User:Doesntmakenosense
བསྟོད་པ་རྐང་བརྒྱད།། ༀ་གྲུབ་པར་གྱུར་ཅིག།། ཧ་ཧ་ཧཱུྃ་དང་ཀཱི་ལི་ཀཱི་ལི་ཞེས་སྒྲོག་འབྱུང་པོ་རོ་ལངས་ཚོགས་རྣམས་མྱུར་བསད་ནས།། སྐུ་ལ་མི་ཡི་ཤ་དང་རྒྱུ་མས་སྦྲེལ་བའི་ཕྲེང་བས་ཀུན་ནས་བརྒྱན་ཅིང་ཞལ་དུ་གསོལ།། འདོད་པའི་གཟུགས་དང་མི་སྡུག་གཟུགས་ཅན་ཕྱག་གཡོན་ཁ་ཊྭཱྃ་ག་བཅས་མི་འི་ཐོད་པ་རྣམས།། སྨིན་སྐྲ་སེར་ཞིང་སྤྱན་དམར་རོའི་གདན་ལ་དགྱེས་པའི་ཞིང་སྐྱོང་ཁྱོད་ཀྱིས་ཞིང་སྐྱོངས་མཛོད།། ཕེཾ་ཕེཾ་ཕཏ་ཅེས་སྒྲོགས་པས་སོ་སོར་བསྐྱོད་པའི་མེ་དཔུང་ཆེའི་པོའི་དབུས་སུ་རབ་བཞུགས་ནས།། རབ་ཏུ་གསལ་ཞིང་མགོ་བོ་རྣམས་ཀྱི་ཕྲེང་བས་འཇིགས་པའི་སྐུ་བརྒྱན་གཤིན་རྗེ་དང་མཚུངས་པ།། དྲག་ཤུལ་ཕྱག་གིས་བསད་པ་རྣམས་ཀྱི་མ་མོགོ་མ་ལུས་བཟུང་ནས་མྱུར་ཁྲག་རྒྱུན་འབབ་པ་གསོལ།། རོལ་པས་རོལ་པ་སེར་ཞིང་མི་ཡིས་གང་བའི་ས་ལ་ཞིང་སྐྱོང་ཁྱོད་ཀྱིས་སྲུང་བར་མཛོད།། ཀྵྃ་ཀྵྃ་ཀྵྃ་ཞེས་བཟོད་པའི་སྐད་ཅན་ཅ་ཅོ་སྒྲོགས་པར་བྱེད་པའི་གདུག་པ་རྣམས་བཟུང་སྟེ།། གཅིག་པུས་སྣ་ཚོགས་མནན་ཅིང་མནན་ནས་ཀ་ཧ་ཀ་ཧ་བརྗོད་མཛད་ཆར་སྤྲིན་སྔོན་པོའི་མདོག།། ཧྲིཾ་ཧྲིཾ་ཧྲིཾ་ཞེས་སྔགས་ཀྱི་གསུང་ཅན་པ་ཙ་པ་ཙའི་སྔགས་ཀྱིས་རིགས་ཀྱི་ལུས་ཅན་བསྲེག།། སྒྲུབ་པོ་རྣམས་ཀྱིས་དགེགས་རྣམས་མྱུར་དུ་སྐྲོད་པར་མཛད་ཅིང་ཞིང་རྣམས་ངེས་པར་ཞིང་སྐྱོང་མཛོད།། ཧཱུྃ་ཧཱུྃ་ཕཊ་ཅེས་དྲག་པོའི་སྒྲ་ཡིས་སྲིད་པ་གསུམ་གྱི་ཁོངས་ནི་མ་ལུས་འགེངས་ནུས་ཤིང་། །ཧཱ་ཧཱ་ཌ་ཌ་ཞེས་བཞད་གང་ཞིག་དུས་ཀུན་ཏུ་ནི་ཤིན་ཏུ་རབ་ཏུ་འཇིགས་མཛད་པ།། ཕྱུགས་རྣམས་ཀྱི་ནི་ཉིན་རེ་བཞིན་ཏུ་འདུད་དང་བགེགས་འཇོམས་དྲི་མེད་བརྙེས་པ་ཆུ་ཟླ་བཞིན།། དབུ་སྐྲ་སྨ་རའི་རལ་པ་ཆེས་སེར་ཉེ་བར་བསྐྱོད་པའི་ཞིང་སྐྱོང་ཁྱོད་ཀྱིས་ཞིང་སྐྱོང་མཛོད།། རཾ་རཾ་རཾ་ཞེས་སྤྱན་དམར་འཁྲུག་ཅིང་བསྒྱུར་མཛད་ཀྲཱུྃ་ཀྲཱུྃ་ཀྲཱུྃ་ཞེས་ཁྲོས་སྤྱན་གྱིས་གཟིགས།། ཁྃ་ཁྃ་ཁྃ་ཞེས་གཏུམ་པའི་ཤུགས་ཀྱི་ཕྱག་གཡས་གྲི་གུག་རལ་གྲིས་བགེགས་རྣམས་རོལ་མཛད་ཅིང།། རུ་རུ་རུ་ཞེས་ཁྲག་ནི་ཕྱག་གིས་བསྣམས་ཤིང་ཞལ་དུ་གསོལ་མཛད་འཐུང་བ་ལ་དགྱེས་པ།། ཌྃ་ཌྃ་ཌྃ་ཞེས་ཌཱ་མ་རུ་ཅན་འདི་ཡིས་གདུལ་མཛད་འཁོར་བཅས་ཞིང་སྐྱོང་ཁྱོད་ཀྱིས་སྐྱོངས།། ཀྃ་ཀྃ་ཀྃ་ཞེས་ཐོད་པའི་ཕྲེང་བས་དབུ་ལ་སྤྲས་ཤིང་ནག་པོ་ཆུ་དང་འདྲ་བའི་སྐུ།། ཙཾ་ཙཾ་ཙཾ་ཞེས་གཏུམ་པའི་ཤུགས་ཀྱིས་རབ་གཡོས་རྨད་བྱུང་འོད་ཀྱིས་འཇིག་རྟེན་སྣང་མཛད་པ།། ཀྲྃ་ཀྲྃ་ཀྲྃ་ཞེས་གཤེགས་པས་དགྲ་བོ་ཉོན་མོངས་པ་རྣམས་ངེས་པར་མ་ལུས་འཇོམས་མཛད་ཅིང་།། སྃ་སྃ་སྃ་ཞེས་ཚོགས་པའི་བདག་ཉིད་དམ་ཚིག་ཐོས་འཛིན་ཞིང་སྐྱོང་གང་ཡིན་ཁྱོད་ཀྱིས་སྐྱོངས།། བཾ་བྃ་བཾ་ཞེས་སྣ་ཚོགས་གཤིན་རྗེ་ལྟར་འགྲོ་དྲི་མ་མེད་པའི་ཆུ་བཞིན་གཟིགས་མཛད་པ།། ཡྃ་ཡྃ་ཡྃ་ཞེས་རླུང་གི་ཤུགས་ཀྱིས་མྱུར་དུ་རྒྱུ་ཞིང་ཉོན་མོངས་འཇིག་རྟེན་གནོད་བྱེད་མཁྱེན།། བྷྲཱུཾ་བྷྲཱུྃ་བྷྲཱུཾ་ཞེས་ནུས་པ་མཆོག་གི་ཁྲོ་གཉེར་འཇིགས་མཛད་འཇིགས་པའི་ཁ་གདངས་ཤ་ཟ་ཞིང་།། ཀྵཾ་ཀྵཾ་ཀྵཾ་ཞེས་ཕན་པར་མཛད་ཅིང་གནོད་པ་སྐད་ཅིག་གིས་སེལ་ཞིང་སྐྱོང་ཁྱོད་ཀྱིས་སྐྱོངས།། ཀླྃ་ཀླིཾ་ཀླུཾ་ཞེས་གདུག་པའི་གཟུགས་ཀྱིས་སྲིད་གསུམ་ཉིན་མཚན་དུས་ཀུན་ཉོན་མོངས་གྱུར་པ་གང་།། པྃ་པྃ་པྃ་ཞེས་ཐུགས་རྗེའི་ཞགས་པས་བྱོལ་སོང་རྣམས་འཛིན་ཕྱག་གིས་གདུལ་བྱ་རྣམས་སྐྱོང་བ།། སྔགས་ཀྱི་སྐུ་ཅན་སྔགས་བདག་ཐུགས་ཀྱིས་སྔགས་པ་རྣམས་ལ་བློ་གྲོས་འབྲས་བུ་མཚུངས་མེད་སྟེར།། ཞིང་རྣམས་སྐྱོང་བར་མཛད་པ་རྣམས་ཀྱིས་འགྲོ་བ་མ་ལུས་པ་རྣམས་ཡུན་རིང་སྐྱོང་དུ་གསོལ།། སྒྲུབ་པ་པོའམ་སློབ་དཔོན་གང་ཞིག་དམ་ཚིག་ཐོས་འཛིན་བློ་ལྡན་གུས་པ་དང་བཅས་པ།། ཐུན་གསུམ་དུ་ནི་སྔགས་རྣམས་བརྒྱད་པོ་ཀློག་བྱེད་དེ་ནི་བསོད་ནམས་ལྡན་པར་འགྱུར་བ་དང་།། ཚེ་དང་དཔལ་དང་གྲགས་དང་མཐུ་སྟོབས་འབྱོར་པ་འཛིན་ཅིང་བློ་གྲོས་རྒྱས་པ་མཚུངས་མེད་སྟེར།། ས་སྟེང་དང་ནི་མཐོ་རིས་སུ་ཡང་དེ་ཡི་བགེགས་ཀྱི་ཚོགས་རྣམས་རྟག་ཏུ་ཉམས་པར་འགྱུར།།
བྷྱོཿ ཏིལ་མར་གྱིས་བསྐུས་ལན་བུ་གཅིག་ཆངས་རོ་ཉེའི་རྣ་ཆས་སྒེག་ཅིང་ཆ་ལུགས་མ་ལུས་འཆང་། རྒྱན་དུ་རྐང་སྒྲོག་ལྕགས་ལས་བྱས་པ་གཅིག་གིས་རང་གི་རྐང་པ་མཛེས་པར་བྱས་པ་སྟེ། གཅེར་བུ་བོང་བུ་ཞོན་ནས་འགྲོ་བ་འདི་ན་རྒྱུ་བ་དེ་ནི་ལྷ་མོ་ཁྱོད་ཉིད་ཀྱིས། བདག་ཉིད་མཛེས་པར་ཤེས་ཀྱིས་གཞན་ལྟས་ཁྱོད་ཀྱི་སྤྱོད་པ་མཚོ་ཆེན་དོན་དག་སུ་ཡིས་ཤེས། འཁོར་བ་འཇིགས་པའི་ཚེ་ན་མི་ལུས་དག་ལས་ཁྲག་དང་ཞག་འཛག་དུད་པ་འཐུལ་བས་ན། ལྷ་མོ་མཆེ་བ་གཙིགས་པ་ཁྱོད་ཀྱི་ཞལ་དུ་འགྲོ་ཀུན་སྐད་ཅིག་ཙམ་གྱིས་ཞུགས་པར་འགྱུར། ནག་མོ་མི་ཐོད་ཐོགས་པ་ཁྱོད་ནི་རྣལ་འབྱོར་བསྒྲུབ་པའི་སྤྱོད་ཡུལ་ཅན་དེ་དུར་ཁྲོད་དགྱེས། ཁྱོད་ནི་གཡོན་ཅན་མནན་ཅིང་ནད་དང་འཆི་བའི་འཇིགས་པ་སེལ་ཞིང་མི་ཟད་དྲིལ་ཡང་སྒྲོག །ཁྱོད་ནི་དཔའ་བོ་དག་གི་མགོ་ནི་ཅོད་པན་ལེགས་སྤྲས་གཡུལ་དུ་མཚོན་གྱིས་བཅད་པ་ཡི། །ཕྲེང་བ་ཐོགས་ཤིང་གར་བྱེད་ལག་པ་མཉེན་རྐྱང་རྐུབ་ཚོས་ཆེ་ཤིང་ཀླུ་དབང་གཤིབས་པ་ཡི། སྐ་རགས་ འཆིང་ཞིང་ཤཱཀྟི་མདུང་དང་རལ་གྲི་ཐོགས་ལ་ཁྲག་གི་ཆང་གིས་མྱོས་གྱུར་པ། །མིག་རྩ་དམར་མོར་གྱུར་ཅིང་མཚན་མོ་དུར་ཁྲོད་རྒྱུ་བ་འབྱུང་པོ་ཕལ་ཆེར་རྣམས་ཀྱིས་མཐོང་། །ཀོ་རློན་ཆེན་པོ་དྲལ་ཏེ་རྒྱངས་པའི་གོས་ཀྱིས་སྟོད་གཡོགས་སྨད་ནི་རེ་ལྡེ་སེར་པོས་དཀྲིས། །མི་ཡི་རྒྱུ་མ་གསར་པའི་སྦུབས་ཀྱིས་ཞལ་གྱི་ཟླ་བ་བརྒྱན་ཅིང་དྲིལ་བུ་འགྲམ་པར་འཁྲོལ། །ལུས་ནི་སྣུམ་གྱིས་གསར་དུ་བྱུགས་ཤིང་ཁྲག་དང་ཞག་མང་འཛག་པའི་ཐིག་ལེས་ཚོམ་བུར་བྲིས། །མི་ཡི་ཤ་ལ་སོ་ཡིས་ཆོམ་ཆེམ་གཅོད་བྱེད་ཐོད་པ་ཅན་གྱིས་བདག་ལ་སྐྱོང་གྱུར་ཅིག །དྲག་པོ་དྲག་མོ་མི་བཟད་མི་ཤ་ཁ་ན་ཐོགས་པ་སྔོན་ཆད་མ་བྱུང་ཁྱོད་མཐོང་ན། །མ་མོ་རྣམས་ཀྱང་སྐྲག་ཅིང་རྟབས་ལ་རྔམ་པ་འདོན་ཅིང་མིག་རྩ་རིག་རིག་ཁྱོད་ལ་འདུད། །ནག་མོ་བཟང་མོ་ལུས་མདོག་ནག་ཅིང་བཟོད་པར་དཀའ་བ་ཁྱོད་ལ་བརྒྱ་བྱིན་ལ་སོགས་ཀྱང་། །ཞབས་ལ་ཉིན་རེ་བཞིན་ཏུ་བསྟོད་པར་བྱེད་ཅིང་གཤིན་རྗེའི་རྒྱལ་པོ་ཉིད་ཀྱང་འདར་ཞིང་འདུད། །མི་རྣམས་དང་ནི་འགྲོ་བ་མ་ལུས་འཇུག་བརྟུལ་ནས་ནི་ཁྱོད་ཀྱི་རྣ་བ་ཡ་གཅིག་ལ། །བྲང་གི་འགྲོ་བའི་གདེང་ཀ་སྟོང་དང་ལྡན་པ་གཅིག་གི་རྒྱབ་ནས་ཁྱོད་ལ་རྒྱན་དུ་བྱས། །ཡ་གཅིག་ལ་ནི་སེང་གེ་མཚུངས་མེད་ཐོགས་ཤིང་རྒྱ་མཚོའི་མཐའ་བསྐོར་ས་གཞི་མ་ལུས་གནོན། །སྟེང་ནས་རྒྱུ་བའི་ཉི་མ་འོད་ཟེར་སྟོང་ལྡན་དེ་ནི་ཁྱོད་ཀྱི་ལྟེ་བའི་ཕྱོགས་སུ་ཤར །བྷྱོཿ རྒྱ་མཚོའི་ཀློང་ནས་མེ་འབར་ཁྱོད། །མཚོ་རྣམས་སྐེམ་པར་ནུས་མ་སྟེ། །བུད་མེད་ཐམས་ཅད་ཞི་མཛད་ཕྱིར། །ལྷ་ཆེན་སྐུ་ཡི་ཕྱེད་དུ་བཞུགས །རྫོང་དང་བཀའ་བཟློག་ནག་མོ་ཆེ། །ལྷ་དང་ལྷ་མིན་ཕྱག་བྱས་མ། །མི་ནད་གང་ཡིན་ཁྱོད་མིང་ཤེས། །དེ་ལ་འཇིགས་པ་མེད་པར་འགྱུར། །གཤིན་རྗེའི་ལྕམ་མོ་བདུད་ཀྱི་ཡུམ།། འདོད་པ་ཁམས་ཀྱི་དབང་ཕྱུག་མ།། ནད་དོ་ཅོག་གི་བདག་མོ་སྟེ།། སངས་རྒྱསབསྟན་པ་སྲུང་བ་ཡི།། དཔལ་ལྡན་ལྷ་མོ་ཁྱོད་ལ་འདུད།། དཔལ་ལྡན་གསང་ཆེན་མེ་འབར་དུད་དསོལ་མ།། མི་ཕམ་ཁམས་གསུམ་ཟིལ་གནོན་འདོད་དབང་མ།། ཕྱི་ནང་གསང་བའི་གདོན་བགེགས་རིམས་ལ་སོགས།། དྲན་པ་རྩམ་གྱིས་སྐྱོབ་ཅིང་རབ་ཞི་བའི།། གཡར་དམ་གཉན་པོ་དེང་དུས་བརྩེར་དགོངས་ཤིག།།
༈ ཀྱཻ༑ ལྷ་ཆེན་མ་ཧཱ་ཀཱ་ལ་གསན་ཅིང་དགོངས་སུ་གསོལ། །མ་ཧཱ་ཀཱ་ལའི་དཀྱིལ་འཁོར་སྒོར་ཞུགས་ནས། །བཀའ་ཡི་དམ་ཚིག་གཉན་པོ་བསྲུང་རྒྱུ་ལ། །བཀའ་ལྟར་མ་གྱུར་གཞུང་བཞིན་རྔོ་མ་ཐོགས། །བསྙེན་སྒྲུབ་དུས་འདས་ཕུད་དང་གཏོར་མ་ཆག །རྩ་བ་ཡན་ལག་དམ་ཚིག་ཉམས་པ་ཀུན། །རྡོ་རྗེ་སྲིན་པོ་དུར་ཁྲོད་ཚོགས་ལ་བཤགས། །ལུག་ནག་གཅན་གཟན་བཀའ་ཡི་ལས་མཁན་རྣམས། །བྱ་རོག་གདོང་ཅན་འཁོར་དང་བཅས་ལ་བཤགས། །བསྟན་སྲུང་མཐུ་ཡི་དངོས་གྲུབ་སྩལ་དུ་གསོལ། །དཀོན་མཆོག་གསུམ་དང་བླ་མ་སྤུན་གྲོགས་ལ། །ལུས་ངག་ཡིད་གསུམ་དད་པས་མཆོད་བྱེད་པ། །ནག་པོ་སྤྱི་ཡི་དམ་ཚིག་ཡིན་པ་ལ། །དད་གུས་བརྩེ་སེམས་ཆུང་བ་མཐོལ་ལོ་བཤགས། །མགོན་པོའི་སྐུ་འབག་བྱ་རོག་གཡང་གཞིས་བརྒྱན། །གསང་ནས་སྲེལ་ཞིང་མི་འབྲལ་མཆོད་པ་ནི། །ནག་པོ་སྐུ་ཡི་དམ་ཚིག་ཡིན་པ་ལ། །ལེ་ལོར་གྱུར་ཏེ་མ་སྲེལ༴ །ནག་པོའི་སྲོག་སྙིང་འཆང་ཞིང་མི་ཚིག་གིས། །བར་དུ་མ་ཆོད་རྒྱུན་དུ་བཟློས་པ་ནི། །ནག་པོ་གསུང་གི་དམ་ཚིག་ཡིན་པ་ལ། །ལོང་གཏམ་བར་ཆོད་བྱས་པ༴ །རིན་ཆེན་རྣམ་ལྔ་ནག་པོའི་སྙིང་ནས་འཆང༌། །རང་ཉིད་ལྷར་གསལ་ནག་པོ་ཆེན་པོ་བསྐྱེད། །ནག་པོ་ཐུགས་ཀྱི་དམ་ཚིག་ཡིན་པ་ལ། །ཏིང་འཛིན་མ་གསལ་ལྷ་བསྐྱེད༴ །ཤ་སྣ་སྙིང་སྣ་སྨན་སྣ་ཞལ་ཟས་སོགས། །འཕངས་པ་མེད་པར་དུས་བཞིར་མཆོད་པ་ནི། །ཆོས་སྐྱོང་མཉེས་པའི་དམ་ཚིག་ཡིན་པ་ལ། །མཆོད་གཏོར་ཕུལ་ཆུང་དུས་འདས༴ །གཡབ་དར་རཀྴ་གསང་སྔགས་མི་རྐང་དང༌། །ཤ་ཆེན་དུད་པ་ཚིལ་ཆེན་མར་མེ་སོགས། །ཆོས་སྐྱོང་འདུ་བའི་དམ་ཚིག་ཡིན་པ་ལ། །འབྱོར་སྟོབས་ཆུང་པས་མ་ཚོགས༴ །བླ་མ་ལ་སྡང་གསང་སྔགས་སྤུན་ལ་འཁུ། །བསྟན་པ་བཤིག་ཅིང་སེམས་ཅན་སྡིག་ལ་འདོགས། །ཐོ་ཕྱིར་མི་རྟེན་དམ་ཚིག་ཡིན་པ་ལ། །ཞེ་སྡང་མ་སྐྱེས་བྱམས་བྱས་མཐོལ་ལོ་བཤགས། །མཛེ་ཕོ་ཡུགས་ས་རྨེ་དོང་བཤན་པ་དང༌། །དམ་ཉམས་ཁྲིམས་རལ་མི་ནག་སྡིག་ལས་བྱེད། །ཕྱོགས་སུ་མི་རྟེན་དམ་ཚིག་ཡིན་པ་ལ། །ངོ་མ་ཕྱོགས་ཤིང་བརྟེན་པ་མཐོལ་ལོ་བཤགས། །གཞན་ཡང་དཔལ་ཆེན་མཆོད་པ་རྟར་བཟུང་ནས། །དུས་གཞིར་མཆོད་དང་ནང་ནུབ་མཆོད་རྒྱུ་ལ། །མཆོད་པའི་འབྱོར་ཚོགས་ཆུང་སྟེ་སྐུ་མ་མཉེས། །ནག་པོ་འཁོར་དང་བཅས་ལ་མཐོལ་ལོ་བཤགས། །བཟླས་བརྗོད་སྔགས་ཚིག་ལོང་གཏམ་བར་དུ་ཆོད། །ནག་པོའི་སྲོག་སྙིང་གནད་ནས་མ་འཁུལ་ཏེ། །བཟླས་བརྗོད་སྔགས་ཚིག་ཉམས་པ་ཐམས་ཅད་ཀུན། །ལྷ་ཆེན་འཁོར་དང་བཅས་ལ༴ །ཡི་དམ་རྩེ་གཅིག་གཞུང་བཞིན་སྒོམ་རྒྱུ་ལ། །ཏིང་འཛིན་མ་གསལ་ནག་པོ་ཆེན་པོ་བསྐྱེད། །ཐུགས་ཀྱི་དམ་ཚིག་ཉམས་པ་ཐམས་ཅད་ཀུན། །ནག་པོ་འཁོར་དང་བཅས་ལ་མཐོལ་ལོ་བཤགས། །དར་ནག་རཀྟ་བ་དན་ལ་སོགས་པའི། །རྟེན་རྫས་མ་ཚོགས་དམ་ཚིག་ཉམས་པ་ཀུན། །ནག་པོ་འཁོར་དང་བཅས་ལ་མཐོལ་ལོ་བཤགས། །གནོང་ངོ་འགྱོད་དོ་མ་དང་མཁའ་འགྲོའི་ཚོགས། །མཐོལ་ལོ་བཤགས་སོ་བཀའ་ཡི་ལས་མཁན་རྣམས། །བྱང་ཞིང་དག་པར་མཛོད་ཅིག་ཐུགས་དམ་ཅན། །དྲི་མེད་ཚངས་པའི་དངོས་གྲུབ་སྩལ་དུ་གསོལ། །
