ཨི་ཇིབཊ། Egypt
༉ ཨི་ཇིབཊ་འདི་ རྒྱལ་རབས་དང་ལམ་སྲོལ་གནམ་མེད་ས་མེད་དར་ཁྱབ་འགྱོ་བའི་རྒྱལ་ཁབ་ཅིག་ཨིན། རྒྱལ་ཁབ་འདི་ བྱང་ཤར་ཨེཕ་རི་ཀ་གི་མཐའ་ཟུར་ལུ་ཡོདཔ་དང་ རྒྱལ་ཁབ་འདི་གིས་ ཨེཕ་རི་ཀ་དང་ མི་དྲིལ་ཨིཡིཀྲི་རྒྱལ་ཁབ་ཚུ་གི་བར་ན་ ཟམ་བཟུམ་ཅིག་སྦེ་ ལཱ་འབད་དོ་ཡོདཔ་ཨིན།
ཨི་ཇིབཊ་གི་ས་ཁོངས་འདི་ ས་ཆ་གྲུ་བཞི་ཀི་ལོ་མི་ཊར་ས་ཡ་ ༡ དེ་ཅིག་གི་ས་ཁར་ཡོདཔ་ལས་ འཛམ་གླིང་ནང་ ས་ཆ་རྒྱ་ཆེ་ཤོས་ཀྱི་གྲས་ལས་ རྒྱལ་ཁབ་ ༣༠ པ་ནང་ཚུད་དེ་ཡོདཔ་ཨིན། དེའི་བྱང་ཁ་ཐུག་ལུ་ མེ་ཌི་ཊེ་རེ་ནི་ཡཱན་མཚོ་དང་ ཤར་ཁ་ཐུག་ལུ་ རེད་སི་ དེ་ལས་ ལྷོ་ཁ་ཐུག་ལུ་ སུ་དཱན་དང་ ནུབ་ཁ་ཐུག་ལུ་ ལི་བི་ཡ་གི་ས་མཚམས་ཚུ་ཡོདཔ་ཨིན། ས་ཁོངས་འདི་ མང་ཤོས་ར་ བྱེ་ཐང་གི་རི་ཐང་དང་ ནཱཡེལ་ལུང་གཤོང་དང་ གཙང་ཆུ་ཁ་གྱེས་ས་གི་ རྒྱལ་ཁབ་ཀྱི་ས་ཆ་བརྒྱ་ཆ་ ༤ དེ་ཅིག་གང་ཡོདཔ་ཨིན། གཙང་ཆུ་ནཱཡེལ་འདི་ ཨི་ཇིབཊ་རྒྱལ་ཁབ་ལུ་ གནམ་མེད་ས་མེད་ཁག་ཆེཝ་ཨིནམ་མ་ཚད་ ཧེ་མ་ལས་ རྒྱལ་ཁབ་ཀྱི་མི་སེར་ཚུ་གི་དོན་ལུ་ ཁག་ཆེ་ཤོས་ཅིག་ཨིན་མས། ཨི་ཇིབཊ་ནང་ ས་གནས་མཐོ་སར་འདི་ སི་ནཱཡི་ནང་ རྒྱ་མཚོའི་མཐོ་ཚད་མི་ཊར་ ༢,༦༢༩ ལུ་ཡོད་པའི་གངས་རི་ཀེ་ཐི་རིན་དང་ རྒྱ་མཚོའི་མཐོ་ཚད་མི་ཊར་ ༡༣༣ ལུ་ཡོད་པའི་ ཀིཝ་ཊ་ར་ཌི་པེ་རེ་ཤཱན་འདི་ ས་གནས་དམའ་སར་ཨིན།
སྤྱི་ལོ་ ༢༠༢༥ འགོ་བཙུགས་ཁམས་ཅིག་ཁར་ ཨི་ཇིབཊ་གི་མི་རློབས་དེ་ མི་ས་ཡ་ ༡༡༧ དེ་ཅིག་ལུ་ལྷོད་ཡོདཔ་དང་ རྒྱལ་ཁབ་འདི་ ཨཕ་རི་ཀ་རྒྱལ་ཁབ་ནང་ལུ་ མི་རློབས་མཐོ་ཤོས་ ཨང་ ༣ པ་དང་ རྒྱལ་སྤྱི་ནང་ མི་རློབས་མཐོ་ཤོས་ ཨང་ ༡༤ པ་ནང་ཚུདཔ་ཨིན། ཨི་ཇིབཊ་གི་མི་རློབས་བརྒྱ་ཆ་ ༩༥ དེ་ཅིག་ ནཱཡེལ་གཙང་ཆུ་བདའ་སྟེ་སྡོད་དོ་ཡོདཔ་མ་ཚད་ ཀཱའེ་རོ་དང་ ཨེ་ལེཀས་ཟེན་ཌིརིཡ་ཟེར་མི་ ཁྲོམ་ཚོགས་ལྟེ་བ་ཚུ་ནང་ སྡོད་དོ་ཡོདཔ་དང་ འདི་ཡང་ རྒྱལ་ཁབ་ཀྱི་ས་ཆ་གཞན་མི་མང་ཤོས་ཅིག་ར་ ས་སྐམ་རྡོ་སྐམ་ཡོདཔ་ལས་ཨིན། དེ་འབདཝ་ལས་ མི་རློབས་ཀྱི་གྱངས་ཁ་འདི་ ནཱཡེལ་ལུང་གཤོང་བདའ་སྟེ་ མཐོ་དྲགས་སྦེ་ཡོདཔ་དང་ འདི་ནང་ ས་གནས་ལ་ལུ་ཅིག་ནང་ མི་རློབས་ཀི་ལོ་མི་ཊར་གྲུ་བཞི་རེ་ལུ་ མི་གྲངས་ ༢,༠༠༠ ལྷགཔ་རེ་ཡོདཔ་ཨིན།
ཨི་ཇིབཊ་འདི་ ས་སྐམ་རྡོ་སྐམ་གྱི་བྱེ་ཐང་ཅིག་འབདཝ་ལས་ གནམ་བྱཱར་ལུ་གནམ་མེད་ས་མེད་དྲོད་ཤུགས་དང་ གནམ་དགུན་ལུ་ གནམ་གཤིས་འདི་ རན་ཏོག་ཏོ་ཡོདཔ་ཨིན། ལུང་ཕྱོགས་མང་ཤོས་ཅིག་ནང་ ཆརཔ་ཐར་ཐོར་ཅིག་རྐྱབ་དོ་ཡོདཔ་ཨིན་རུང་ མེ་ཌི་ཊེ་རེ་ནི་ཡཱན་རྒྱ་མཚོའི་མཐའ་སྐོར་གྱི་རྒྱལ་ཁབ་ཚུ་ནང་ སྐབས་སྐབས་ ཆརཔ་ཟིམ་ཟིམ་རེ་ལས་རྐྱབ་ནི་མེདཔ་ཨིན། གནམ་བྱཱར་གྱི་ཟླཝ་འདི་ནང་ བྱེ་ཐང་གི་ས་གནས་ཚུ་ནང་ དྲོད་ཚད་ཌི་གི་རི་སེེལ་ཤི་ཡཱསི་ ༤༠ ལས་བརྒལ་འགྱོ་དོ་ཡོདཔ་ཨིན་རུང་ མཚོ་མཐའི་ལུང་ཕྱོགས་ཚུ་ནང་ལུ་ དྲོད་ཚད་འདི་ ཚད་ལྡན་ཅིག་སྦེ་སྡོད་དོ་ཡོདཔ་ཨིན། དེ་ལས་ གནམ་དགུན་ལུ་འབད་བ་ཅིན་ དྲོད་ཚད་ཌི་གི་རི་སེེལ་ཤི་ཡཱསི་ ༩ དང་ ༢༠ གི་བར་ན་ རན་ཏོག་ཏོ་སྦེ་སྡོད་དོ་ཡོདཔ་ཨིན།
ཨི་ཇིབཊ་གི་ལམ་སྲོལ་འདི་ ཧེ་མ་ལས་ཡོད་པའི་ ལོ་རྒྱུས་དང་རྒྱལ་རབས་ཚུ་ལུ་ གཙོ་བོ་བཟུང་སྟེ་གནས་ཡོདཔ་དང་ རྒྱལ་ཁབ་འདི་ནང་ལུ་ གི་ཟ་གཏོར་གཟུགས་མཆོད་རྟེན་དང་ ལུ་སོར་དང་ ཨཱས་ཝན་ལུ་ཡོད་པའི་ ལྷ་ཁང་ཚུ་གི་ རྒྱལ་ཁབ་འདི་ མིང་གཏམ་ཅན་དང་ངོ་རྟགས་ཅན་གྱི་ས་གོ་བཟོ་ཚུགས་དོ་ཡོདཔ་ཨིན། དེང་སང་གི་ ཨི་ཇིབཊ་གི་མི་ཚུ་གི་ལམ་སྲོལ་འདི་ ཨ་རབ་ཀྱི་སྔར་སྲོལ་ལམ་ལུགས་ཚུ་དང་ སླ་བསྲེ་འབད་དེ་ཡོདཔ་ཨིན།
