སྐད་སྒྱུར
སྐད་སྒྱུར་སློབ་སྦྱོང་།
༡༽ སྐད་སྒྱུར་ངོ་སྤྲོད། - ད་རེས་ནངས་པ་བརྡ་དོན་རྒྱུད་འབྲེལ་དང་ འཕྲུལ་རིགས་ཡར་རྒྱས་འགྱོ་བའི་གནས་རིམ་ནང་ སྐད་རིགས་མ་འདྲཝ་ཚུ་གི་བར་ན་ འབྲེལ་བ་ཡར་དྲག་གཏང་ཐབས་ལུ་ སྐད་སྒྱུར་འདི་ལག་ཆ་གཙོབོ་ཅིག་ཨིན། - སྐད་སྒྱུར་པ་ལུ་ལྷབ་ཡོད་པའི་ རིག་གཞུང་དང་ ལག་ལེན་གྱི་རིག་རྩལ་རྐྱངམ་ཅིག་གིས་མ་དོ་བར་ གནས་སྟངས་དང་བསྟུན་ཏེ་ སྐད་སྒྱུར་འབད་ཚུགས་པའི་ རིག་རྩལ་དང་ ལྕོགས་གྲུབ་དགོཔ་ཁག་ཆེ།༼ཤ་བཱ་ལི་ ༡༩༩༧༽ - སྐད་སྒྱུར་པའི་ལྕོགས་གྲུབ་འདི་ གནས་སྟངས་དང་མཐུནམ་སྦེ་ བཟོ་དགོ་པའི་ཁར་ མནོ་བསམ་གཏང་ཐངས་དང་ གོ་བརྡ་སྤྲོད་ཚུགས་པའི་ ལྕོགས་གྲུབ་གོང་འཕེལ་གཏང་དགོཔ་ཁག་ཆེ། ༼ཤ་བཱ་ལི ༡༩༩༧༽ - སྐད་སྒྱུར་པ་ཚུ་གིས་ སྒྱུར་བྱའི་སྐད་ཡིག་གི་ལམ་སྲོལ་དང་དོན་དག་ དེ་ལས་ སྐད་ཡིག་འདི་ནང་གི་ཁྱད་བཅུད་ཚུ་ མ་འཛོལ་བར་ སྐད་ཡིག་གཞན་ཅིག་ནང་ལུ་ གོ་བརྡ་སྤྲོད་མི་གི་ངོ་ཚབ་གལ་ཅན་ཅིག་ཨིན།༼ཨ་ཛབ་དྲཕ་ཏྲ་རེ ༡༩༩༦༽ - སྐད་སྒྱུར་པ་ཚུ་གིས་ སྐད་ཡིག་རྒྱུན་འཛིན་འབད་ནི་དང་ ལམ་སྲོལ་རྒྱ་བསྐྱེད་གཏང་ནི་ནང་ ཞབས་ཏོག་ཞུ་ཚུགས།༼ཨ་ཛབ་དྲཕ་ཏྲ་རེ་ ༡༩༩༦༽
༢༽ སྐད་སྒྱུར་ངེས་ཚིག། - སྐད་སྒྱུར་ཟེར་མི་འདི་ སྐད་ཡིག་ཅིག་ནང་ཡོད་མིའི་ཡིག་སྦྱོར་གྱི་བཀོད་པ་ཅིག་ དེ་དང་ དོ་མཉམ་གྱི་སྐད་ཡིག་གཞན་ཅིག་གི་ ཡིག་སྦྱོར་གྱི་བཀོད་ཡིག་ནང་ལུ་ བསྒྱུར་བཅོས་འབད་མི་འདི་ལུ་ སྐད་སྒྱུར་ཟེརཝ་ཨིན། ༼ཀེཏྲེ་ཕོདྲི ༡༩༦༥༽ - སྐད་སྒྱུར་གྱི་ཟེར་མི་འདི་ ངག་ཐོག་གི་བཤད་པ་ སྐད་ཡིག་གཞན་ཅིག་ནང་ཡོད་མིའི་མནོ་དོན་ཚུ་ དེ་དང་ དོ་མཉམ་གྱི་སྐད་ཡིག་ཅིག་ནང་ སྒྱུར་ཚུགས་མི་ལུ་ སྐད་སྒྱུར་ཟེར་སླབ་ཨིན།
༼ནའི་དྲ་དང་ཏྲ་བར་ ༡༩༦༩༽ _ འཛམ་གླིང་ནང་ མི་དང་མི་གི་བར་ན་ ཡི་གུ་དང་རི་མོའི་བར་ན་ བརྗོད་དོན་ག་ཅི་རང་ཨིན་རུང་ སྐད་ཡིག་ཅིག་གི་ནང་ལསཅིག་ལུ་བསྒྱུར་ཏེ་སླབ་མི་ལུ་ སྐད་སྒྱུར་ཟེར་སླབ་ཨིན། _ འབྲུག་རྒྱལ་ཁབ་ནང་ སྐད་ཡིག་ཅིག་ལས་ སྐད་ཡིག་གཞན་ནང་ བསྒྱུར་མི་ལུ་སྐད་སྒྱུར་དང་ སྒྲ་སྒྱུར་ ཡིག་སྒྱུར་ཟེར་སླབ་སྲོལ་པའི་ཁར་ ཁ་སྐད་ཅིག་ལས་ ཁ་སྐད་གཞན་མི་ཅིག་ནང་བསྒྱུར་ཏེ་ སླབ་མི་ལུ་ དོར་ཁ་བསྒྱུར་ཟེར་ཡང་སླབ་ཨིན། ༣༽ དགོས་དོན། - འཛམ་གླིང་གི་མཁས་པ་ཚུ་གིསསྐད་རིགས་སོ་སོ་ནང་བརྩམས་ཏེ་ཡོད་པའི་རྩོམ་རིག་དང་ ཤེས་བྱའི་ཡོན་ཏན་ཚུ་ལུ་ སྦྱང་བརྩོན་འབད་དེ་ ཡོན་ཏན་ཅན་བཟོ་ནིའི་ཐབས་ལམ་ངོ་མ་ཅིག་ སྐད་སྒྱུར་གྱི་ལཱ་འདི་ཨིན། - ཕྱི་ནང་གི་ཤེས་བྱའི་རིག་པ་ག་ར་ ཤེས་ཚུགསཔ་བཟོ་ཐབས་ལུ་ སྐད་སྒྱུར་གྱི་རིག་རྩལ་ལུ་སྦྱང་བརྩོན་འབད་དགོཔ་ཁག་ཆེ། ༣༽ མཚན་ཉིད། - སྐད་སྒྱུར་པའི་ལཱ་འགན་ངོ་མ་འདི་རང་ བསྒྱུར་བྱ་སྐད་ཡིག་གི་གོ་དོན་ཚུ་ མ་འཛོལ་བར་ སྒྱུར་བྱེད་སྐད་ཡིག་ནང་ལུ་ བསྒྱུར་ནི་འདི་ཨིནམ་དང་ སྐད་སྒྱུར་པ་གིས་བསྒྱུར་ཡོད་པའི་ཡིག་ཆ་འདི་གིས་ བསྒྱུར་བྱའི་སྐད་ཡིག་ནང་ལུ་ཡོད་པའི་ གནད་དོན་ཚུ་མ་འཛོལ་བར་ གོ་བརྡ་སྤྲོད་ཚུགས་མི་ཅིག་དགོ།
ཐུན་ཚན་གཉིས་པ། ༡༽ སྐད་སྒྱུར་གྱི་དོན་ལུ་སྔ་གོང་གི་གྲ་སྒྲིག་དང་ཕན་ཐབས། - སྐད་སྒྱུར་འབད་སའི་ས་ཁོངས་ཙ་ཏོག་ཏོ་ཅིག་དགོ། - སྐད་སྒྱུར་གྱི་ལཱ་འདི་ ལཱ་གཞན་དང་གཅིག་ཁར་ སླ་བསྲེ་རྐྱབ་སྟེ་ འབད་ནི་མི་འོང་། - སྐད་སྒྱུར་འབད་བའི་སྐབས་ལུ་ ལུས་སེམས་བདེ་ཏོག་ཏོ་དགོ། - སྐད་སྒྱུར་གྱི་གནད་དོན་དང་འཁྲིལ་བའི་ རྒྱབ་རྟེན་དཔེ་དེབ་དང་ ཡིག་ཆ་ཚུ་ཚང་དགོ། - བསྒྱུར་བྱ་དང་སྒྱུར་བྱེད་སྐད་ཡིག་གི་ཚིག་མཛོད་ སྤྱིར་བཏང་དང་དམིགས་བསལ་ཁྱད་རིག་ཚིག་མཛོད་ཚུ་ག་དེ་མང་མང་དགོ། - རང་ལུ་དོགས་པ་འཆརཝ་ད་ དྲི་གཏུགས་འབད་སའི་མི་ རབ་བྱུང་པ་ཅིན་བསྒྱུར་བྱའི་ཡིག་ཆ་རྩོམ་པ་པོ་དང་ གཞུང་འབྲེལ་ཡིག་ཆ་ཨིན་པ་ཅིན་ དེའི་སྐོར་ལས་ ཁུངས་ཆོད་པའི་མཁས་པ་དང་ ཉམས་མྱོང་ཅན་ཚུ་དགོ། - ཤོག་ཀུ། སྣག་རྩི། གློག་རིག་ ལ་སོགས་པ་ཚུ་ རང་གི་བློ་དང་བསྟུན་དགོ། ༢༽ སྐད་སྒྱུར་གྱི་དབྱེ་བ། ཀ༽ སྐད་སྒྱུར་ལཱ་ཁག་གི་རིགས། - ཆོས་ཀྱི་ལྟ་བ་དང་འབྲེལ་བའི་སྐད་སྒྱུར། - ཁྲིམས་འབྲེལ་ཡིག་ཆའི་རིགས་ཀྱི་སྐད་སྒྱུར། - གྲོས་ཆོད་དང་ཁས་བླངས་ཡིག་ཆའི་རིགས་ཀྱི་སྐད་སྒྱུར། - འཆར་གཞི་དང་ལས་འགུལ་ཡིག་ཆ་རིགས། - སྙན་རྩོམ་སྐད་སྒྱུར། - རྒྱལ་རབས་དང་ཆོས་འབྱུང་། - རྣམ་མཐར་དང་ སྲུང་དང་གཏམ་རྒྱུད། ༢༽ སྐད་སྒྱུར་འཇམ་སངམ་རིགས། - ཞུ་ཡིག་དང་གཏང་ཡིག། - སྙན་ཞུ་དང་གྲོས་གཞི་ལས་རིམ། - གསུང་བཤད་དང་ཁྱབ་བསྒྲགས་ གསལ་བསྒྲགས། ༣༽ འབྲི་རྩོམ་གྱི་རིགས། - འགྲེལ་བཤད་འབྲི་རྩོམ། - ལོ་རྒྱུས་འབྲི་རྩོམ། - རྒྱུད་སྐུལ་འབྲི་རྩོམ། - ཁུངས་གཐུངས་འབྲི་རྩོམ། - རྒྱས་བཤད་འབྲི་རྩོམ། - རྩོད་འགྲན་འབྲི་རྩོམ། - དབྱེ་དཔྱད་འབྲི་རྩོམ། ཐུན་ཚན་གསུམ་པ། ༡༽ སྐད་སྒྱུར་འབད་ཐངས་དང་འཁྲིལ་བའི་དབྱེ་བ། - ཚིག་སྒྱུར། - དོན་སྒྱུར། - དཀྲུགས་སྒྱུར། - ཐད་སྒྱུར། - སྒྲ་སྒྱུར། - སྡེབ་སྒྱུར། ༢༽ སྐད་སྒྱུར་གྱི་དཀའ་ངལ་དང་ དཀའ་ངལ་བསལ་ཐབས། - བསྒྱུར་བྱའི་ཡིག་ཆ་འདི་ མཐའ་དཔྱད་ཡིག་ཆ་ཅིག་མེན་པར་ སྐད་སྒྱུར་རྐྱབ་པའི་ནམ་དུས་ལུ་རང་ བསྒྱུར་གཏང་ནི། - བསྒྱུར་བྱའི་ཡིག་ཆ་འདི་ ལེགས་ཤོམ་སྦེ་ལྷག་མ་ཚུགས་པའི་ ཡིག་ཆ། - ཡིག་སྡེབ་དང་བརྡ་སྦྱོར་ལ་སོགས་པ་ འཛོལ་ཡོད་པའི་ཡིག་ཆ། - དོན་ཚན་ཆ་མ་ཚང་པའི་ཡིག་ཆ། - ལུང་ཕྱོགས་དང་གཡུས་སྒོ་སོ་སོའི་ མིང་ཚིག་ལག་ལེན་འཐབ་ཡོད་པའི་ཡིག་ཆ། - འགྲེལ་བཤད་མེད་པའི་ བསྡུ་ཡིག་ལག་ལེན་འཐབ་ཡོད་པའི་ཡིག་ཆ། - ཚུལ་མིན་གྱི་མིང་ཚིག་ལག་ལེན་འཐབ་ཡོད་པའི་ཡིག་ཆ། - ལམ་སྲོལ་དང་འབྲེལ་བའི་གནས་སྟངས་ མིང་ཚིག་མང་རབས་ཅིག་ཚུད་ཡོད་པའི་ཡིག་ཆ། ༣༽ སྐད་སྒྱུར་རྐྱབ་ཐངས། - སྐད་སྒྱུར་གྱི་སྐབས་ལུ་ གོ་བ་མ་འཛོལ་བར་བསྒྱུར་དགོཔ། - བསྒྱུར་བྱ་དང་ སྒྱུར་བྱེད་ སྐད་ཡིག་གཉིས་ཀྱི་ བརྡ་སྦྱོར་ལམ་ལུགས། - ཚིག་སྡེ། - བསྒྱུར་བྱ་དང་སྒྱུར་བྱེད་གཉིས་ཀྱི་ རིག་གཞུང་ལུ་ ལྕོགས་གྲུབ་ཅན་ཅིག་དགོ། - ལོ་ཀཱ་ལའི་ཟེ་ཤཱན། - གཅིག་མཚུངས་མེད་པའི་དཀའ་ངལ། - ལམ་སྲོལ་དང་འབྲེལ་པའི་དཀའ་ངལ་དང་ བསལ་ཐབས། - དཔྱེ་གཏམ་སྐད་སྒྱུར་རྐྱབ་ཐངས། - རྗོད་བྱེད་ཚིག་གི་ལམ་སྲོལ་དང་འབྲེལ་བའི་ སྐད་སྒྱུར། - དོ་མཉམ་མིང་ཚིག་ དཀའ་ངལ་བསལ་ཐབས། - མིང་ཚིག་ཚུ་གི་གོ་དོན་དང་འཁྲིལ་ཏེ་ སྐད་སྒྱུར་རྐྱབ་དགོཔ། - ལམ་སྲོལ་དང་འབྲེལ་བའི་ མིང་ཚིག་སྐད་སྒྱུར། - སྐད་སྒྱུར་གོ་རིམ་སེམས་ཁར་བཞག་དགོཔ། - མིང་ཚིག་གསར་བཟོ། - སྐད་ཡིག་དང་འབྲེལ་བའི་ དཀའ་ངལ་བསལ་ཐབས། - རྩོམ་རིག་དང་འབྲེལ་བའི་དཀའ་ངལ་བསལ་ཐབས། - སྐད་སྒྱུར་གྱི་ལམ་ལུགས་ཤེས་དགོཔ།