ལྷ་མོའི་། ཧཱུྃ། འགྲོ་བའི་དོན་དུ་སྐུ་མཆོག་འཇིགས་པ་ལས། །འཇིག་རྟེན་མ་ལུས་ཁྱབ་པར་གསལ་མཛད་ཅིང་། །ང་རྒྱལ་དྲེགས་པ་ཅན་རྣམས་འཇོམས་མཛད་པའི། །ཡོན་ཏན་རྫོགས་པའི་སྐུ་ལ་ཕྱག་འཚལ་ལོ། །འདའ་དཀའ་རྡོ་རྗེའི་དམ་ཚིག་གཉེར་གཏད་པས། །སྲུང་བར་དམ་བཅས་སྐུ་ཡི་དམ་ཚིག་ལ། །སྐུ་ཡི་སྤྱོད་པ་ཚུལ་བཞིན་མ་རྟོགས་ཏེ། །ཁམས་གསུམ་མ་ལུས་ཁྱབ་ལ་བཟོད་པར་གསོལ། །རྣལ་འབྱོར་གདུང་གསོབ་བདག་ཅག་འདིར་འདུས་རྣམས། །སྤྱི་དང་ཁྱད་པར་དམ་ཚིག་མི་སྟོང་ཡང་། །ཀློང་དུ་གྱུར་པའི་གོམས་ཤེས་རྩལ་ཆུང་བ། །མ་གཅིག་ལྷ་མོའི་སྐུ་ལ་བཟོད་པར་གསོལ། །ཐུགས་རྗེས་ངེས་པར་གཟིགས་པའི་ལྷ་མོ་ལ། །དམ་རྫས་གཙང་མའི་མཆོད་པ་མ་བཤམས་ཏེ། །འཕངས་སེམས་དབང་གིས་མཆོད་པ་རྒྱུ་ཆུང་བ། །རྫོང་མོ་དཀའ་ཟློག་སྐུ་ལ་ྈ །མ་གཅིག་སྐུ་མདོག་ཕྱག་མཚན་ཕྱག་རྒྱ་ལས། །དོན་དང་མཐུན་པ་ཚུལ་བཞིན་མ་བྲིས་ཏེ། །འཕགས་མའི་ཐུགས་རྗེ་གཡེལ་བར་གྱུར་པ་རྣམས། །བདུད་ལས་རྒྱལ་བའི་སྐུ་ལ་ྈ །བུ་ཡི་ཚུལ་གྱིས་རྒྱུ་ཡི་དམ་ཚིག་ལ། །ལེ་ལོ་གཉིད་དབང་གཡེང་བྲེལ་གཏམ་ལ་སོགས། །ཐུགས་དང་འགལ་བར་གྱུར་པ་ཅི་མཆིས་པ། །ཐུགས་རྗེས་ཚངས་པར་རབ་ཏུ་བཤགས་སུ་གསོལ།། བྷྱོཿ ཐོད་པ་དགུ་བརྩེགས་སྲིད་པའི་གཞལ་ཡས་ནས། །དཔལ་ལྡན་ལྷ་མོ་གསན་ཅིང་དགོངས་སུ་གསོལ། །རང་ལ་རིག་པའི་ཡེ་ཤེས་རྒྱུན་ལྡན་ཡང་། །འཕྲལ་བྱུང་རྣམ་རྟོག་ཤིན་ཏུ་དབང་ཆེ་བས། །ལོག་རྟོག་མཚན་མ་གཉིས་ཀྱི་དབང་གྱུར་ནས། །ཏིང་འཛིན་ཡི་དམ་རྩེ་གཅིག་མི་གསལ་ཞིང་། །དཔལ་ལྡན་ལྷ་མོའི་བཀའ་ལས་འདས་གྱུར་པ། །བཟོད་པར་གསོལ་ལོ་ཚངས་པར་སྩལ་དུ་གསོལ། །འབད་པ་རྩལ་ཆུང་བཟླས་བརྗོད་བསྙེན་པ་ཆག །མན་ངག་གཞུང་དང་འགལ་བ་བཟོད་པར་གསོལ། །འཆལ་ལ་གཡེང་བས་གསང་བའི་ཚིག་མ་ཐུབ། །ཟབ་མོའི་དོན་དང་འགལ་བ་ྈ ཐལ་མོ་རྔ་གླིང་དུས་སུ་མ་ཚོགས་ཏེ། །བརྡ་ཡི་མཆོད་པ་ཆག་པ་ྈ བདུད་ཡུམ་ཡེ་ནས་གནག་པའི་ཚུལ་སྟོན་ཀྱང་། །བློ་ཞན་དོན་མ་རྟོགས་པ་ྈ །སྦྱོར་བ་ཡེ་ནས་ལྷ་མོའི་ཆོས་སྤྱོད་ཀྱང་། །སྦྱོར་བའི་མཆོད་པ་ཆག་པ་ྈ །བོང་བུ་ཡེ་ནས་ལྷ་མོའི་ཆིབས་ཡིན་ཀྱང་། །མ་བརྟེན་བརྡེག་པར་གྱུར་པ་ྈ ། གཤིན་རྗེ་ཡེ་ནས་ལྷ་མོའི་ཁྱོ་ཡིན་ཀྱང་། །ངན་སེམས་སྤང་སེམས་སྐྱེས་པ་ྈ །རླུང་ནག་ཡེ་ནས་ལྷ་མོའི་སྤྲུལ་ཡིན་ཀྱང་། །ངན་པའི་སེམས་ཀྱིས་སྨད་པ་ྈ ། ལེ་ལོ་སྙོམས་ལས་དབང་གྱུར་པ་ྈ །མཆོད་པ་ལོ་ཟླར་འགྱངས་པ་ྈ །ཞག་ནས་ཞག་ཏུ་ཆག་པ་ྈ །ཉ་བཞི་དུས་དྲུག་ཆག་པ་ྈ །སྔོན་ནས་རང་གི་བག་ཆགས་མ་སྦྱངས་པས། །དམ་རྫས་བརྟུལ་ཞུགས་ཆུང་པ་ྈ །སྔོན་ནས་སེར་སྣའི་དབང་དུ་གྱུར་ལགས་པས། །ཚོགས་ལ་གཡོ་སྒྱུ་བྱས་པ་བཟོད་པར་ྈ །སྔོན་ནས་ཤིན་ཏུ་གསང་དབང་མ་ཐོབ་པས། །འདོད་ཆགས་ཆོས་ལ་སྤྱད་པ་ྈ །བརྟུལ་ཞུགས་ལྟ་བ་ཟབ་མོ་མ་རྟོགས་པས། །རྣམ་སྨིན་མཐོང་ནས་མ་བསྒྲལ་ྈ །ཏིང་འཛིན་ལྟ་བ་ཀློང་དུ་མ་གྱུར་པས། །ཕུད་དང་ལྷག་མ་མ་ཕྱེད་ྈ །ཞེ་སྡང་དབང་ལ་ང་རྒྱལ་འདྲིས་གྱུར་པས། །རྡོ་རྗེ་ནང་དམེ་བྱས་པ་ྈ །ང་རྒྱལ་དབང་ལ་ཕྲག་དོག་འདྲིས་གྱུར་པས། །སློབ་དཔོན་སྐུ་ལ་བརྡོས་པ་ྈ །སྔོན་ནས་རང་སེམས་ལྟ་བ་དཔངས་སྨས་པས། །རྣལ་འབྱོར་ཉེ་ཕྱོགས་བྱས་པ། ལྟ་སྤྱོད་ཟབ་མོའི་མན་ངག་མ་རྟོགས་པས། །བློ་ལ་ཁུ་འཕྲིག་ཞུགས་པ་ྈ །ལྟ་བ་དྲོད་ཀྱི་མན་ངག་མ་རྟོགས་པས། །ཉམས་ཀྱི་དྲོད་མ་སྐྱེས་པ་བཟོད་པར་གསོལ། །ཨོཾ། ཡེ་ཤེས་ལྷ་དང་ལྷ་མོ་མི་ཕམ་བདག །དང་པོ་སྒྲུབ་དང་བསྒྲུབ་པར་བྱས་ནས་ནི། །མཐུན་པའི་དམ་རྫས་གཞུང་བཞིན་མ་ཚོགས་པས། །དཔལ་ལྡན་ལྷ་མོའི་ཐུགས་དང་འགལ་གྱུར་པས། །བཀའ་ཡི་ཆད་པའི་གནས་སུ་གྱུར་ལགས་ན། །ཡེ་ཤེས་ཐུགས་རྗེ་ཅན་ལ་བཟོད་པར་གསོལ། །ཐུགས་དང་འགལ་བར་གྱུར་པ་མཐོལ་ལོ་བཤགས། །དམ་ཚིག་ཉམས་པར་གྱུར་པ་སྐོང་གྱུར་ཅིག།
ཧོཿ དགོངས་སུ་གསོལ་ལོ། དཔལ་རྡོ་རྗེ་མགོན་པོ་འཇིགས་བྱེད་ཆེན་པོ་ཧེ་རུ་ཀ་དང་རང་བཞིན་ཆོས་ཉིད་དུ་གཅིག་པ། ངོ་བོ་ཡེ་ཤེས་སུ་མཚུངས་པ། མཚན་ཉིད་འཕྲིན་ལས་ཐོགས་མེད་དུ་མཉམ་པ། མི་མཐུན་པའི་ཕྱོགས་ཐམས་ཅད་འཇོམས་པའི་དཔའ་བོ། སྣང་སྲིད་ལྷ་འདྲེ་ཀུན་གྱི་ཡང་རྗེ། ཞིང་སྐྱོང་དྲག་པོ་ལས་གཉན་གྱི་དེད་དཔོན། མི་ཕམ་རྡོ་རྗེ་གཟི་བརྗིད་ཀྱི་རྒྱལ་པོ། རིག་འཛིན་གྱི་རྣལ་འབྱོར་བུ་བཞིན་དུ་སྐྱོང་བ། དམ་ཅན་སྒྲུབ་པ་པོའི་བསམ་གཏན་གྱི་དྲོད་ཉུལ་བ། ཞི་བའི་མདངས་དང་ལྡན་པ། རྒྱས་པའི་བྱིན་ཆགས་པ། དབང་སྡུད་ལས་ཀྱི་རྩལ་མངའ་བ། དྲག་པོ་དགྲ་བགེགས་སྒྲོལ་བའི་ལས་ལ་མྱུར་བ། བསྟན་པ་བསྲུང་བ་ལ་རྩལ་འབྱིན་པ། མཐུ་དང་སྟོབས་ཀྱི་དབང་ཕྱུག་རྡོ་རྗེ་དྲག་རྩལ་ཅན་བདག་ལ་དགོངས་སུ་གསོལ། བདག་རྡོ་རྗེ་འཛིན་པས་བཙུགས་པའི་ཕྱི་ནང་གསང་གསུམ་གྱི་རྟེན་འདི་ལ་བརྟན་པར་བཞུགས་ལ། རྣལ་འབྱོར་པ་བདག་བླ་ན་མེད་པའི་བྱང་ཆུབ། བདེ་བ་ཆེན་པོའི་ཞིང་ཁམས་བགྲོད་པའི་ལམ་གྱི་བར་ཆད་བདུད་བཞིའི་འཇིགས་པ་ལས་སྒྲོལ་བའི་སྐྱེལ་མ་མཛོད་ཅིག ཡང་དག་པའི་ལམ་ལ་འཁྲིད་པའི་ཏིང་ངེ་འཛིན་གྱི་བསུན་མ་དང་ཕྲད་པར་མཛོད་ཅིག