས།} མདུན་རྟེན་འོད་ཞུ་རང་ལ་ཐིམ། །རང་ཉིད་འཕགས་མའི་སྐུ་རུ་གྱུར། _{།ཅེས་རང་ཉིད་ལྷའི་ང་རྒྱལ་བཟུང་ནས།} ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། _{ཅི་ནུས་བཟླས་པའི་མཐར།} ལྷ་དང་རང་སེམས་དབྱེར་མེད་པར། །མ་བཅོས་གཉུག་མའི་ངང་དུ་བཞག། _{།དེ་ནས་ལྷའི་བསལ་སྣང་བསྡུས་ཏེ་དགེ་བ་བསྔོ།} རྒྱལ་བའི་དཀྱིལ་འཁོར་_{སོགས་ཀྱིས་སྨོན་ལམ་དང་། བདག་གིས་ཚེ་རབས་སོགས་ཀྱིས་བཀྲ་ཤིས་དང་། །དེ་ནས་}མི་འགྱུར་ལྷུན་པོ་_{སོགས་ཀྱིས་མཐའ་བརྒྱན་པར་བྱའོ། །ཞེས་པའང་དགེ་རིན་པས་སོ།།}