ཐུན་མཚན་བཞི་པ། ༡༽ སྐད་སྒྱུར་ལུ་མཁོ་བའི་བསླབ་བྱ། ༢༽ སྡེ་ཚན་ནང་ སྒྲ་སྒྱུར་ དོན་སྒྱུར་ སྡེབ་སྒྱུར་སོགས་ཀྱི་སྐོར་ལས་ སྦྱོང་ལཱ་འབད་ནི། ༣༽ སྡེ་ཚན་ནང་འབད་དི་ཡོད་མིའི་སྦྱོང་ལཱ་སྐོར་ གྲོས་བསྟུན་འབད་ནི།
རིག་གནས་སྤྱིའི་རྣམ་གཞག
སྒྲ་རིག་པ་ཞེས་པ་ནི། བརྗོད་བྱའི་དོན་མཐའ་དག་གི་མིང་ཚིག་བརྗོད་གཞི་རྣམས་གཏན་ལ་ཕབ་ནས་ཚིག་སྦྱོར་ལ་འཁྲུལ་པ་ཚར་གཅོད་པའི་སྒོ་ནས་གང་ལ་ཅི་དགོས་པ་ཇི་མ་ཇི་བཞིན་དུ་ལུང་སྟོན་པའམ་བརྡ་སྤྲོད་པར་བྱེད་པའི་རིག་པ་ཡིན། བརྡ་སྤྲོད་པའི་བསྟན་བཅོས་ནི་ཡི་གེ་ཡོད་པའི་མི་རིགས་གང་འདྲ་ཡིན་རུང་རང་རང་སོ་སོའི་སྐད་དང་མཐུན་པའི་སྒྲ་རིག་པའི་བསྟན་བཅོས་ཡོད་པ་ཡིན། བརྡ་སྤྲོད་རིག་པའི་བསྟན་བཅོས་ལ། སྒྲ་ཀཱ་ལ་པ་དང༌། ཙནྡྲ་པ། པཱ་ཎི་བ། དབྱངས་ཅན་མ་སྟེ་བརྡ་སྤྲོད་པའི་གཞུང་ལུགས་མང་དུ་ཡོད་ཀྱང༌། ཀཱ་ཙན་དབྱངས་གསུམ་གྲགས་ཆེ། སྒྲའི་བསྟན་བཅོས་ཐོག་མར་བྱུང་བའི་ལོ་རྒྱུས་ནི། སྔོན་སུམ་ཅུ་རྩ་གསུམ་དུ་བྲམ་ཟེ་སརྦ་ཛྙཱ་ཞེས་པས་ལྷའི་དབང་པོ་བརྒྱ་བྱིན་ལ་བསླབས། བརྒྱ་བྱིན་གྱིས་དྲང་སྲོང་ཕུར་བུ་ལ་བསླབས། དེ་ལས་འཛམ་བུ་གླིང་དུ་དར་བར་གྲགས།
ཚད་མ་རིག་ཞེས་པ་ནི། མངོན་སུམ་དང་རྗེས་དཔག་ཚད་མ་གཉིས་ཀྱིས་གཞལ་ཏེ་རང་གཞན་གྱི་རྨོངས་པ་དང་འཁྲུལ་པ་ཚར་བཅད་ནས་དངོས་པོ་ཆེ་ཕྲ་སོ་སོའི་ངོ་བོའམ་ཡིན་ལུགས་གཏན་ལ་འབེབས་བྱེད་ཀྱི་རིག་པ་ཡིན། ཚད་མ་རིག་པ་ལ་ཕྱི་རོལ་པའི་གྲུབ་མཐའི་ལུགས་ཀྱི་བསྟན་བཅོས་ཀྱང་མང་ཞིང༌། ནང་པ་ལ་སློབ་དཔོན་ཕྱོགས་ཀྱི་གླང་པོས་མཛད་པའི་ཚད་མ་ཀུན་བཏུས་དང༌། དེའི་འགྲེལ་པ་སློབ་དཔོན་ཆོས་ཀྱི་གྲགས་པས་མཛད་པའི་ཚད་མ་སྡེ་བདུན་སོགས་རྒྱ་གཞུང་དང༌། བོད་དུའང་ས་པན་གྱིས་མཛད་པའི་ཚད་མ་རིགས་གཏེར་དང༌། མཁས་གྲུབ་རྗེས་མཛད་པའི་ཚད་མ་སྡེ་བདུན་ཡིད་ཀྱི་མུན་སེལ། མི་ཕས་པས་མཛད་པའི་ལེགས་བཤད་སྣང་བའི་གཏེར་སོགས་མང་དུ་མཆིས།
བཟོ་རིག་པ་ཞེས་པ་ནི། བློ་རིག་པ་དང་ལག་རྩལ་སྤྱད་ནས་མཁོ་རྒུ་དངོས་པོའི་དཔལ་ཡོན་སྤེལ་བར་བྱེད་པའི་རིག་པ་ཡིན། དེའང་བདེ་བར་གཤེགས་པའི་སྐུ་བརྙན་འབུར་དུ་ཐོན་པ་དང་བྲིས་མ་སོགས་གཟུགས་བརྙན་གྱི་རིགས་དང༌། གཙུག་ལག་ཁང་སོགས་ཁྱིམ། ཟས་གོས་བྱེ་བྲག་ཅི་རིགས་པ་སོགས་ལུས་ཀྱིས་འབད་པས་བཟོ་སྐྲུན་བྱེད་པ་ལུས་བཟོ་དང༌། བཀའ་དང་བསྟན་བཅོས་དང༌། ཡི་གེའི་མིང་ཚིག་བརྗོད་པ། གདངས་དང་དབྱངས་སོགས་ངག་གི་བྱེད་ལས་ལས་ཐོན་དགོས་པ་ངག་བཟོ་དང༌། ཐོས་བསམ་སྒོམ་གསུམ་དང༌། ས་གཞི་བརྟག་པ་དང་སྐྱེས་པ་བུད་མེད་བརྟག་པ་སོགས་ བློ་གྲོས་ཀྱི་རྩལ་གྱིས་རྟོགས་པར་བྱེད་པ་ཡིད་བཟོ་བཅས་གསུམ་དུ་བཤད། བཟོ་རིག་གི་བསྟན་བཅོས་ལ་ འཇིག་རྟེན་ལུགས་ཀྱི་བསྟན་བཅོས་ཤེས་རབ་བརྒྱ་པ་དང༌། སྐྱེ་བོ་གསོ་ཐིག་སོགས་ཀྱི་བསྟན་བཅོས་སོགས་མང་དུ་ཡོད།
གསོ་བ་རིག་པ་ཞེས་པ་ནི། སྐྱེ་འགྲོའི་སྒྱུ་ལུས་ཀྱི་རྟེན་ལ་ཉེ་བར་འཚེ་བའི་ནད་རིགས་བཞི་བརྒྱ་རྩ་བཞིར་གྲགས་པ་དེ་དག་འགོག་སེལ་དང་འབྲལ་ཡུན་དུ་འཚོ་བའི་ཐབས་སམ་རིག་པ་ཡིན། གསོ་བ་རིག་པའི་བསྟན་བཅོས་ལ་ སློབ་དཔོན་ཀླུ་སྒྲུབ་ཀྱིས་མཛད་པའི་སྡེབ་སྦྱོར་བརྒྱ་པ། སློབ་དཔོན་དཔའ་བོས་མཛད་པའི་སྨན་དཔྱད་ཡན་ལག་བརྒྱད་པའི་སྙིང་པོ་བསྡུས་པ་རྩ་འགྲེལ་བཅས་རྒྱ་གར་གྱི་སྨན་གཞུང་དང༌། བོད་དུའང་གཡུ་ཐོག་གསར་རྙིང་ལས་དར་བ་བོད་ཀྱི་སྨན་གཞུང་ཇི་སྙེད་པ་ལས། རྩ་རྒྱུད། བཤད་རྒྱུད། མན་ངག་རྒྱུད། ཕྱི་མའི་རྒྱུད་སོགས་མང་དུ་ཡོད།
ནང་དོན་རིག་པ་ཞེས་པ་ནི། མི་རྣམས་ཀྱི་ཉོན་མངོས་པ་དུག་གསུམ་སེལ་ནས་རང་གཞན་གྱི་གཏན་བདེ་སྒྲུབ་ཐབས་ཐུན་མངོ་མ་ཡིན་པ་ལམ་བསླབ་པ་གསུམ་དང༌། ལུང་སྡེ་སྣོད་གསུམ་དུ་གྲགས་པ་ནང་པ་སངས་རྒྱས་པའི་ཆོས་ལུགས་ཀྱི་རིག་པ་ཡིན། དེ་ལ་ལུང་སྡེ་སྣོད་གསུམ་དང་སྔགས་རྒྱུད་སྡེ་བཞི་སོགས་སངས་ཀྱི་བཀའ་དང༌། བསྟན་བཅོས་ལ་ཡང་བཀའ་འཁོར་ལོ་གསུམ་གྱི་དགོངས་འགྲེལ་དུ་གྱུར་པའི་བསྟན་བཅོས་བྱམས་ཆོས་སྡེ་ལྔ་དང་དབུ་མ་རིགས་ཚོགས་ལྔ་སོགས་རྒྱ་གཞུང་དང༌། བོད་དུའང་མཁས་གྲུབ་རྣམས་ཀྱིས་མཛད་པའི་བསྟན་བཅོས་མང་དུ་མཆིས།
རིག་གནས་ཆུང་བ་ལྔ་ནི། མངོན་བརྗོད་ནི་ འཁོར་འདས་ཀྱི་ཆོས་རྣམས་ལ་འདྲ་བ་དང༌། འབྲེལ་བ། ལྡོག་པ་རྒྱུ་མཚན་དུ་བྱས་ཏེ་ཐ་སྙད་བཏགས་པ་དོན་གཅིག་ལ་མིང་མང་པོས་མངོན་པར་བརྗོད་པའམ། མིང་གཅིག་ལ་དོན་མང་པོར་འཇུག་ཚུལ་གྱི་རིག་པ་ཡིན། དེ་སྟོན་པའི་གཞུང་ནི་པཎྜི་ཏ་འཆི་མེད་སེངྒེས་མཛད་པའི་མངོན་བརྗོད་འཆི་མེད་མཛོད་དང༌། དེའི་འགྲེལ་པ་རབ་འབྱོར་ཟླ་བས་མཛད་པ་འདོད་འཇོའི་བ་མོ་སོགས་རྒྱ་གཞུང་དང༌། བོད་ཀྱི་མཁས་པ་རིན་སྤུངས་ངག་དབང་འཇིག་རྟེན་གྲགས་པས་མཛད་པའི་མཁས་པའི་རྣ་རྒྱན་སོགས་མང༌།
སྡེབ་སྦྱོར་ནི་ ལྕི་བ་དང་ཡང་བའི་ཡི་གེ་སྒྱུར་བ་དང་སྤེལ་བའི་སྒོ་ནས་ཚིག་གི་སྦྱོར་བ་ལེགས་པར་སྒྲིག་པའི་ཐབས་ཡིན། དེའི་གཞུང་ནི་རྒྱ་གར་པཎྜི་ཏ་ཨ་ཀ་ར་ཤཱནྟིས་མཛད་པའི་སྡེབ་སྦྱོར་རིག་ཆེན་ཕྲེང་བ་དང༌། སློབ་དཔོན་རིན་ཆེན་འབྱུང་གནས། དྲང་སྲོང་དམར་སེར་དང་རྒྱལ་བ་ལྷས་མཛད་པའི་སྡེབ་གྱི་གཞུང་མང་པོ་ཡོད། སྤྱིར་སྡེབ་སྦྱོར་ལ་གཉིས་སུ་ངེས་ཏེ། ཡི་གེ་བགྲང་བ་པྲྀཏྟ་དང༌། ཕྱི་མ་བགྲང་བ་ཛ་ཏི་ཞེས་པའི་སྡེབ་སྦྱོར་རིགས་གཉིས་ཡོད། དེ་ཡང་ལྕི་ཡང་ལས་ཕྱེ་བས་བོད་ཡིག་ལ་གཙོ་མི་ཆེའོ།།
ཟློས་གར་ནི་ འཁྲབ་བྱའི་ནང་དོན་མི་རིགས་གང་ཞིག་གི་ཆས་སུ་ཞུགས་པ་དེའི་སྐད་དུ་སྐྱེ་བོ་རྣམས་ཀྱི་བདེ་སྡུག་དང༌། མཛའ་བརྩེའམ། དགའ་ཁྲོ། བྱམས་སྡང་སོགས་ནང་བློའི་འགྱུར་བ་རྣམས་ཕྱི་ལུས་ཀྱི་ཉམས་ཐོག་ནས་མཚོན་པར་བྱེད་པའི་ཐབས་ཡིན། དེ་ལ་སྤྱིར་བཏང་དུ་བཤད་ན་མདོ་འཛིན་པ་དང༌། རོལ་མོ་བ་དང༌། ཆས་ཞུགས་པ་དང༌། བཞད་གད་མཁན་དང༌། ཟློས་གར་བ་བཅས་ཡན་ལག་ལྔ་ཚང་དགོས་ཤིང༌། ནང་དོན་ནི་དུས་སྐབས་སོ་སོའི་སྤྱི་ཚོགས་འཕེལ་རྒྱས་ཀྱི་དགོས་མཁོ་དང་བསྟུན་ནས་འདེམས་སྒྲིག་བྱེད་པ་ལས་ངེས་པ་མེད། ཟློས་གར་གྱི་བསྟན་བཅོས་ལ་སླབ་དཔོན་ཙནྡྲ་གོ་མིས་མཛད་པའི་འཇིག་རྟེན་ཀུན་ཏུ་དགའ་བའི་བསྟན་བཅོས། དཔལ་དགའ་བའི་ལྷའི་ཀླུ་ཀུན་ཏུ་དགའ་བའི་བསྟན་བཅོས། མགོན་པོ་ཀླུ་སྒྲུབ་ཀྱིས་མཛད་པའི་གསེར་འགྱུར་རྩིའི་བསྟན་བཅོས་སོགས་ཡོད། དབྱེ་གཞི་སྒྲའི་སྟེང་དུ། དབྱེ་ངོ་སྙན་ངག མངོན་བརྗོད། སྡེབ་སྦྱོར། ཟློས་གར་བཞི་བསྣན་པས་རིག་པའི་གནས་ཆུང་ལྔའམ། ཐ་སྙད་རིག་པའི་གནས་ལྔ་ར་ཡང་གྲགས། དེ་ལྔ་ལ་དགོས་པའི་དབང་གིས། སྒྲ་ཤེས་ན་དོན་ལ་མི་རྨོངས། སྙན་ངག་ཤེས་ན་ཚིག་རྒྱན་ལ་མི་རྨོངས། མངོན་བརྗོད་ཤེས་ན་མིང་ལ་མི་རྨོངས། སྡེབ་སྦྱོར་ཤེས་ན་ཚིགས་བཅད་ལ་མི་རྨོངས། ཟློས་གར་ཤེས་ན་སྐད་རིགས་ལ་མི་རྨོངས་ཞེས་སྔ་རབས་པ་རྣམས་ལ་གྲགས།
