ཨེ་ཀུ་ཊོ་རེལ་ གི་ནི། Equatorial Guinea
ཨེ་རི་ཊེ་ཡ་འདི་ ཤར་ཨཕ་རི་ཀ་ནང་ཆགས་ཡོདཔ་ཨིནམ་དང་ རྒྱལ་ཁབ་འདི་གི་ཆགས་ཡུལ་དང་རྒྱལ་རབས་ དེ་ལས་ སྲིད་དོན་སྣ་མང་དང་ མི་སྡེའི་གནས་སྟངས་ལེགས་ཤོམ་ཡོདཔ་ལས་ རྒྱལ་ཁབ་ཚུ་ནང་ ཡོངས་གྲགས་ཅན་ཅིག་སྦེ་ཆ་བཞགཔ་ཨིན། ཨེ་རི་ཊེ་ཡ་འདི་ ས་ཆ་ཀི་ལོ་མི་ཊར་གྲུ་བཞིམ་ ༡༡༧,༦༠༠ དེ་ཅིག་ཁྱབ་ཡོདཔ་ཨིན། རྒྱལ་ཁབ་འདི་གི་ ནུབ་ཁ་ཐུག་ལུ་ སུ་ཌཱན་དང་ ལྷོ་ཁ་ཐུག་ལུ་ ཨི་ཐི་ཡོ་པི་ཡ་ དེ་ལས་ ཤར་ལྷོ་ཁ་ཐུག་ལུ་ ཇི་བྷུ་ཊི་ ཚུ་ཡོདཔ་ཨིན། རྒྱལ་ཁབ་འདི་ནང་ལུ་ སའི་ཆགས་ཚུལ་ཚུ་ཡང་ མ་འདྲཝ་ལེ་ཤ་ཡོདཔ་ལས་ ས་གནས་ཚུ་ནང་གནམ་གཤིས་ཡང་འགྱུརཝ་ཨིན།
སྤྱི་ལོ་ ༢༠༢༣ ལུ་ ཨེ་རི་ཊེ་ཡ་གི་མི་རློབས་དེ་ མི་འབོར་ས་ཡ་ ༦.༢༧ དེ་ཅིག་ཚོད་དཔག་ཡོདཔ་ཨིན། མི་རློབས་ཡར་སེང་གི་ཚད་གཞི་འདི་ ལོ་བསྟར་བཞིན་དུ་ བརྒྱ་ཆ་ ༡.༠༨ ལུ་གནས་ཏེ་ཡོདཔ་ལས་ ཚད་གཞི་འདི་དམའ་ཤོས་ཅིག་ཨིན། ཨེ་རི་ཊེ་ཡ་ནང་ མི་རིགས་མ་འདྲཝ་ལེ་ཤ་ཡོདཔ་དང་ འདི་ནང་ལུ་ མི་རློབས་སྡེ་ཚན་མངམ་ ཊི་གིརིན་ཡ་ བརྒྱ་ཆ་ ༥༠ དང་ ཊི་གེརེ་ བརྒྱ་ཆ་ ༣༠ ཡོདཔ་ཨིན། གཞན་ མི་རིགས་སྡེ་ཚན་ ས་ཧོ་དང་ཨ་ཕཱར་ དེ་ལས་ ན་ར་ ལ་སོགས་པ་དག་པ་ཅིག་ཡོད་མི་འདི་གིས་ རྒྱལ་ཁབ་ཀྱི་མི་རློབས་བརྒྱ་ཆ་ ཉུང་སུ་ཅིག་བཟོ་དོ་ཡོདཔ་ཨིན།
ཨེ་རི་ཊེ་ཡ་གི་གནམ་གཤིས་འདི་ ས་ཁོངས་རེ་ནང་ སོ་སོ་ཡོདཔ་ལས་ མཚོ་མཐའ་གི་ས་ཁོངས་ཚུ་ནང་ གནམ་མེད་ས་མེད་དྲོད་ཡོདཔ་དང་ དབུས་ཀྱི་ས་ཁ་མཐོ་ས་ཚུ་ནང་ བསིལ་ཏོང་ཏོ་དང་ ཆརཔ་ཤུགས་སྦེ་རྐྱབ་དོ་ཡོདཔ་ལས་ ལོ་བསྟར་བཞིན་དུ་ ཟླཝ་དྲུག་པ་དང་ དགུ་པ་གི་བར་ན་ ཆརཔ་སེན་ཊི་མི་ཊར་ ༦༡ རྐྱབ་དོ་ཡོདཔ་ཨིན། དེ་ལས་ ནུབ་ཕྱོགས་ཀྱི་རི་དང་དམའ་ས་ཚུ་ནང་ ས་གཤིས་ཡང་ ས་སྐམ་རྡོ་སྐམ་གྱི་ཆ་ཤས་ཅིག་ཡོདཔ་ཨིན། འདི་བཟུམ་མའི་གནམ་གཤིས་ཀྱི་ཁྱད་པར་ཡོད་མི་ལུ་བརྟེན་ རྒྱལ་ཁབ་ཀྱི་ས་གནས་ཚུ་ནང་ལུ་ སོ་ནམ་དང་འཚོ་བའི་གནས་སྟངས་མ་འདྲཝ་ཡོད་མི་ཚུ་ལུ་ ཕན་སྦོམ་སྦེ་ར་ཐོགས་དོ་ཡོདཔ་ཨིན།
ཨེ་རི་ཊེ་ཡ་འདི་ སྐད་ཡིག་ཕྱུགཔོ་ཨིན་པའི་རྒྱལ་ཁབ་ཅིག་འབདཝ་ལས་ རྒྱལ་ཁབ་ཀྱི་ལུང་ཕྱོགས་ཚུ་ནང་ ཁ་སྐད་རིགས་ལེ་ཤ་ཅིག་ར་སླབ་ནི་ཡོདཔ་ཨིནམ་དང་ གཞུང་འབྲེལ་གྱི་ཁ་སྐད་འདི་ ཊི་གིརིན་ཡ་དང་ ཨ་ར་བིག་ དེ་ལས་ དབྱིན་སྐད་གསུམ་ ལག་ལེན་འཐབ་ཨིན། དེ་མ་ཚད་ རྒྱལ་ཁབ་ནང་ ཁ་སྐད་གཞན་ ཊི་གེརེ་དང་ཀུ་ན་མ་ དེ་ལས་ ཨ་ཕཱར་དང་ ཀུ་ཤི་ཊིག་གི་ཁ་སྐད་མ་འདྲཝ་ཚུ་ཡང་ ཁྱབ་ཆེཝ་སྦེ་ལག་ལེན་འཐབ་ཨིན། རྒྱལ་ཁབ་ནང་ལུ་ འདི་བཟུམ་མའི་ཁ་སྐད་མ་འདྲཝ་ལེ་ཤ་ཡོད་མི་འདི་གིས་ རྒྱལ་ཁབ་ནང་ མི་རིགས་མ་འདྲཝ་དང་ ལམ་སྲོལ་ཕྱུགཔོ་ཡོད་པའི་རྒྱལ་ཁབ་ཅིག་ཨིན་ཟེར་བའི་བརྡ་སྟོནམ་ཨིན།
ཨེ་རི་ཊེ་ཡ་གི་དཔལ་འབྱོར་གནས་སྟངས་འདི་ མང་ཆེ་ཤོས་ཅིག་ སོ་ནམ་གྱི་ལཱ་ལུ་བརྟེནམ་ཨིནམ་དང་ རྒྱལ་ཁབ་ཀྱི་མི་རློབས་མང་ཤོས་ཅིག་ འཚོ་བ་གཙོ་བོ་སོ་ནམ་ལུ་སྐྱོང་སྡོདཔ་ཨིན། རྒྱལ་ཁབ་ནང་ལུ་ ལོ་ཐོག་གི་རིགས་ དཔེར་ན་ ཀར་ ནག་ མོན་བྱཱ་དང་ཚོད་བསྲེ་ དེ་ལས་ སྒོ་ནོར་གྱི་ཐོན་སྐྱེད་ཚུ་བཟོ་དོ་ཡོདཔ་ཨིན། དེ་མ་ཚད་ རྒྱལ་ཁབ་ནང་ གསེར་ ཟངས་ ཏི་ཚ་དང་ཚྭ་ དེ་ལས་ བཅུད་ཚྭ་ལ་སོགས་པའི་ ས་གཏེར་གྱི་ལས་སྡེ་ཚུ་ཡོདཔ་དང་ ས་སྣུམ་དང་ རང་བྱུང་འབར་རླུང་གི་གསོག་འཇོག་ཐོན་སྐྱེད་ཚུ་ཡང་ཡོདཔ་ཨིན།
རྒྱལ་ཁབ་ཀྱི་དཔལ་འབྱོར་འདི་ གཞུང་གི་བུ་ལོན་མཐོ་དྲགས་དང་ སོ་ནམ་གྱི་དཀའ་ངལ་ དཔེར་ན་ གནམ་གཤིས་འགྱུར་བགྲོད་དང་ ཆར་དཀོན་གྱི་ཉེན་ཁ་ཚུ་གདོང་ལེན་འབད་དེ་ཡོདཔ་ཨིན། ཨིན་རུང་ ཨེ་རི་ཊེ་ཡ་གིས་ དཔལ་འབྱོར་གྱི་ཚད་འཛིན་དམ་དྲགས་ཡོད་མི་ལུ་བརྟེན་ དཔལ་འབྱོར་གྱི་དངུལ་ཁུངས་ལྷག་ལུས་ཚུ་ སྒྲིང་སྒྲི་སྦེ་ར་བཞག་ཚུགས་ཏེ་ཡོདཔ་ཨིན། རྒྱལ་ཁབ་ཀྱི་ ཕྱིར་ཚོང་མཉམ་རོགས་གཙོ་བོ་འདི་ རྒྱ་ནག་དང་ ལྷོ་ཀོ་རི་ཡའི་རྒྱལ་ཁབ་ཚུ་ཨིནམ་དང་ དེ་ཡང་ མང་ཤོས་ར་ ས་གཏེར་དང་གྱོན་ཆས་ཚུ་ ཕྱིར་ཚོང་འཐབ་ཡོདཔ་ཨིན། དེ་ལས་ རྒྱལ་ཁབ་ཀྱིས་རྒྱ་ནག་དང་སའུ་དི་ཨ་ར་བི་ཡ་ དེ་ལས་ ཨི་ཊ་ལི་དང་ཊར་ཀི་རྒྱལ་ཁབ་ཚུ་ལས་ འཕྲུལ་ཆས་དང་རྡོ་སྣུམ་གྱི་ཐོན་སྐྱེད་ དེ་ལས་ བཟའ་འཐུང་དང་བཟོ་སྐྲུན་འབད་ཡོད་པའི་ཅ་ཆས་ཚུ་ནང་འདྲེན་འབདཝ་ཨིན།
ཨེ་རི་ཊེ་ཡ་གི་ལམ་སྲོལ་འདི་ རྒྱལ་ཁབ་ཀྱི་མི་རིགས་དང་ ཆོས་ལུགས་ཀྱི་ལམ་སྲོལ་མང་ཤོས་ཅིག་དང་སླ་བསྲེ་འབད་ཡོདཔ་ཨིན། རྒྱལ་ཁབ་ནང་ ཆོས་ལུགས་མ་འདྲཝ་ལེ་ཤ་ཡོད་མི་འདི་ རྒྱལ་ཁབ་ཀྱི་དུས་སྟོན་དང་ཁྱིམ་བཟོ་ དེ་ལས་ ཉིན་བསྟར་གྱི་ལཱ་ཚུ་ནང་ མཐོང་གསལ་བྱུངམ་ཨིན།
རྒྱལ་ཁབ་ནང་ སྲིད་དོན་གྱི་གདོང་ལེན་ཚུ་ཡོད་དེ་འབད་རུང་ ཨེ་རི་ཊེ་ཡ་མི་སེར་ཚུ་གིས་ མི་སྡེ་དང་འབྲེལ་བའི་ མཐུན་ལམ་སྒྲིང་སྒྲི་བཞག་སྟེ་ ལམ་སྲོལ་གྱི་དཔའ་ཉམས་བསྐྱེད་དེ་སྡོདཔ་ཨིན། གཞུང་གིས་ སྲིད་དོན་དང་མི་སེར་གྱི་ཐོབ་དབང་ཚུ་ ཚད་འཛིན་དམ་དམ་འབད་ཡོདཔ་དང་ མི་སྡེའི་ནང་འབད་རུང་ དམག་སྡེ་ལུ་གཙོ་བོར་བཏོན་ཏེ་ཡོདཔ་མ་ཚད་ མི་སེར་མང་ཤོས་ཅིག་ རྒྱལ་ཡོངས་ཀྱི་ཞབས་ཏོག་ནང་ ཨིན་ཅི་མིན་ཅི་ཕྱག་ཞུ་དགོཔ་སྦེ་ཡོདཔ་ཨིན། དེ་གིས་ རྒྱལ་ཁབ་ཀྱི་མི་སྡེའི་གནས་སྟངས་ལུ་ ཐོ་ཕོག་ཡོད་རུང་ མི་སེར་ཚུ་གིས་སེམས་ཤུགས་བསྐྱེད་ནི་ལུ་ ཕན་ཐོགས་བྱུང་ཡོདཔ་ཨིན།