ད་རེས་ནངས་པ་ ཨི་ཇིབཊ་གི་མི་སྡེ་ནང་ལུ་ སྙན་ཆ་དང་ཞབས་ཁྲ་ དེ་ལས་ གློག་བརྙན་འདི་ཚུ་ གནམ་མེད་ས་མེད་ ཁག་ཆེ་བའི་འགན་ཁུར་བཟུམ་ཅིག་སྦེ་གནས་ཏེ་ཡོདཔ་ཨིན། དེ་དང་གཅིག་ཁར་ དཔེར་ན་ རཱ་མ་ཌེན་དགའ་སྟོན་འདི་ མང་ཤོས་ཅིག་ནང་ར་ རྒྱ་ཆེ་དྲགས་སྦེ་བརྩི་སྲུང་འབད་དོ་ཡོདཔ་དང་ གནམ་སེར་ཁ་ལུ་བརྩི་སྲོལ་ཡོད་པའི་ ཤམ་ཨི་ནེ་སིམ་ཟེར་མི་འདི་ སྔར་སྲོལ་གྱི་དགའ་སྟོན་བཟུམ་ཅིག་སྦེ་བརྩིཝ་ཨིན།
ཨ་ར་བིག་འདི་ ཨི་ཇིབཊ་གི་གཞུང་འབྲེལ་ཁ་སྐད་ཨིནམ་ལས་ རྒྱལ་ཁབ་ཀྱི་མི་རིགས་མ་འདྲཝ་ཚུ་ནང་ བརྡ་དོན་སྤྲོད་ལེན་འབད་ནི་གི་ བརྒྱུད་ལམ་བཟུམ་ཅིག་སྦེ་ ལག་ལེན་འཐབ་ཡོདཔ་ཨིན། ཨི་ཇིབཊ་ཤན་ཨ་ར་བིག་གི་ཁ་སྐད་འདི་ ཉིན་བསྟར་གྱི་མི་ཚེ་ནང་ལུ་ རྒྱ་ཆེ་དྲགས་སྦེ་སླབ་ཨིན། ཨིང་ལིཤ་དང་ཕེརེནཆི་འདི་ ཚོང་འབྲེལ་གྱི་དོན་ལུ་དང་ ཤེས་ཡོན་ནང་ལུ་ སྤྱིར་བཏང་སྦེ་ལག་ལེན་འཐབ་དོ་ཡོདཔ་ཨིན།
ཨི་ཇིབཊ་གི་དཔལ་འབྱོར་འདི་ ཨཕ་རི་ཀ་རྒྱལ་ཁབ་ལུ་སྦོམ་ཤོས་ཅིག་ཨིན་མི་འདི་ཡང་ སོ་ནམ་དང་བཟོ་གྲྭ་ དེ་ལས་ ལྟ་བཤལ་དང་ཞབས་ཏོག་ལ་སོགས་པ་ལུ་བརྟེན་ ནང་འཁོད་ཐོན་སྐྱེད་ཡོངས་འབོར་བཟོ་དོ་ཡོདཔ་ཨིན། ནཱཡེལ་གཙང་ཆུ་གིས་ སོ་ནམ་གྱི་ལཱ་ལུ་ གནམ་མེད་ས་མེད་ ཕན་ཐོགས་དོ་ཡོདཔ་ད་ གཙང་ཆུ་བདའ་སྟེ་ ས་ཞིང་ལེགས་ཤོམ་ཡོདཔ་ད་ ས་ཞིང་དེ་ནང་ ཀ་བལ་དང་ ཀར་ དེ་ལས་ ཆུམ་ལ་སོགས་པ་ཚུ་གི་ ཞིང་ལཱ་འབད་དོ་ཡོདཔ་ཨིན། ཨིན་རུང་ ཨི་ཇིབཊ་གི་རྒྱལ་རབས་ཅན་གྱི་ཤུལ་ནོར་ལུ་བརྟེན་ ལྟ་བཤལ་འདི་ ཁག་ཆེ་བའི་ལས་སྡེ་ཅིག་སྦེ་ར་ ལུས་ཏེ་ཡོདཔ་ཨིན།