སྐར་རྩིས་ནི་ གྲངས་ཀྱི་རིག་པས་གཞལ་ཏེ་འཁོར་འདས་ཀྱི་ཆོས་ལྐོག་སུ་གྱུར་པ་མཐའ་ཀླས་པ་ཞིག་ངོ་མཚར་ལྡན་པའི་སྒོ་ནས་སྟོན་པའི་རིག་པ་ཡིན། དེ་ལ་བརྟེན་ནས་སྐར་རྩིས་ཤེས་ན་གྲངས་ལ་རྨོངས་ཞེས་གྲགས། དེའི་འབྱུང་ཁུངས་ནི་ སྟོན་པ་ཤཱཀྱ་ཐུབ་པས་བྲམ་ཟེའི་སློབ་དཔོན་ཀུན་གྱི་བཤེས་གཉེན་གྱི་དྲུང་ནས་གསན་ཅིང༌། ཕྱིས་དཔལ་ལྡན་འབྲས་སྤུངས་སུ་ཤམ་བྷ་ལའི་ཆོས་རྒྱལ་ཟླ་བ་བཟང་པོ་འཁོར་ཚོགས་དང་བཅས་པ་ལ་དུས་འཁོར་གྱི་རྩ་རྒྱུད་སྟོང་ཕྲག་བཅུ་གཉིས་སོགས་མྱ་ངན་ལས་འདའ་ཁའི་ཞལ་ཆེམས་ཀྱི་ཚུལ་དུ་གསུངས་ཞིང༌། ལྕགས་སྦྲུལ་ལོ་ལ་ཟླ་བཟང་གིས་རྩ་རྒྱུད་བསྡུས་ཤིང་འགྲེལ་པ་མཛད། ཆུ་རྟ་ལོ་ལ་སྐལ་བ་དང་ལྡན་པ་རྣམས་ལ་བསྟན་ནས་རྩིས་གཞུང་དར་བ་དེ་བོད་དུ་དར་བར་གྲགས། སྐར་རྩིས་ལ་བྱེད་རྩིས་དང་གྲུབ་རྩིས་གཉིས་ཡོད། འདི་དག་གི་གཞུང་ཡང་ལོ་ཙཱ་བ་རྭ་འབྲོམ་ཤོང་གསུམ་གྱི་རིང་ལ་བོད་དུ་ཐོག་མར་འགྱུར་ཞིང༌། ཕྱིས་སུ་ཕུག་པ་ལྷུན་གྲུབ་རྒྱ་མཚོ་སོགས་རྒྱ་མཚོ་རྣམ་གསུམ་ནས་བཟུང་དར་རྒྱས་ཆེ་བ་བྱུང༌། སྡེ་སྲིད་སངས་རྒྱས་རྒྱ་མཚོས་མཛད་པའི་བཻ་དཀར་སོགས་བོད་དུའང་བསྟན་བཅོས་རྩིས་ཀྱི་གཞུང་ཤིན་ཏུ་མང་པོ་ཡོད།
སྙན་ངག་ནི་ བརྗོད་བྱ་གང་དང་གང་རྗོད་པར་བྱེད་པའི་ཚིག་ བཅད་ལྷུག་སྤེལ་གསུམ་གྱི་ལུས་མཛེས་ཤིང་སྙན་པ་དང༌། ཡང་ན་བརྗིད་ཅིང་ཉམས་ལྡན་བྱུང་ན་བློ་ལྡན་རྣམས་ཀྱི་ཡིད་འཕྲོག་པའི་གནས་སུ་འགྱུར་པའི་རིག་པ་ཡིན། དེ་བསྟན་པའི་གཞུང་ཡང་ རྒྱ་གར་དུ་དྲང་སྲང་རྒྱས་པའི་སྙན་ངག་བྷ་ར་ཏ། མེ་བཞིན་འཇུག་གི་བུ་མོའི་སྙན་ངག་བསྒོམ་པའི་ཆོས། དྲང་སྲོང་གྲོག་མཁར་བའི་སྙན་ངག་རཱ་མ་ཡ་ན། མརྐེ་ཎ་ཊའི་སྙན་ངག་ཁྱབ་འཇུག་གི་འཇུག་པ་བཅུ་སོགས་ཤོ་ལོ་ཀ་འབུམ་ཡོད་པ་དང༌། དེ་བཞིན་ནག་མོའི་ཁོལ་གྱི་སྙན་ངག་གཞོན་ནུ་འབྱུང་བ། རཱ་མ་ཤརྨའི་སྙན་ངག་གྷུ་ཝཾ་ཤ། སྙན་ངག་གི་བསྟན་བཅོས་དབྱངས་ཅན་མགུལ་རྒྱན་དང༌། སློབ་དཔོན་དབྱུག་པ་ཅན་གྱིས་མཛད་པའི་སྙན་ངག་གི་བསྟན་བཅོས་མེ་ལོང་མ་སོགས་མང་དུ་ཡོད། བོད་དུ་ཡང་ ལོ་ཙཱ་བ་ཤོང་སྟོན་རྡོ་རྗེ་རྒྱལ་མཚན་གྱིས་སྙན་ངག་མེ་ལོང་མ་ཐོག་མར་བསྒྱུར་ལས་བཟུང་ མཁས་གྲུབ་སྤྱི་དང་བྱེ་བྲག་གིས་མཛད་པའི་སྙན་ངག་གི་བསྟན་བཅོས་དབྱངས་ཅན་དགྱེས་པའི་རོལ་མཚོ། དབྱངས་ཅན་ངག་གི་རོལ་མཚོ། སྙན་ངག་དནྜའི་དགོངས་རྒྱན་སོགས་མང་དུ་མཆིས།
རིག་གནས་ཆུང་ལྔ་པོ་ རིག་པའི་གནས་ཆེན་ལྔའི་ནང་དུ་ཚུལ། ཤེས་བྱ་རིག་པའི་གནས་ཐམས་ཅད་རིག་པའི་གནས་ཆེན་ལྔའི་ནང་དུ་མ་འདུས་པ་མེད་པས། རིག་པའི་གནས་ཆུང་ལྔ་པོ་ཡང་རིག་པའི་གནས་ལྔའི་ཁོངས་སུ་འདུ་སྟེ། འདི་ཡང་ མངོན་བརྗོད། ཟློས་གར། སྐར་རྩིས། སྡེབ་སྦྱོར། སྙན་ངག་ལྔ་ཀ་ སྒྲ་རིག་པའི་ནང་དུ་འདུ། གཞན་ཡང་འདུལ་བ་ལུང་ལས་གསུངས་པའི་རིག་གནས་བཅོ་བརྒྱད་དང༌། སློབ་དཔོན་དབྱིག་གཉེན་གྱི་མཛོད་རང་འགྲེལ་ལས་གསུངས་པའི་རིག་པའི་གནས་བཅོ་བརྒྱད་ཡང་ཅི་རིགས་པར་རིག་པའི་གནས་ཆེན་ལྔའི་ནང་དུ་འདུ་བ་མ་ཚད། སྒྱུ་རྩལ་དྲུག་ཅུ་རྩ་བཞི་ལ་སོགས་པའང་རིག་གནས་ཆེ་བ་ལྔའི་ནང་དུ་འདུས་པར་ས་སྐྱ་པཎྜི་ཏའི་མཁས་པ་ལ་འཇུག་པའི་སྒོ་ལས་གསུངས།
སྤྱིར་རིག་པའི་གནས་ལྔ་སྦྱངས་དགོས་པའི་དགོས་པ་ནི། དེ་ཡང་མདོ་ལས། བྱང་ཆུབ་སེམས་དཔའ་རིག་པའི་དངོས་པོ་ལྔ་མ་བསླབས་ན་ནི་ནམ་དུ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐམས་ཅད་མཁྱེན་པའི་ཡེ་ཤེས་ཐོབ་པར་མི་ནུས་སོ།། དེ་བས་ན་བླ་ན་མེད་པའི་བྱང་ཆུབ་ཐོབ་པར་བྱ་བའི་ཕྱིར་རིག་པའི་དངོས་པོ་ལྔ་བསླབ་པར་བྱའོ།། ཞེས་དང༌། རྒྱས་ཚབ་བྱམས་པ་མགོན་པོས། རིག་པའི་གནས་ལྔ་དག་ལ་བརྩོན་པར་མ་བྱས་ན།། འཕགས་མཆོག་གིས་ཀྱང་ཐམས་ཅད་མཁྱེན་ཉིད་ཐོབ་མི་འགྱུར།། དེ་བས་གཞན་དག་ཚར་གཅད་རྗེས་སུ་གཟུང་ཕྱིར་དང༌།། བདག་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱ།། ཞེས་དང༌། ས་སྐྱ་པཎྜི་ཏས། རང་བློ་ཤེས་བྱའི་གནས་ལ་མ་སྦྱངས་ན།། ཐམས་ཅད་མཁྱེན་པ་ནམ་མཁའི་མཐའ་ལྟར་རིང༌།། དེ་ལྟར་དགོངས་ནས་རྒྱལ་དང་རྒྱལ་སྲས་ཀྱིས།། ཤེས་བྱའི་གནས་ཀུན་སྦྱངས་ཞེས་ལེགས་པར་གསུངས།། ཞེས་གསུངས་པ་ལྟར་ རིག་པའི་གནས་ལྔ་ལ་ཚུལ་བཞིན་དུ་མ་བསླབས་ན། འཕགས་པ་དག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པར་མི་འགྱུར་ལ། དེའི་ཕྱིར་སོ་སོ་སྐྱེ་བོ་རྣམས་ཀྱིས་ཤེས་བྱ་རིག་པའི་གནས་གཅིག་ཀྱང་མ་ལུས་པ་དེ་དང་དེ་ལ་ཐོག་མ་ཉིད་ནས་བརྩོན་པར་བྱ་དགོས་པས། རིག་པའི་གནས་ལྔ་པོ་ནི་རྣམ་པ་ཐམས་ཅད་མཁྱེན་པའི་གོ་འཕང་འཐོབ་པའི་རྒྱུའི་གཙོ་བོ་དང༌། རང་གཞན་གྱ་ིདོན་གཉིས་འབྱུང་བའི་གཞི། འཕྲལ་ཡུན་གྱི་ལེགས་པ་ཐམས་ཅད་ཀྱི་འབྱུང་ཁུངས་ཡིད་པས་ཐོག་མ་ཉིད་དུ་དེ་ལ་བརྟེན་དགོས་སོ།།
སྒོས་སུ་བརྡ་དང་ཐ་སྙད་རིག་པ་ནི་ཐོག་མ་ཉིད་འཇུག་ཅིང་བསླབ་པར་བྱ་དགོས་པའི་རྒྱུ་མཚན་ནི། སློབ་དཔོན་འཕགས་པ་ཀླུ་སྒྲུབ་ཀྱིས། ཐ་སྙད་ལ་ནི་མ་བརྟེན་པར།། དམ་པའི་དོན་ནི་བསྟན་མི་ནུས།། དམ་པའི་དོན་ནི་མ་རྟོགས་པར།། མྱ་ངན་འདས་པ་ཐོབ་མི་འགྱུར།། ཞེས་དོན་དམ་པའི་གནས་ལུགས་རྟོགས་པར་བྱེད་པའང་བརྡ་དང་ཐ་སྙད་ལ་བརྟེན་དགོས་ཤིང༌། དེ་ཡང་རྗོད་བྱེད་ཡང་དག་པ་ལ་བརྟེན་ནས་བརྗོད་བྱ་ཕྱིན་ཅི་མ་ལོག་པར་ཁོང་དུ་ཆུད་པར་བྱེད་དགོས་པས་ཐོག་མར་བརྡ་དང་ཐ་སྙད་རིག་པ་ལ་བསླབ་དགོས་སོ།།
སྙན་ངག་རིག་པའི་གཞུང་གི་ལོ་རྒྱུས་ལ། སྤྱིར་སྙན་ངག་གཞུང་མ་དར་བའི་གོང་སྙན་ངག་ཡོད་མེད་སྐོར། དེ་ཡང་ སྤྱིར་ སྙན་ངག་མཁན་ལ་ཅི་ཡང་རྒྱན།། ཞེས་གསུངས་པ་ལྟར་བརྗོད་བྱའི་དོན་ཆེ་ཕྲ་གང་ཞིག་ཡིག་རུང་རྗོད་བྱེད་ངག་གི་སྦྱོར་བ་ཐ་མལ་པ་ལས་ཁྱད་དུ་འཕགས་པ་ཞིག་ཡིན་ན་སྙན་ངག་ཡིན་པས་ཁྱབ་པས། འགྲོ་བ་མིའི་སྐད་རིགས་ཅིག་ཡོད་ཕྱིན་ཆད་ དེ་ལ་སྙན་ངག་འདི་རང་བཞིན་ཤུགས་ཀྱིས་ཡོད་པ་ཡིན། ཐ་ན་འཇིག་རྟེན་པ་ཕྱུགས་རྫི་རྣམས་ཀྱི་ངག་གཤིས་ལ་ཡང་ ཚིག་སྦྱོར་ཕུན་སུམ་ཚོགས་པའི་སྙན་ངག་འདི་རང་བཞིན་ལྷན་སྐྱེས་སུ་ཡོད། དེ་ཡང་གནའ་རབས་ཀྱི་ཡིག་རྙིང་དང་གླུ་བཞེས་ལ་སོགས་པ་ངག་གི་ཉམས་འགྱུར་ཕུན་སུམ་ཚོགས་པའི་སྙན་ཚིག་རིག་པའི་རྣམ་འགྱུར་སྣ་ཚོགས་པ་བསྒྱུར་ཏེ་བརྗོད་སྲོལ་ཡོད་པ་མཐོང་ཆོས་སུ་ཡིན།
