སྤ་རོ་རྒྱ་བབ་བྱང་ཆུབ་ཆོས་གླིང་དགོན་པ། Paro Jabab Jangchubchhoeling Goenpa
དེ་ཡང་རྒྱ་མཚོ་ལས་མཐོ་ཚད་མི་ཊར་ ༢༩༢༠ གི་ས་ཁར་ཆགས་ཏེ་ཡོད་པའི་རྒྱ་བབ་བྱང་ཆུབ་ཆོས་གླིང་དགོན་པ་འདི་ རབ་བྱུང་ ༡༡ པའི་ནང་དུས་རབས་ ༡༧ པ་ལུ་ དཔོན་སློབ་དྲག་པ་རྒྱ་མཚོ་གིས་བཞེངས་ཡོདཔ་ཨིན་མས། ལྷ་ཁང་དེ་ནང་ལུ་འགྱོ་དགོ་པ་ཅིན་སྦུག་སྟོད་གཡུས་ཚན་བརྒྱུད་དེ་ ཧཱ་གི་གཞུང་ལམ་ལས་ཀི་ལོ་མི་ཊར་ ༢.༢ དེ་ཅིག་སོ་ནམ་ཞིང་ལམ་བདའ་འགྱོ་བའི་སྐབས་བྱ་དགོན་པ་ཁྱིམ་སྙེ་མ་ལུ་ལྷོདཔ་ཨིན་མས། དེ་ལས་རྐང་ཐང་སྦེ་དུས་ཡུན་སྐར་མ་ ༢༠ དེ་ཅིག་ལམ་འགྱོཝ་ད་ལྷ་ཁང་དེ་ནང་ལུ་ལྷོད་ཚུགསཔ་ཨིན་མས། དེ་ལས་བྱེ་ཏེ་ཁའི་གཡུས་ཚན་ལས་ དུས་ཡུན་ཆུ་ཚོད་གཅིག་དང་ཕྱེད་དེ་ཅིག་རྐང་ཐང་སྦེ་འགྱོཝ་ད་ས་གོ་དེ་ཁར་ལྷོད་ཚུགསཔ་ཨིན་མས།
དགོན་པ་དེ་གི་རྒྱབ་ཁར་ཡོད་པའི་སྤོ་ཏོ་ཚུ་ལུ་བཀྲིས་རྟགས་བརྒྱད་ཀྱི་རྟགས་ཚུ་ཡོདཔ་སྦེ་བཤདཔ་ཨིན་མས། དེ་བསྒང་བླམ་གྲགས་པ་རྒྱ་མཚོ་འདི་ས་གོ་དེ་ཁར་ལྷ་ཁང་བཞེངས་ནིའི་ཐུགས་བསམ་བཞེས་ཏེ་ ད་ལྟོ་ཡོད་པའི་ལྷ་ཁང་གི་ལྟག་ལུ་སྤང་ཐང་ནང་ལུ་ཕེབས་ད་ ཁོ་གིས་ཡི་གུ་དྲུག་མའི་དབྱངས་འདི་གསན་ཡོདཔ་སྦེ་ཨིན་མས། འགོ་ཐོག་བླམ་གིས་དབྱངས་འདི་ཁོ་གིས་སྤང་ཐང་ནང་ལུ་ལྷ་ཁང་བཞེངས་ནི་གི་རྟགས་མཚན་ལེགས་ཤོམ་ཨིན་པས་ཟེར་ཐུགས་བསམ་བཞེས་ཡོད་རུང་ བརྟག་ཞིབ་འབད་བའི་སྐབས་ལུ་སྤོ་ཏོ་འདི་ཐགཔ་མདུད་པ་རྐྱབ་སྟེ་ཡོདཔ་བཟུམ་གཞིགས་ཏེ་ ས་གོ་དེ་ཁར་ལྷ་ཁང་བཞེངས་ནིའི་རྟགས་མཚན་ལེགས་ཤོམ་མེདཔ་སྦེ་གཟིགས་ཏེ་ ས་གནས་དེ་ཁར་ལྷ་ཁང་མི་བཞེངས་ནིའི་ཐུགས་ཐག་བཅད་དེ་ ས་གོ་ལས་ཁ་མར་ལྟ་འབབ་སྟེ་ད་ལྟོ་ལྷ་ཁང་བཞེངས་ཡོད་པའི་ས་གོ་ཁར་ཕེབས་ད་ དོ་རུང་ཡི་གུ་དྲུག་མ་༼ཨོཾ་མ་ཎི་པདྨེ་ཧཱུཾ༽ ཟེར་མི་དབྱངས་འདི་དོ་རུང་ལོག་གསན་ཡོདཔ་དང་རྒྱ་གླིང་གི་སྐད་དང་གཅིག་ཁར་ ཕོ་སྐྱེས་གོ་ལ་དཀརཔོ་གྱོན་ཏེ་ལག་པར་ཤེལ་ཕྲེང་དཀརཔོ་བཤེད་མི་གཅིག་ཡང་གཟིགས་ནུག།