ཨེ་རི་ཊེ་ཡ་འདི་ ས་ཆའི་གནས་སྟངས་དང་ རང་བཞིན་གནས་སྟངས་ཚུ་མ་འདྲཝ་ཡོད་པའི་རྒྱལ་ཁབ་ཅིག་ཨིནམ་དང་ རྒྱལ་ཁབ་ནང་གི་མི་རློབས་ཡང་ མི་རིགས་དང་སྐད་རིགས་མ་འདྲཝ་ལེ་ཤ་ཡོད་མི་ཅིག་ཨིན། རྒྱལ་ཁབ་ཀྱི་དཔལ་འབྱོར་འདི་ མང་ཤོས་ར་ སོ་ནམ་དང་ས་གཏེར་ལུ་བརྟེན་ཏེ་ཡོདཔ་དང་ གོང་འཕེལ་དང་སྲིད་དོན་གྱི་གཞུང་སྐྱོང་དང་འབྲེལ་བའི་ གདོང་ལེན་ཚུ་འབྱུང་བཞིན་ར་ཡོདཔ་ཨིན། ཨེ་རི་ཊེ་ཡ་གི་ལམ་སྲོལ་འདི་གིས་ ཧེ་མའི་རྒྱལ་རབས་དང་ མི་རིགས་མ་འདྲཝ་ལེ་ཤ་ཡོད་པའི་བརྡ་སྟོན་ཨིནམ་དང་ འདི་ཡང་ ཆོས་ལུགས་དང་སྙན་ཆ་ དེ་ལས་ མི་སྡེའི་ལུགས་སྲོལ་ཚུ་ མར་ཉམས་མ་བཅུག་པར་སྒྲིང་སྒྲི་སྦེ་བཞག་ཡོདཔ་ཨིན།
རྒྱལ་ས་ལྟེ་བ། ཨཱས་མ་ར། Asmara
ཨཱས་མ་ར་འདི་ ཨེ་རི་ཊེ་ཡ་གི་རྒྱལ་ས་ལྟེ་བ་ཨིནམ་དང་ ཨཱས་མ་ར་འདི་ ཨི་ཐི་ཡོ་པི་ཡཱན་གྱི་བྱང་ཁ་ཐུག་ལུ་ རྒྱ་མཚོའི་མཐོ་ཚད་ལས་ མི་ཊར་ ༢,༣༢༥ ལུ་ཡོད་པའི་ ཁྲོམ་སྡེ་ལྟེ་བ་ཅིག་ཨིནམ་དང་ ཁྲོམ་འདི་ ས་ཆ་གྲུ་བཞི་ཀི་ལོ་མི་ཊར་ ༤༥ དེ་ཅིག་ཁྱབ་ཡོདཔ་ཨིན།
སྤྱི་ལོ་ ༢༠༢༣ ལུ་ ཨེས་མ་ར་གི་མི་རློབས་དེ་ མི་གྲངས་ ༡,༠༧༣,༠༠༠ དེ་ཅིག་ཨིནམ་སྦེ་ཚོད་དཔག་ཡོདཔ་དང་ དེ་ཡང་ ཨེས་མ་ར་འདི་ ཨེ་རི་ཊེ་ཡ་གི་ཁྲོམ་ཚོགས་སྦོམ་ཤོས་དང་ རྒྱལ་ཁབ་ཀྱི་སྲིད་དོན་དང་ལམ་སྲོལ་ དེ་ལས་ དཔལ་འབྱོར་གྱི་ལྟེ་བ་ཅིག་ཨིན། ཁྲོམ་ཚོགས་འདི་ནང་ལུ་ མི་རློབས་མངམ་ཡོདཔ་དང་ དེ་ནང་ལུ་ མི་རློབས་ཀྱི་གྱངས་ཁ་འདི་ ཀི་ལོ་མི་ཊར་གྲུ་བཞི་རེ་ལུ་ མི་གྲངས་ ༡༩,༩༡༡ དེ་ཅིག་ཡོདཔ་ཨིན། ཨེས་མ་ར་ལུ་སྡོད་མི་ཚུ་ཡང་ མི་རིགས་དང་རིགས་རྒྱུད་མ་འདྲཝ་ལས་འོང་མི་ལེ་ཤ་ཡོདཔ་དང་ ཁྲོམ་ཚོགས་ལྟེ་བ་འདི་ནང་ ཊི་གིརིན་ཡ་གི་མི་རློབས་མངམ་ཡོདཔ་ཨིན། ཁྲོམ་འདི་ལོ་ངོ་མང་རབས་ཅིག་གི་རིང་ ཡར་རྒྱས་འགྱོ་སྟེ་ཡོདཔ་དང་ ད་ལྟོ་ཡང་ གྲོང་གསེབ་ཀྱི་མི་སེར་ཚུ་ ཤེས་ཡོན་དང་ལཱ་གཡོག་ དེ་ལས་ མི་ཚེ་གནས་སྟངས་ལེགས་ཤོམ་འཚོལ་ཏེ་ ཁྲོམས་ཚོགས་ལྟེ་བ་ནང་འོང་སྟེ་ར་ཡོདཔ་ཨིན།
ཁྲོམ་འདི་ནང་ལུ་ཆར་ཆུའི་དུས་ཚོད་འདི་ སྤྱི་ཟླ་བདུན་པ་དང་བརྒྱད་པ་ནང་ཨིནམ་དང་ ལོ་བསྟར་གྱི་ཆར་ཆུའི་ཚད་གཞི་འདི་ མི་ལི་མི་ཊར་ ༥༡༨ དེ་ཅིག་རྐྱབ་ཨིན། ས་གནས་འདི་ནང་ ས་སྐམ་རྡོ་སྐམ་གྱི་དུས་ཚོད་འདི་ སྤྱི་ཟླ་ ༩ པ་ལས་འགོ་བཙུགས་ཏེ་ སྤྱི་ཟླ་ ༤ པ་ཚུན་ཨིནམ་དང་ ཁྲོམ་འདི་ནང་ལུ་ལོ་རིམ་བཞིན་དུ་ ཉི་དྲོད་ཆུ་ཚོད་ ༢༩༠༠ དེ་ཅིག་འཐོབ་ཚུགསཔ་ཨིན། དེ་ལས་ ས་གནས་འདི་ནང་ བ་མོ་ཆགས་ནི་འདི་དཀོན་དྲགས་ཅིག་ཨིནམ་དང་ བརྒྱ་ལམ་རེ་ལས་བརྒལ་ དྲོད་ཚད་ ༣༡ ལས་ལྷག་ནི་མེདཔ་ཨིན། ཨིན་རུང་ ལུང་ཕྱོགས་འདི་ནང་ལུ་ ནགས་ཚལ་རྩ་སྟོངས་དང་ས་རུད་ དེ་ལས་ བྱེ་མའི་ཐང་སྒྱུར་ལ་སོགས་པའི་རང་བཞིན་གནས་སྟངས་ལུ་བརྟེན་པའི་གདོང་ལེན་ཚུ་བྱུང་མི་དེ་གིས་ སོ་ནམ་ཞིང་ལཱ་དང་ ས་གནས་ཀྱི་མི་སེར་ཚུ་གི་ འཚོ་བའི་མཐུན་རྐྱེན་ལུ་ཐོ་སྦོམ་སྦེ་ར་ཕོགཔ་ཨིན།
ཨེས་མ་ར་ནང་ ཁ་སྐད་ངོ་མ་འདི་ ཊི་གིརིན་ཡ་ཨིནམ་དང་ ཁ་སྐད་འདི་ ཨེ་རི་ཊེ་ཡ་རྒྱལ་ཁབ་ནང་ལུ་ ཁྱབ་ཆེ་དྲགས་སྦེ་སླབ་སྲོལ་ཡོདཔ་ཨིན། འདི་དང་གཅིག་ཁར་ གཞུང་དང་ཤེས་རིག་ དེ་ལས་ ཚོང་འབྲེལ་ཚུ་ནང་ ཨ་ར་བིག་དང་ཨིང་སྐད་ཡང་ སྤྱིར་བཏང་སྦེ་ལག་ལེན་འཐབ་ཨིན། ཨ་ར་བིག་འདི་ ཚོང་འབྲེལ་དང་ ཆོས་དང་འབྲེལ་བའི་ལཱ་ཚུ་ནང་ ལག་ལེན་འཐབ་དོ་ཡོདཔ་དང་ ཨིང་སྐད་འདི་སློབ་གྲྭ་ཚུ་ནང་ལུ་ སློབ་སྟོན་འབད་དོ་ཡོདཔ་དང་ གཞུང་འབྲེལ་གྱི་དོན་ལུ་བརྡ་སྤྲོད་འབད་བའི་སྐབས་ ལག་ལེན་འཐབ་ཨིན། ཁྲོམ་ཚོགས་འདི་ནང་ ཨེ་རི་ཊེ་རི་ཡ་གི་ མི་རིགས་སྣ་ཚོགས་འཛོམས་ཡོདཔ་ལས་ འདི་ནང་ ཁ་སྐད་ཡང་མ་འདྲཝ་ལེ་ཤ་སླབ་སྲོལ་ཡོད་ནི་འདི་གིས་ ས་གནས་འདི་ ཁ་སྐད་ཕྱུགཔོ་ཡོད་མི་ཅིག་སྦེ་ཆ་བཞགཔ་ཨིན།