རྒྱ་གར་འཕགས་པའི་ཡུལ་དུ་སྙན་ངག་གི་གཞུང་ཇི་ལྟར་བྱུང་བའི་ལོ་རྒྱུས་ནི། དེ་ཡང་སྔོན་རྒྱ་གར་དུ་སྙན་ངག་གི་བསྟན་བཅོས་བྷ་ར་ཏ་ཞེས་བྱ་བ་ཞིག་བརྩམས་པ་ཚོགས་བདག་གིས་ཡིན་མཁན་བྱས་ནས་བྲིས་པར་གྲགས་པའི་གཞུང་ཤོ་ལོ་ཀ་འབུམ་ལྷག་ཡོད་པ་དང༌། དྲང་སྲོང་མེ་བཞིན་འཇུག་གི་བུ་མོས་སྙན་ངག་རཱ་མ་ཡ་ན་ཞེས་པ་ཞིག་བརྩམས་པ་དེ་ནི་རྒྱལ་པོ་རཱ་མ་ན་དང་དེའི་བཙུན་པོ་རོལ་རྙེད་མའི་ལོ་རྒྱུས་སྙན་ངག་ཏུ་སྦྱར་བ་ཤོ་ལོ་ཀ་འབུམ་ཡོད་པ་ཞིག་དང༌། མརྐེ་ཎ་ཊ་ཡིས་བརྩམས་པའི་སྙན་ངག་གི་བསྟན་བཅོས་ཁྱབ་འཇུག་གི་འཇུག་པ་བཅུ་སོགས་གཙོ་བོར་སྟོན་པ་ཤོ་ལོ་ཀ་འབུམ་ལྷག་ཡོད་པ་ཞིག་དང༌། རཱ་མ་ཤརྨས་མཛད་པའི་སྙན་ངག་གི་བསྟན་བཅོས་ཤོ་ལོ་ཀ་སྟོང་ཕྲག་བརྒྱད་ཅུ་ཅན་དང༌། ནག་མོ་ཁོལ་གྱིས་མཛད་པའི་སྙན་ངག་གཞོན་ནུ་འབྱུང་བ་དང༌། གཞན་སྙན་ངག་གི་བསྟན་བཅོས་དབྱངས་ཅན་མགུལ་རྒྱན་སོགས་མང་པོ་ཡོད་ལ། དེ་དག་ལས་རཱ་མ་ཤརྨས་བརྩམས་པའི་གཞུང་དང༌། དབྱངས་ཅན་མགུལ་རྒྱན་གཉིས་གྲགས་ཆེ་བས་ཁྱབ་གདལ་ཆེ། ཕྱིས་སུ་སློབ་དཔོན་དཎྜིའམ་དབྱུག་པ་ཅན་གྱིས་སྔོན་གྱི་སྙན་ངག་གི་བསྟན་བཅོས་མང་པོའི་ཚིག་ཚོགས་ཆེ་བ་རྣམས་ཉུང་ངུར་བསྡུས། དེ་དག་ལས་ལེགས་པའི་ཚིག་སྦྱོར་མཚོན་པར་བྱས་པའི་སྟེང་དུ་བྷ་ར་ཏའི་སྦྱོར་བ་སོགས་ཡོན་ཏན་བཅུ་པོ་ཡང་བསྣན་ཏེ་རྒྱས་བསྡུས་ཤིན་ཏུ་འཚམ་པ། ཚིག་སྦྱོར་ལེགས་ཤིང་གསལ་བ། སྙན་ངག་མེ་ལོང་མ་ཞེས་བྱ་བ་ལེའུ་གསུམ་གྱི་རང་བཞིན་འདི་བརྩམས་པ་ནས་བཟུང༌། འདི་ཉིད་རྒྱ་གར་བ་ཐམས་ཅད་ཀྱིས་ཐུན་མངོ་བའི་གཞུང་དུ་འཛིན་པར་གྲགས།
བོད་དུ་སྙན་ངག་གི་གཞུང་དར་ཚུལ་ནི། དེ་ཡང་རབ་བྱུང་བཞི་པའི་སྔོན་བོད་དུ་སྙན་ངག་གི་གཞུང་མ་དར་ལ། ཕྱིས་རབ་བྱུང་བཞི་པའི་དུས་སུ་ས་སྐྱ་འགྲོ་མགོན་འཕགས་པའི་སྐུ་རིང་ལ་ལོ་ཙཱ་བ་ཤོང་སྟོན་རྡོ་རྗེ་རྒྱལ་མཚན་གྱིས་དཔལ་ས་སྐྱའི་གཙུག་ལག་ཁང་ཆེན་པོར་(སྤྱི་ལོ་༡༢༥༠ནས་༡༢༧༠ཙམ་གྱི་བར་ལ)སྙན་ངག་མེ་ལོང་འདི་ཐོག་མར་བསྒྱུར། དེ་རྗེས་དཔང་ལོ་ཙཱ་བ་བློ་གྲོས་བརྟན་པས་གོ་དཀའ་བའི་ཆ་ཤས་སུ་གྱུར་པ་རྣམས་དང༌། དོན་ཆེ་བ་རྣམས་ལ་འགྱུར་བཅོས་བྱས་ཤིང༌། དེ་རྗེས་སྙེ་ཐང་བློ་བརྟན་ཞི་བས་སླར་ཡང་འགྱུར་བཅོས་དང་འབྲེལ་མཆན་ཉན་གྱི་རྒྱུན་སྤེལ་བའི་བཀའ་དྲིན་གྱིས་བོད་ལྗོངས་སུ་ཆེ་ཆེར་དར། དེའི་རྗེས་སུའང་ཞ་ལུ་ལོ་ཙཱ་བ་ཆོས་སྐྱོང་བཟང་པོས་རྒྱ་འགྲེལ་གཉིས་ལ་གཏུགས་ནས་དག་བཅོས་དང་མཆན་འདེབས་མཛད། ཀརྨ་སི་ཏུ་བསྟན་པའི་ཉིན་བྱེད་ཀྱིས་ཀྱང་རྒྱ་དཔེ་དང་བསྡུར་ནས་འགྱུར་བཅོས་ལེགས་པར་མཛད་པའི་སྐད་གཉིས་ཤན་སྦྱར་མཛད། སྡེ་པ་རིན་སྤུངས་པའི་སྙན་འགྲེལ་འཇིགས་མེད་སེང་གེའི་ངོ་རོ། རྒྱལ་བ་ལྔ་པའི་དབྱངས་ཅན་དགྱེས་གླུ། བོད་མཁས་པའི་དཎྜིའི་དགོངས་རྒྱན། ཁམས་སྤྲུལ་བསྟན་འཛིན་ཆོས་ཀྱི་ཉི་མའི་དབྱངས་ཅན་ངག་གི་རོལ་མཚོ། འཇུ་མི་ཕམ་གྱི་དབྱངས་ཅན་དགྱེས་པའི་རོལ་མཚོ་སོགས་དང༌། ཙནྡན་ནགས་མོའི་ལྗོངས་འདིར་ཡང་ རྗེ་དགེ་འདུན་རིན་ཆེན་གྱིས་མཛད་པའི་སྙན་དཔེ། སློབ་དཔོན་ནོར་བུ་དབང་ཕྱུག་གིས་མཛད་པའི་སྙན་ཚིག་འགྲེལ་པ་དང་དཔེར་བརྗོད། གཞན་ཡང་མཁས་གྲུབ་རྣམས་ཀྱིས་མཛད་པའི་སྙན་འགྲེལ་དང་དཔེར་བརྗོད་གྲངས་ལས་འདས་སོ།།
སྙན་ཚིག་རིག་པ་སྦྱང་དགོས་པའི་ཁུངས་དོན། དེ་ཡང་ འཇིག་རྗེན་འདིར་མཁས་པ་པཎྜི་ཏ་ལས་ ཐ་ན་ཕྱུགས་རྫི་ཡན་ཆད་དུ་མེད་དུ་མི་རུང་པའི་ཁྱད་ཆོས་ མི་རྣམས་ཀྱི་ངག་གི་རྒྱན་ཆ་དང་འདྲ་བའི་སྙན་ངག་ནི། ནང་དོན་རིག་པའི་གསུང་རབ་ མདོ་སྔགས་རིག་གནས་དང་བཅས་པའི་བཀའ་དང་བསྟན་བཅོས་ཇི་སྙེད་ཅིག་ཡོད་པ་རྣམས་ ཕལ་ཆེར་སྙན་ངག་གི་ཚིག་སྦྱོར་གྱིས་བཅིངས་ཤིང༌། སྙན་ངག་མི་འཇུག་པ་མེད་པས་ལོ་རྒྱུས་དང་རྣམ་ཐར་དེབ་ཐེར་སོགས་ནའང་སྙན་ཚིག་གི་ལམ་ནས་ཆེད་དུ་བརྗོད་པ་དང༌། མ་མཐའ་འཕྲིན་ཡིག་ཙམ་ལའང་སྙན་ཚིག་གི་ཚིག་འདི་ལས་མ་འདས་པས། འདི་ནི་རིག་གནས་ཀུན་ལ་བལྟ་བའི་མིག་ཏུ་འགྱུར་པ་མ་ཟད། རང་ཉིད་ཀྱིས་སྐྱེ་བོ་མང་པོའི་ཁྲོད་དུ་རིག་པའི་གནས་ལས་བརྩམས་ཏེ་འཆད་རྩོད་རྩོམ་གསུམ་དང༌། གཞན་ལ་མཛུབ་ཁྲིད་བྱེད་པ་དང༌། གཞན་ཡང་གྲོགས་ཕན་ཚུན་འབེལ་གཏམ་གྱི་གླེང་མོལ་བྱེད་པ་ཚུན་ཆད་ཀྱི་སྐབས་སུའང༌། རང་ཚིག་སྔ་ཕྱི་མི་འགལ་བ་དང༌། ཚིག་དོན་གྱི་ཆ་སྐྱོན་མེད་མིང་འབྲེལ་ཆགས་པར་མ་ཟད། ཐ་ན་ཀུ་རེའམ་བཞད་གད་ཀྱི་གཏམ་དང་འབྲེལ་ཚེ་ཐོས་པ་ཙམ་གྱིས་དགོད་ཤོར་བ་དང༌། སྐྱེ་བོ་གཞན་ལ་བསྡིག་པའི་ཚིག་གམ་མཚང་འབྲུ་བ་ལ་སོགས་པའི་གཏམ་དང་འབྲེལ་ཚེ། གླེངས་པ་ཙམ་གྱིས་གཞན་ཡིད་སྤ་བཀོང་བར་བྱེད་པ། མྱ་ངན་གྱི་གཏམ་དང་འབྲེལ་ཚེ། ཐོས་པ་ཙམ་གྱིས་ཡིད་རང་དབང་མེད་པར་སྐྱོ་བར་བྱེད་པ། གཞན་དགའ་བའི་གཏམ་དང་འབྲེལ་ཚེ། ཐོས་པ་ཙམ་གྱི་འཛུམ་དམུལ་བྱེད་པ་སོགས་ནི་སྙན་ངག་གི་དོན་རྟོགས་ཤིང༌། ཚིག་སྦྱོར་ལ་མཁས་པར་གོམས་པ་འདི་ཁོ་ན་ལ་རག་ལས་པའི་ཕྱིར་སྙན་ངག་གི་གཞུང་འདི་ནི། མཁས་པར་འདོད་པ་དག་གིས་བསླབ་པར་བྱ་བའི་གནས་མཆོག་ཏུ་གྱུར་པ་ཡིན་ཏེ། རྗེ་ཙོང་ཁ་པ་ཆེན་པོས། མཛད་པའི་རིན་པོ་ཆེ་གསུམ་གྱི་གཏམ་གྱི་སྦྱོར་བ་ལས། རིགས་ལམ་རྣམ་པར་ཕྱེད་པའི་རྣམ་དཔྱོད་དང༌།། གཞུང་ལུགས་གདམས་པར་ཤར་བའི་ཉམས་ལེན་དང༌།། ཚིག་སྦྱོར་ཚུལ་ལ་མཁས་པའི་ངག་གི་དཔལ།། ས་སྟེང་འདི་ན་རིན་ཆེན་རྣམ་གསུམ་སྣང༌།། ཞེས་དང༌། སློབ་དཔོན་ཙནྡྲ་གོ་མིས། གང་ཕྱིར་མཁས་པའི་ལས་གསུམ་ལས།། རྩོད་འཆད་ངག་ལ་མ་ངེས་པ།། སྲིད་ཕྱིར་མི་འཁྲུལ་རྩོམ་པ་སྟེ།། ཞེས་དང༌། དཔག་བསམ་འཁྲི་ཤིང་ལས། མཁས་པ་ཉིད་ནི་མེད་ན་བློ་གྲོས་རྣམས་ཉམས་མི་རྣམས་འཚོ་བ་དོན་ཡོད་མིན།། མཚུངས་མེད་རྒྱས་པའི་སྙན་ངག་མེད་ན་མཁས་པ་ཉིད་ནི་ནེ་ཙོའི་ཀློག་དང་མཚུངས།། ཞེས་མཁས་པའི་བྱ་བ་འཆད་རྩོད་རྩོམ་གསུམ་ལས་རྩོམ་པ་བཟང་ངན་སྙན་ངག་ཤེས་མི་ཤེས་ཀྱི་རྗེས་སུ་འགྲོ་ལྡོག་བྱེད་ལ། གལ་ཏེ་ཚིག་སྦྱོར་ལ་མ་མཁས་ན་ ཤེས་བྱའི་གནས་གཞན་ལ་ཅི་ཙམ་མཁས་ཀྱང་ ཟུར་མཁར་བློ་གྲོས་རྒྱལ་བས། རྒྱལ་པོ་ལང་ཚོས་དྲེགས་གྱུར་ཀྱང༌།། རྒྱན་མེད་པ་ན་སྐྱེས་བོས་གླེང༌།། དེ་བཞིན་སྙན་ངག་མི་ལྡན་པའི།། བསྟན་བཅོས་མཁས་ལ་རྩིས་སུ་མེད།། ཅེས་གསུངས་པ་ལྟར་བརྗོད་བྱ་དོན་ཤིན་ཏུ་ཟབ་ཀྱང༌། རྗོད་བྱེད་ཀྱི་ཚིག་སྦྱོར་ཕུན་སུམ་ཚོགས་པ་མ་བྱུང་ན། བརྗོད་བྱའི་དོན་ཉམས་ཤིང༌། འབྲེལ་མི་ཆགས་པ་དང༌། རང་ཚིག་སྔ་ཕྱིའི་གོ་རིམ་འཆོལ་བ་ལ་སོགས་པའི་སྐྱོན་དང་ལྡན་པ་མ་ཟད། རྗོད་བྱེད་ཀྱི་ངག་མི་མཛེས་ཤིང༌། རྣ་བའི་ལམ་དུའང་མི་སྙན་པས་མཁས་པ་དག་གི་བཞད་གད་ཀྱི་ཡུལ་དུ་འགྱུར་བས། གནས་སྐབས་མཁས་པའི་གྲགས་པ་དང༌། རྙེད་བཀུར། མཐར་ཐུག་མཆོག་གི་བྱང་ཆུབ་འདོད་ཅིང་དོན་དུ་གཉེར་བ་རྣམས་ཀྱིས་དུས་རྟག་ཏུ་ལེ་ལོ་དང་སྙོམ་ལས་མེད་པར་སྙན་ཚིག་རིག་པ་འདི་སྦྱང་དགོས་སོ།།