རྒྱལ་ཁབ་འདི་ནང་ བཟོ་སྐྲུན་གྱི་ལཱ་ཚུ་ ཡར་དྲག་སོང་ཡོདཔ་དང་ བཟོ་སྐྲུན་གྱི་ལཱ་ཚུ་ཡང་ ཐགས་རིགས་དང་རྫས་སྦྱོར་ དེ་ལས་ གློག་རིག་ཅ་ཆས་ཚུ་ བཟོ་སྐྲུན་འབད་དོ་ཡོདཔ་ཨིན། དེ་བཟུམ་སྦེ་ ཨི་ཇིབཊ་ལུ་ ཐབས་བྱུས་ཅན་གྱི་ས་ཁོངས་ནང་ལས་ ཁེ་ཕན་ཐོབ་ཡོདཔ་ད་ དེ་གིས་ སུས་གཡུར་ཆེན་ལུ་ འཛུལ་སྒོ་བཀག་འཛིན་འབད་ཚུགས་ཏེ་ཡོད། འདི་ཡང་ རྒྱལ་སྤྱི་ནང་ ཚོང་འབྲེལ་གྱི་ལམ་ངོ་མ་ཅིག་ཨིནམ་ལས་ དེ་གིས་ འོང་འབབ་འབོར་ཆེ་ཏོག་ཏོ་སྦེ་ བཟོ་ཚུགས་ཏེ་ཡོདཔ་ཨིན།
ཁྲོམ་ཚོགས་འདི་ནང་ ད་ལྟོའི་བར་ན་ཡང་ གདོང་ལེན་ལེ་ཤ་ཡོདཔ་དང་ དེ་ཡང་ ན་གཞོན་ཚུ་ ལཱ་གཡོག་མ་ཐོབ་པའི་གྱངས་ཁ་མཐོ་མི་དང་ ཁྲོམ་ཚོགས་འདི་ནང་ མི་རློབས་ཀྱི་གྱངས་ཁ་མགྱོགས་དྲགས་སྦེ་ཡར་སེང་འགྱོ་ཡོད་མི་ལུ་བརྟེན་ གཞི་རྟེན་མཁོ་ཆས་ཚུ་ལུ་ གདོང་ལེན་སྦོམ་སྦེ་ར་ བྱུང་སྟེ་ཡོདཔ་ཨིན། ཨིན་རུང་ ཨང་གནས་ཅན་ལག་ལེན་འཐབ་མི་འདི་ཡར་འཕར་སོང་ཡོདཔ་ལས་ སྤྱི་ལོ་༢༠༢༥ འགོ་བཙུགས་ཁམས་ཅིག་ཁར་ ཨི་ཇིབཊ་གི་ མི་རློབས་བརྒྱ་ཆ་ ༨༡ དེ་ཅིག་གིས་ གློག་རིག་ཡོངས་འབྲེལ་འདི་ལག་ལེན་འཐབ་དོ་ཡོདཔ་ཨིནམ་ལས་ འཕྲུལ་རིག་ལུ་བརྟེན་པའི་ཚོང་ལས་ཚུ་ ཡར་འཕར་འགྱོ་ནི་འདི་གིས་ ལཱ་གཡོག་གི་གོ་སྐབས་ཡང་མངམ་བཟོ་སྟེ་ཡོདཔ་ཨིན།
རྒྱལ་ས་ལྟེ་བ།
