དཔལ་འབྲུག་པའི་བསྟན་སྲུང་སྤྱིའི་གསོལ་ཁ་བསྡུས།
༄༅། །དཔལ་འབྲུག་པའི་བསྟན་སྲུང་སྤྱིའི་གསོལ་ཁ་བསྡུས་པ་ཕྲིན་ལས་འདོད་འཇོའི་བུམ་བཟང་ཞེས་བྱ་བ་བཞུགས་སོ།།
༄༅། །ན་མོ་གུ་རུ་དྷེ་ཝ་ཌཱ་ཀྐི་ནི་དྷརྨཱ་པཱ་ལ་ཡེ། དེ་ལ་འདིར་དཔལ་འབྲུག་པའི་བསྟན་སྲུང་མགོན་པོ་ལྕམ་དྲལ་གྱི་གསོལ་ཁ་བསྡུས་པ་ཕྱོགས་གཅིག་ཏུ་བསྡེབ་པ་ལ། །བཅས་གཤོམ་དང་ཆོ་གའི་རིམ་པ་གཉིས་ལས། །དང་པོ་ནི། །སྟེགས་མཐོ་བར་མགོན་པོ་ལྕམ་དྲལ་གྱི་སྐུ་རྟེན་བྲིས་འབུར་གང་རུང་བཞུགས་སུ་གསོལ། །དེའི་མདུན་དུ་སྤུངས་གཏོར། སྨན་རཀ །ཆུ་གཉིས་སྔོན་འགྲོའི་ཉེར་སྤྱོད། གཞན་ཡང་ནང་མཆོད་ཀྱི་བདུད་རྩི། །བསངས་ཆུ་ལ་སོགས་བརྒྱུད་པའི་ཕྱག་བཞེས་ཇི་ལྟར་བར་གཤམ། གཉིས་པ་ཆོ་ག་ལ། ཐོག་མར་མ་ནམ་བཞི་སྐོར་ལན་གསུམ་དང་། བསྟོད་ཚོགས་ནི། རྡོ་རྗེ་འཆང་ཆེན་ཏིལླི་ནཱ་རོ་དང་། སོགས་དང་། འཇིག་རྟེན་དབང་ཕྱུག་ཐུགས་རྗེའི་རླབས་འཕྲེང་དབུས། །སོགས་དང་། སངས་རྒྱས་ཐམས་ཅད་འདུས་པའི་སྐུ། །སོགས་དང་། །བླ་མ་སྐུ་ཁམས་བཟང་བར་གསོལ་བ་འདེབས། །སོགས་སྐབས་བསྟུན་འདོན། དེ་ནས་སྐྱབས་སེམས་ནི། སངས་རྒྱས་ཆོས་དང་དགེ་འདུན་དང་། །རྩ་བ་གསུམ་དང་གཉུག་སེམས་ལ། །དེང་ནས་བྱང་ཆུབ་སྙིང་པོའི་བར། །བདག་དང་འགྲོ་ཀུན་སྐྱབས་སུ་མཆི། །ལན་གསུམ། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་ལྟར། །སྨོན་འཇུག་བླ་མེད་བྱང་ཆུབ་སེམས། །དམ་པ་བདག་གིས་བསྐྱེད་པར་བགྱི། །ལན་གསུམ། ཚོགས་བསགས་ནི། །རང་གི་སྤྱི་བོར་རྩ་བརྒྱུད་ཀྱི། །བླ་མ་ཐམས་ཅད་ཐོ་བརྩེགས་སུ། །བཞུགས་པའི་ཞབས་ལ་གུས་བཏུད་དེ། །གསོལ་བ་འདེབས་སོ་དངོས་གྲུབ་སྩོལ། །སེམས་ཅན་བདེ་དང་ལྡན་གྱུར་ཅིང་། །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང། །ཆོས་ཀུན་མཉམ་ཉིད་རྟོགས་པར་ཤོག །ཅེས་ལན་གཅིག །དེ་ནས་གོང་གནོན་བདག་བསྐྱེད་ནི། ཨོཾ་སྭབྷཱ་ཝ་ཤུདྡྷཉ་སརྦ་དྷརྨཱཿ སཱབྷཱཝ་ཤུདྡྷོཉཧཾ། །བདག་དང་དངོས་པོའི་ཆོས་ཐམས་ཅད། །མི་དམིགས་སྟོང་པའི་ངང་ཉིད་ལས། །རི་རབ་སྣ་ཚོགས་པད་ཉིའི་སྟེང་། །རང་ཉིད་སྐད་ཅིག་དྲན་རྫོགས་སུ། །འཁོར་ལོ་སྡོམ་པ་སྐུ་མདོག་མཐིང་། །དྲང་སྲོང་ཁྲོས་འདྲའི་ཞལ་རས་ལ། །བདུད་བཅོམ་མཆེ་བཞིའི་མྱུ་གུ་དང་། །དུས་གསུམ་མཁྱེན་པའི་སྤྱན་གྱིས་མཚན། །ཐོད་པའི་དབུ་བརྒྱན་ཐོ་ཚུགས་ཅན། །བདེན་གཉིས་ཟུང་འཇུག་ཕྱག་རྒྱ་ཡིས། །རྡོར་དྲིལ་འཛིན་ཅིང་ཡུམ་ལ་འཁྱུད། །གར་གྱི་ཉམས་དགུ་ལྡན་པའི་སྐུ། །མགོ་རློན་ལྔ་བཅུའི་དོ་ཤལ་དང་། །སྟག་ཤམ་ཕྱག་རྒྱ་དྲུག་གིས་བརྒྱན། །ཞབས་གཉིས་གཡས་བརྐྱང་གཡོན་བསྐུམ་གྱིས། །འཇིགས་དུས་མནན་ཏེ་བཞེངས་པའི་པང་། །རྡོ་རྗེ་རྣལ་འབྱོར་སྐུ་མདོག་དམར། །ཞལ་གཅིག་ཕྱག་གཉིས་སྤྱན་གསུམ་པ། །སྐྲ་གྲོལ་ཐོད་པའི་ཅོད་པན་ཅན། །ཕྱག་གཡས་རྡོ་རྗེ་མཁའ་ལ་འཕྱར། །ཐོད་བཅས་གཡོན་པས་ཡབ་ལ་འཁྱུད། །བཅུ་དྲུག་དགའ་སྟེར་ལང་ཚོས་སྙེམས། །ཐོད་སྐམ་ལྔ་བཅུའི་དོ་ཤལ་འཕྱང་། །གཅེར་མོ་རུས་རྒྱན་རྣམ་ལྔས་སྤྲས། །ཞབས་གཡས་ཡབ་ཀྱི་བརླ་ལ་འཁྱུད། །གཡོན་པ་ལྷན་ཅིག་བརྐྱང་བས་མཚོན། །བདེ་སྟོང་ལྷན་ཅིག་སྐྱེས་པའི་སྐུ། །ཡེ་ཤེས་མེ་དཔུང་ཀློང་ན་འགྱིང་། །མི་བསྐྱོད་རྒྱལ་བས་དབུ་བརྒྱན་པའི། །ཐུགས་ཀར་ཉི་དཀྱིལ་ཧཱུཾ་མཐིང་མཐར། །བཟླ་བྱའི་སྔགས་ཀྱིས་བསྐོར་བ་ལས། །འོད་འཕྲོས་དོན་གཉིས་བྱས་པར་གྱུར། །ཨོ་ཧྲཱིཿཧ་ཧ་ཧཱུྃ་ཧཱུྃ་ཕཊ། ཅེས་བརྒྱ་རྩ་བཟླའོ། དེ་ནས་བསངས་ཆུ་ལ་དམིགས་ཏེ། །ཨོཾ་སུམྦྷ་ནི་སུམྦྷ་སོགས་ལན་གསུམ་བཟླས་མཐར། ཐུགས་ལས་ཁྲོ་བོའི་ཚོགས་འཕྲོས་ཏེ། །སྤོས་ཆུར་ཐིམ་པས་ཁྲོ་ཆུའི་རྡུལ། །གང་ལ་རེག་པས་ཉེས་སྐྱོན་དྲི། །དག་པའི་ནུས་མཐུ་ཅན་དུ་གྱུར། ཅེས་ལན་གཅིག །ནང་མཆོད་བདུད་རྩི་ལ་དམིགས་ཏེ། ཐོད་སྟེང་ཧ་ཧོ་ཧི་ཡིག་ལས། །ལྷན་སྐྱེས་དཀར་དམར་སྔོར་གྱུར་པའི། །ཐུགས་སྲོག་འོད་ཀྱིས་བྱིན་བཅུད་བསྡུས། །ལྷ་བཅས་འོད་ཞུ་བདུད་རྩིར་གྱུར། །ཨོཾ་ཨཱཿཧཱུྃ། ཞེས་ལན་གསུམ་བརྗོད་ཅིང་བྱིན་གྱིས་བརླབས་པའི་ཆུ་ཆང་མཆོད་གཏོར་ལ་བྲན། བགེགས་གཏོར་ལ་བསངས་ཆུ་འཐོར་ཏེ། ཧཱུྃ༔ ཉོན་ཅིག་བགེགས་དང་ལོག་འདྲེན་ཚོགས། །སྔགས་རྒྱ་ཉན་སོགས་མི་དབང་བས། །མཆོད་སྦྱིན་གཏོར་མ་འདི་ལོངས་ལ། །མྱུར་བ་ཉིད་དུ་ཕྱིར་དེངས་ཤིག། །ཨོཾ་སུམྦྷ་ནི་སུམྦྷ་སོགས་བརྗོད་ཅིང་བསྐྲད། སྲུང་འཁོར་ནི། །བདག་ཉིད་དཔལ་ཆེན་རབ་ཁྲོས་པའི། །ཐུགས་སྲོག་ཧཱུྃ་ལས་ཡེ་ཤེས་མེ། །སྣ་ལྔ་ཕྱོགས་བཅུར་སྤྲོས་པའི་སྤྲིན། །ཚུར་བསྡུས་སྲུང་བའི་གུར་དུ་གྱུར། །ཅེས་བརྗོད་ཅིང་བསྒོམས་པའི་བར་གོང་གནོན་གྱི་རིམ་པའོ། །དེ་ནས་བསྟན་སྲུང་མགོན་པོ་ལྷ་མང་གི་གསོལ་ཁ་བསྡུས་པ་ནི། ཨོ་ཤཱུ་ཎྱ་ཏཱ་ཛྙཱ་ན་བཛྲ་སྭཱ་ཝ་ཨཱཏྨ་ཀོཉ་ཧཾ། །སྟོང་པ་ཉིད་དུ་གྱུར། །སྟོང་པའི་ངང་ལས་འབྱུང་བཞི་རི་རབ་དང་། །པདྨ་སྣ་ཚོགས་རྡོ་རྗེའི་གདན་སྟེང་དུ། །ཧཱུྃ་ལས་འོད་འཕྲོས་རྡོ་རྗེའི་རྭ་གུར་དང་། །མཚོན་ཆ་ཡེ་ཤེས་མེ་དཔུང་འབར་བས་དཀྲིགས། །དེ་དབུས་ཨོཾ་ལས་རྣམ་སྣང་རང་བཞིན་གྱི། །གཞལ་མེད་ཁང་མཆོག་དུར་ཁྲོད་བརྒྱད་དང་བཅས། །སྐུ་གསུང་ཐུགས་འཁོར་རིམ་བཞིན་རིན་པོ་ཆེ། །ལྔ་དང་དཀར་དམར་སྔོ་བའི་ནོར་བུ་དང་། །ཐོད་པ་སྐམ་རྙིང་རློན་གསུམ་ལས་གྲུབ་པའི། །ཞི་དང་དྲག་པོའི་རྒྱན་ལྡན་གྲུ་བཞི་དང་། །སྒོ་བཞི་མཚན་ཉིད་ཀུན་རྫོགས་ཞག་དང་ཁྲག །ཀླད་པའི་མཚོ་བཅས་དབུས་སུ་བདེ་ཆེན་འཁོར། །གྲུ་བཞི་གླིང་དགུ་ཟླུམ་བསྐོར་ཨེ་དབྱིབས་དབུས། །འདབ་བརྒྱད་པད་ཉི་བོ་ཆེན་གདན་བཅས་དང་། །ལྷ་གནས་རྣམས་སུ་ཧཱུྃ་མཐིང་ཡོངས་གྱུར་ལས། །དབུས་སུ་ཡེ་ཤེས་མགོན་པོ་སྐུ་མདོག་ནག །ཕྱག་བཞི་བེ་འབྲས་ཐོད་ཁྲག་རལ་གྲི་དང་། །རྩེ་གསུམ་འཛིན་ཅིང་དྲག་པོའི་ཆ་ལུགས་རྫོགས། །རོལ་སྟབས་པང་དུ་ཡུམ་ཆེན་ཙཎྜི་ཀ །གྲི་ཐོད་འཛིན་འཁྱུད་ཡེ་ཤེས་མེ་དབུས་བཞུགས། །གཡས་གཡོན་དབྱིངས་སྒྲོལ་འདབ་བཞིར་རེ་ཏི་བཞི། །ཟུར་གསུམ་རིགས་གསུམ་ཟླ་གམ་ཡུམ་ཆེན་གསུམ། །གྲུ་བཞིར་ལས་མགོན་སྡེ་བཞི་རང་གཡོན་ཡུམ། །གླིང་བརྒྱད་མགོན་པོ་བཀའ་བརྒྱུད་ཡུམ་དང་བཅས། །སྒོ་མཚམས་བརྒྱད་དུ་གདོང་ཅན་གསུང་འཁོར་ཁྱམས། །ནང་མར་འཇིགས་བྱེད་ཆེན་མོ་བརྒྱད་དང་ནི། །ཕྱི་རིམ་ཞིང་སྐྱོང་ཉེར་བཞི་སྒོ་སྐྱོང་བཞི། །རང་རང་ཡབ་བཅས་སྐུ་ཡི་འཁོར་ལོའི་ནང་། །སྡེ་བརྒྱད་མགོན་པོ་ཡབ་ཡུམ་འཁོར་བཅས་དང་། །ཕྱི་ཁྱམས་ཕྱོགས་སྐྱོང་བཅུ་དང་སྒོ་བཞི་རུ། །རྒྱལ་ཆེན་བཞི་རྣམས་རང་རིགས་སྡེ་དཔུང་གིས། །ཡོངས་བསྐོར་དཀྱིལ་འཁོར་ཆེན་པོའི་ལྷ་ཚོགས་གསལ། །གནས་བཞིར་འབྲུ་བཞི་ཐུགས་ཀའི་འོད་ཟེར་གྱིས། །ལྷ་མོ་བཞི་བསྐུལ་སྤྲུལ་པའི་ཚོགས་སྤྲོས་པས། །ཕྱོགས་བཅུའི་ཞིང་ནས་དམ་ཅན་རྒྱ་མཚོ་ཚོགས། །མ་ལུས་སྤྲིན་ཕུང་གཏིབས་བཞིན་སྤྱན་དྲངས་གྱུར། །ཧཱུྃ༔ ཆོས་དབྱིངས་འོག་མིན་ཞིང་དང་རྡོ་རྗེའི་གདན། །ནཱ་ལནྡ་སོགས་གནས་དང་དུར་ཁྲོད་བརྒྱད། །ཉེར་བཞིའི་ཡུལ་དང་རང་རང་གནས་མཆོག་ནས། །འཁོར་བཅས་འབོད་ཀྱིས་མ་གཡེལ་ད་ཚུར་བྱོན། །ཨོཾ་བཛྲ་མཧཱ་ཀཱ་ལ་སུ་ཏྲི་ཡ་མ་དུ་ཛཿ འབར་བའི་གདན་བཞུགས་ཕྱི་ནང་གསང་མཆོད་འབུལ། །ཛཧཱུྃ་བཾ་ཧོ༔དམ་ཡེ་དབྱེར་མེད་གྱུར། །དབང་ལྷ་སྤྱན་དྲངས་དབང་བསྐུར་གཙོ་བོ་ལ། །བདེ་མཆོག་འཁོར་རྣམས་གཙོ་བོས་དབུ་བརྒྱན་གྱུར། །འཁོར་བཅས་སྔོན་གྱི་དམ་དགོངས་ལས་མ་གཡེལ། །སྒོ་གསུམ་གུས་པས་འདུད་ཅིང་ཕྱག་འཚལ་ལོ། །ཨོ་བཛྲ་མཧཱ་ཀཱ་ལ་ས་མ་ཡ་ཧ་ན་ཧ་ན་ཧཱུྃ་ཕཊ། ན་མཿཏེ་ཧཱུཾ། ན་མཱ་མི་ཧཱུཾ། ན་མོ་ན་མཧཱུྃ། །མཆོད་རྫས་ཐམས་ཅད་ཨོཾ་གྱིས་རབ་སྦྱངས་ཤིང་། །ཨཱཿཡིག་གིས་སྤེལ་ཧཱུྃ་གིས་བདུད་རྩིར་སྦར། །ལས་བཞི་རབ་འབྱམས་དེ་དེའི་རྫས་འཆར་བའི། །བླ་མེད་མཆོད་པའི་སྤྲིན་ཕུང་ཆེན་པོར་གྱུར། །ཧཱུྃ༔ ཀུན་ཏུ་བཟང་པོའི་མཆོད་སྤྲིན་རྒྱ་མཚོའི་འཇིང་། །ནམ་མཁའི་མཛོད་ཀྱི་ནོར་བུས་ཡོངསགང་ཞིང་། །ཁམས་གསུམ་འགུགས་པའི་འོད་ཕྲེང་གཤིན་རྗེའི་ཁབ། །ཇི་བཞིན་བདུད་སྡེའི་སྙིང་ལ་འཇིགས་སྐྱེད་འབུལ། །ཨོཾ་བཛྲ་མཧཱ་ཀཱ་ལ་ས་པ་རི་ཝཱ་ར་ཨརྒྷཾ་པྲ་ཏི་ཙྪ་ཧཱུྃ་སྭཱཧཱ། དེ་བཞིན་དུ། པཱཏྱཾ༴ །པུཥྤེ༴ །དྷཱུ་པེ༴ །ཨ་ལོ་ཀེ༴ །གནྡྷེ༴ །ནེེ་ཝི་དྱཾ༴ །ཤལྟ་པྲ་ཏིཙྪ་ཧཱུྃ་སྭཱཧཱ། ཞེས་པའི་བར་གྱིས་མཆོད། ཧཱུྃ། དམ་རྫས་བདུད་རྩི་རཀྟ་བདེ་བའི་མཆོག། །ལས་བཞིའི་བཀོད་པ་དང་འཚམས་བ་ལིངྟ། །འབྲུ་གསུམ་སྦྱངས་རྟོགས་སྦར་བས་མཁའ་དབྱིངས་ཀུན། །ཡོངས་གང་དམ་ཅན་རྒྱ་མཚོ་མཉེས་ཕྱིར་འབུལ། །ཨོཾ་བཛྲ་མཧཱ་ཀཱ་ལ་ས་པ་རི་ཝཱ་ར་ཨ་མྲྀ་ཏ་པཱུ་ཛ་ཁཱ་ཧི། ༀ་བཛྲ་མཧཱ་ཀཱ་ལ་ས་པ་རི་ཝཱར་རཀྟ་པཱུ་ཛ་ཁཱ་ཧི། ཨོ་མཧཱ་སུ་ཁ་བཛྲ་སཏཱ་ཛཧཱུྃ་བཾ་ཧོཿསུ་ར་ཏེ་སྟྭཾ། ཞེས་པ་རྣམས་རེ་རེས་འབུལ། ཨོཾ་མཧཱ་ཀཱ་ལ་ཡ་ཤཱ་ས་ན་ཨུ་པ་ཧཱ་རི་ཎཱི་ཨེ་ཥ་ཨ་པ་ཥི་མ་ཀཱལོ་ཨ་ཡཾ། ཨི་དཾ་རཏྣ་ཏྲ་ཡཱ་ཡ་ཨ་པ་ཀ་རི་ཎཾ། ཡ་དི་པྲ་ཏི་ཛྙཱ་སྨ་ར་སི་ཏ་དཱ། ཨི་དཾ་དུཥྚཾ་སཏཱ་ན། ཁ་ཁ་ཁཱ་ཧི་ཁཱ་ཧི། མ་ར་མ་ར། གྲྀཧྞ་གྲྀཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀེ་ན་ཧཱུྃ་ཕཊ་ཧཱུཾ། ཞེས་ལན་གསུམ་གྱིས་ཐུགས་དཀྱིལ་བ་ལ་འབུལ། ཨོཾ་ཀ་ཀ་ཀ་དྷྱ་ན། བ་བ་བནྡྷ་ན། ཁ་ཁ་ཁ་ད་ན། སརྦ་དུཥྚ་ནཾ། ཧ་ན་ཧ་ན། གྷཱ་ཏ་ཡ་གྷཱ་ཏ་ཡ་ཨ་མུ་ཀ་སྱ། ཤྲིནྟཾ་ཀུ་རུ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཛཿསཱཧཱ། ཞེས་ལན་གསུམ་གྱིས་གསུང་དཀྱིལ་བ་ལ་འབུལ། ཨོཾ་ཨ་ཀཱ་རོ་མུ་ཁཾ་སརྦ་དྷརྨ་ཎཾ་ཨདྱ་ནུཏྤནྣ་ཏོཏ་ཨོཾ་ཨཱཿཧཱུྃ་ཕཊ། ཅེས་ལན་གསུམ་གྱིས་སྐུ་དཀྱིལ་བལ་འབུལ། སྤྲོ་ན། འདོད་གསོལ་རྒྱས་པ་དང་། བསྟོད་པ་རྐང་བརྒྱད། ཏིལ་མར་རྣམས་འདོན། བསྡུ་ན། དཔལ་མགོན་ལྕམ་བཀའ་སྡོད་ཚོགས་བཅས་ལ། །མཆོད་གཏོར་འདི་འབུལ་སྤྱི་དང་བྱེ་བྲག་གི། །བསྟན་པ་ཆེར་རྒྱས་བདག་ཅག་འགལ་རྐྱེན་སོལ། །ཞི་སོགས་ལས་དང་དངོས་གྲུབ་རྣམ་གཉིས་སྩོལ། །ཅེས་འདོད་དོན་གསོལ། ཧཱུྃ༔ བདེ་གཤེགས་ཐུགས་རྗེ་སྐུ་སྤྲུལ་པ། །སེམས་ཅན་རྣམས་ལ་མགོན་སྐྱབས་མཛད། །འོག་མིན་གནས་ན་བཞུགས་པ་ལ། །རབ་ཏུ་བཏུད་དེ་ཕྱག་འཚལ་ལོ། །བཅོམ་ལྡན་འདས་ཀྱི་སྐུར་སྟོན་པ། །འདྲེན་པ་འཇིག་རྟེན་མཁའ་འགྲོའི་གཙོ། །དྲག་པོ་མ་རུང་འདུལ་མཛད་པ། །མཧཱ་ཀཱ་ལིར་ཕྱག་འཚལ་བསྟོད། །འཇིག་རྟེན་ལ་གནས་གདུག་པ་འདུལ། །དུར་ཁྲོད་མ་མོ་རྣམས་ཀྱི་གཙོ། །ལྷ་ཆེན་དྲག་པོའི་སྐུར་སྟོད་པ། །འཇིག་རྟེན་མགོན་ལ་ཕྱག་འཚལ་བསྟོད།། ཅེས་པས་བསྟོད་དོ།།
མགོན་པོའི་གསོལ་ཁའི་བསྟོད་པ་དགེ་རིན་པས་མཛད་པ་ནི། ཧཱུྃ༔ ཆོས་དབྱིངས་སྤྲོས་བྲལ་བསམ་མི་ཁྱབ་པའི་རྩལ། །འགག་མེད་བཟུང་འཇུག་རོལ་པ་ཧེ་རུ་ཀ། །གང་འདུལ་སྒྱུ་འཕྲུལ་རྡོ་རྗེ་ནག་པོ་ཆེ། །སྐུ་གསུམ་དབྱེར་མེད་ཁྲག་འཐུང་མགོན་ལ་བསྟོད། །ཐུགས་གསུང་སྐུ་ཡི་དཀྱིལ་འཁོར་ལྷ་ཚོགས་རྣམས། །ཆ་ལུགས་མ་ངེས་རྣམ་པ་ཅི་དང་ཅིང་། །སྣང་ཡང་སྣ་ཚོགས་གཅིག་པུའི་རོལ་རྩེག་མཁན། །དམ་ཅན་ཆོས་སྐྱོང་རྒྱ་མཚོའི་གཙོ་ལ་བསྟོད། །ཁྱོད་ཀྱི་ཐུགས་ཀྱི་གསང་བ་ནམ་མཁའི་མཛོད། །ཆོས་རྣམས་ཀུན་གྱི་རང་བཞིན་ལགས་པའི་ཕྱིར། །བསྟོད་པའི་ཡུལ་ལས་འདས་ཀྱང་རང་དགའི་ངོར། །དཔལ་མཆོག་དང་པོའི་སྐྱེ་བུ་ཁྱོད་ལ་བསྟོད། །སྔོད་ཆད་ཁྱོད་དང་རང་སེམས་གཉིས་མེད་དུ། །ཡིན་པར་མ་འཚལ་གཞན་དུ་བཙལ་བ་ཡི། །ནོངས་པ་དག་སྟེ་རང་རིག་སེམས་ཀྱི་གཤིས།།གནས་ལུགས་དོན་དམ་གཞི་ཡི་མགོན་ལ་བསྟོད། དོན་དམ་ངོ་ན་གཉིས་སུ་མ་མཆིས་ཀྱང་། །མ་རྟོགས་ཀུན་རྫོབ་ཚད་མའི་བསྟན་པ་ལ། །ཐབས་དང་ཐབས་བྱུང་ལམ་གྱི་སྙིང་པོ་རུ། །ཤེས་ནས་རྣམ་ཀུན་ལམ་གྱི་མགོན་ལ་བསྟོད། །ཆོས་སྐྱོང་ནང་ནས་རྟོགས་པའི་ལྟ་སྒོམ་གྱིས། །གང་ཤར་འཛིན་མེད་གཏོང་བའི་མངོན་སྤྱོད་ལས། །གཟུང་འཛིན་དགྲ་བགེགས་མཐའ་བྲལ་དབུ་མར་སྒྲོལ། །སྤངས་རྟོགས་མངོན་གྱུར་འབྲས་བུའི་མགོན་ལ་བསྟོད། །དེ་ལྟར་ཡོན་ཏན་རྒྱ་མཚོ་མ་ཐོབ་བར། །ནམ་གཞར་དམ་ཅན་རྒྱ་མཚོ་མཆོད་པའི་མཐུས། །གཡེལ་མེད་ཕྲིན་ལས་རྒྱ་མཚོས་གྲོགས་མཛད་ནས། །མཐོག་མཐུན་དངོས་གྲུབ་རྒྱ་མཚོ་དེང་འདིར་སྩོལ། །
༈ ལས་མགོན་བྱ་རོག་གདོང་ཅན་གྱི་གསོལ་ཁ་བསྡུས་པ་ནི། ཨོཾ་སྭབྷཱ་ཝ་ཤུདྡྷཉ་སརྦ་དྷརྨཿསྭབྷཱཝ་ཤུདྡྷོཉཧཾ། སྟོང་པ་ཉིད་དུ་གྱུར། །སྟོང་པའི་ངང་ལས་མདུན་དུ་དུར་ཁྲོད་ཀྱི། །ས་གཞི་ཀེང་རུས་བཻ་རོ་གསར་རྙིང་དང་། །སྐམ་རློན་ཐོད་པ་ཁྲག་ཞག་ཞུན་སྦྱར་བའི། །གཞལ་ཡས་འཇིགས་རུང་གྲུ་གསུམ་ཡངས་པའི་ནང་། །དྲག་པོའི་འབྲུག་གློག་གནམ་ལྕགས་མེའི་སེར་བ། །འབེབས་བྱེད་སྤྲིན་ནག་བསྐལ་མེ་འཁྲུགས་པའི་དབུས། །པད་ཉིའི་སྟེང་དུ་ཧཱུཾ།ཡིག་འཕྲོ་འདུ་ལས། །དཔལ་ལྡན་ལས་བྱེད་མགོན་པོ་བྱ་རོག་གདོང་། །མཐིང་ནག་སྦོམ་ཐུང་གནམ་ལྕགས་མཆུ་སྡེར་ཅན། །རྡོ་རྗེའི་གཤོག་གདེང་ཕྱག་གཉིས་གྲི་གུག་དང་། །ཐོད་ཁྲག་འཛིན་ཅིང་དུར་ཁྲོད་ཆས་ཀྱིས་བརྒྱན། །ཞབས་གཉིས་བརྐྱང་བསྐུམ་དོར་སྟབས་དྲག་པོ་ཡིས། །དགྲ་བགེགས་བདུད་དཔུང་བརྫིས་པའི་གཡོན་ངོས་ན། །དམར་མོ་འབར་གདོང་ཙཎྜི་ཀ་དང་ནི། །ཕྱོགས་མཚམས་རང་འདྲའི་ཚེ་བདག་སྲོག་བདག་དང་། །འཆི་བདག་ལ་སོགས་བྱར་གདོང་སྟོང་ཕྲག་དང་། །ཤ་ཟ་འབུམ་སྡེ་མ་མོ་བྱེ་བའི་ཚོགས། །མཁའ་འགྲོ་སྡེ་བརྒྱད་ཡང་འཁོར་དཔག་མེད་བཅས། །ཀུན་གྱི་གནས་གསུམ་འབྲུ་གསུམ་གྱིས་མཚན་གྱུར། །ཧཱུྃ༑ ཁྲག་འཐུང་དབྱིངས་ཀྱི་རོལ་གར་གདུག་པའི་གཤེད། །མ་ལུས་དྲེགས་གཙོ་དཔལ་ལྡན་ལས་ཀྱི་མགོན། །འཁོར་བཅས་བསིལ་བའི་ཚལ་ནས་མྱུར་བ་ནི། །འབོད་པའི་དབྱངས་བརྡས་བསྐུལ་ལོ་གཤེགས་སུ་གསོལ། །ཨོ་མཧཱ་ཀཱ་ལ་སུ་ཏྲི་ཡ་མ་དུ་ཛཿཛཿཧཱུཾ་བཾ་ཧོ༔ཨོཾ་ཨ་བྷི་ཥཱཉྩ་ཏུ་མཾ། ཧཱུྃ༔ རྣམ་དག་ལྟ་བའི་མཆོད་ཡོན་རྒྱ་མཚོའི་འཇིང་། །འཁྲུལ་མེད་སྒོམ་པའི་མེ་ཏོག་སྤྱོད་པའི་སྤོས། །ཏིང་འཛིན་སྒྲོན་མེ་སྡོམ་པའི་དྲི་ཆབ་དང་། །འབྲས་བུའི་ཞལ་ཟས་རྫོགས་པའི་རོལ་མོ་འབུལ། །ཨོ་ལས་ཁྱབ་གདལ་ཆོས་དབྱིངས་ཐོད་པའི་ཀློང་། །ཨཱ་ལས་འགག་མེད་རང་གདངས་གཏོར་མའི་ཚོགས། །ཧཱུྃ་ལས་སྣ་ཚོགས་དཀར་དམར་འཕྲོ་འདུ་ཅན། །ཧ་ཧོ་ཧྲཱིཿཡིས་ཡེ་ཤེས་བདུད་རྩིར་གྱུར། །ཨོ་མཧཱ་ཀཱ་ལཱ་ཡ། ཤཱ་ས་ན་ཨུ་པ་ཧཱ་རི་ཎི་སོགས་ལན་གསུམ་དང་། ཨོ་མཧཱ་ཀཱ་ལ་གུ་ཎ་ཧྲི་ད་ཨི་དཾ་བ་ལིངྐ་ཁ་ཁཱ་ཁཱ་ཧི་ཁཱ་ཧི། ཞེས་ལན་གསུམ་དང་། ཨོཾ་ཨ་ཀཱ་རོ་སོགས་ལན་གསུམ་བཅས་ཀྱིས་འབུལ། །སྤྲོ་ན་འདོད་གསོལ་རྒྱས་པ་དང་། བསྡུ་ན། ལས་མགོན་བྱ་རོག་གདོང་ཅན་འཁོར་བཅས་ལ། །བསྟན་དགྲའི་ཤ་ཁྲག་རུས་གཏོར་འདི་འབུལ་ལོ། །བསྟན་དང་དེ་འཛིན་སྤྱི་བྱེ་བདག་ཅག་གི །ཕྱི་ནང་གསང་བའི་རྐྱེན་ངན་མྱུར་ཟློག་མཛོད།། ཅེས་བརྗོད། ཧཱུྃ༔ ཐོད་པའི་སྐྱོགས་ཀྱིས་ཁྲག་འཐུང་རྡོ་རྗེའི་གདངས། །སྲིད་པའི་གཉེན་དུ་བླ་མེད་ཟླ་བའི་ཆ། །མཐིང་ནག་མེ་འོད་འཇའ་ཚོན་འཁྲུགས་པའི་རྫུ། །སྣ་ཚོགས་རང་དགའི་ངོ་ན་ཀུན་ཏུ་སྣང་། །དེ་ཕྱིར་སྲིད་ཞིའི་འཕྲོ་འདུ་རང་རིག་ཏུ། །ཤེས་པས་བསྟོད་བྲལ་ཁྱོད་ལ་བསྟོད་བགྱིད་ན། །སྐྱེ་འཇིག་སྒྱུ་མའི་གཡུལ་ངོ་བཅོམ་པ་དང་། །ཡེ་ཤེས་སྣང་བ་ཕྱོགས་བཅུར་རྒྱས་པར་མཛོད། །ཉོན་མོངས་རང་རིག་ཀློང་དུ་ཞི་བ་དང་། །ཏིང་འཛིན་རྒྱ་མཚོའི་རྩལ་སྣང་དབང་སྡུད་ཅིང་། །ཡིད་སྲུབ་དྲག་པོའི་འཕྲུལ་འཁོར་ཚར་གཅོད་པའི། །ཕྲིན་ལས་ཁྱོད་ལ་རེའོ་མྱུར་སྒྲུབས་མཛོད། །ཅེས་བསྟོད་ཅིང་འདོད་དོན་གསོལ།
༈ དཔལ་ཡེ་ཤེས་ཀྱི་ལྷ་མོ་དུད་སོལ་མའི་གསོལ་ཁ་བསྡུས་པ་ནི། ཨོཾ་སྭབྷཱ་ཝ་སོགས་ཀྱིས་སྦྱངས། སྟོང་པའི་ངང་ལས་ཨེ་ཡཾ་ཝཾ་རཾ་ལཾ། །སུཾ་བྫྷྲྭཾཞུ་བས་ཆོས་འབྱུང་འབྱུང་བཞིའི་དལ། །རི་རབ་རྭ་གུར་རིན་ཆེན་གཞལ་མེད་ཁང་། །མཚན་ཉིད་རྫོགས་པའི་ནང་དུ་ཐོད་པའི་མཁར། །གྲུ་གསུམ་མེ་རླུང་འཁྲུགས་པའི་ཁྲག་མཚོའི་དབུས། །མཐིང་ནག་ཧཱུྃ་ལས་བཅོམ་ལྡན་དུད་སོལ་མ། ནག་པོའི་སྤྲིན་འདྲ་ཁྲོ་གཏུམ་སྦེག་པའི་གཟུགས། །མཆེ་གཙིགས་ལྗགས་འདྲིལ་མི་རོ་རེངས་པ གསོལ། །དམར་བའི་སྤྱན་གསུམ་ཟློག་གཟིགས་ཟུར་ཕུད་ཅན། །ལན་བུ་གཡོན་འཁྱིལ་ཐོད་པ་སྦྲུལ་གྱིས་བརྒྱན། །སྙན་གོང་དར་ནག་ཨུཏྤལ་རོ་ཉེ་དང་། །སྦྲུལ་དང་སེངྒེའི་རྣ་རྒྱན་གླང་ལྤགས་གསོལ། །ཕྱག་བཞིའི་གཡས་གཉིས་རལ་གྲི་ཐོད་ཁྲག་གཡོན། །ཤཀྟི་ཏྲི་ཤུ་བཟུང་ཞིང་ཕྱག་རྒྱ་དྲུག །ཁྲག་ཞག་ལྷ་མིན་མགོ་ཡི་དོ་ཤལ་ཅན། །བ་ལང་ཀོ་རློན་རེ་ལྡེས་སྨད་དཀྲིས་ནས། །ཀླུ་དབང་སྐ་རགས་བཙན་འཁྱིལ་ལྕགས་སྒྲོག་འཆང་། །གྲྭ་དམར་བོང་བུའི་སྟེང་དུ་འགྱིང་ཞིང་སྒེག །ཟུར་གསུམ་གཅེར་བུ་རལ་ཅན་སྙིང་ཁྲག་འཛིན། །ཕྱི་སྣམ་ནང་ཕྱོགས་དཀར་སེར་དམར་ལྗང་བཞི། །གྲི་ཐོད་འཛིན་མ་བདུན་ཡང་བོང་བུར་བཞོན། །ཕྱོགས་བཞིར་སེངྒེ་སྟག་སྤྱང་ཕག་དང་མཚམས། །བྱ་རྒོད་སྐྱུང་ཀ་དུར་བྱ་བྱར་གདོང་མ། །དྲེའུ་བཅིབས་ཤིང་གྲི་ཐོད་འཛིན་དང་སྒོར། །ཀཾ་ཀའི་གདོང་ཅན་མདའ་གཞུ་སྤུ་གྲི་སྦྲུལ། །ནད་རྐྱལ་གཡོན་པ་ཐོད་ཁྲག་སྟག་སྤྱང་སྤྲེའུ། །དྲེལ་ཞོན་ཁོར་ཡུག་མ་མོ་འབུམ་གྱི་སྡེ། །དུར་ཁྲོད་ཆས་བརྒྱན་ཨོ་ཨཱ༔ཧཱུྃ་གིས་མཚན། །ཧཱུྃ༑ སུམ་ཅུ་རྩ་བདུན་གནས་ཀྱི་ཕོ་ཉ་མོའི། །ཚོགས་ཀྱི་དབང་ཕྱུག་རིགས་ལྡན་དུད་སོལ་མ། །དད་དང་གདུང་བས་སྤྱན་འདྲེན་འདིར་གཤེགས་ལ། །དྲག་ཤུལ་ཆེན་པོས་དགྲ་བགེགས་འཇོམས་པར་མཛོད། །དྲིཥྱ་ཛ༔ ཧཱུྃ་བཾ་ཧོ༔ ཨོཾ་བཛྲ་ས་མ་ཡ་ཧ་ན་ཧ་ན་ཧཱུྃ་ཕཊ། ཧཱུྃ༔ སྨིན་བྱེད་དབང་གི་ཆུ་བོའི་ཨརྒྷཾ་སྦྲེང་། །དམ་ཚིག་མེ་ཏོག་བསྐྱེད་རིམ་སྤོས་ཀྱི་དུད། །རྫོགས་པའི་མར་མེ་སྤྱོད་པའི་དྲི་ཆབ་དང་། །འབྲས་བུའི་ཞལ་ཟས་མཆོག་གིས་མཆོད་པར་བགྱི། །ཧ་ལས་ཐོད་པའི་གཏོར་མ་གསེར་ཞུན་ལྟར། །ཧོ༔ ལས་དྲི་བཟང་ཀུན་གྱི་འབྱུང་ཁུངས་དང་། ཧྲི་ལས་རོ་བཅུད་ལྷ་རྫས་ལས་འདས་པའི། །ཡེ་ཤེས་བདུད་རྩིའི་རྒྱ་མཚོ་ཆེན་པོར་གྱུར། །ༀ་ཧཱུཾ་ཤྲཱི་ཡ་དེ་ཝི་ཀཱ་ལི་ཀཱ་ལི་མཧཱ་ཀཱ་ལི་ཧཱུྃ་བྷྱོཿ ཨི་དཾ་བ་ལིངྟ་གྲྀཧྞ་་གྲྀཧྞ་ས་མ་ཡ་ཧཱུྃ་ཕཊ། ཅེས་ལན་གསུམ་གྱིས་འབུལ། སྤྲོ་ན་འདོད་གསོལ་རྒྱས་པ་དང་། བསྡུ་ན། དཔལ་ལྡན་དུད་སོལ་ལྷ་མོ་འཁོར་བཅས་ལ། །འདོད་ཡོན་ལྔ་ལྡན་གཏོར་མ་འདི་འབུལ་ལོ། །བདག་ཅག་དཔོན་སློབ་ཡོན་མཆོད་འཁོར་བཅས་ཀྱི། །འགལ་རྐྱེན་སེལ་ཞིང་མཐུན་རྐྱེན་འགྲུབ་པར་མཛོད། །ཅེས་བརྗོད། ཧཱུྃ༔ དྷ་ཡིག་གིས་བརྗོད་བདག་ཉིད་ཐབས་ཀྱི་ལྷས། །ཤེས་རབ་ཡུམ་ལ་རྗེས་སུ་ཆགོས་བཞིན་པས། །བསྙེན་པའི་ཚུལ་ཤེས་ཞི་སོགས་གང་འདོད་དེར། །མོད་ལ་བརྗོད་འདི་འོལ་ཕྱིར་མི་སྤོབས་མཐུ། །མཾ་ཡིག་ནཱ་ཌིར་ཉི་མའི་སྡེ་འཆིངས་པས། །ནང་གི་ལྷ་མོ་ཁྱོད་མཉེས་ཉམས་བརྒྱའི་གར། །ནཱ་དའི་དབྱངས་སྦྱར་ཁམས་གསུམ་དུ་བསྒྱུར་ཚེ། །ཕུང་ཁམས་འཇའ་ཚོན་སྟོན་པའང་སྒྱུ་མའི་ཟོལ། །གཱ་ཡིག་ཉི་ཟླ་སྦྱར་བ་སྒྲ་གཅན་ཁར། །ཟོས་དུས་གསང་བའི་མ་མོ་ཁྱོད་ཞབས་དྲན། །སྒོ་གསུམ་དྷཱ་ཏིའི་དབྱིངས་སུ་ཐིམ་གྱུར་པའི། མངོན་པར་བྱང་ཆུབ་ཡུད་ཀྱིས་དེ་ལ་ཤར། །ར་ཡིག་སྒྱུ་མའི་ཁམས་བཞིའི་ལྷ་མོའི་གླུས། །སྟོང་བཞིའི་མཐའ་ལས་སད་པའི་ཡེ་ཤེས་ལུས། སླད་ནས་ཡང་དག་མཐའ་དང་ནམ་གཞར་ཡང་། །མི་ཕྱེད་དད་པས་དངོས་གྲུབ་སྦྱིན་ཁྱོད་ཀྱིས། །བཤད་པ་པདྨོའི་འབྱུང་གནས་འདི་ཉིད་དུ། །མཁས་པ་ངང་པའི་དེད་དཔོན་ཀུན་འདུས་ནས། །པད་དཀར་བཞད་པའི་དྲི་བསུང་གིས་སིམ་པའི། །དམ་ཆོས་མགྲིན་རྔ་རྡུང་བས་རྟག་འགེངས་མཛོད། །ཅེས་བསྟོད་ཅིང་འདོད་དོན་གསོལ། དགེ་བསྙེན་ཇག་མེའི་གསོལ་ཁ་བསྡུས་པ་ནི། ཧཱུྃ༑ མཐོ་བ་སྲིད་པའི་ཡས་སྟེང་གི། །རྩུབ་འགྱུར་ཚལ་དུ་རུ་མཚོན་ཅན། །དཀར་པོ་ལྷ་ཡི་དབང་ཕྱུག་གི། །དམག་དཔོན་ཆེན་པོ་གཤེགས་སུ་གསོལ། །ཧཱུྃ༑ དམའ་བ་ས་འོག་རིམ་པ་དགུའི། །གྲོང་ཁྱེར་མཆོག་ན་སྲོག་བདག་དམར། །ཆོས་ཀྱི་རྒྱལ་པོ་གཤིན་རྗེ་ཡི། །ལས་མཁན་ཆེན་པོ་གཤེགས་སུ་གསོལ། །ཧཱུྃ༑ བར་གྱི་བདུད་ཡུལ་ཁ་རག་གླིང་། །གདོང་མར་ཡུལ་ནས་ཨ་བསེ་རྒྱལ། །ཞང་ཞུང་བོན་གྱི་སྐྱོང་བ་ཆེ། །དགྲ་ལྷའི་རྒྱལ་པོ་གཤེགས་སུ་གསོལ། །ཧཱུྃ༑ ལྷག་པར་མོན་ཁམས་ཐིམ་ཕུ་ཡི། །བདེ་ཆེན་གནས་ནས་བཙན་རྒོད་སྤྱད། །རིག་འཛིན་བླ་མའི་བཀའ་ཉན་མཆོག །ཇག་པ་མེ་ལེན་གཤེགས་སུ་གསོལ། །ཧཱུྃ༑ བསད་པའི་དམར་ཆོལ་ལྦུ་གསར་ཅན། །དགྲ་བོའི་སྙིང་རྩ་ནས་འབབ་དང་། །སྣ་ཚོགས་འབྲུ་ཡི་ཛ་གད་ནི། །གསེར་ཁ་གཡུ་ཁས་བརྒྱན་ཏེ་འབུལ། །ཧཱུྃ༑ དགྲ་མགོ་བྲེགས་པའི་ཕྲེང་བས་གཏིབས། །ཤ་དྲི་གསར་པའི་ན་བུན་འཐུལ།། རྒྱལ་བའི་རུ་མཚོན་སྣང་བ་སྦར། །དཔའ་བོའི་འབྲུག་སྒྲ་ལྡིར་བ་འབུལ།། ཧཱུྃ༑ ཡིད་གར་འོང་བ་སྒྲུབ་པའི་རྒྱན། །སྡང་བའི་དགྲ་བོ་འཇོམས་པའི་ཆས། མནབས་འོས་ཁྱིམ་གྱི་མནངས་ཆེན་ནོར། །ཕྱུགས་ཀྱི་འགྲོ་བ་ཀུན་ཀྱང་འབུལ། །ཧཱུྃ༑ རྟ་དམར་གླང་དམར་ར་དག་གི། །ཤ་ནི་ངར་བཅས་བ་ལིཏྟ། སྙིང་དང་ནང་ཁྲོལ་སྣ་ཚོགས་ཀྱིས། །རྒྱ་མཚོ་ཆེན་པོ་བྱས་པ་འབུལ། །ཧཱུྃ༑ གདུག་པ་ཁྱོད་ཀྱི་གཟུགས་ཀྱི་བྱིན། །མ་རུང་ཇག་པའི་ཚ་ངད་ཀྱིས། །བར་ཆད་བགེགས་ཀྱི་ཕྱེ་མ་ལེབ། །ཐམས་ཅད་གཞོབ་ཀྱང་མེད་པར་སྲེག། །ཧཱུྃ༑ གཟིར་བའི་སྤྱན་གྱིས་མ་ནོན་བགེགས། །ཁྲོས་པའི་ཞལ་གྱི་མཆེ་བའི་རྩེར།། མི་ལེན་དམ་ཚིག་ཉམས་པའི་སྲོག །འཇིག་རྟེན་ཁམས་ན་ཅང་མེད་དོ། །ཧཱུྃ༑ རྡོ་རྗེའི་རྨོག་ཞུ་ཁྲབ་ཆེན་ཕུབ། །མདུང་མར་ཞགས་བཟུང་མདོ་དྲུག་ཆས།། ཞུད་ཅན་རྟར་ཞོན་དཔའ་སྐྱེན་གདོང་། །སུས་ཀྱང་ཚུགས་པར་མི་ནུས་སོ།། ཧཱུྃ༑ སྲིན་བྱ་ཁུས་འདེབས་ཕར་ཁྱི་ངར། །བཙན་དམག་ཅོ་སྒྲས་ཁོལ་བ་རྣམས། །མེ་རུ་འབར་ཞིང་རླུང་དུད་འཚུབས། །དགྲ་བོའི་སྲོག་ལ་དུག་ཏུ་གྱུར། །ཧཱུྃ༑ སྲིད་གསུམ་འཇོམས་པའི་ཇག་པ་ནི། །ཞེ་སྡང་མེ་ལྟར་འབར་བ་རྣམས། །དགྲ་བོའི་སྲོག་རྩ་ལེན་ལ་སོང་། །སྲོག་དང་དབུགས་ལ་རྔམ་ཟས་གྱིས། །ཧཱུྃ༑ མི་སྡུག་གཟུགས་དགུའི་སྒྱུ་འཕྲུལ་ཇག །དགྲ་དང་བགེགས་ཀྱི་སྟེང་ཏུ་སྒྱུར། །མི་ཉན་ངག་གི་དམོད་པའི་མེ། །ལེན་མཁན་དགྲ་འདི་ཡིན་པས་སྦྱར། །ཧཱུྃ༑ ལྷ་སྲིན་དྲེགས་པའི་ཇག་དཔོན་ཁྱོད། །ཐུབ་པའི་ལྷ་འདྲེ་གར་ཡང་མེད། །མི་བོ་ཟས་སྐལ་ཡིན་པའི་ཕྱིར། །དགྲ་བོ་མེ་འདྲ་སྲོག་ལེན་མཛོད། །ཧཱུྃ༑ ཇག་དམར་རལ་གུ་བརྡབས་ནས་ཁྱོད་རྗོད་དོ། དམ་བསྐུལ་མེ་དཔུང་སྤར་ནས་ཁྱོད་རྗོད་དོ། །ལེན་རྩའི་རྩ་བ་བཤད་ནས་ཁྱོད་ཅོད་དོ། །དགྲ་བོ་ཚར་གཅོད་ལས་འདི་མྱུར་དུ་སྒྲུབས། །དམ་ཅན་ཇག་པ་མེ་ལེན་ཞེས། །གྲུབ་པའི་བཀའ་ཉན་དེ་མཆོད་པའི། །ཆོ་ག་ཧཱུྃ་སྒྲ་བཅུ་དྲུག་པ། །པདྨ་དཀར་པོ་བདག་གིས་སྦྱར། །སྒོ་མོ་ལུང་པའི་གསོལ་ཁ་བསྡུས་པ་ནི། ཧཱུྃ༑ རྡོ་རྗེ་ལྷུན་པོའི་ཟོམ་ཆེན་པོར། །གཟའ་རྒོད་ཆེན་པོའི་མཚན་ཡང་འཛིན། །ཕྱག་བརྙན་ལྷ་མིན་ཚོགས་ཆེན་པོས། །བསྐོར་ནས་འདིར་གཤེགས་ཀི་ཀང་ཁྱོད། །ཧཱུྃ༑ ལྕགས་མཁར་སྒོ་མེད་བཅུ་དྲུག་ན། །འཆི་བདུད་ནག་པོའི་མཚན་ཡང་འཛིན། །བཀའ་ཉན་དམྱལ་སྲུང་གཏུམ་པོའི་སྡེས། །བསྐོར་ནས་འདིར་གཤེགས་ལས་གཤིན་ཁྱོད། །ཧཱུྃ༑ སྤྲུལ་པའི་ཞིང་གི་ལྷོ་ཕྱོགས་སུ། །སྒོ་བདུད་ཆེན་པོའི་མཚན་ཡང་འཛིན། །ལས་མཛད་སྡེ་བརྒྱད་བཤན་པའི་ཚོགས། །བསྐོར་ནས་འདིར་གཤེགས་གནས་སྲུང་ཁྱོད། །ཧཱུྃ༑ དཔའ་བོའི་ཆང་ཕུད་རྒྱ་མཚོར་བསྐྱིལ། །དམར་ཆོལ་ཁྲག་སྣའི་ཨརྒྱུ་སྦྲེང་། །མཐུན་རྫས་བཤོས་བུ་རི་དབང་རྩེར། །དཀར་དམར་ཟླ་ཉིས་མཛེས་པ་འབུལ། །ཧཱུྃ༑ དམིགས་པའི་དགྲ་བོ་དམ་ཉམས་ཀྱི། །སྲོག་དང་དབུགས་དང་བླ་དང་ཚེ། །ཤ་ཁྲག་རུས་པའི་བ་ལིད། །དམར་གྱི་ངད་དྲི་ཆིལ་བས་མཆོད། །ཧཱུྃ༑ ནག་པོའི་ངར་ལ་བདུད་ཀྱི་མཁར། །དགྱེས་དགུ་ཡས་དང་ཐག་ལས་གྲུབ། །མི་ཟད་ནམ་མཁའི་མཛོད་ངོ་མར།། བྱིན་གྱིས་བརླབས་པས་ཐུགས་དམ་བསྐང་། །ཧཱུྃ༑ མཐོང་བའི་དུག་རླངས་སྤྲིན་ནག་གིས། །མུན་པར་འཐིབས་གཟུགས་ལྟ་བྱེད་གློག །སྟོང་ཕྲག་གཡོ་ལས་ཁྲག་གི་ཆར། །ཅི་ཡང་འབེབས་ལ་ཕྱག་འཚལ་བསྟོད། །ཧཱུྃ༑ ཟ་བར་བྱེད་པའི་ཁ་བོ་ཆེ། །མཚོན་ཆའི་ངར་ཀུན་འདྲིལ་བའི་སོས། །དགྲ་སྲོག་གཏུབ་པའི་རཀྟའི་རྒྱུན། །མ་བམ་འགྲམ་པར་འཛག་ལ་བསྟོད། །ཧཱུྃ༑ རྒྱལ་བའི་དམ་ཚིག་ཆང་འཐུངས་པས། །མྱོས་པའི་གད་རྒྱངས་མི་ཟད་པ། །རྣམ་པར་རོལ་པ་བརྒྱ་ཕྲག་གིས། །མ་རུངས་འཇོམས་ལ་ཕྱག་འཚལ་བསྟོད།། ཅེས་ཕྲིན་བཅོལ་བྱས། སྒེར་གསོལ་རྣམས་ཀྱི་གཏོར་བསྔོ་བསྡུས་པ་ནི། དཔལ་ལྡན་འབྲུག་པའི་བསྟན་སྲུང་སྒེར་གསོལ་རྣམས་ལ་གཏོར་མ་འབུལ་བར་འདོད་ན། མགོན་པོ་ལྕམ་དྲལ་གྱི་གསོལ་ཁ་བསྡུས་པའི་རྗེས་སུ་བྱ་སྟེ། སྤུངས་གཏོར་ལ་དམིགས་ཏེ། ཨོཾ་སྭ་བྷ་ཝ་སོགས་ཀྱིས་སྦྱངས། གཏོར་རྫས་རྣམས་མི་དམིགས་ཏེ་སྟོང་པོ་ཉིད་དུ་གྱུར། སྟོང་པའི་ངང་ལས། ཕྱི་ལྟར་རིན་པོ་ཆེ་ལས་གྲུབ་པའི་གཏོར་སྣོད་སྲིད་པའི་ཁྱོན་ལྟར་ཡངས་པའི་ནང་དུ། གཏོར་རྫས་རྣམས་ངོ་བོ་ཟག་མེད་ཡེ་ཤེས་ཀྱི་བདུད་རྩིའི་རྒྱ་མཚོ། རྣམ་པ་འདོད་ཡོན་གྱི་སྤྲིན་ཕུང་འཕྲོ་བ། ནང་ལྟར་བནྡྷ་འབར་བའི་སྣོད་དུ། ཞིང་བཅུ་ཚང་བའི་དགྲ་བགེགས་ཀྱི་ཤ་ཁྲག་རུས་པ་སྲོག་དབུགས་བླ་ཚེ་ཁར་རྗེ་དབང་ཐང་རླུང་རྟ་ལ་སོགས་འདུས་པའི་ཕུང་པོ། གསང་བ་ཤེས་རབ་བྷ་གའི་སྣོད་དུ། ཐབས་མཆོག་ལིང་གས་གཏམས་པའི་བདེ་སྟོང་དགའ་བཞི་རོ་བཅུད་འཕོ་མེད་བདེ་བ་ཆེན་པོའི་རང་བཞིན་དུ་གྱུར། ཨོཾ་ཨཱཿཧཱུཾ། ཞེས་ལན་གསུམ་གྱིས་བྱིན་བརླབས་བྱས་ཏེ། རང་ཉིད་ཧེ་རུ་ཀར་གསལ་བའི་སྙིང་གའི་འོད་ཀྱིས་བསྐུལ་བས། ལྕང་ལོ་ཅན་སོགས་རང་རང་སོ་སོའི་གནས་ནས་རྒྱལ་ཆེན་རྣམ་མང་ཐོས་སྲས། །ལྷ་སྨན་ཚེ་རིང་མཆེད་ལྔ། །སྨན་བཙུན་རྡོ་རྗེ་གཡུ་སྒྲོན། །ལས་གཤིན་ཅིག་ཅར་དམར་པོ། །གཟའ་རྒོད་དུག་གི་སྤུ་གྲི། གཏེར་བདག་སྨྱོན་ཁའི་ཀླུ་བཙན། །དཀོར་བདག་རྒྱལ་ཆེན་སྐུ་ལྔ། གངས་བཟང་མི་སྔོན་རྟ་སྔོན།དགེ་བསྙེན་ཇག་པ་མེ་ལེན། །དམ་ཅན་སྒོ་མོ་ལུང་པ། ཇོ་བོ་ཤིང་རྟའི་ཁ་ལོ། །གནམ་འབྲུག་ཕུ་མདའི་གཞི་བདག། །གདན་ས་འདི་ཉིད་དུ་གཉུག་མར་གནས་པ་མིང་ཆེ་གེ་མོ་ལ་སོགས་བསྟན་སྲུང་དམ་ཅན་རྒྱ་མཚོ་ཐམས་ཅད་སྐད་ཅིག་གིས་བྱོན་ནས་དཀྱིལ་འཁོར་གྱི་ཁོར་ཡུག་ཏུ་བཞུགས་པའི་ལྗགས་འོད་ཀྱི་སྦུ་གུས་གཏོར་མའི་བཅུད་དྲངས་ཏེ་གསོལ་བར་གྱུར། །རྣམ་སྲས་ལ། ཨོཾ་བེེ་ཤྲ་བ་ཎཱ་ཡེ་ས་པ་རི་ཝཱ་ར་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། ཚེ་རིང་མ་ལ། མཾ་ལཾ་ཨཾ་ཙཾ་ཏཾ་པཉྩ་ཊཱཀྐི་ནཱི་ས་པ་རི་ཝ་ར༴ །གཡུ་སྒྲོན་མར། ཨོཾ་བཛྲ་ལ་ལ་ལི་ལི་ས་པ་རི་ཝ་ར༴ །ཅིག་ཅར་ལ། ཡུ་ག་པདྨོ་ཧི་ཏ་ས་པ་རི་ཝ་ར༴། དྲང་སྲོང་ལ། ཧྲཱི་ཤཀ་རུ་རཾ་ན་ག་ལི་ཧཾ། ཤཾ་ཏྲི་ཛཿཛཿཤཀ་རཀྵ་ཀ་ར་ཧཱུྃ་བིངྟ་ཁཱ་ཧི། ན་ག་ལི་ཧཾ། ཤཾ་ཏྲི་ཛ་ཛ་བ་ལིནྟ་ཁཱ་ཧི། ར་ཧུ་ལ་པཀྵི་མེ་ཀེ་རུ་རུ་ཏི་ཛྭ་ལ་ཏི་སྭཱཧཱ། བ་ལིནྟ་ཁཱ་ཧི། མྱོན་ཁ་ལ། ཨོ་ནག་པོ་ཏི་པ་རཱ་ཛ་ནཱ་ག་རཀྵ་ས་པ་རི་ཝཱར༴ །རྒྱལ་པོ་ལ། དྷརྨ་པཱ་ལ་མཧཱ་རཱ་ཛ་བྷེ་ཧ་ར༴ །གདན་ས་པ་ལ། ཡཀྵ་པུར་ཎ་བྷ་དྲ༴ །མ་ནུ་ཁཱ་ཤོ་ནི་ལ༴ །དགེ་བསྙེན་ལ། ཨོཾ་སརྦ་སུཾ་ཏྲི་རི་ཏྲི་ན་ན་ཁ་རེ་བྷྲུཾ༴ །སྒོ་མོ་ལ། མུ་ཁཱི་མ་ར་ཀྲིཥྞ༴ །གནམ་འབྲུག་ཕུ་མདའ་བར། ཨ་དྱ་ནུ་ཀམྤ། ལག་མི་ནི་གཱ༴། ཨ་མུ་ཁེ་དེ་ཤསྛ་བ༴ །གཞི་བདག་སྤྱི་འགྲོ་ལ། ཨོཾ་ཨ་ཀཱ་རོ༴ །རྣམས་ལན་གསུམ་རེས་འབུལ། འདོད་གསོལ་ནི། རྒྱལ་བསྟན་སྒྲུབ་བརྒྱུད་སྙིང་པོ་དཔལ་ལྡན་འབྲུག་པའི་བསྟན་སྲུང་དམ་ཅན་རྒྱ་མཚོ་བཀའ་སྡོད་ཕོ་ཉའི་དམག་ཚོགས་གཞི་བདག་དང་བཅས་པ་རྣམས་ལ་མཆོད་སྦྱིན་གྱི་གཏོར་མ་འདི་འབུལ་ལོ། །སྤྱིར་སངས་རྒྱས་ཀྱི་བསྟན་པ་སྲུངས། །དཀོན་མཆོག་གི་དབུ་འཕང་བསྟོད། །དཔལ་ལྡན་བླ་མའི་སྐུ་ཚེ་སྲིངས། །དགེ་འདུན་གྱི་སྡེ་སྐྱོངས། བསྟན་ལ་སྡང་བའི་དགྲ་ཐུལ། །གནོད་པར་བྱེད་བགེགས་ཆོམས། །དམ་སྲི་རྒྱལ་འགོང་གི་ཆོ་འཕྲུལ་ཟློག། །འཇིག་རྟེན་དུས་ཀྱི་རྒུད་པ་སེལ། །སེམས་ཅན་ཡོངས་ཀྱི་ཕན་བདེ་སྤེལ། །ཁྱད་པར་དུའང་རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་པ་ཐམས་ཅད་གནས་སྐབས་སུ་ནད་གདོན་ཆག་ཆེ་ཉམ་ང་ལོ་ཀེག་ཟླ་གཤེད་ལ་སོགས་འགལ་རྐྱེན་བར་ཆད་མི་མཐུན་པའི་ཕྱོགས་ངན་པ་མཐའ་དག་ལས་སྲུང་ཞིང་། །ཚེ་བསོད་དཔལ་འབྱོར་ཕྱུ་གཡང་ལོངས་སྤྱོད་སྙན་གྲགས་མངའ་ཐང་སོགས་མཐུན་པའི་ལེགས་ཚོགས་ཐམས་ཅད་འཕེལ་ཞིང་རྒྱས་པ་དང་། །ཚེ་གང་དབེན་པའི་རི་སུལ་དུ་སྒྲུབ་པ་སྙིང་པོར་ལེན་པའི་རྒྱུ་ཅན་ཉམས་རྟོགས་ཀྱི་གཤོག་རྩལ་ནང་ནས་རྫོགས་ཏེ། །ནམ་ཞིག་རྣམ་སྨིན་ལུས་ཀྱི་སྒོང་རྒྱ་རལ་མ་ཐག་ཏུ་མཁའ་སྤྱོད་བདེ་བ་ཆེན་པོའི་ཞིང་དབུགས་འབྱིན་ཞིང་། །མཐར་ཐུག་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་ལ་སྦྱོར་བའི་སྟོངས་གྲོགས་དང་ཕྲིན་ལས་རྒྱ་ཆེན་པོ་འགྲུབ་པར་མཛད་དུ་གསོལ། ཅེས་དང་། སྤྲོ་ན། ཀྱེེ༑ སངས་རྒྱས་བསྟན་སྲུངས་དཀོན་མཆོག་དབུ་འཕངས་བསྟོད། །དགེ་འདུན་སྡེ་སྐྱོངས་རྣལ་འབྱོར་ཚེ་སྲོག་སྲིངས། །སྙན་པའི་དར་འཕྱར་གྲགས་པའི་དུང་བུས་ལ། །འཁོར་དང་ལོངས་སྤྱོད་རྒྱས་པ་ཉིད་དུ་མཛོད། །རྒས་མེད་ལང་ཚོ་ལྡན་པའི་ལུས་སྟོབས་རྒྱས། །མིག་ལ་ཡ་མཚན་ལྟད་མོས་དགའ་བ་དང་། །རྣ་བར་རྟག་ཏུ་སྙན་པའི་གཏམ་ཐོས་ཤིང་། །དྲི་ཞིམ་ངད་པ་སྣ་དང་མི་འབྲལ་མཛོད། །ཟས་སྐོམ་འབྱོར་པ་རོ་ཡིས་ཚིམ་བྱེད་ཅིང་། །ཡིད་ལ་རྣམ་པར་བཀྲ་བའི་ཤེས་རབ་རྒྱས། །ལུས་ལ་རེག་འཇམ་བདེ་བས་ནམ་ཡང་ཁྱབ། །ཟག་མེད་བདེ་བས་ནམ་ཡང་ངོམས་པར་མཛོད། །ཁྱོད་གསོལ་ཁྱོད་བསྟེན་ཁྱོད་བསྒྲུབས་ཁྱོད་རྦད་ན། །མཐུ་རྩལ་མ་ཆུང་བརྩེ་གདུང་ཆེ་བ་ཡིས། །གཞི་ལ་བཀྲ་ཤིས་ལོངས་སྤྱོད་ཕུན་སུམ་ཚོགས། །བྱེས་སུ་ལམ་འཕྲང་ཆུ་ལས་སྒྲོལ་འདོན་མཛོད། །འཇིགས་སར་དགྲ་ཇག་ཆོམ་རྐུན་འཚེ་བ་སྐྱོབས། །མདོར་ན་བསམ་དོན་མ་ལུས་འགྲུབ་པ་དང་། །འགྲོ་བའི་དོན་ལ་མཐུ་དང་ལྡན་པ་ཡིས།།བཅོལ་བའི་ཕྲིན་ལས་མ་ལུས་འགྲུབ་པར་མཛོད། །གང་ཞིག་ཡིད་ལ་དྲན་པ་ཙམ་གྱིས་ཀྱང། འདོད་པའི་དངོས་གྲུབ་སྟེར་བར་མཛད་པ་ཡི། །ཆོས་སྐྱོང་ཡིད་བཞིན་ནོར་བུ་ཁྱེད་རྣམས་ཀྱིས། །བདག་ཅག་བསམ་དོན་མ་ལུས་འགྲུབ་པར་མཛོད། །མཚམས་འདིར་ལོང་ཁོམ་བྱུང་ན་མགོན་པོ་དང་ལྷ་མོའི་བཤགས་པརྣམས་ཀྱང་འདོན་པར་བྱའོ། །ཚོགས་མཆོད་གཞུང་བཞིན་གྲུབ་རྗེས། ཀྱེེ༑ མཧཱ་ཀཱ་ལ་གསན་ཅིང་དགོངས་སུ་གསོལ། །ནག་པོ་ཆེན་པོའི་དཀྱིལ་འཁོར་སྒོར་ཞུགས་ནས། །བཀའ་ཡི་དམ་ཚིག་གཉན་པོ་བསྲུང་རྒྱུ་ལ། །བཀའ་ལྟར་མ་གྱུར་གཞུང་བཞིན་རྔོ་མ་ཐོགས། །བསྙེན་སྒྲུབ་དུས་འདས་ཕུད་དང་གཏོར་མ་ཆག །རྩ་བ་ཡན་ལག་དམ་ཚིག་ཉམས་པ་ཀུན། །རྡོ་རྗེ་སྲིན་པོ་འཁོར་དང་བཅས་ལ་བཤགས། །ༀ་ཤྲཱི་ཧེ་རུ་ཀ་ས་མ་སོགས་ལན་གཅིག། ཧཱུྃ༑ ལྷ་མི་འདོད་ཡོན་མ་ལུས་ཚོགས་པའི་སྤྲིན། །སོ་སོའི་ཐུགས་ལ་དགྱེས་དགུའི་ཆར་འབེབས་པ། །ནམ་མཁའི་ཁམས་རྣམས་ཀུན་ནས་ཁྱབ་པ་འདིས། །དམ་ཅན་སྲུང་མ་རྒྱ་མཚོའི་ཐུགས་དམ་བསྐང་། །གཡག་ལུག་རྟ་ཁྱི་གཅན་གཟན་གཏུམ་པོའི་ཚོགས། །བྱ་ནག་རྟེན་གཏོར་གཡང་གཞི་དཔའ་བོའི་སྙིང་། །སྲོག་གི་འཁོར་ལོས་བལྟམས་སོགས་རང་རང་གི །རྟེན་རྫས་རྒྱ་ཆེར་སྤེལ་བས་ཐུགས་དམ་བསྐང་། །སྐུ་བརྙན་ཇ་དང་ཅང་ཏེའུ་སིལ་སྙན་དུང་། །ཁོང་བུ་གྲྭ་དམར་ནལ་བུའི་རྒྱལ་མཚན་སྙིང་། །མདོངས་མཐའ་ཅན་གྱི་གར་དང་འདོད་ཡོན་ལྔ། །དམར་གྱི་ཨརྒྷ་སྦྲེང་བས་ཐུགས་དམ་བསྐང་། །རིན་ཆེན་གོ་ཆ་རྣོ་བའི་དགྲ་ཆ་དང་། །འཕྱར་བའི་དར་དང་བསྲ་བའི་ལག་ཆ་དང་། །བལྟ་བས་མི་ངོམས་སྤྱན་གཟིགས་དཀོར་ཆའི་དབྱིག །གང་གཱའི་ཀླུང་རྡུལ་གྲངས་ཆས་ཐུགས་དམ་བསྐང་། །དྲི་རོ་བཅུད་མདངས་ཕུད་ཀྱི་བཟའ་བཏུང་ནི། །སྲིད་ན་ཅི་མཆིས་དེ་སྙེད་སྤུངས་པ་གང་། །སྔགས་རྒྱས་དམ་ཚིག་རྫས་སུ་ལེགས་བསྙེན་པའི། །ཚོགས་དང་གཏོར་མ་རྒྱ་མཚོས་ཐུགས་དམ་བསྐང་། །དགྱེས་བཞིན་འཁོར་བས་འགལ་རྐྱེན་སེལ་བ་དང་། །གནད་དུ་བསྐུལ་བས་ཕྲིན་ལས་སྒྲུབ་པའི་རྒྱུ། །མཆོད་དང་ཉེ་བར་བསྒྲུབ་པའི་སྒོམ་བཟླས་སོགས། །མཐུན་པའི་དམ་རྫས་ཡོངས་ཀྱིས་ཐུགས་དམ་བསྐང་། །ལྕམ་དྲལ་ཁྱེད་དང་དམ་ཅན་མ་ལུས་པར། །མཆོག་ཏུ་གདུང་ཤུགས་ལྡན་ཀྱང་མི་མཁས་པས། །ཚུལ་བཞིན་སྒྲུབ་པའི་དམ་ཚིག་ལས་ཉམས་པ། །དོ་ནུབ་བསྐང་ངོ་བཤགས་སོ་ཐུགས་དམ་ཅན། །དེ་ལྟར་བསྐང་ཞིང་བཤགས་ནས་འདོད་པའི་དོན། །མ་ལུས་སྒྲུབ་ཅིང་ལྷག་པར་བདག་ཅག་ལ། །ཕ་རོལ་བསམ་སྦྱོར་ངན་པས་ལས་བརྩམས་པ། །གང་མཆིས་དགྲ་བགེགས་ཉིད་ལ་བཟློག་པར་མཛོད།། ཞེས་བརྗོད། དེནས་ལྷག་གཏོར་བསྔོས་གྲུབ་པའི་འོག་ཏུ། སྤྲོ་ན་མགོན་པོའི་གསོལ་འདེབས་དང་ལྷ་མོའི་གཉེར་གསོལ། སྨན་རག་གཏོར་འབུལ་སོགས་ཀྱང་བྱའོ། །དེ་ནས་རྗེས་ཆོག་ནི། ཨོཾ་བཛྲ་མཧཱ་ཀཱ་ལ་ས་པ་རི་ཝཱ་ར་ཨརྒྷཾ་པྲ་ཏིཙྪ་ཧཱུྃ་སྭཱཧཱ། སོགས་ཀྱིས་སྔར་བཞིན་མཆོད། ཧཱུྃ༑ ཆོས་ཀྱི་དབྱིངས་ནས་བདུད་སྡེར་ཁྲོས་པའི་གཟུགས། །མཧཱ་ཀཱ་ལ་ཡབ་ཡུམ་སྲས་དང་འཁོར། །དམ་ཅན་རྒྱ་མཚོའི་ཚོགས་བཅས་དཀྱིལ་འཁོར་གྱི། །ལྷ་ཚོགས་ཀུན་ལ་དད་པས་ཕྱག་འཚལ་བསྟོད། །ཅེས་བསྟོད། ཨོཾ་ཤྲཱི་ཧེ་རུ་ཀ་ས་མ་ཡ་སོགས་ཡི་གེ་བརྒྱ་པས་ལྷག་ཆད་བསྐང་། མ་འབྱོར་བ་དང་ཉམས་པ་དང་།། སོགས་ཀྱིས་བཟོད་པ་གསོལ། འདིར་ནི་གཟུགས་དང་ལྷན་ཅིག་ཏུ། །སོགས་ཀྱིས་མདུན་བསྐྱེད་བརྟན་བཞུགས་བྱ། དེ་ནས་བདག་བསྐྱེད་བསྡུ་ལྡང་བྱས་གྲུབ་པ་དང་། དགེ་བ་འདི་ཡིས་མྱུར་དུ་བདག །ཧེ་རུ་ཀ་དཔལ་འགྲུབ་གྱུར་ནས། །སོགས་དགེ་བ་བསྔོ།། ༄༅། །དཔལ་ནག་པོ་ཆེན་པོ་ཐོད་པ་ནག་པོའི་རྒྱུད་ལ་མགོན་པོའི་སྨོན་ལམ་ནི། ཕྱག་ན་རྡོ་རྗེས་ཡང་ཞུས་པ།། འདི་ཉིད་སྨོན་ལམ་ཇི་ལྟར་གདབ། །བཅོམ་ལྡན་འདས་ཀྱིས་བཀའ་སྩལ་པ། །རྣལ་འབྱོར་ལྡན་པས་སྔགས་པ་ཡིས། །སྨོན་ལམ་བཏབ་པ་འགྲུབ་པར་འགྱུར། །ཚོགས་གཉིས་རབ་བསགས་དྲི་མ་མེད། །བསྐྱེད་དང་རྫོགས་པ་གཉིས་སུ་གསལ། །རྒྱུ་འབྲས་རྐྱེན་གྱི་བདག་ཉིད་ཅན། །དགེ་བ་རྡོ་རྗེ་ང་ཡི་སྲོག །ཐུན་མཚམས་རྗེས་ལ་འདི་སྐད་བརྗོད། །སྐྱེ་ཞིང་སྐྱེ་བ་ཐམས་ཅད་དུ། །མཧཱ་ཀཱ་ལ་སྟོན་པ་དང་། །འཕྲིན་ལས་བཞི་པོ་འགྲུབ་པ་དང་། །སངས་རྒྱས་བསྟན་པ་བསྲུང་བར་ཤོག །ཀུན་ཏུ་སངས་རྒྱས་ཐམས་ཅད་ཀྱིས། །རྡོ་རྗེ་འཆང་ཆེན་གོ་འཕང་ལྡན། །བདག་གིས་བསྟན་པ་དར་བྱེད་ཅིང་། །དགེ་བ་འདི་ཡིས་ཐོབ་གྱུར་ཅིག །འགྲོ་བ་ལྔས་ཀྱང་ཐོབ་པར་ཤོག །བྱང་ཆུབ་རྡོ་རྗེ་སྔགས་པ་ཡིས། །རྫོགས་སངས་རྒྱས་ཀྱི་སྤྱོད་པ་གང་། །བདག་ཀྱང་དེ་ཉིད་སྤྱོད་པར་ཤོག །བདག་གིས་དགེ་བའི་རྩ་བ་འདིས། །བསྒྲུབ་ལ་བར་ཆད་མེད་པ་དང་། །འོད་གསལ་ཆེན་པོའི་དོན་རྟོགས་ནས། །ཚེ་འདི་ཉིད་ལ་སངས་རྒྱས་ཤོག །འབད་པ་མེད་པ་སེམས་ཅན་གྱི། །དོན་རྣམས་ཐམས་ཅད་བྱེད་པ་དང་། །སྐྱེ་རྒ་ན་འཆི་རྩད་བཅད་ནས། །བདེ་བ་ཆེན་པོའི་སྐུ་ཐོབ་ཤོག། །དཔལ་ནག་པོ་ཆེན་པོའི་རྒྱུད་ལས་སྨོན་ལམ་གྱི་ལེའུ་སྟེ་ཉེར་གཅིག་པའོ། །ཞེས་གོང་མའི་ཞལ་ཐུན་གནང་སྲོལ་གྱི་རིམ་པའོ། །ཕྱོགས་དུས་རྒྱལ་བ་སྲས་བཅས་ཐམས་ཅད་དང་། །ཁྱད་པར་དཔལ་ལྡན་འབྲུག་པ་ཡབ་སྲས་ཀྱིས། །བསྟན་འགྲོའི་དོན་དུ་སྨོན་ལམ་གང་བཏབ་པ། །དེ་རྣམས་ཐམས་ཅད་བདག་གིས་འགྲུབ་པར་ཤོག །བཀྲ་ཤིས་ནི། དཀར་བརྒྱུད་བླ་མ་རྣམས་ཀྱིས་བཀྲ་ཤིས་ཤོག །ཡི་དམ་ལྷ་ཚོགས་རྣམས་ཀྱིས༴། །དཔའ་བོ་མཁའ་འགྲོ་རྣམས་ཀྱིས༴། །ཆོས་སྐྱོང་སྲུང་མ་རྣམས་ཀྱིས༴། །མི་འགྱུར་ལྷུན་པོ་སྐུ་ཡི༴། །ཡན་ལག་དྲུག་ཅུ་གསུང་གི༴། །མཐའ་བྲལ་འཁྲུལ་མེད་ཐུགས་ཀྱིས། རྒྱལ་བའི་སྐུ་གསུང་ཐུགས་ཀྱིས་བཀྲ་ཤིས་ཤོག །སྟོན་པ་འཇིག་རྟེན་ཁམས་སུ་བྱོན་པ་དང་། །བསྟན་པ་ཉི་འོད་བཞིན་དུ་གསལ་བ་དང་། །བསྟན་འཛིན་དཔོན་སློབ་ཤིན་ཏུ་མཐུན་པ་ཡིས། །བསྟན་པ་ཡུན་རིང་གནས་པའི་བཀྲ་ཤིས་ཤོག། །ཅེས་པ་འདིའང་དཔལ་འབྲུག་པ་ཡབ་སྲས་རྣམས་ཀྱིས་མཛད་པའི་ཆོས་སྐྱོང་གི་གསོལ་ཁ་བསྡུས་པ་རྣམས་ཤཱཀྱའི་དགེ་སློང་བསྟན་འཛིན་དོན་ཀུན་གྲུབ་པའི་སྡེས་ཕྱོགས་གཅིག་ཏུ་བསྡེབས་ཏེ་བཀླག་ཆོག་ཏུ་བཀོད་པ་དགེའོ།། །།