སྤ་རོ་རིན་སྤུང་རྫོང

Wikipedia ལས།
སྤ་རོ་རིན་སྤུང་རྫོང      Photo by: Keith Mason
སྤ་རོ་རིན་སྤུང་རྫོང      Photo by: Christopher Fynn
view of Rinpung Dzong from Tenchen Choeling Nunnery

སྤ་རོ་རིན་སྤུང་རྫོང - རྫོང སྤ་རོ་


སྤ་རོ་རྫོང་འདི་ ༡༦༤༤ ལུ་ ཞབས་དྲུང་ ངག་དབང་རྣམ་རྒྱལ་མཆོག་གི་ བཀའ་རྒྱ་དང་འཁྲིལ་ཏེ་ བཞེངས་ནི་འགོ་བཙུགས་ནུག། དྲགོས་དྲུང་ཆེན་སངས་རྒྱས་རྡོ་རྗེ་གིས་འབྲི་མི་ནང་རྫོང་གི་འོག་ལུ་ཡོད་མི་རྡོ་འདི་དུས་རབས་བརྒྱད་པའི་ནང་གུརུ་རིན་པོ་ཆེ་གིས་རིན་སྤ྄ང་ཟེར་བཏགས་གནངམ་བཞིན་དུ།་རྫོང་གཞི་འདི་གི་མིང་ཡང་རིན་སྤ྄ང་ཟེར་དར་ནུག།[༡]

༡༩༠༧ ལུ་ མེ་རྐྱེན་ལུ་བརྟེན་ གནོད་པ་འབྱུང་ཡོད་རུང་ ༡༨༩༧ ལུ་ ས་གཡོམ་རྐྱབས་ཏེ་ རྒྱལ་ཁབ་ཀྱི་ རྫོང་གཞི་གཞན་ཚུ་མེདཔ་གཏང་དེ་ར་འབད་རུང་ སྤ་རོ་རྫོང་འདི་ལུ་གནོད་སྐྱོན་ག་ནི་ཡང་མ་འབྱུངམ་ཨིན་མས།

སྤ་རོ་ རྫོང་གི་མིང་ངོ་མ་འདི་ རིན་སྤུང་རྫོང་ཟེར་སླབ་ཨིནམ་དང་ དེའི་དོན་དག་འདི་ རིན་ཆེན་སྤུངས་བཞག་ཡོད་པའི་རྫོང་ཟེར་ཨིན་མས། དུས་རབས་ ༡༥ པའི་ནང་ ཕ་ཇོ་འབྲུག་སྒོམ་བཞི་པོའི་ སློབ་མ་ རྒྱལ་མཆོག་དང་ རྒྱལ་འཛོས་སྤུན་ཆ་གཉིས་ སྤ་རོ་ལུ་སྡོད་ཡོདཔ་དང་ རྒྱལ་འཛོམས་གིས་ སྒང་ཏ་ཁ་ ལྷ་ཁང་ནང་ལུ་ གདན་ས་བཅག་ཡོདཔ་དང་ ཁོ་གི་སྤུན་ཆ་ རྒྱལ་མཆོག་དེ་ ཆོས་ལུགས་རིག་པ་ལྷཔ་ནིའི་དོན་ལུ་སོང་ཞིནམ་ལས་ ལོག་སྤ་རོ་ལུ་འོང་ནུག། རྒྱལ་མཆོག་གིས་ ཧུམ་རལ་དགོན་པ་ལུ་འབྱོན་ཏེ་ ལྷ་ཁང་ཆུང་ཀུ་གཅིག་བཞེངས་ཡོདཔ་དང་ ཁོ་གི་ སློབ་མ་ཚུ་ ས་གནས་དེ་ཁར་དབང་ཚད་ཡོདཔ་ལས་ འབྲུག་གི་རྒྱལ་རབ་ནང་ལུ་ “ཧུམ་རལ་གྱི་དྲག་རིམ་”ཟེར་ ཡོངས་གྲགས་ཡོདཔ་ཨིན།

