ཧཱུཾ་རལ་རྫོང་། Hungrel Dzong
ཧཱུཾ་རལ་རྫོང་འདི་སྣུམ་འཁོར་ལམ་ལས་ལས་སྤ་ཆུ་གི་ཆུ་ཕ་ཀི་ལོགས་ལུ་ཆགས་ཏེ་ཡོདཔ་ཨིན། སྤ་རོ་ཁྲོམ་ལས་སྦ་ཟམ་འདི་བརྒྱུད་དེ་རྐང་སྟོང་སྦེ་འགྱོཝ་ད་ སྐར་མ་བཅོ་ལྔ་འགོརཝ་ཨིན། ཡོངས་གྲགས་ཅན་གྱི་ལོ་རྒྱུས་དང་འཁྲིལ་བ་ཅིན་ ས་གནས་འདི་ཧེ་མ་དུས་རབས་ ༨ པའི་ནང་ལུ་བྱོན་མི་གུ་རུ་པདྨ་བསམ་བྷ་ཝ་གིས་ ཞབས་ཀྱིས་བཅགས་ཏེ་བྱིན་གྱིས་བརླབས་ཡོདཔ་སྦེ་བཤདཔ་ཨིན་མས། སློབ་དཔོན་ཆེན་པོ་པདྨ་བསམ་བྷ་ཝ་གིས་ད་ལྟོ་ཧཱུཾ་རལ་རྫོང་འདི་ཆགས་ཏེ་ཡོད་ས་ལུ་ ཙུ་ནེ་རྡོ་རིངམོ་གིས་གཞི་རྟེན་འབད་དེ་ཡོདཔ་གཟིགས་ཏེ་མ་འོངས་པ་ལུ་ ཉིནམ་གཅིག་གི་ཚེ་འདི་གི་ཐོག་ཁར་རྫོང་ཆགས་འོང་ཟེར་བའི་ལུང་བསྟན་གནང་སྟེ་ ས་གོ་འདི་གི་མིང་ཡང་རིན་སྤུངས་བྲག་ཟེར་བཏགས་གནང་ཡོདཔ་ལས་ ད་ལྟོ་སྤ་རོ་རིན་སྤུངས་རྫོང་ཟེར་མི་གི་མིང་འདི་གུ་རུ་གི་ལུང་བསྟན་ལུ་གཞི་བཞག་ཐོག་བཏགས་ཡོདཔ་ཨིན་མས།
ཨིན་རུང་ཡང་དུས་རབས་ ༡༥ པ་ལུ་བོད་ལས་ཕ་ཇོ་འབྲུག་སྒོམ་ཞིག་པོ་གི་གདུང་བརྒྱུད་བར་མ་ཆད་པ་བཞི་པ་ དམ་སྤྲུལ་རྒྱལ་མཆོག་གི་སྲས་སྦོམ་ཤོས་རྒྱལ་མཆོག་འདི་ས་གནས་དེ་ཁར་ཕེབས་ཞིནམ་ལས་ཚུར་བྱུང་རབས་འདི་གསལ་ཏོག་ཏོ་སོང་ཡོདཔ་ཨིན་མས། རྒྱལ་མཆོག་འདི་ཁོ་རའི་དོན་ལུ་ཆོས་ཐམས་ཅད་མཁྱིན་ཅིང་གཟིགས་ཏེ་རང་དོན་ལུ་ཆོས་སྐུའི་དགོངས་པ་མངོན་སུམ་དུ་གཟིགས་ཏེ་ རང་དོན་གྱི་ཐུགས་ཀྱི་ཚ་གྱང་ག་ནི་ཡང་མེད་པར་གཞན་དོན་རྐྱངམ་གཅིག་ཐུགས་ཁར་དགོངས་ཏེ་གཞན་དོན་སྒྲུབ་ནི་ལུ་བརྩོན་ནི་ཟེར་ཐུགས་བཞེས་གནང་ནུག། དེ་ལས་ཐུགས་སྲས་རྒྱལ་མཆོག་འདི་ཁོ་རའི་ཕོ་རྒནམ་གྱིས་ཁོ་རའི་གདན་ས་ལུ་ལོག་འོང་མ་སྟེར་བར་ ཁོ་སྤ་རོ་ཚོང་འདུས་ཀྱི་དུར་ཁྲོད་ཁར་ཐུགས་དམ་གནང་བཞུགས་གནང་ཡོདཔ་ཨིན་མས། སྲས་རྒྱལ་མཆོག་འདི་སྤ་རོ་ཚོང་འདུས་ཀྱི་དུར་ཁྲོད་ནང་ལུ་ཐུགས་དམ་ལུ་བཞུགས་པའི་སྐབས་ ཆུའི་ཕ་ཀི་ལོགས་ལུ་བྱག་གི་རྩ་བར་སྡོད་མི་སྲུང་མ་ཅིག་གིས་རྒྱལ་མཆོག་གིས་ཐུགས་དམ་ལུ་བར་ཆད་རྐྱབ་ནི་འབདཝ་ད་ རྒྱལ་མཆོག་གིས་སྲུང་མ་འདི་དམ་ལ་བཏགས་ཏེ་ནང་པའི་ཆོས་ཀྱི་བསྟན་པ་རིན་པོ་ཆེ་བདག་འཛིན་འབད་མི་སྲུང་ཅིག་སྦེ་བྱིན་གྱིས་བརླབས་ཏེ་ སྲུང་མ་འདི་གི་མཚན་ཡང་ཧཱུཾ་རལ་མགོན་པོ་ཟེར་བཏགས་གནང་ཡོདཔ་ཨིན་མས། དེ་ལས་སྲུང་མ་ཧཱུཾ་རལ་མགོན་པོ་གིས་དྲུང་དྲུང་རྒྱལ་མཆོག་ལུ་ཁོ་གི་བྱག་འདི་ཕུལ་ཞིན་ན་ བྱག་དེ་མགུར་སྦ་སྒོར་ཆུང་ཀུ་ཅིག་རྐྱབ་སྟེ་གདན་ས་བཅགས་གནང་དགོ་པའི་ཞུ་བ་ཕུལ་ཡོདཔ་ཨིན་མས།
དེ་ལས་དྲུང་དྲུང་རྒྱལ་མཆོག་གིས་ལུང་བསྟན་དུས་ལུ་འབབ་ཡོདཔ་གཟིགས་ཏེ་ སྲུང་མ་ཧཱུཾ་རལ་མོགན་པོ་གིས་གསོལཝ་བཏབ་དོ་བཟུམ་སྦེ་བྱག་འདི་བདག་གིར་བཞེས་ཏེ་ སྦ་སྒོར་ཆུང་ཀུ་ཅིག་རྐྱབ་སྦེ་གདན་ས་གཞི་བཙུགས་གནང་སྟེ་དེ་ཁར་བཞུགས་ཡོདཔ་ཨིན་མས། ཨིན་རུང་ཡང་སྤ་རོ་ལུང་གཤོང་ནང་ལུ་ཡོད་པའི་ཆོས་ལུགས་མ་འདྲཝ་བདག་འཛིན་འབད་མི་ཚུ་གི་བླམ་ཆོསཔ་ཚུ་གིས་བར་ན་ འཐབ་འཛིང་ཨ་རྟག་ར་བྱུང་མི་དེ་གིས་དྲུང་དྲུང་རིན་པོ་ཐུགས་ཕམ་སྦོམ་བྱུང་སྟེ་ གསང་བའི་ཐོག་ལས་དྲུང་དྲུང་འདི་ལོག་བོད་ལུ་བྱོན་ནི་གི་འཆར་གཞི་བརྩམས་ཡོདཔ་ཨིན་མི་འདི་ ཁོ་རའི་སྦྱིན་བདག་ཚུ་གིས་ཧ་གོ་ཞིནམ་ལས་བླམ་གི་སྐུ་མདུན་ལུ་བཅར་ཏེ་ ཧཱུཾ་རལ་བྱག་ལུ་ཁོ་བཟུམ་གྱི་བླམ་རྟོགས་པ་ཅན་བཞུགས་པ་ཅིན་ སྤ་རོ་གི་ལུང་གཤོང་གི་མི་སེར་ག་ར་ཁོ་གི་སྦྱིན་བདག་གཙོ་བོ་འབད་འོང་ཟེར་གསོལཝ་བཏབ་སྟེ་ ཁོང་ཆ་ཁྱབ་ཀྱིས་བླམ་དྲུང་དྲུང་ལུ་ས་གནས་ཧཱུཾ་རལ་བྱག་དེ་ཁར་གཏན་འཇགས་ཀྱི་གཞིས་ཆགས་དགོཔ་སྦེ་ཞུ་ནུག།
དེ་ལས་དྲུང་དྲུང་གིས་ས་གོ་གི་འོས་འབབ་ཅིག་གཟིགས་ཏེ་ཧཱུཾ་རལ་ལུ་གཏན་འཇགས་སྦེ་གཞིས་ཆགས་ཏེ་ སྤ་རོ་ལུང་གཤོང་གི་བླམ་མཛད་ནི་གུར་ཐུགས་ཐག་བཅད་དེ་གནང་ནུག། དེ་ལས་བླམ་དྲུང་དྲུང་གིས་མགྱོགས་པ་ར་དུས་ཚོད་བཟང་པོ་ཅིག་ནང་ ཁོ་རའི་དད་ལྡན་གྱི་སྦྱིན་བདག་ཚུ་བཀུག་ཞིན་ན་ཁྱིམ་ཐོག་ལྔ་འབད་མི་ཧཱུཾ་རལ་རྫོང་གི་གཞི་འགྱམ་འདི་འགོ་བཙུགས་གནང་ནུག། དེ་བསྒང་བླམ་དྲུང་དྲུང་གིས་ཁོ་ར་གཅིག་གིས་མི་གྲངས་སུམ་ཅུ་གིས་ལཱ་འབདཝ་ཨིན་ཟེར་བཤདཔ་ཨིན་མས། བླམ་གིས་དེ་ཁར་དགོ་པའི་ཤིང་གི་བཟོ་བཀོད་ཚུ་མི་སེར་ཚུ་གིས་འབག་འོང་མ་དགོ་པར་ ཡར་ལས་མར་རང་བཞིན་གྱིས་བཤུད་དེ་འབག་འོང་ཡོདཔ་ཨིན་མས། དེ་འབད་ནི་དེ་གིས་གྱང་བརྡུངས་ཏེ་རྐྱབ་མི་ཁྱིམ་ཐོག་ལྔ་འབད་མི་འདི་ དུས་ཡུན་ལེ་ཤ་མ་འགོར་བར་རྐྱབ་ཚུགས་ཡོདཔ་ཨིན་མས། ཐོག་ལྔ་འབད་མི་རྫོང་ནང་ལུ་འོག་ཐོག་ལུ་འབྱུ་མཛོད། ཐོག་དང་པ་ནང་ལུ་ཞལ་འཛོམས་ཁང་། ཐོག་གཉིས་པ་ནང་ལུ་སྡོད་ཁང་གི་ཞག་ཚན་ཚུ། ཐོག་གསུམ་པ་ནང་ལུ་མགོན་ཁང་དང་ཐོག་བཞི་པ་ནང་ལུ་ལྷ་ཁང་སྦེ་ཡོདཔ་ཨིན་མས། རྫོང་འདི་གི་མཚན་ཡང་ཧཱུཾ་རལ་རྫོང་དང་ས་གོ་འདི་གི་མིང་ལུ་ཧཱུཾ་རལ་ཁ་ཟེར་བཏགས་གནང་ནུག། ཧཱུཾ་རལ་རྫོང་དང་ཡང་ན་ཧཱུཾ་རལ་བྲག་ཟེར་མིང་དར་ཁྱབ་འགྱོ་དགོ་མི་དེ་ཡང་ ཧེ་མ་དུས་རབས་ ༡༣ པའི་ནང་ལུ་བོད་ཀྱི་གྲུབ་ཐོབ་ཐང་སྟོང་རྒྱལ་པོ་གིས་བྱག་འདི་གི་སྲུང་མ་འདི་ ཡི་གུ་ཧཱུཾ་ཟེར་གསུངས་ཞིན་ན་བདའ་བཏང་ནི་དེ་གིས་བྱག་འདི་གི་མིང་ཡང་ཧཱུཾ་རལ་ཟེར་དར་ཡོདཔ་ཨིན་མས།
རྒྱལ་རབས་ཅན་གྱི་ཧཱུཾ་རལ་རྫོང་ནང་ལུ་ནང་རྟེན་ཚུ་ཡང་ བྱག་འོག་གནསཔོ་དང་ཇོ་བོ་གནསཔོ་ཧཱུཾ་རལ་མགོན་པོ་གི་མགོན་ཁང་ཚུ་ཡོདཔ་ཨིན། རྫོང་འདི་གི་ནང་རྟེན་གཙོ་བོ་འདི་གུ་རུ་གསུང་བྱོན་མའི་སྐུ་འདྲ་བཞུགས་ཏེ་ཡོདཔ་ཨིན་མས། མགོན་ཁང་དེ་གི་འོག་ལུ་ར་ཇོ་བོ་གྲུབ་ཆུ་དང་ཧཱུཾ་རལ་གྲུབ་ཆུ་ཟེར་ཁག་གཉིས་ཡོད་མི་དེ་གིས་ང་བཅས་རའི་རྒྱུད་ལུ་ཡོད་པའི་ སྡིག་སྒྲིབ་ཚུ་དག་དོ་ཡོདཔ་སྦེ་བཤདཔ་ཨིན་མས། ཡི་གུ་ཧཱུཾ་ཟེར་མི་འདི་བྱག་གུར་ད་ལྟོ་ཡང་ཧིང་སངས་ས་སྦེ་མཇལ་ནི་ཡོདཔ་ལས་ བཀྲིས་གཡང་རྩེ་རྫོང་ཁག་ལུ་ཡོད་པའི་ཨོཾ་བྷ་གནས། མོང་སྒར་ལུ་ཡོད་པའི་ཨ་བརྒྱ་གནས་དང་སྤ་རོ་གི་ཧཱུཾ་རལ་གནས་གསུམ་འདི་གུ་རུ་གི་གནས་བྱིན་ཅན་ཅིག་ཨིནམ་ལས་གནས་དེ་གསུམ་ལུ་བྱིན་བརླབས་ཀྱི་ཁྱད་པར་མེདཔ་ཨིན་མས། དེ་ཡང་གནས་དེ་གསུམ་ནང་ལུ་ནང་པའི་ཡི་གུ་བྱིན་བརླབས་ཅན་ཨོཾ་ཨཱ་ཧཱུཾ་གསུམ་ལས་གྲུབ་ནི་དེ་གིས་ཨིན་མས། དེ་འབད་ནི་དེ་གིས་མི་སེར་ཚུ་གིས་ཁོང་རའི་མི་ཚེ་ནང་ལུ་རྫོང་འདི་ཚར་གཅིག་ཨིན་ཅི་མིན་ཅི་ར་མཇལ་དོ་ཡོདཔ་ཨིན་མས། (འབྲུག་གནས་སྐོར། གནམ་ལོ་མེད། སྤྱི་ལོ་མེད)
རྒྱབ་རྟེན་དཔེ་ཐོ།
༡. འབྲུག་གནས་སྐོར། གུ་རུ་གི་ཞབས་དྲུང་ལུ། གནམ་ལོ་མེད། སྤྱི་ལོ་མེད། ཡོངས་འབྲེལ་ཁ་བྱང་།