སྙན་ངག་གི་རྒྱུ་བཤད་པ། ཀ༽ ཕུན་སུམ་ཚོགས་པའི་རྒྱུ་ནི། རྩ་བར་་་་་རང་བཞིན་གྱིས་གྲུབ་སྤོབས་པ་དང༌།། མང་དུ་ཐོས་པ་དྲི་མེད་དང༌།། མངོན་པར་སྦྱོར་བ་མི་དམན་པ།། སྙན་ངག་ཕུན་སུམ་ཚོགས་པའི་རྒྱུ།། ཞེས་པ་སྟེ། སྐྱེ་བ་གཞན་སྔ་མ་མར་རིག་པའི་གནས་ལ་གོམས་པ་སྔོན་དུ་སོང་བའི་མཐུས་ཚེ་འདིར་རང་བཞིན་གྱིས་གྲུབ་པའི་སྤོབས་པ་སྟེ་ སྐྱེ་ཐོབ་ཀྱི་ཤེས་རབ་ཟབ་མོ་དང༌། སྤྱིར་ཤེས་གནས་ཀུན་དང་བྱེ་བྲག་སྙན་ངག་གི་བསྟན་བཅོས་ཀྱི་ཚོགས་དང༌། དེ་དང་འབྲེལ་བ་སྔོན་གྱི་གཏམ་རྒྱུད་དང༌། མངོན་བརྗོད་ལ་སོགས་པ་ལེགས་བཤད་ཀྱི་ཚོགས་མང་དུ་ཐོས་ཤིང་ཐེ་ཚོམ་གྱི་དྲི་མ་མེད་པ་དང༌། དེ་དག་སེམས་པ་དང་གོམས་པ་ལ་མངོན་པར་སྦྱོར་བའི་གུས་སྦྱོར་དང༌། རྟག་སྦྱོར་གྱི་བརྩོན་འགྲུས་མི་དམན་པ་གསུམ་ནི་སྙན་ངག་གི་རིག་ཚུལ་ཕུན་སུམ་ཚོགས་པ་རང་རྒྱུད་ལ་སྐྲུན་པའི་རྒྱུའོ།། ཁ༽ སྣོད་དུ་རང་བའི་རྒྱུ་ནི། རྩ་བར་་་་་་་གལ་ཏེ་སྔོན་གྱི་བག་ཆགས་ཡོན་ཏན་གྱི།། རྗེས་འགྲེལ་སྤོབས་པ་རྨད་བྱུང་མེད་པ་ལའང༌།། ཐོད་དང་འབད་པ་དག་གིས་ངག་བསྟེན་ན།། ཅི་ཞིག་ལྟར་ཡང་ངེས་པར་རྗེས་འཛིན་བྱེད།། ཅེས་པ་སྟེ། གལ་ཏེ་ཚེ་སྔོན་སྦྱངས་པའི་བག་ཆགས་སད་པའི་ཡོན་ཏན་གྱི་རྗེས་འབྲེལ་དུ་བྱུང་བའི་སྐྱེས་ཐོབ་ཀྱི་སྤོབས་པ་རྨད་དུ་བྱུང་བ་མེད་པས་རྒྱུ་དང་པོ་མ་གྲུབ་པའི་གང་ལ་ལའང་རྒྱུ་གཉིས་པ་མང་དུ་ཐོས་པ་དང༌། རྒྱུ་གསུམ་པ་འབད་པ་བྱས་ན་དབང་པོའི་ཁྱད་པར་ཅི་ཞིག་ལྟར་ཡང་བློ་གྲོས་འཕེལ་བར་འགྱུར་བས་ངེས་པར་དུ་རྗེས་སུ་འཛིན་པར་བྱེད་དེ། སྙན་ངག་བསྟན་པར་བྱ་བའི་སྣོད་དུ་རུང་བ་ཡིན་པས་དེ་ལ་དུས་སུ་བསྟན་པར་བྱ་དགོས་སོ།།
སྙན་ངག་སྦྱང་པའི་ཕན་ཡོན་ནི། སྦྱངས་ན་གོང་དུ་བཤད་པའི་དོན་རྣམས་འགྲུབ་པར་འགྱུར་པ་དང༌། ངེས་པར་དུ་སྙན་ངག་ཤེས་པའི་སྐལ་བ་དང་ལྡན་པར་འགྱུར་བ་དང༌། བཀའ་བསྟན་རིག་གནས་དང་བཅས་པའི་གཞུང་ལུགས་ཀུན་ནོར་འཁྲུལ་མེད་པར་རྟོགས་ནུས་པ་དང༌། རང་གིས་ཡང་སྙན་ངག་ཆེན་པོ་སརྒས་བཅིངས་པའི་སྒོ་ནས་དམ་པའི་ཆོས་གསལ་བར་བྱེད་པའི་བསྟན་བཅོས་བརྩམས་པ་དང༌། དཀོན་མཆོག་གསུམ་ལ་བསྟོད་པས་ཡིད་དམ་ལྷས་ཞལ་གཟིགས་ཏེ་བྱིན་གྱིས་རློབ་པའང་འབྱུང་བ་དང༌། མཐར་ཐུག་ཐམས་ཅད་མཁྱེན་པའི་གོ་འཕང་དམ་པ་འཐོབ་པར་འགྱུར་བ་དང༌། གལ་ཏེ་དེ་ལྟར་དོན་ཆེན་མ་བྱུང་ནའང་ ངལ་བས་བསྟེན་ན་དེ་ཉིད་རྨོངས་པའི་ངང་ཚུལ་ལས་རིང་དུ་གྲོལ་ཏེ་མཁས་པའི་གོ་འཕང་འཐོབ་པར་གདོན་མི་ཟའོ།།
སྙན་ངག་མཛད་པ་པོ་སློབ་དཔོན་དབྱུག་པ་ཅན་གྱི་ལོ་རྒྱུས། སྤྱིར་ཁ་རྒྱུན་ལ། མཛེས་པའི་དཔེ་སྟོན་ལ་མཆོག་ཏུ་གྱུར་པ་ནག་མོའི་ཁོལ། རྗེས་ཁྲིད་ཀྱི་སྒྲ་སྦྱོར་ལ་མཁོན་ཏུ་གྱུར་པ་བྷ་ར་ཝི། སྙན་པའི་རོ་འདོན་པ་ལ་མཆོག་ཏུ་གྱུར་པ་དབྱུག་པ་ཅན། ཞེས་གྲགས་པའི་སླབ་དཔོན་དཎྜིའམ་དབྱུག་པ་པ་ཅན་ནི། རབ་བྱུང་གསུམ་པའི་ཕྱེད་ཕྱི་མ་ཙམ་སྟེ་དུས་རབས་བཅུ་གཉིས་པའི་སྨད་ཙམ་དུ་བྱུང་ཞེས་འདོད་པ་དང༌། ཡང་ལོ་རྒྱུས་ཁ་ཅིག་ལས་ དུས་རབས་བདུན་པའི་ནམ་ཙམ་ལ་བྱོན་པར་ཡང་གྲགས། གང་ལྟར་ཀྱང་སླབ་དཔོན་འདི་ནི་སྔ་མ་དག་རྒྱ་གར་གུ་ཛ་ར་ཐའི་ཡུལ་ཀུན་ཏའི་གྲོང་ཞེས་བྱ་བར་ རྒན་པ་ལས་རིམ་གྱིས་ལྷོ་ཕྱོགས་སུ་སོང་སྟེ་ཀཉྩའི་ཡུལ་དུ་ཆགས། རིགས་ལ་སྲེད་མེད་ཀྱི་བུ་ཞེས་བྱ་བའི་མཁས་པ་ཞིག་བྱུང༌། དེའི་བུ་ནི་འགྲན་ཟླ་མེད་པའི་སྙན་ངག་མཁན་ཆེན་པོ་བྷ་ར་ཝིའམ་མེ་དར་བ་བྱ་བ་དེ་ཡིན། དེས་ར་མ་ཡ་ནའི་གཞུང་ཞིག་བྲིས་པར་ དཀྱུས་བཞིན་བཀླགས་པས་རྒྱལ་པོ་ར་མ་ཎའི་གཏམ་རྒྱུད་སྟོན་ཅིང༌། མཇུག་ནས་བཟློག་སྟེ་བཀླགས་པས་བྷ་ར་ཏའི་རྒྱད་སྟོན་པ། དེ་ཡང་དོན་གོ་བེད་ལ་ཚིག་སྙན་པ་ཞིག་བྱུང་བར་གྲགས། བྷ་ར་ཝི་ལ་ཆུང་མ་གསུམ་ཡོད་པའི་འབྲིང་པོ་མ་ནེ་ར་ཐ། དེ་ལ་བུ་བཞི་བྱུང་བའི་ཐ་ཆུང་བི་ར་དརྐ་སྟེ། དེ་དང་མ་གོ་རི་གཉིས་ཀྱི་བུ་ནི་དཎྜི་ཡིན་ལ། རིགས་ནི་བྲརྨཎཱ་སྟེ་བྲམ་ཟེའོ།། ཆུང་ངུ་ནས་ཕ་མ་གཉིས་ཤི་བས་དྭ་ཕྲུག་ཏུ་འཁྱམས། རེ་ཞིག་ནས་ཡུལ་དེར་འབངས་དང་རྒྱལ་པོ་མ་མཐུན་པས་འཁྲུག་ལོང་གི་རྐྱེན་གྱིས་ནགས་ཁྲོད་དུ་བྲོས་ནས་བསྣ་སྐབས། ཡོན་ཏན་ལ་མཁས་པར་སྦྱངས། ཡུལ་འཁྲུག་བདེ་ནས་སླར་ཡུལ་དུ་འཁོར་ཏེ། རྒྱལ་པོ་པཱ་ལླ་ཞེས་བྱ་བའི་བློན་པོར་གྱུར། གཞན་ཡང་རྒྱལ་པོ་པུ་ལ་ཀེ་ཤ་ཞེས་བྱ་བའི་སྤུན་ཁྱབ་འཇུག་འཕེལ་བ་དང་མཛའ་གྲོས་སུ་གྱུར་ནས། སྙན་ངག་མེ་ལོང་མ་འདི་རྒྱལ་པོ་དེའི་བུ་རྣམས་ཀྱི་ཆེད་དུ་བརྩམས་པར་གྲགས། སློབ་དཔོན་འདིས་འཇིག་རྟེན་ན་གྲགས་པའི་གཞུང་གསུམ་མཛད་དེ་སྙན་ངག་མེ་ལོང་འདི་དང༌། གཞོན་ནུ་བཅུའི་འཇུག་པ་ཞེས་བྱ་བ་སྔོན་གྱི་ལེའུ་ལྔ་ལ་རྒྱལ་པོ་བ་ཧ་ན་དང༌། མཛེས་མ་ཨ་བནྟི་གཉིས་ཀྱི་ལོ་རྒྱུས་དང༌། དངོས་གཞི་ལ་གཞོན་ནུ་བཅུ་པོ་རང་རང་གི་སྤྱོད་པ་བཤད་ཡོད་པ་དེ་དང༌། གཅིག་ནི་ཟློས་གར་རིགས་ཀྱི་བསྟན་བཅོས་ཡིན་པར་གྲགས་སོ།།
མཛད་པ་པོ་སློབ་དཔོན་འདི་ཉིད་ཕྱི་ནང་གང་ཡིན་དཔྱད་པ། མཛད་པ་པོ་སློབ་དཔོན་འདི་ཉིད་མཁས་པ་ཕལ་ཆེ་བས། མེ་ལོང་མའི་གཞུང་འདིར། བརྟན་རྒྱས་དབང་པོ་རབ་བསྡམས་པ།། ཁྱོད་ནི་སྡོམ་ལྡན་ཕྱིར་མི་ཉམས།། ཞེས་སོགས་ནང་པའི་གྲུབ་མཐའ་སྟོན་པའི་ཚིག་དང༌། ཉི་མ་ཟླ་བ་རླུང་ས་མཁའ།། སྦྱིན་སྲེག་བྱེད་དང་མེ་དང་ཆུ།། ཞེས་སོགས་ཕྱི་རོལ་པའི་གྲུབ་མཐའ་སྟོན་པའི་ཚིག་ཡང་མང་དུ་སྣང་བས་ ཕྱི་ནང་ཐུན་མོང་གི་པཎྜི་ཏ་ཡིན་པར་འདོད་པ་དང༌། ཡང་ཁ་ཅིག་གིས་ སྡེབ་སྦྱོར་རིན་ཆེན་འབྱུང་གནས་མཛད་པ་པོ་ཡིན་ཞེས་པ་དང༌། ལ་ལས་ སློབ་དཔོན་དཔའ་བོ་བསྟན་པ་འདི་ལ་མ་ཞུགས་གོང་གི་མཚན་ལ་དེ་ལྟར་གྲགས་པ་ཡིན་པས་ སློབ་དཔོན་འདི་ཉིད་ནང་པའི་པཎྜི་ཏ་ཡིན་པར་འདོད། ཡང་ཁ་ཅིག་ དམངས་དོ་ཧ་ལས། དབྱུ་གུ་དབྱུག་གསུམ་ལེགས་ལྡན་གཟུགས།། འཆང་ཞིང་དུས་སུ་མཆོད་པ་དང༌།། ལ་སོགས་པའི་ལུང་དྲངས་ནས་ཕྱི་རོལ་པའི་པཎྜི་ཏ་ཡིན་པར་འདོད། གང་ལྟར་ཀྱང་སློབ་དཔོན་འདི་རང་གཞན་གྱི་གཞུང་དང་གྲུབ་མཐའ་མང་པོ་ལ་མཁས་པ་ཞིག་ཡིན་པ་ནི་དཔེར་བརྗོད་པ་དག་གིས་ཤེས་ནུས་སོ།།
སྤྱིར་སྙན་ངག་གི་དབྱེ་བ་ནི། སྤྱིར་སྙན་ངག་ལ་བལྟ་བྱའི་སྙན་ངག་དང་ ཉན་བྱའི་སྙན་ངག་གཉིས་ཡོད། དེ་ལ་བལྟ་བྱའི་སྙན་ངག་ནི། སྒེག་པ་དང་རོལ་བ་ལ་སོགས་པའི་ཉམས་གཙོ་བོར་གྱུར་པ་ལུས་ཀྱི་འདུག་སྟངས་དང༌། རྐང་ལག་གི་གར་སྟབས་ལྟ་བུ་མིག་གི་ཡུལ་དུ་གྱུར་པའི་དོན་གཙོ་བོར་སྟོན་པའི་སྙན་ངག། དཔེར་ན། ཀླུ་ཀུན་ཏུ་དགའ་བའི་ཟློས་གར་ལྟ་བུ་ལ་བལྟ་བྱའི་སྙན་ངག་ཅེས་བྱ། ཉན་བྱའི་སྙན་ངག་ནི། བལྟ་བྱའི་ཡུལ་མིན་པ་རྣ་བར་ཉན་བྱའི་ཚིག་ཉམས་གཙོ་བོར་སྟོན་པ། དཔེར་ན་སྙན་ངག་གི་གཞུང་མེ་ལོང་མ་ལྟ་བུ་ནི་ཉན་བྱའི་སྙན་ངག་ཡིན།