དཔལ་འབྱོར་གྱི་ཐད་ལུ་ ཨེས་མ་ར་འདི་ ཨེ་རི་ཊེ་ཡ་གི་སྲིད་དོན་དང་དཔལ་འབྱོར་གྱི་ ལཱ་གི་ལྟེ་བ་ཅིག་ཨིན། ཁྲོམ་ཚོགས་ལྟེ་བ་འདི་ནང་ལུ་ གཞུང་གི་གཙུག་སྡེ་དང་ ཕྱི་རྒྱལ་གྱི་གཞུང་ཚབ་ལས་ཁང་ དེ་ལས་ ཚོང་ལས་སྦོམ་ཤོས་ཚུ་གི་ཡིག་ཚང་ལྟེ་བ་ཚུ་ཡོདཔ་ཨིན། ཁྲོམ་ཚོགས་ལྟེ་བ་འདི་ནང་ ཁེ་འབབ་ཅན་གྱི་ལས་སྡེ་ དཔེར་ན་ བཟོ་སྐྲུན་དང་ཚོང་འབྲེལ་ དེ་ལས་ཞབས་ཏོག་དང་ སྐྱེལ་འདྲེན་ཚུ་ཡོདཔ་ཨིན། ཁྲོམ་འདི་ནང་ དབང་འོག་རྒྱལ་ཁབ་ཀྱི་ཁྱིམ་བཟོ་ཚུ་ མི་ཉམས་རྒྱུན་སྐྱོང་འབད་དེ་བཞག་ཡོདཔ་ལས་ ས་གནས་འདི་ནང་ ལྟ་བཤལ་དང་ལམ་སྲོལ་ལུ་སྤྲོ་བ་བསྐྱེད་མི་ལེ་ཤ་ཡོདཔ་ཨིན། ཁྲོམ་འདི་ནང་ དཔལ་འབྱོར་གྱི་གནད་དོན་འདི་ གལ་ཆེ་དྲགས་ཅིག་ཨིན་རུང་ ཨེས་མ་ར་ནང་ བཟོ་གྲྭ་ཁང་སོར་འགྱུར་ཚད་ལས་བརྒལ་མེདཔ་དང་ གཞི་རྟེན་མཐུན་རྐྱེན་ཚུ་ལེགས་ཤོམ་མེདཔ་ དེ་ལས་ རྒྱལ་ཡོངས་སྲིད་བྱུས་ཚུ་གིས་ སྒེར་གྱི་ཚོང་ལཱ་ལུ་ ཐོ་ཕོག་ཡོད་པའི་གདོང་ལེན་ཚུ་བྱུང་སྟེ་ར་ཡོདཔ་ཨིན།
ཁྲོམ་ཚོགས་ལྟེ་བ་འདི་ནང་ ཨེ་རི་ཊེ་ཡ་གི་ རྒྱལ་ཡོངས་འགྲེམས་སྟོན་ཁང་ཡང་ཡོདཔ་དང་ འདི་ནང་ལུ་ རྒྱལ་ཁབ་ཀྱི་ཅ་རྙིང་དང་ ལམ་སྲོལ་གྱི་རྒྱལ་རབས་དང་བྱུང་རབས་ཚུ་གསལ་སྟོན་འབདཝ་ཨིན། ཨེས་མ་ར་གི་ མི་སྡེའི་གནས་སྟངས་ནང་ལུ་ རིགས་བརྒྱུད་དང་ཁྲོམ་ནང་ཡོད་པའི་ ཆོས་ལུགས་མ་འདྲཝ་གི་སྡེ་ཚན་ཡོད་མི་ཚུ་ སྙན་ཆ་དང་ཞབས་ཁྲ་ དེ་ལས་ རང་ལུགས་ཀྱི་དུས་སྟོན་ཐོག་སྟོནམ་ཨིནམ་དང་ འདི་ཚུ་མི་སྡེ་ནང་ཁག་ཆེ་ཤོས་ཅིག་སྦེ་བརྩི་འཇོག་འབདཝ་ཨིན། དེ་མ་ཚད་ ཨེ་རི་ཊེ་ཡ་གི་ལམ་སྲོལ་གཙོ་བོ་ཅིག་ཨིན་མི་ ཀཱ་ཕི་གི་མཛད་སྒོ་འདི་ རྒྱ་ཆེ་དྲགས་སྦེ་དགའ་སྟོན་འབད་དོ་ཡོདཔ་དང་ འདི་གིས་ མགྲོན་སྐྱོང་དང་མི་སྡེ་ནང་ གཅིག་མཐུན་དང་འབྲེལ་བ་སྦོམ་ཡོད་པའི་རྟགས་མཚན་སྟོནམ་ཨིན།
ཨེས་མ་ར་འདི་ ས་ཁ་མཐོ་སར་ཡོད་པའི་རྒྱལ་ས་ལྟེ་བ་ཅིག་ཨིནམ་དང་ བསིལ་དྲོད་གནས་སྟངས་ཡང་ རན་ཏོག་ཏོ་ཡོདཔ་མ་ཚད་ ས་གནས་འདི་ནང་མི་རིགས་མ་འདྲཝ་ དེ་ལས་ ལམ་སྲོལ་ཕྱུགཔོ་ཡོད་མི་ཅིག་སྦེ་ཆ་བཞགཔ་ཨིན། ས་ཆའི་གནས་སྟངས་འདི་ ཨེ་རི་ཊེ་ཡའི་རི་བརྒྱུད་ཚུ་ནང་ལུ་ཡོདཔ་ལས་ ས་གནས་ཀྱི་གནམ་གཤིས་འདི་ མཐའ་འཁོར་གྱི་ལུང་གཤོང་ཚུ་དང་ཁྱད་པར་ཅན་ཨིན། ཁྲོམ་འདི་ ཨེ་རི་ཊེ་ཡ་གི་སྲིད་དོན་དང་དཔལ་འབྱོར་ དེ་ལས་ ལམ་སྲོལ་གྱི་ལྟེ་བ་ཅིག་སྦེ་ ལག་ལེན་འཐབ་དོ་ཡོདཔ་དང་ འདི་གིས་ རྒྱལ་རབས་ཀྱི་རྗེས་ཤུལ་ དེང་སང་གི་དཀའ་ངལ་དང་གོ་སྐབས་ཚུ་གི་བར་ན་ ཁྱད་མཉམ་འབད་དེ་ཡོདཔ་ཨིན།[༡]
Reference
[ཞུན་དག]- ↑ https://www.countryreports.org/country/EquatorialGuinea/geography.htm https://academia-lab.com/encyclopedia/languages-of-equatorial-guinea/ https://www.britannica.com/place/Equatorial-Guinea/Cultural-life https://www.worldatlas.com/maps/equatorial-guinea https://www.studycountry.com/guide/GQ-culture.htm#google_vignette
༼རྩོམ་ཡིག་འདི་སྲོལ་འཛིན་དང་རྫོང་ཁ་གོང་འཕེལ་ལས་ཁུངས་ཀྱི་སྐད་ཡིག་ཞིབ་འཚོལ་དང་ལས་རིམ་སྡེ་ཚན་གྱི་ཞལ་འདེབས།༽
Source: Department of Culture and Dzongkha Development.