ཀཱའི་རོ་འདི་ ཨི་ཇིབཊ་གི་རྒྱལ་ས་ལྟེ་བ་ཨིནམ་དང་ རྒྱལ་ཁབ་ཀྱི་ལོ་རྒྱུས་དང་རྒྱལ་རབས་ སྤྲོ་ཉམས་ཆེ་བའི་ལམ་སྲོལ་ དེ་ལས་ དེང་སང་གི་དམིགས་གཏད་ཚུ་ཁྱབ་ཡོད་པའི་ཁྲོམ་ཅིག་ཨིན། ཨི་སི་ལམ་གྱི་བཟོ་རིག་ལུ་བརྟེན་ ཀ་ཟླུམ་རིངམོ་སྟོང་ཕྲག་གི་ཁྲོམ་སྡེ་ཟེར་སླབ་མི་ ཀཱའི་རོ་དེ་ ཨི་ཇིབཊ་གི་ཁྲོམ་ཚོགས་སྦོམ་ཤོས་རྐྱངམ་གཅིག་མེན་པར་ ཨཕ་རི་ཀ་དང་མི་ཌིལ་ཨིསཊ་གི་ཁྲོམ་ཚོགས་ལྟེ་བ་ཅིག་ཡང་ཨིན།
ཀཱའི་རོ་འདི་ ཨི་ཇིབཊ་གི་བྱང་ཁ་ཐུག་དང་ ལྷོ་ཁ་ཐུག་ལུ་ ནཱཡེལ་གཙང་ཆུ་ཁ་གྱེས་ས་ལུ་ཆགས་ཏེ་ཡོདཔ་ཨིན། འདི་གི་ས་ཆ་འདི་ ཀི་ལོ་མི་ཊར་ ༥༢༨ གྲུ་བཞི་ཅནམ་དང་ ཀཱའི་རོ་ཁྲོམ་ཆེན་འདི་ ས་ཆ་ཀི་ལོ་མི་ཊར་ ༡,༧༠༩ གྲུ་བཞི་ཅན་ལུ་ཁྱབ་ཡོདཔ་ཨིན། ཁྲོམ་གྱི་དབྱིབས་བཟོ་འདི་ རླུང་འཁོར་བཟུམ་གི་བཟོ་བཀོད་ཡོདཔ་དང་ ས་ཆ་འདི་ལྷོ་ཁ་ཐུག་ལུ་ དོག་སུ་དང་ བྱང་ཁ་ཐུག་ལུ་ རྒྱས་ཏེ་ཡོདཔ་ཨིན། ནཱཡེལ་གཙང་ཆུ་བདའ་སྟེ་ ས་གོ་འདི་ གནམ་མེད་ས་མེད་ལེགས་ཤོམ་ཡོདཔ་ལས་ ས་གནས་འདི་ ཚོང་འབྲེལ་དང་ ལམ་སྲོལ་ལྟེ་བ་ཅིག་ལུ་འགྱུར་ཏེ་ཡོདཔ་ཨིན།
ཀཱའི་རོ་གི་ས་ཆའི་གནས་སྟངས་འདི་ ཧེ་མའི་བྱུང་རབས་དང་ དེང་སང་གི་རྫོང་ཁག་གཉིས་ཆ་ར་ཡོདཔ་ཨིན། ཧེ་མའི་ ཀའི་རོ་ ནང་ལུ་ བེ་བི་ལོན་གྱི་རྫོང་དང་ ཀོབ་ཀྲིག་གི་ལྷ་ཁང་ཡོད་མི་ཚུ་བྱུང་རབས་ཅན་ཅིག་ཨིནམ་དང་ དེང་སང་གི་ ཀཱའི་རོ་ནང་ལུ་ ཚོང་ཁྲོམ་དང་ ཐོག་བརྩེགས་རིངམོ་གི་ཁྱིམ་ དེ་ལས་ ཀཱའི་རོ་ཁྲོམ་ཚོགས་གསརཔ་ལེ་ཤ་ གོང་འཕེལ་འགྱོ་སྟེ་ཡོདཔ་ཨིན། ཁྲོམ་གྱི་སྦོ་ལོགས་ཁར་ གི་ཟ་གི་གཏོར་གཟུགས་མཆོད་རྟེན་སྦོམ་ཚུ་ཡོདཔ་ལས་ རྒྱལ་སྤྱི་ནང་ མིང་གཏམ་ཡར་འཕར་གཏང་ནི་ལུ་ གནམ་མེད་ས་མེད་ ཕན་ཐོགས་བྱུང་སྟེ་ཡོདཔ་ཨིན།