སྙན་ངག་རྩོམ་ལུགས་ལ། རྒྱ་གར་ཤར་ཕྱོགས་གཽ་ཊ་པའི་ལུགས་དང༌། ལྷོ་ཕྱོགས་བཻ་དརྦྷའི་ལུགས་བཅས་གཉིས་ཡོད། དེ་ཡང་ རྒྱ་གར་ཤར་པའི་ལུགས་ནི། ཁ་ཅུང་ཟད་དམ་ཞིང་གོ་དཀའ་ལ་ ཚིག་སྡུ་ཧ་ཅང་མང་བའི་བརྗིད་པའི་ཉམས་གཙོ་བོ་བྱེད་པ། དཔེར་ན། རྒྱལ་དབང་ལྔ་པ་དང༌། བོད་མཁས་པའི་གསུང་རྩོམ་ལྟ་བུ་ཡིན། རྒྱ་གར་ལྷོ་པའི་ལུགས་ནི། ཚིག་ཁ་ཤིན་ཏུ་གསལ་ཞིང་འཇམ་ལ་ ཚིག་སྙན་པ་གཙོ་བོར་བྱེད་པ། དཔེར་ན། ལྕང་སྐྱ་རོལ་པའི་རྡོ་རྗེ་དང༌། གུང་ཐང་བསྟན་པའི་སྒྲོན་མེའི་གསུང་རྩོམ་ལྟ་བུ་ཡིན།
སྙན་ངག་མེ་ལོང་མའི་གཞུང་དང་ གཞུང་འདིའི་བརྗོད་བྱ་ནི། ཕྱི་ནང་ཐུན་མོང་གི་སྦྱང་བྱའི་སྙན་ངག་གི་རྩ་བར་གྱུར་པ་ སྙན་ངག་མེ་ལོང་མའི་གཞུང་ལ་ལེའུ་ཐོག་མཐའ་བར་གསུམ་བཅས་ལེའུ་གསུམ་དུ་བཞུགས་པ་ལས། ལེའུ་དང་པོ་ལ་ཤོ་ལོ་ཀ་བརྒྱ་དང་ལྔ། གཉིས་པལ་ཤོ་ལོ་ཀ་སུམ་བརྒྱ་དྲུག་ཅུ་རེ་ལྔ། གསུམ་པ་ལ་ཤོ་ལོ་ཀ་བརྒྱ་དང་གྱ་དྲུག་སྟེ་བསྡོམས་པས་ཤོ་ལོ་ཀ་དྲུག་བརྒྱ་དང་ང་དྲུག་ཡོད། གཞུང་འདིའི་བརྗོད་བྱའི་དོན་གཙོ་བོ་ལུས་རྒྱན་སྐྱོན་སེལ་གསུམ་གྱི་ཁོངས་སུ་འདུ་བས་ ལུས་དང༌། རྒྱན། སྐྱོན་སེལ་གསུམ་པོ་སྙན་ངག་གི་བརྗོད་བྱའི་གཙོ་བོ་ཡིན།
དེ་ལ་ ལུས་ནི། མེ་ལོང་མའི་རྩ་བར་་་་་་ལུས་ནི་རེ་ཞིག་འདོད་པ་ཡི།། དོན་གྱི་རྣམ་བཅད་ཚིག་གི་ཕྲེང༌།། ཞེས་གསུངས་པ་ལྟར། བརྗོད་འདོད་ཀྱིས་ཀུན་ནས་བསླངས་པའི་བརྗོད་བྱ་དེའི་དོན་དང་དོན་མ་ཡིན་པ་རྣམ་པར་དཔྱོད་པའི་མིང་ཚིག་ཡི་གེ་གསུམ་གྱི་བདག་ཉིད་ཅན་གྱི་ཕྲེང་བ་སྤེལ་བ་དེ་ལ་སྙན་ངག་གི་ལུས་ཟེར། དེ་ནི་སྙན་ཞིང་མཛེས་པའི་ཚིག་རྒྱན་སྣ་ཚོགས་ཀྱི་ཉམས་དོད་སའི་ཡུལ། རྗོད་བྱེད་མིང་ཚིག་ཡི་གེ་གསུམ་ཚོགས་པའི་རང་བཞིན་གྱི་ཚིག་གི་ཕྲེང་བའམ། ངག་གི་རྒྱུན་དེ་ལ་ཟེར་ཏེ། དཔེར་ན། རིན་པོ་ཆེའི་རྒྱན་ཆ་སྣ་ཚོགས་འདོགས་ཡུལ་གྱི་སྐྱེས་བུའི་ལུས་ལྟ་བུ་ཡིན། མདོར་ན་ལུས་ནི་ བརྗོད་བྱའི་དོན་གང་ཡིན་ཡང་ རང་གི་སེམས་ལ་ཤར་བའི་དོན་དེ་གཟུགས་སུ་བཀོད་པའི་ཚིག་སྦྱོར་ཞིག་ལ་ལུས་ཞེས་བྱ། དེ་ལ་དབྱེ་ན། བཅད་ལྷུག་སྤེལ་བ་གསུམ་ཡོད།
རྒྱན་ནི། མེ་ལོང་མའི་རྩ་བར། སྙན་ངག་མཛེས་པར་བྱེད་པ་ཡི།། ཆོས་རྣམས་རྒྱན་ཞེས་རབ་ཏུ་བརྗོད།། ཞེས་གསུངས་པ་ལྟར། སྙན་ངག་གི་ལུས་ཚིགས་སུ་བཅད་པ་དང༌། ལྷུག་པ་དང༌། སྤེལ་མ་རྣམ་པ་གསུམ་པོ་གང་ཞིག་ཡིན་རུང༌། དེ་མཛེས་པར་བྱེད་པའི་ཡོན་ཏན་ནམ་ཆོས་བརྗོད་པ་གང་དང་ཅི་རུང་བ་རྣམས་ལ་རྒྱན་ཞེས་བྱ། དེ་ལ་ཐུན་མོང་མིན་པ་དང༌། ཐུན་མོང་གི་རྒྱན་གཉིས་ཡོད།
དེ་ཡང་ཐུན་མོང་མ་ཡིན་པའི་རྒྱན་ནི། སྤྱིར་ལེའུ་དང་པོའི་ཐུན་མོང་མ་ཡིན་པའི་རྒྱན་ནི་ ཕལ་ཆེར་ཡི་གེ་འཇམ་རྩུབ་ཀྱི་མང་ཉུང་ལ་བརྟེན་ནས་སྦྱོར་བ་ལྕི་ཡང་གི་ཁྱད་པར་ལས་རྒྱན་སོ་སོར་འབྱེད་ཅིང༌། དེ་རེ་རེ་ལའང་ལྷོ་པའི་ལུགས་དང་ཤར་པའི་ལུགས་གཉིས་འགལ་བ་ལྟག་སྤྲོད་དུ་ཡོད་པས་ན་ ཐུན་མོང་མ་ཡིན་པའི་རྒྱན་ཞེས་བྱ། དེ་ལ་རབ་དྭངས་ལ་སོགས་རྒྱན་བཅུ་ཡོད།
ཐུན་མོང་གི་རྒྱན་ནི། ལེའུ་གཉིས་པ་དང་གསུམ་པར་བཤད་པའི་རྒྱན་རྣམས་ ཤར་ལྷོ་ཐུན་མོང་དུ་འདོད་པས་ཐུན་མོང་གི་རྒྱན་ཞེས་བྱ། ཐུན་མོང་གི་རྒྱན་དེ་ལ། དོན་རྒྱན། སྒྲ་རྒྱན། གབ་ཚིག་གི་རྒྱན་བཅས་གསུམ་ཡོད།
དེ་ལས་ དོན་རྒྱན་ཞེས་པ་ནི། བརྗོད་བྱ་དོན་གྱི་ཉམས་གཙོ་བོར་འདོན་པ་སྟེ། རྗོད་བྱེད་ཀྱི་ཚིག་སྙན་ཞིང་མཛེས་པའི་ཉམས་སྣ་ཚོགས་ཀྱི་སྒོ་ནས་ གཙོ་བོ་བརྗོད་བྱ་དོན་གྱི་རོ་ཉམས་ཕུན་སུམ་ཚོགས་པའི་ཚིག་སྦྱོར་གྱི་ངག་དོན་ལ་དོན་རྒྱན་ཞེས་བྱ། དེ་ལ་དབྱེ་ན། མེ་ལོང་མའི་རྩ་བར། རང་བཞིན་བརྗོད་དང་དཔེ་དང་ནི།། སོགས་གསུངས་པ་ལྟར་དོན་རྒྱན་སོ་ལྔ་ཡོད།
སྒྲ་རྒྱན་ཞེས་པ་ནི། རྗོད་བྱེད་ཚིག་གམ་སྒྲའི་ཉམས་གཙོ་བོར་འདོན་པ་སྟེ། སྒྲ་དོན་གཉིས་ལས་གཙོ་བོར་རྗོད་བྱེད་ཀྱི་ཚིག་གམ་སྒྲ་སྦྱོར་ཚུལ་གྱི་ཉམས་མི་འདྲ་བ་སྣ་ཚོགས་ཀྱི་སྒོ་ནས་བརྗོད་བྱའི་དོན་དང༌། རྗོད་བྱེད་ཀྱི་ཚིག་མཛེས་པར་བྱེད་ཅིང༌། སྙན་ཞིང་འཇེབས་པའི་སྒྲའི་རོ་ཉམས་ཕུན་སུམ་ཚོགས་པའི་ཚིག་སྦྱོར་གྱི་གང་ལ་སྒྲ་རྒྱན་ཞེས་བྱ། དེ་ལ་དབྱེ་ན། མེ་ལོང་མར། ཟུང་ལྡན་གྱི་རྣམ་གཞག་བསྟན་པ། བྱ་དཀའ་བའི་ཁྱད་པར་གཞན་བརྗོད་པ། དབྱངས་སོགས་ངེས་པའི་བྱ་དཀའ་བ་བཤད་པ་གསུམ་ཡོད།
གབ་ཚིག་གི་རྒྱན་ཞེས་པ་ནི། བརྗོད་བྱའི་དོན་དངོས་སྦ་བའི་ཕྱིར་དུ། ཚིག་དོན་གཞན་གྱིས་བཀབ་ནས་རྗོད་པ་གཙོ་བོར་བྱས་པ་ལ་གབ་ཚིག་གི་རྒྱན་ཞེས་བྱ། དེ་ལ་དབྱེ་ན། ཀུན་ཚོགས་པ་ལ་སོགས་པ་བཅུ་དྲུག་ཡོད།
སྐྱོན་སེལ་ནི། སྙན་ངག་གི་ཚིག་གི་སྦྱོར་བ་གང་ཞིག་ལའང་འདྲེས་ན་མི་རུང་བའི་སྐྱོན་གྱི་ཆ་རྣམས་ སྙན་ངག་མཁན་་རྣམས་ཀྱིས་སྤང་བར་བྱ་བའི་དོན་བཤད་པ་ལ་སྐྱོན་སེལ་ཞེས་བྱ། དེལ་དབྱེ་ན། མེ་ལོང་མར། དོན་ཉམས་དོན་འགལ་དོན་གཅིག་དང༌།། སོགས་བཅུ་ཡོད།
རང་བཞིན་བརྗོད་པའི་རྒྱན།
དངོས་པོ་རྣམས་ཀྱི་རང་བཞིན་དང་ དེའི་གནས་སྟངས་རྣམས་བརྗོད་ཐངས་སྣ་ཚོགས་པའི་སྒོ་ནས་ དངོས་སུ་དྲང་པོར་བརྗོད་པའི་ཉམས་ལྡན་གྱི་ཚིག་སྦྱོར་ལ་རང་བཞིན་བརྗོད་པའི་རྒྱན་ཞེས་བྱ།
༡༽ སྤྱིར་ཆོས་ཞིག་གི་རང་བཞིན་དྲང་པོར་བརྗོད་པའི་ངག་ལ་རིགས་རང་བཞིན་བརྗོད་པ་ཞེས་བྱ།
_ བརྗོད་ཡུལ་གྱི་ཁྱད་གཞི་དེའི་ཁྱོད་ཆོས་སྣ་ཚོགས་བརྗོད་པ། _ རིགས་ཅན་ཀུན་ལ་ཁྱབ་བྱེད་དུ་ཡོད་པ། _ ཁྱད་ཆོས་ཀྱི་ངོ་བོ་དག་ལ་སྒྲོ་སྐུར་སྤངས་ཏེ་དྲང་པོ་བརྗོད་པ། _ གཞན་སེལ་གྱི་དོན་དང་ལྡན་པ། _ ཁྱད་གཞི་རིགས་སྤྱི་ཞིག་སྐབས་ཀྱི་བརྗོད་བྱ་གཙོ་བོར་བཟུང་བ།
༢༽ ཁྱད་ཆོས་བྱ་བའི་ངོ་བོ་དྲང་པོར་བརྗོད་པ་ལ་བྱ་བ་རང་བཞིན་བརྗོད་པ་ཞེས་བྱ།
_ ཁྱད་ཆོས་བྱ་བ་དེ་བརྗོད་བྱ་གཙོ་བོར་བཟུང་བ། _ རྣམ་དབྱེ་གཉིས་པ་དང་གསུམ་པ་སོགས་ཕྲད་ཀྱི་རིགས་སྦྱོར་བ། _ བྱེད་པ་པོ་དང༌། བྱ་ཡུལ། བྱ་བ་གསུམ་ངེས་པར་ཚང་བ། _ བྱ་བ་བྱེད་བཞིན་པའམ་བྱས་ཟིན་པ། _ དེའི་རང་བཞིན་དྲང་པོར་བརྗོད་པ།
༣༽ ཁྱད་ཆོས་ཡོན་ཏན་གྱི་ངོ་བོ་དྲང་པོར་བརྗོད་པ་ལ་ཡོན་ཏན་གྱི་རང་བཞིན་ཞེས་བྱ།
_ ཁྱད་གཞི་དེའི་ཁྱད་ཆོས་ཡོན་ཏན་བརྗོད་བྱའི་གཙོ་བོར་བཟུང་བ། _ བྱེད་ལས་གསལ་པོར་སྟོན་པ། _ བྱེད་ལས་སྟོན་པའི་ཆེད་རྣམ་དབྱེ་གསུམ་པའི་ཕྲད་ཡོད་པ། _ དེའི་རང་བཞིན་དྲང་པོར་བརྗོད་པ།
༤༽ ཁྱད་གཞི་ལ་ཡོད་པའི་རྫས་ཀྱི་ངོ་བོ་དྲང་པོར་བརྗོད་པ་ལ་རྫས་རང་བཞིན་བརྗོད་པ་ཞེས་བྱ།