༡༦༤༥ ལུ་ ཁོང་ཚུ་གིས་ ཞབས་དྲུག་གི་ ཆོས་དང་སྲིད་ཀྱི་དབང་ཆ་ངོས་འཛིན་འབད་ཞིནམ་ལས་ ཁོང་རའི་རྫོང་ཆུང་ཀུ་དེ་ ཞབས་དྲུག་ལུ་ ཕུལ་ཏེ་ དེ་འཕྲོད་ལས་ ཞབས་དྲུང་མཆོག་གིས་ རྫོང་སྦོམ་སྦེ་བཞེངས་ནི་འགོ་བཙུགས་ཏེ་ ༡༦༤༦ ལུ་ རྫོང་འདི་རབ་གནས་གནང་ནུག།

རི་ དུམ་དྲག་ཅིག་གཟར་དྲགས་དང་ ཤིང་གི་ཟམ་མཛེས་ཏོག་ཏོ་གཅིག་གི་ སྦོ་ལོག་ཁར་བཞེངས་ཡོེད་པའི་རྫོང་འདི་ སྤ་རོ་ རྫོང་ཁག་བདག་སྐྱོང་གི་ཕྱག་ལཱ་གནང་ས་ཨིནམ་མ་ཚད་ འདི་ནང་ལུ་ གྲྭ་ཚང་ཡང་ཡོདཔ་མ་ཚད་ དགེ་སློང་ ༢༠༠ དེ་ཅིག་ཡོདཔ་ཨིན་མས།

རྫོང་གི་རྡོག་ཅལ་དང་པམ་འདི་ནང་ལུ་ བདག་སྐྱོང་གི་ཡིག་ཚང་ཚུ་ཡོདཔ་དང་ འཛུལ་སྒོའི་གཡས་དང་གཡོན་ལུ་ མི་གཅིག་སེམས་ཅན་སྟག་གཅིག་ཁྱིད་དེ་ཡོད་མི་སྐུ་འདྲ་གཅིག་དང་ ཕོ་རྒས་གཅིག་གིས་གཡག་གནགཔོ་གཅིག་ཟུང་སྟེ་ཡོད་པའི་སྐུ་འདྲ་གཅིག་ཡོདཔ་ཨིན། རྫོང་གི་དབུ་རྩེ་འདི་ ཤིང་བཟོ་ངོ་མཚར་ཆེ་ཏོག་ཏོ་ཡོད་མི་དེ་ རྒྱལ་ཁབ་ནང་ལུ་ མཛེས་ཤོས་གཅིག་ཨིན་མས།

རྫོང་གི་ལྟག་ལུ་ ལྟ་རྫོང་ཡོདཔ་དང་ ད་རེས་ནངས་པ་འདི་ནང་ལུ་ རྒྱལ་ཡོངས་ འགྲེམ་སྟོན་ཁང་ཡོདཔ་ཨིན། ༡༩༠༥ ལུ་ རྫོང་འདི་ལུ་མེ་རྐྱེན་འབྱུང་དེ་ར་འབད་རུང་ ༡༩༠༨ དང་ ༡༩༠༩ ལུ་ གུ་རུ་རིན་པོ་ཆེ་དང་ སྟོན་པ་ དེ་ལས་ ཞབས་དྲུང་གི་སྐུ་ཚུ་ ཧེང་བཀལ་བཙུགས་ཏེ་ ཉམས་གསོ་ཞུ་ནུག། རྫོང་འདིའི་ནང་རྟེན་གཙོབོ་ ཐང་ཀ་ མི་ཊར་ ༢༠ x༢༠ འབད་མི་ མཐོང་འགྲོལ་ དེ་ མེ་རྐྱེན་གྱི་སྐབས་ལུ་ བསྲུངས་བཞག་འབད་ཡོད་མི་དེ་ ཚེས་བཅུའི་སྐབས་ལུ་ མི་མང་ལུ་ མཇལ་ཁ་གནངམ་ཨིན།




  1. Seeds of Faith by KMT Publishers, Volume 1