ཀཱའི་རོ་གི་ཁྲོམ་ཚོགས་འདི་ནང་ མི་ས་ཡ་ ༡༠ ལྷགཔ་ཅིག་ཡོདཔ་དང་ ཀཱའི་རོ་ཁྲོམ་ཆེན་གྱི་ས་ཁོངས་འདི་ནང་ མི་ས་ཡ་ ༢༡.༣ དེ་ཅིག་སྡོད་དོ་ཡོདཔ་ཨིན། དེ་འབདཝ་ལས་ འཛམ་གླིང་ནང་ ཁྲོམ་ཚོགས་སྦོམ་ཤོས་ཅིག་སྦེ་བཟོ་དོ་ཡོདཔ་མ་ཚད་ ཨཕ་རི་ཀ་དང་ ཨ་རབ་རྒྱལ་ཁབ་ནང་ ཁྲོམ་ཚོགས་སྦོམ་ཤོས་ཅིག་ཨིན།
ཁྲོམ་ཚོགས་འདི་ནང་ མི་རློབས་མངམ་ཡོདཔ་ལས་ ད་ལྟོའི་བར་ན་ཡང་ གདོང་ལེན་ཅན་ཅིག་སྦེ་ར་ ལུས་ཏེ་ཡོདཔ་དང་ གཞུང་གིས་ སྡོད་ཁྱིམ་གྱི་གནས་སྟངས་ཡར་དྲག་གཏང་ནིའི་དོན་ལུ་ ཤུགས་བཏོན་ཡོད་རུང་ མི་སེར་མང་ཤོས་ཅིག་ གཞུང་གི་སྒྲིག་གཞི་དང་མ་འཁྲིལ་བར་ སྡོད་མི་ལེ་ཤ་ཡོདཔ་ཨིན།
ཀཱའི་རོ་ལུ་ གནམ་བྱཱར་འདི་ གནམ་མེད་ས་མེད་ དྲོད་ཤུགས་དང་སྐམ་ཀྲོག་ཀྲོ་ཡོདཔ་དང་ འཕྲལ་འཕྲལ་ དྲོད་ཚད་འདི་ ༣༥ ལས་བརྒལ་འགྱོ་དོ་ཡོདཔ་དང་ གནམ་དགུན་ལུ་ ཉི་དྲོད་འདི་རན་ཏོག་ཏོ་ཡོདཔ་དང་ ཉིན་མའི་དྲོད་ཚད་དེ་ ༢༠ དེ་ཅིག་ལུ་ལྷོད་དོ་ཡོདཔ་ཨིན། ས་གནས་འདི་ནང་ ཆརཔ་ཉུང་སུ་ཅིག་ལས་བརྒལ་ རྐྱབ་ནི་མེདཔ་ཨིན།
ཁྲོམ་འདི་ནང་ལུ་ མི་རློབས་མངམ་ཡོད་ནི་འདི་གིས་ ཁྲོམ་གྱི་ཚ་དྲོད་འདི་ གནམ་མེད་ས་མེད་ཡར་སེང་འགྱོ་སྟེ་ དམིགས་བསལ་དུ་ གནམ་བྱཱར་ལུ་ ལཱ་ཁག་རྐྱབ་དོ་ཡོདཔ་ཨིན། ས་གནས་འདི་ནང་ གནམ་གཤིས་འགྱུར་བགྲོད་ལུ་བརྟེན་ དྲོད་ཚད་དང་ རིམ་མཐུན་མིན་པའི་ཆརཔ་རྐྱབ་ནི་ལ་སོགས་པའི་ ཉེན་ཁ་ཡོདཔ་ལས་ དེ་གིས་ ཀའི་རོ་གི་ གཞི་རྟེན་མཐུན་རྐྱེན་ཚུ་ལུ་ ཧེང་སྐལ་ར་ གནོད་སྐྱོན་རྐྱབ་ནི་གི་ཉེན་ཁ་བཀལཝ་ཨིན།