_ ཁྱད་གཞི་བརྗོད་བྱ་གཙོ་བོར་མ་བཟུང་བར་ ཁྱད་གཞི་དེ་ལ་ཡོད་པའི་ཁྱད་ཆོས་རྫས་རྣམས་སྐབས་ཀྱི་བརྗོད་བྱར་བཟུང་བ། _ ཡུལ་དེའི་ཐུན་མོང་མ་ཡིན་པའི་རྫས་སམ་དངོས་པོ་བཀོད་པ། _ རྫས་དེས་ཡུལ་གྱི་བྱེ་བྲག་རང་གཅིག་པུ་སྟོན་ནུས་པ། _ དེའི་ངོ་བོ་དྲང་པོར་བརྗོད་པ།
དཔེ་རྒྱན།
གཙོ་བོ་དཔེ་དང་དཔེ་ཅན་གཉིས་ཐ་དད་པའི་ཚུལ་གྱིས་ཁྱད་གཞི་ཁྱད་ཆོས་སོགས་ཕན་ཚུན་འདྲ་མཚུངས་སུ་ མཚུངས་པ་གསལ་བྱེད་ཀྱི་སྒྲ་ལ་བརྟེན་ནས་གོ་བར་བྱེད་པའི་ངག་ལ་དཔེ་རྒྱན་ཞེས་བྱ།
༡༽ དཔེ་དང་དཔེ་ཅན་གཉིས་ཀྱི་འདྲ་བའི་ཁྱད་ཆོས་ཞིག་དངོས་སུ་བརྗོད་པའི་སྒོ་ནས་ དཔེ་དཔེ་ཅན་གཉིས་འདྲ་བར་སྟོན་པའི་ངག་ལ་ཆོས་དཔེ་ཞེས་བྱ།
_ དཔེ་དང་དཔེ་ཅན་གཉིས་སུ་ཡོད་པ། _ མཚུངས་གསལ་གྱི་སྒྲ་ཡོད་པ། _ དེ་གཉིས་འདྲ་བའི་ཁྱད་ཆོས་དངོས་སུ་ཡོད་པ། _ མཚུངས་ཆོས་མཚུངས་པ་གསལ་བྱེད་ཀྱི་སྒྲའི་ཤུལ་དུ་བཀོད་པ།
༢༽ དཔེ་དང་དཔེ་ཅན་གཉིས་འདྲ་བའི་ཁྱད་ཆོས་དངོས་སུ་མ་བརྗོད་པར་ དཔེ་དོན་གཉིས་ཀྱི་ཁྱད་གཞི་ཁོ་ན་འདྲ་བར་སྟོན་པའི་ངག་ལ་དངོས་དཔེ་ཞེས་བྱ།
_ ཆོས་ཅན་ཁོ་ན་མཚུངས་པར་སྦྱར་བ། _ ཁྱད་ཆོས་འདྲ་བ་དངོས་སུ་མ་སྦྱོར་བ། _ ཤུགས་ལས་ཁྱད་ཆོས་འདྲ་བར་གོ་ནུས་པ། _ མཚུངས་གསལ་གྱི་སྒྲ་ཡོད་པ། _ དཔེ་དང་དཔེ་ཅན་གཉིས་འདྲ་བའི་ཁྱད་གཞི་དངོས་པོ་སོགས་པའི་ཤུལ་དུ་མཚུངས་གསལ་གྱི་སྒྲ་བཀོད་པ།
༣༽ འཇིག་རྟེན་ལ་ཡོངས་སུ་གྲགས་པའི་གནས་སྟངས་ལས་བཟློག་སྟེ་ དཔེ་དེ་དཔེ་ཅན་ལ་བཀོད་པ་དང་ དཔེ་ཅན་དཔེ་ལ་བཀོད་པའི་ངག་ལ་བཟློག་པའི་དཔེ་ཞེས་བྱ།
_ དཔེ་དང་དཔེ་ཅན་བཀོད་ཐངས་ཀྱི་བཟློག་པ། _ དོན་གོ་མ་བཟློག་པ། _ ཤུགས་ལས་དཔེ་དོན་ཁྱད་ཆོས་མཚུངས་པར་གོ་ནུས་པ། _ མཚུངས་གསལ་གྱི་སྒྲ་ཡོད་པ།
༤༽ དཔེ་དང་དཔེ་ཅན་གཉིས་ཕན་ཚུན་དཔེ་ལེན་རེས་བྱས་ནས་གཉིས་ཀ་ཕན་ཚུན་མཚུངས་པར་བརྗོད་པས་ན་ཕུན་ཚུན་དཔེ་ཞེས་བྱ།
_ དཔེ་དང་དཔེ་ཅན་རེས་མོས་སུ་བཀོད་པ། _ མཚུངས་གསལ་གྱི་སྒྲ་དངོས་སུ་ཡོད་པ། _ དཔེ་དཔེ་ཅན་གཉིས་ཀ་ཁྱད་དུ་འཕགས་པར་བརྗོད་པ།
༥༽ མཚུངས་པའི་དངོས་པོ་གཞན་བཟློག་པའི་ཕྱིར། དཔེ་གཅིག་ཁོ་ནར་ངེས་པར་བརྗོད་པས་ན་ངེས་པའི་དཔེ་ཞེས་བྱ།
_ མཚུངས་པའི་དཔེ་གཅིག་བཀོད་པ། _ དཔེ་གཅིག་ཏུ་ངེས་པར་བརྗོད་པའམ་ མཚུངས་པ་གཞན་བཟློག་པ། _ མཚུངས་གསལ་གྱི་སྒྲ་ཡོད་པ།
༦༽ དཔེ་གཅིག་ལ་ངེས་པ་མེད་པར་གཞན་ཡང་ཡོད་སྲིད་པར་བརྗོད་པས་ངེས་མེད་དཔེ་ཞེས་བྱ།
_ དཔེ་དང་དཔེ་ཅན་མཚུངས་ཆོས་སུ་བཀོད་པ། _ དཔེ་གཅིག་ཏུ་མ་ངེས་པར་གཞན་ཡོད་སྲིད་པར་བརྗོད་པ། _ མཚུངས་གསལ་གྱི་སྒྲ་ཡོད་པ།
༧༽ དཔེ་ཅན་དེའི་ཁྱད་ཆོས་སམ་ཡོན་ཏན་གྱི་ཕྱོགས་གཅིག་ཁོ་ན་ཙམ་དཔེ་དེ་དང་མཚུངས་པ་མ་ཡིན་པར། དཔེ་ཅན་དེའི་ཡོན་ཏན་ནམ་ཁྱོད་ཆོས་གཞན་རྣམས་ཀྱང་བསྡུས་ནས་དཔེ་དེ་དང་མཚུངས་པར་སྦྱོར་བ་བསྡུས་པའི་དཔེ་ཞེས་བྱ།
_ དཔེ་ཅན་གྱི་ཁྱད་ཆོས་གཉིས་བསྡུས་པ། _ དེ་དཔེ་དང་མཚུངས་པར་སྦྱོར་བ།། _ མཚུངས་པ་ཚིག་ཟིན་ལ་དངོས་སུ་ཐོན་པ། _ ཀྱང་སྒྲ་ངེས་པར་དགོས་པ།
༨༽ དཔེ་དང་དཔེ་ཅན་གཉིས་ཀྱི་བར་ འབྱེད་ཆོས་མི་འདྲ་བ་མང་དུ་ཡོད་ཀྱང་ ཁྱོད་ཆོས་གཅིག་ཁོ་ན་ལས་གཞན་ཁྱད་པར་ཅི་ཡང་མེད་ཅེས་ འུད་ཀྱིས་བརྗོད་པས་ཕུལ་གྱི་དཔེ་ཞེས་བྱ།
_ ཐ་དད་པའི་ཁྱད་པར་ཅུང་ཟད་བརྗོད་པ། _ ཁྱད་པར་གཅིག་ལས་གཞན་མེད་པར་སྟོན་པ། _ ཁྱད་པར་གཞོན་ཡོད་ཀྱང་མེད་པ་ལྟར་འུད་ཆེན་པོས་བརྗོད་པ། _ མཚུངས་གསལ་གྱི་སྒྲ་དངོས་སུ་མེད་པ། _ འདྲ་བ་ཤུགས་ཀྱིས་སྟོན་པ།
༩༽ དཔེ་ལ་མེད་པ་ལ་ཡོད་པར་སྒྲོ་བཏགས་ཏེ་བརྗོད་པ་ལ་རབ་བཏགས་ཀྱི་དཔེ་ཞེས་བྱ།
_ དཔེ་དང་དཔེ་ཅན་གཉིས་སུ་བཀོད་པ། _ དཔེ་ལ་སྒྲོ་བཏགས་པའི་ཚིག་དངོས་སུ་ཐོན་པ། _ མཚུངས་གསལ་གྱི་སྒྲ་དངོས་སུ་མེད་པ། _ འདྲ་བ་ཤུགས་ལས་རྟོགས་པ།
༡༠༽ དཔེ་ལས་ དཔེ་ཅན་ཁྱད་པར་དུ་འཕགས་པའི་ཡོན་ཏན་དང་ལྡན་པར་སྟོན་པ་ལྟ་བུ་ ཚིག་ཟིན་ལ་དངོས་སུ་བརྗོད་པས་རྨད་བྱུང་གི་དཔེ་ཞེས་བྱ། ཡང་ན་ འབྱུང་བར་དཀའ་བའི་དཔེ་ཞིག་བཀོད་པའི་སྒོ་ནས་ དཔེ་ཅན་དེ་ཁྱད་པར་དུ་འཕགས་པར་སྟོན་པ་ལ་གོ།
_ དཔེ་ཅན་དེའི་དཔེར་བརྟག་པ་མཐའ་བཟུང་གི་སྒོ་ནས་བཀོད་པ། _ དཔེ་ཅན་དཔེ་ལས་རྨད་དུ་བྱུང་བའི་ཆོས་ ཚིག་ཟིན་ལ་དངོས་སུ་བརྗོད་པ། _ མཚུངས་གསལ་གྱི་སྒྲ་དངོས་སུ་མ་བཀོད་པ། _ འདྲ་བ་ཤུགས་ལས་རྟོགས་པ།
༡༡༽ དཔེ་དང་དཔེ་ཅན་གཉིས་པོ་མཚུངས་པ་ཤས་ཆེ་བས་ དབྱེ་བ་འབྱེད་མ་ནུས་པར་ དཔེ་ཅན་དཔེ་རུ་འཁྲུལ་བར་བརྗོད་པས་རྨོངས་པའི་དཔེ་ཞེས་བྱ།
_ དཔེ་དང་དཔེ་དབྱེ་མི་ནུས་པ་ འཁྲུལ་པར་བརྗོད་པ། _ གཙོ་བོ་དཔེ་ཅན་དེ་དཔེ་རུ་འཁྲུལ་པ་ཞིག་དགོས། _ མཚུངས་གསལ་གྱི་སྒྲ་ཡོད་པ། _ འཁྲུལ་པ་ཐག་བཅད་པ།
༡༢༽ དཔེ་དང་དཔེ་ཅན་གཉིས་ འདྲ་བ་ཤས་ཆེ་བས་ དཔེ་དང་དཔེ་ཅན་གང་ཡིན་དབྱེ་བ་འབྱེད་མི་ནུས་པར་ཐེ་ཚོམ་དུ་གྱུར་པ་ལྟ་བུ་སྟོན་པས་ཐེ་ཚོམ་གྱི་དཔེ་ཞེས་བྱ།
_ དཔེ་དང་དཔེ་ཅན་གང་ཡིན་མ་ངེས་པ་ཐེ་ཚོམ་གྱི་གཞིར་གྱུར་པར་བརྗོད་པ། _ འཁྲུལ་པ་ཐག་མ་བཅད་པ། _ མཚུངས་གསལ་གྱི་སྒྲ་དངོས་སུ་མེད་པ། _ འདྲ་བ་ཤུགས་ལ་སྟོན་པ།
༡༣༽ གཞི་དེ་ དཔེ་ཡིན་ནམ་ དཔེ་ཅན་ཡིན་ཐེ་ཚོམ་དུ་གྱུར་པ་ལྟར་བྱས་ནས་ སླར་དཔེ་དེ་དཔེ་ཅན་ལས་ཅུང་ཟད་དམན་པས་ དཔེ་ཅན་ལ་དཔེ་དེ་ལས་ཡོན་ཏན་ཁྱད་པར་བ་ཞིག་ཡོད་པའི་རྒྱུ་མཚན་བཀོད་ནས་ དཔེ་ཅན་དེ་ཡིན་པར་གཏན་ལ་འབེབས་པ་ལ་གཏན་འབེབས་ཀྱི་དཔེ་ཞེས་བྱ།
_ དཔེ་དང་དཔེ་ཅན་ཐེ་ཚོམ་དུ་གྱུར་པ་ལྟར་བཀོད་པ། _ དཔེ་ལས་དཔེ་ཅན་ལ་ཡོན་ཏན་ཁྱད་པར་བ་ཞིག་ཡོད་པར་སྟོན་པ། _ ཡོན་ཏན་དེ་རྒྱུ་མཚན་དུ་བཀོད་ནས་ དཔེ་ཅན་ཡིན་པར་བརྗོད་པ། _ མཚུངས་གསལ་གྱི་སྒྲ་མེད་པ།
༡༤༽ དཔེ་ཅན་དེ་ལ་ཁྱད་ཆོས་སམ་ཡོན་ཏན་འགའ་རེ་ཡོད་པ་དེ་ དཔེ་ལའང་ཁྱད་ཆོས་དེ་དག་ཡོད་པ་སྒྲ་སྦྱར་རམ་ དོན་སྦྱར་གང་རུང་གི་སྒོ་ནས་ དཔེ་ཅན་དེ་དཔེ་དང་མཚུངས་པར་བརྗོད་པ་ལ་སྦྱར་བའི་དཔེ་ཞེས་བྱ།
_ དཔེ་དང་དཔེ་ཅན་ལ་ཡོད་པའི་ཁྱད་ཆོས་རྣམས་སྒྲ་འམ་དོན་སྦྱར་བ། _ མཚུངས་གསལ་གྱི་སྒྲ་དངོས་སུ་ཡོད་པ། _ མཚུངས་གསལ་གྱི་མཇུག་ཏུ་བཀོད་པ།
༡༥༽ དོན་གྱི་ཆོས་མཚུངས་སྒྲ་ལ་སྦྱར་ནས་ བརྗོད་བྱའི་ཚིག་གི་སྒྲ་གཅིག་ལ་ གཅོད་མཚམས་མི་འདྲ་བ་གཉིས་ཕྱེ་སྟེ་ མཚུངས་ཆོས་སྒྲ་མཉམ་པའི་སྒོ་ནས་བརྗོད་བྱ་ དཔེ་དང་དཔེ་ཅན་གཉིས་ངོ་བོ་གཅིག་མཚུངས་སུ་སྒྲུབ་པ་ལ་མཉམ་ཉིད་ཀྱི་དཔེ་ཞེས་བྱ།
_ དོན་གྱི་ཆོས་མཚུངས་སྒྲ་ལ་སྦྱར་བ། _ བརྗོད་ཚིག་གཅིག་ལ་གཅོད་མཚམས་མི་འདྲ་བ་གཉིས་སུ་ཕྱེ་བ། _ བརྗོད་བྱ་དཔེ་དཔེ་ཅན་ངོ་བོ་གཅིག་མཚུངས་སུ་སྒྲུབ་པ། _ དོན་གྱི་མཚུངས་ཆོས་ཅི་ཡང་མེད་པ། _ སྒྲ་མཚུངས་ཙམ་ཡོད་པ། _ མཚུངས་གསལ་གྱི་སྒྲ་ཡོད་པ།