ཕོ་སྐྱེས་འདི་སྤྱན་རས་གཟིགས་ཀྱི་སྤྲུལ་པ་ཨིནམ་ད་ ཁོ་ལོག་བྱོནམ་ད་ལུ་ཤེལ་ཕྲེང་དཀརཔོ་འདི་ད་ལྟོ་ལྷ་ཁང་བཞེངས་སའི་ ས་གོ་དེ་ཁར་སྟོར་བཏང་སྟེ་བཞག་ནུག། ད་ལྟོ་ལྷ་ཁང་གི་སྦོ་ལོགས་ཁར་ཡོད་པའི་རྡོ་དཀརཔོ་ཚུ་སྙིང་རྗེའི་རང་གཟུགས་འཕགས་པ་སྤྱན་རས་གཟིགས་ཀྱིས་ སྟོར་བཏང་མི་ཤེལ་ཕྲེང་དཀརཔོ་ཚུ་ཨིན་པའི་ཡིད་ཆེས་བསྐྱེད་དོ་ཡོདཔ་ཨིན་མས། བླམ་དེ་གིས་ས་གོ་དེ་ཁར་འཕགས་པ་སྤྱན་རས་གཟིགས་འདི་ དངོས་སུ་སྦེ་མིའི་གཟུགས་སུ་གཟིགས་ཡོད་མི་ལུ་བརྟེན་ཏེ་ས་གནས་འདི་ འཕགས་པ་སྤྱན་རས་གཟིགས་ཀྱི་ཞིང་ཁམས་རི་བོ་པོ་ཏ་ལ་སྦེ་ཆ་བཞགཔ་ཨིན་མས། དེ་གིས་སྦེ་ལྷ་ཁང་དེ་ནང་ལུ་སྨྱུང་གནས་སྲུང་ཚུགས་པ་ཅིན་ བསོད་ནམས་དཔག་ཏུ་མེདཔ་སྦེ་བསག་འོང་ཟེར་གསུངས་ཡོདཔ་མ་ཚད་ ལྷ་ཁང་གི་ལྟག་ལུ་ཡོད་པའི་སྤོ་ཏོ་འདི་ཉི་གདུགས་རྩ་ཅན་ཅིག་བཟུམ་མཐོངམ་ཨིན་མས།
ས་གནས་ཀྱི་ལོ་རྒྱུས་དང་འཁྲིལ་བ་ཅིན་ དེ་ལས་ལྷ་ཁང་དེ་གི་རྒྱབ་ཁར་ཡོད་པའི་སྤོ་ཏོ་འདི་ཚེ་རིང་མའི་རི་གི་རྣམ་པ་སྦེ་ཡོདཔ་མ་ཚད་ རི་དེ་གི་རྩ་བོ་ལས་འབབ་མི་འཐུང་ཆུ་འདི་གནམ་མེད་ས་མེད་གལ་ཅན་ཅིག་ཨིནམ་དང་ རི་ཆུ་འདི་ལུ་ནད་རིགས་ཚུ་ལུ་ཕན་པའི་ནུས་པ་ཚུ་ཡོདཔ་སྦེ་བཤདཔ་ཨིན་མས། རྒྱ་བབ་བྱང་ཆུབ་ཆོས་གླིང་འདི་ཧེ་མ་སྒེར་སྡེའི་ལྷ་ཁང་གཅིག་ཨིན་རུང་ ཤུལ་ལས་གཞུང་གྲྭ་ཚང་ལུ་ཕུལ་ཞིན་ན་གཞུང་གིས་སྤྱི་ལོ་ ༢༠༠༣ ལུ་ནང་པའི་སློབ་གྲྭ་གཅིག་ཡང་གཞི་བཙུགས་འབད་དེ་ཡོདཔ་ཨིན་མས། (འབྲུག་གི་གནས། གནམ་ལོ། སྤྱི་ལོ་ ༢༠༢༣།)
རྒྱབ་རྟེན་དཔེ་ཐོ།
༡. འབྲུག་གི་གནས། སྤ་རོ་གི་རྒྱ་བབ་བྱང་ཆུབ་ཆོས་གླིང་། གནམ་ལོ། སྤྱི་ལོ་ ༢༠༢༣། ཕེསི་བྷུག།