ཀཱའི་རོ་འདི་ ཨི་ཇིབཊ་དཔལ་འབྱོར་གྱི་དབང་ལྡན་ལས་ཚོགས་ཅིག་སྦེ་ ལཱ་འབདཝ་ཨིན། འདི་གི་དཔལ་འབྱོར་འདི་ གཞུང་གི་ལཱ་འགན་དང་ ཚོང་འབྲེལ་ དེ་ལས་ ལྟ་བཤལ་དང་ བཟོ་སྐྲུན་གྱི་ལཱ་ཚུ་སླ་བསྲེ་སྟེ་ཡོདཔ་ཨིནམ་དང་ བཟོ་སྐྲུན་གྱི་ལཱ་གཙོ་བོ་ཚུ་ཡང་ ཐགས་རིགས་དང་རྫས་སྦྱོར་ དེ་ལས་ འགྱིབ་ཤོག་བཟོ་སྐྲུན་གྱི་ལཱ་དང་ བཟའ་འཐུང་བཟོ་འདོན་གི་ལཱ་ཚུ་ཨིན།
སྤྱི་ལོ་༢༠༡༤ ལུ་ ཀཱའི་རོ་གི་ ནང་འཁོད་ཐོན་སྐྱེད་ཡོངས་འབོར་འདི་ དངུལ་ཀྲམ་ཐེར་འབུམ་ ༡༠༢.༢ ཚོད་དཔག་འབད་ཡོདཔ་དང་ འདི་ཡང་ ཨཕ་རི་ཀ་ནང་ དཔལ་འབྱོར་གྱི་ཐད་ཁར་ ཁྲོམ་ཚོགས་གལ་ཅན་ཅིག་ལུ་གྱུར་ཡོདཔ་ཨིན། ཁྲོམ་ཚོགས་འདི་ ཨི་ཇིབཊ་གི་ཚོང་འབྲེལ་ནང་ཡང་ ཁག་ཆེ་ཤོས་ཅིག་ཨིནམ་དང་ འདི་ཡང་ རྡོ་སྣུམ་གྱི་ཐོན་སྐྱེད་དང་གསེར་ དེ་ལས་ ཚལ་ལུ་དང་ ནང་ཆས་ལ་སོགས་པ་ཚུ་ བཟོ་སྐྲུན་འབད་དེ་ ཕྱིར་ཚོང་འཐབ་དོ་ཡོདཔ་ཨིན། ཨིན་རུང་ ལྟ་བཤལ་འདི་ ཀཱའི་རོ་དཔལ་འབྱོར་གྱི་དོན་ལུ་ ཁག་ཆེ་ཤོས་ཅིག་སྦེ་ར་གནས་ཏེ་ཡོདཔ་དང་ དེ་ཡང་ ཁྲོམ་ཚོགས་སྦོ་ལོགས་ཁར་ གི་ཟ་གཏོར་གཟུགས་མཆོད་རྟེན་དང་ ཁྲོམ་ཚོགས་ཀྱི་ནང་འཁོད་ལུ་ཡོད་པའི་ ལམ་སྲོལ་བཟང་པོ་ལེ་ཤ་ཡོདཔ་ལས་བརྟེན་ཨིན།
ཀཱའི་རོ་འདི་ ཨི་ཇིབཊ་གི་རྒྱལ་ས་ལྟེ་བ་རྐྱངམ་གཅིག་མེན་པར་ རྒྱལ་ཁབ་འདི་གི་བྱུང་རབས་དང་ལམ་སྲོལ་ དེ་ལས་ དེང་སང་གི་འགྱུར་བ་དང་བསྟུན་ གནས་སྟངས་ཡར་དྲག་འགྱོཝ་ལས་ ཚོང་འབྲེལ་དང་ཤེས་ཡོན་ ཆོས་ལུགས་ དེ་ལས་ སྒྱུ་རྩལ་གྱི་ལྟེ་བ་ཅིག་སྦེ་ར་ཡོདཔ་ཨིན། ཨིན་རུང་ མི་རློབས་དང་གནམ་གཤིས་འགྱུར་བགྲོད་ལ་སོགས་པའི་གདོང་ལེན་ཚུ་ལུ་བརྟེན་ གོང་འཕེལ་ཚུ་ཡུན་བརྟན་སྦེ་བཟོ་ཐབས་ལུ་ ཐབས་ལམ་གསར་བཏོད་ཚུ་ གཙོ་བོ་བཟུང་སྟེ་ཡོདཔ་ཨིན།<ref>[1]