དེ་ལྟར་བྱང་ཆུབ་མ་ཐོབ་བར་དུ་ཡང་ལུས་ངག་ཡིད་གསུམ་ལོག་པའི་ལམ་ལ་མི་འཇུག་ཅིང་། ཐར་པ་བྱང་ཆུབ་ཀྱི་ཕྱོགས་སུ་བློ་འགྲོ་བར་མཛད་དུ་གསོལ། འཇིག་རྟེན་འདིར་ཡང་མི་མཐུན་པའི་ཕྱོགས་ཐམས་ཅད་ལས་རྒྱལ་ཞིང་། བཀྲ་ཤིས་དང་བདེ་ལེགས་ཀྱིས་གནས་ནས། ཅི་བསམས་པ་ལྷུན་གྱིས་གྲུབ་པར་མཛད་དུ་གསོལ་ལོ། །མཆོག་ཐུན་མོང་གི་དངོས་གྲུབ་ཐོགས་པ་མེད་པར་ཐོབ་ནས། འགྲོ་བ་ཡོངས་ཀྱི་དཔལ་དང་མགོན་དུ་འགྱུར་བར་མཛད་དུ་གསོལ། དུས་དང་གནས་སྐབས་ཐམས་ཅད་དུ་འཕྲིན་ལས་ཀྱི་བྱ་བ་ལ་གསོལ་བ་ཇི་ལྟར་བཏབ་པ་བཞིན་དུ་འགྲུབ་པར་མཛད་དུ་གསོལ།། ་་་་་་་་་་་་དཔལ་ཆེན་པོ་ལྒ་ལོས་ནྱ་གྲོ་དྷའི་ཚལ་དུ་བསམ་གཏན་ལ་མཉམ་པར་བཞག་པའི་དུས་སུ། རྡོ་རྗེ་མགོན་པོ་ཞལ་གཟིགས་པའི་ཚེ་གསང་བའི་གསོལ་འདེབས་འདི་མཛད་པས་བྱིན་རླབས་ཁྱད་པར་འཕགས་པའོ། །ཡེ་དྷརྨ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་དཏ། ཏེ་ཥཉྩ་ཡོ་ནི་རོ་དྷ་ཨེ་ཝཾ་ཝཱ་དཱི་མ་ཧཱ་ཤྲ་མ་ཎཿ།།
བྷྱོཿ མཁའ་འགྲོ་ནག་མོ་དུད་པའི་སོལ་བ་མ། མ་ལྟར་མཉེན་གཤིན། རྒྱ་མཚོ་ལྟར་དཀྱེལ་ཆེ། རི་བོ་ལྟར་ལྷུན་ཆགས། ཉི་ཟླ་ལྟར་འོད་གསལ། ནོར་བུ་ལྟར་རེ་བ་སྐོང་བ། ཅི་བགྱིའི་དབང་ཕྱུག་མ་འཁོར་དང་བཅས་པ་ལ་རྣལ་འབྱོར་པ་བདག་གིས་གཏད་གཉེར་དུ་བྱ་བའི་འོས། དངོས་གྲུབ་རྣམ་པ་གཉིས། བཀའ་དང་བསྟན་པ། ཆོས་དང་དམ་ཚིག །ཚེ་དང་བསོད་ནམས། ནད་མེད་པ་དང་བདེ་བ་དམ་པ། བསྐུལ་ཞིང་བཅོལ་བའི་ལས། སློབ་མ་དང་འཁོར། སྦྱིན་པོ་དང་འབངས། དཀོར་དང་ལོངས་སྤྱོད། མངའ་རིས་དང་དབང་ཕྱུག །སྡེ་དང་སྲིད། མཆོད་རྟེན་དང་གཙུག་ལག་ཁང་། དགོན་གནས་དང་ཡུལ་འཁོར་དུ་བཅས་པ་ཐམས་ཅད་གཏད་ཀྱིས། མཐུན་ཞིང་དགྱེས་པའི་རྟེན་རྫས་དམ་ཚིག་གི་གཟུགས་སུ་གྱུར་པ་འདི་རྣམས་ལ་བརྟན་པར་བཞུགས་ཏེ། གནས་ལུས་ལོངས་སྤྱོད་མཐུ་སྟོབས་རྫུ་འཕྲུལ་བསམ་གྱིས་མི་ཁྱབ་པར་གྱུར་པ། ལས་བཅོལ་ཞིང་གཏད་པ་འདི་མཐའ་དག་གི་གཉེར་ཁ་གྱིས་ལ། མི་མཐུན་པའི་ཕྱོགས་མཐའ་དག་ལས་སྲུངས།མཐུན་རྐྱེན་ཐམས་ཅད་སྒྲུབས། གོང་ནས་གོང་དུ་སྤེལ། སྙིང་ལ་གཅེས་པ་དང་བརྣག་པ་མ་དོར་བར་བྱང་ཆུབ་ཀྱི་བར་དུ་བརྟན་པར་སྐྱོངས་ལ་ཡིད་བཞིན་དུ་འདོད་པ་འཇོ་བར་བྱོས་ཤིག།།
ཚེ་རིང་མའི་གཉེར་གསོལ། ཨོྃ་དཔལ་མོ།། བཀྲ་ཤིས་མ།། མཁའ་འགྲོ་མ།། ཀུན་ཏུ་འགྲོའི་མ།། རོལ་པའི་ཅོད་པན་མ།། མིག་སྒྱུར་མ།། སྔོ་བསངས་མ།། གངས་རི་ལ་གནས་མ།། རྡོ་རྗེ་མི་འགྱུར་དཔལ་གྱི་ཡུམ།། ཇོ་མོ་ལྷ་སྨན་རྒྱལ་མོ་བཀྲ་ཤིས་ཚེ་རིང་མ་མཆེད་ལྔ་འཁོར་དང་བཅས་པ་རྣམས་བདག་ལ་དགོངས་སུ་གསོལ།། རིག་འཛིན་པདྨ་འབྱུང་གནས།། དཔལ་ལྡན་བཞད་པ་རྡོ་རྗེ་སོགས་རྡོ་རྗེ་འཛིན་པ་རྣམས་ཀྱི་སྤྱན་སྔར་ཇི་ལྟར་ཁས་བླངས་པའི་གཡར་དམ་གཉན་པོ་རྗེས་སུ་དགོངས་ལ།། དཔལ་ལྡན་བླ་མའི་དགོངས་པ་སྒྲུབས།། བསྟན་པ་སྤྱིའི་བྱ་ར་དང་གཉེར་ཁ་མཛོད།། འཇིག་རྟེན་གྱི་ཁམས་ཀུན་ཏུ་བཀྲ་ཤིས་དང་བདེ་ལེགས་སྤེལ།། རྣལ་འབྱོར་པ་བདག་ཅག་དཔོན་སློབ་ཡོན་མཆོད་འཁོར་དང་བཅས་པའི་དོན་གཉིས་ཀྱི་བསམ་པ་བསྒྲུབ།། ཕྲིན་ལས་རྣམ་པ་བཞིའི་སྟོང་གྲོགས་མཛོད།། གནས་སྐབས་སུ་ཚེ་བསྲིངས།། དཔལ་སྐྱེད་ལོངས་སྤྱོད་སྤེལ།། དགོས་དགུ་བསྒྲུབས།། ཉིན་གྱི་བྱ་ར་དང་མཚན་གྱི་མལ་ཚེ་མཛོད།། སྡུན་ནས་སུལ།། ཕྱི་ནས་སྐྱོལ།། དགྲ་དང་དུག་བཟློག།། ནད་དང་རིན་ཅིང་།། མི་ཁ་དང་ཁ་མཆུ་བསྒྱུར།། འགྲོ་ན་ལམ་དྲོངས།། སྡོད་ན་གྲོགས་ཀྱིས།། སྡང་བའི་དགྲ་ཐུལ་གནོད་པའི་བགེགས་ཆོམ།། ཁྱད་པར་ཆོས་དང་ཆོས་སྲིད་བསྲུངས།། རིགས་བརྒྱུད་འཕེལ་བ།། སྣང་སྲིད་གསལ་བ་འཕྲུལ་གྱི་མངོན་ཤེས།། ཟས་ནོར་ཕྱུགས་སོགས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་དང་།། མཐར་ཐུག་མཆོག་གི་དངོས་གྲུབ་འགྲུབ་པའི་ཕྲིན་ལས་མཛད་དུ་གསོལ།།
ཀྱཻ། དཔལ་རྡོ་རྗེ་ཆོས་སྐྱོང་བའི་སྲུང་མ། ཆོས་ནོར་གཏེར་གྱི་བདག་པོ། རྒྱལ་ཆེན་རྣམ་མང་ཐོས་སྲས། བཀྲ་ཤིས་ཚེ་རིང་མཆེད་ལྔ། སྨན་བཙུན་རྡོ་རྗེ་གཡུ་སྒྲོལ། ཆོས་སྐྱོང་རྒྱལ་ཆེན་སྐུ་ལྔ། དམ་ཅན་གཤན་པ་དམར་ནག་ལ་སོགས་པ་དཔལ་ལྡན་འབྲུག་པའི་བཀའ་བསྲུང༌། རྣལ་འབྱོར་བདག་གི་དཔུང་གཉེན་མངོན་ཤེས་རྫུ་འཕྲུལ་གྱི་མཐུ་དང་ལྡན་པ་ཐམས་ཅད་བདག་ལ་དགོངས་སུ་གསོལ། དེང་འདིར་རྣལ་འབྱོར་པ་བདག་ཅག་གིས་ཆོས་སྐྱོང་སྲུང་མ་ཁྱེད་རྣམས་ལ་གཉེར་དུ་གཏད་པ་ནི་འདི་ལྟ་སྟེ། སྤྱིར་ཀུན་མཁྱེན་རྒྱལ་བའི་ལུང་རྟོགས་ཀྱི་བསྟན་པ་རིན་པོ་ཆེ་དང་ཁྱད་པར་དཔལ་ལྡན་འབྲུག་པའི་བཤད་སྒྲུབ་ཀྱི་བསྟན་པ་ལ་གནོད་པར་རྩོམ་པའི་དགྲ་དང་བགེགས་ཀྱི་རིས་སུ་གཏོགས་པ་ཐམས་ཅད་མངོན་སྤྱོད་དྲག་པོའི་ལས་ཀྱིས་ཚར་གཅོད་པ་དང༌། དེ་འཛིན་གྱི་སྐྱེས་བུ་དམ་པ་རྣམས་ཀྱི་སྐུ་ཚེ་དང་ཕྲིན་ལས་སྤེལ། འཇིག་རྟེན་གྱི་ཁམས་ཀུན་ཏུ་ནད་མུག་འཁྲུག་རྩོད་སོགས་མི་མཐུན་པའི་ངན་དགུ་མཐའ་དག་དབྱིངས་སུ་སེལ། ལྷག་པར་བདག་ཅག་འཁོར་དང་བཅས་པ་རྣམས་ལ་ལུས་དང་གྲིབ་མ་བཞིན་དུ་འགྲོགས་ནས་ཉིན་གྱི་བྱ་ར་དང་མཚན་གྱི་མེལ་ཚེ་གཡེལ་བ་མེད་པར་མཛད་པ་དང༌། གནས་སྐབས་འགལ་རྐྱེན་ཕྱི་ནང་གསང་གསུམ་གྱི་བར་ཆད་ཐམས་ཅད་ཞི་བ་དང༌། མཐུན་རྐྱེན་སྨོན་པའི་ལེགས་ཚོགས་ཐམས་ཅད་ཡར་ངོའི་ཟླ་ལྟར་འཕེལ་ཞིང་རྒྱས་པ་དང༌། མཐར་ཐུག་བདག་ཅག་བྱང་ཆུབ་བསྒྲུབ་པའི་ལམ་གྱི་བར་ཆད་ཐམས་ཅད་ཞི་ཞིང༌། སྤངས་དང་རྟོགས་པའི་ཡོན་ཏན་ཐམས་ཅད་ཡོངས་སུ་རྫོགས་ཏེ་རྣམ་པ་ཐམས་ཅད་མཁྱེན་པའི་ཡེ་ཤེས་མཆོག་ལ་སྦྱོར་བའི་གྲོགས་དང་དཔུང་གཉེན་དམ་པ་མཛད་དུ་གསོལ།།