༡༦༽ དཔེ་དང་དཔེ་ཅན་གཉིས་འདྲ་བ་ཙམ་བཀོད་དེ། དཔེ་ལ་སྐྱོན་གྱི་ཆ་ཅུང་ཟད་ཙམ་འདུག་ཅེས་སྨད་པའི་སྒོ་ནས་ དཔེ་ཅན་ཁྱད་པར་འཕགས་པར་བརྗོད་པ་ལ་སྨད་པའི་དཔེ་ཞེས་བྱ།
_ དཔེ་གཉིས་ངེས་པར་དུ་ཡོད་པ། _ དཔེ་ལ་ཡོད་པའི་སྐྱོན་དངོས་སུ་བརྗོད་པ། _ དཔེ་ལ་སྨད་པའི་སྒོ་ནས་མཚུངས་པ་ཙམ་ དངོས་སུ་སྟོན་ཅིང་ དཔེ་ཅན་ཁྱད་པར་དུ་འཕགས་པར་བརྗོད་པ། _ མཚུངས་གསལ་གྱི་སྒྲ་ཡོད་པ།
༡༧༽ དཔེ་ལ་བསྟོད་པའི་སྒོ་ནས་ དཔེ་ཅན་ཀྱང་དེ་དང་འདྲ་བར་སྟོན་པ་ལ་བསྔགས་པའི་དཔེ་ཞེས་བྱ།
_ དཔེའི་ཁྱད་ཁྱོད་ཆོས་འགའ་ལ་བསྔགས་པ་བརྗོད་པ། _ དཔེ་ཅན་ལ་ཡང་མཚུངས་པར་སྟོན་པ། _ མཚུངས་གསལ་གྱི་སྒྲ་ཡོད་པ།
༡༨༽ དཔེ་དེ་ལ་སྐྱོན་ཡོན་ཅི་འདྲ་ཡོད་ཀྱང་ དེ་ལ་མི་ལྟ་བར། རང་གི་བསམ་པས་བརྗོད་འདོད་ཀྱི་དབང་གིས་དཔེ་ཅན་དང་མཚུངས་པར་བརྗོད་པ་ ཚིག་ཟིན་ལ་གསལ་བར་བསྟན་པ་ལ་བརྗོད་འདོད་ཀྱི་དཔེ་ཞེས་བྱ།
_ དཔེའི་སྐྱོན་ཡོན་ལ་མི་ལྟ་བ། _ བསམ་པའི་དབང་གིས་མཚུངས་པར་ཚིག་ཟིན་ལ་གསལ་བར་བསྟན་པ། _ མཚུངས་གསལ་གྱི་སྒྲ་ཡོད་པ།
༡༩༽ དཔེ་རིགས་མི་འདྲ་བ་གཉིས་ཙམ་བཀོད་ནས། དཔེ་དེ་དག་དང་ དཔེ་ཅན་ཕན་ཚུན་རྣམ་པ་འགལ་བ་ཙམ་མ་གཏོགས༌། དཔེ་དཔེ་ ཅན་གཉིས་ལ་ཁྱད་པར་གཞན་ཅི་ཡང་མེད་ཅེས་མཚུངས་པར་སྟོན་པ་ལ་འགལ་བའི་དཔེ་ཞེས་བྱ།
_ དཔེ་རིགས་མི་འདྲ་བ་གཉིས་ཙམ་བཀོད་པ། _ དཔེ་དོན་རྣམ་པ་འགལ་བ་ཙམ་བརྗོད་པ། _ ཆོས་མཚུངས་འདྲ་བར་བརྗོད་པ། _ མཚུངས་གསལ་གྱི་སྒྲ་ཡོད་པ།
༢༠༽ དཔེ་ལ་ དེ་ཅན་དང་འགྲན་པའི་ནུས་པ་ནམ་ཡང་མེད་དོ་ཞེས་ མཚུངས་པ་དགག་པའི་སྒོ་ནས་དཔེར་བཀོད་པས་དགག་པའི་དཔེ་ཞེས་བྱ། ཡང་ན་ དཔེ་ལ་སྐྱོན་ཞིག་སྟོན་པའི་སྒོ་ནས་ དཔེ་ཅན་དང་འགྲན་པའི་ནུས་པ་མེད་པར་བརྗོད་པའོ།།
_ དགག་བྱ་དཔེ། _ འགོག་བྱེད་དཔེ་དེའི་སྐྱོན། _ དཔེ་དམན་པས་དཔེ་ཅན་དང་མི་མཚུངས་པར་དངོས་སུ་བརྗོད་པ། _ དཔེ་ཅན་ཁྱད་འཕགས་ཤུགས་ལས་སྟོན་པ། _ དགག་བྱ་དཔེ་ལ་དངོས་སུ་བཀག་པའི་དོན་ཞིག་ངེས་སྟོན་པ་དགོས། _ མཚུངས་གསལ་གྱི་སྒྲ་མེད་པ། _ མཚུངས་པཤུགས་ལས་རྟོགས་པ།
༢༡༽ དཔེ་དེ་དཔེ་ཅན་ལས་ཁྱད་པར་མང་དུ་ཡོད་ཀྱང་མེད་པ་ལྟར་མཚུངས་པ་ཁོ་ན་བརྗོད་པས། དཔེ་ཅན་ལ་ངོ་བསྟོད་བྱེད་པའམ། དེ་མཛེས་པར་སྟོན་པ་ཞིག་ལ་ངོ་བསྟོད་ཀྱི་དཔེ་ཞེས་བྱ།
_ དཔེ་དོན་ལ་ཁྱད་པར་ཡོད་ཀྱང་མེད་པར་ལྟར་བརྗོད་པ། _ ཚིག་ཟིན་ལ་དངོས་སུ་ཐོན་པ། _ མཚུངས་གསལ་གྱི་སྒྲ་ཡོད་པ།
༢༢༽ དཔེ་དང་དཔེ་ཅན་གྱི་ཁྱད་ཆོས་ཕན་ཚུན་ཤིན་ཏུ་འདྲ་ཆེ་བས། ཐ་དད་མིན་པ་ལྟར་དུ་འཁྲུལ་ཉེན་ཡོད་པ་ཞིག་ལ། ཞིབ་ཏུ་བརྟགས་ཤིང་དཔྱད་ནས་ དཔེ་དང་དཔེ་ཅན་གྱི་ཁྱོད་ཆོས་མ་འདྲེས་པར། རང་རང་གི་གནས་ལུགས་སོ་སོ་ངེས་པ བདེན་པར་བརྗོད་པ་ལ་དེ་ཉིད་བརྗོད་པའི་དཔེ་ཞེས་བྱ།
_ དཔེ་དང་དཔེ་ཅན་འཁྲུལ་ཉེན་ཡོད་པ་ལྟར་བརྗོད་པ། _ ཞིབ་ཏུ་བརྟགས་ནས་དཔེ་དོན་མ་འདྲེས་པར་བརྗོད་པའི་དོན་སྟོན་པ། _ མཚུངས་གསལ་གྱ་ིསྒྲ་མེད་པ། _ མཚུངས་པ་ཤུགས་ལ་བསྟན་པ།
༢༣༽ དཔེ་ཅན་དེ་ལ་ དཔེ་ཅན་རང་ཉིད་ལས་མཚུངས་པ་གཞན་པ་མ་རྙེད་པ་ལྟར་བརྗོད་པས་ཐུན་མོང་མིན་པའི་དཔེ་ཞེས་བྱ།
_ དཔེ་ཁྱད་འཕགས་ཅན་ཞིག་བཀོད་པ། _ དཔེ་ཅན་རང་ཉིད་དཔེར་འོས་པ་མ་གཏོགས་གཞན་མི་སྲིད་ལྟ་བུ་བཀོད་པ། _ ཚིག་ཟིན་ལ་དངོས་སུ་ཐོན་པ། _ མཚུངས་གསལ་གྱ་ིསྒྲ་ཡོད་པ།
༢༤༽ དཔེ་དེའི་ཁྱོད་ཆོས་སམ་ཡོན་ཏན་ དེ་འདྲ་བ་ཞིག་འཇིག་རྟེན་དུ་འབྱུང་མི་སྲིད་པའི་དཔེ་ ངོ་མཚར་བ་ཞིག་བཀོད་པའི་སྒོ་ནས་ དཔེ་ཅན་དང་མཚུངས་པར་བརྗོད་པ་ལ་འབྱུང་མིན་དཔེ་ཞེས་བྱ།
_ འཇིག་རྟེན་དུ་འབྱུང་མི་སྲིད་པའི་དཔེ་ཞིག་བཀོད་པ། _ དཔེ་ཅན་དེ་དང་མཚུངས་པར་བརྗོད་པ། _ མཚུངས་གསལ་གྱི་སྒྲ་ཡོད་པ།
༢༥༽ དཔེ་ལས་ཁྱོད་ཆོས་དེ་འདྲ་ཞིག་འབྱུང་མི་སྲིད་པ་ལྟར། དཔེ་ཅན་ལས་ཀྱང་ཁྱད་ཆོས་དེ་འདྲ་འབྱུང་མི་སྲིད་པ་ དཔེ་དོན་གཉིས་མཚུངས་པར་སྦྱར་བ་ལ་སྲིད་མིན་གྱི་དཔེ་ཞེས་བྱ།
_ དཔེ་དོན་ཀུན་ལ་རྣམ་དབྱེ་ལྔ་པ་ཁོ་ན་སྦྱར་བ། _ དཔེ་ལ་ཁྱད་ཆོས་ཞིག་འབྱུང་མི་སྲིད་པར་ དཔེ་དོན་མཚུངས་པར་སྦྱར་བ། _ མཚུངས་གསལ་གྱི་སྒྲ་ཡོད་པ།
༢༦༽ དཔེ་མང་པོ་ལྷན་དུ་བཀོད་དེ། དེ་དག་གི་ཁྱད་ཆོས་རེ་རེ་ནས་ དཔེ་ཅན་གྱི་ཁྱད་ཆོས་གཅིག་གསལ་བར་བྱེད་ཅིང་ དེ་དང་རང་བཞིན་མཚུངས་པར་བརྗོད་པ་ལ་མང་བའི་དཔེ་ཞེས་བྱ།
_ དཔེ་མང་པོ་ཞིག་ལྷན་དུ་བཀོད་པ། _ ཁྱད་ཆོས་རེ་རེ་ནས་དཔེ་ཅན་གྱི་ཁྱད་ཆོས་གཅིག་གསལ་བར་བྱེད་པ། _ དཔེ་དང་དཔེ་ཅན་རང་བཞིན་མཚུངས་པར་བརྗོད་པ། _ མཚུངས་གསལ་གྱི་སྒྲ་ཡོད་པ།
༢༧༽ དཔེའི་མཛེས་ཆོས་རྣམས་ངོ་བོ་གཅིག་ཀྱང་ རྣམ་འགྱུར་ཙམ་སོ་སོར་སྟོན་པ་ལ་རྣམ་འགྱུར་གྱི་དཔེ་ཞེས་བྱ།
_ དཔེ་ཅན་དེ་ དཔེ་ཁྱད་འཕགས་ཞིག་ལས་སྟོན་པ་ལྟར་བརྗོད་པ། _ རྣམ་འགྱུར་ཙམ་ཐ་དད་པ་ལ་རང་བཞིན་མཚུངས་པར་བརྗོད་པ། _ མཚུངས་གསལ་གྱི་སྒྲ་ཡོད་པ།
༢༨༽ སྔ་མ་རིམ་བཞིན་དཔེ་དང་ ཕྱི་མ་རིམ་བཞིན་དཔེ་ཅན་དུ་ ཕྲེང་བ་ལྟར་སྤེལ་བ་ལ་ཕྲེང་བའི་དཔེ་ཞེས་བྱ།
_ དཔེ་དཔེ་ཅན་ཕྲེང་བ་ལྟར་བསྒྲིགས་པ། _ སྔ་མ་དཔེ་དང་ཕྱི་མ་དཔེ་ཅན་དུ་གྱུར་བ། _ ཚིག་སྔ་ཕྱི་བལྟོས་པའི་སྒོ་ནས་ ཕྱི་མ་ཕྱི་མའི་གནས་ཚུལ་གསལ་བར་བྱེད་པ། _ མཚུངས་གསལ་གྱི་སྒྲ་ཡོད་པ།
༢༩༽ ངག་དོན་གྱི་མཚན་ཉིད་་་་་་་་བརྗོད་བྱ་གང་ཡིན་ཡང་ ཚིག་གི་དོན་ཙམ་མ་ཡིན་པར་བྱེད་ཅན་དྲུག་ཅི་རིགས་དང་འབྲེལ་བའི་ འཇལ་བྱེད་དཔེའི་ངག་དོན་གྱིས་གཞལ་བྱ་དོན་གྱི་ངག་དོན་ཉེ་བར་འཇལ་བ་ བཞིན་སྒྲ་དང་བཅས་པ་ཞིག་ལ་ངག་དོན་གྱི་དཔེ་ཞེས་བྱ།
_ དཔེ་དོན་གྱི་ཆོས་དང་ཆོས་ཅན་ཚོགས་པའི་ངག་དོན་ཡོད་པ། _ ངག་དོན་དེ་ལ་བྱ་བྱེད་ལས་གསུམ་གཙོ་བོར་གྱུར་པའི་བྱེད་ཅན་དྲུག་གང་རང་ཡོད་པ། _ དཔེའི་ངག་དོན་གྱིས་ དཔེ་ཅན་གྱི་ངག་དོན་འཇལ་བ། _ མཚུངས་པ་གསལ་བྱེད་ཀྱི་བཞིན་སྒྲ་ཡོད་པ།
ཀ༽ བཞིན་སྒྲ་གཅིག་པ། ངག་དོན་གང་ཡིན་པ་ཞིར་བཞན་གྱི་སྟེང་ མཚུངས་པ་གསལ་བྱེད་ཀྱི་བཞིན་སྒྲ་གཅིག་གིས་གསལ་བར་བྱེད་པ། ཁ༽ བཞིན་སྒྲ་དུ་མ། ངག་དོན་གང་ཡིན་པ་ཞིར་བཞན་གྱི་སྟེང་ མཚམས་སྦྱོར་བའི་བཞིན་སྒྲ་དུ་མ་ཡོད་པ།
༣༠༽ དཔེ་ཅན་གྱི་དངོས་པོ་འགའ་ཞིག་ སྔར་བཀོད་ནས་ དེ་དང་ཆོས་མཐུན་པའི་དཔེ་ཞིག་ཟླ་བོའམ་གྲོགས་ཀྱི་ཚུལ་དུ་ཕྱིས་སུ་བཀོད་ཅིང༌། དེ་གཉིས་དངོས་སུ་མཚུངས་པར་མ་བརྗོད་ཀྱང་ཤུགས་ལ་མཚུངས་པ་ཞིག་ལ་ཟླ་བོ་དངོས་པོའི་དཔེ་ཞེས་བྱ།
_ དཔེ་ཅན་གྱི་དངོས་པོ་སྔར་བཀོད་པ། _ དེ་དང་མཐུན་པའི་དཔེ་ཞིག་གྲོགས་ཀྱི་ཚུལ་དུ་བཀོད་པ། _ མཚུངས་པ་དངོས་སུ་མ་བརྗོད་པ། _ མཚུངས་པ་ཤུགས་ལས་བསྟན་པ། _ མཚུངས་གསལ་གྱི་སྒྲ་ཡོད་པ།
༣༡༽ དཔེ་ཡོན་ཏན་ལྷག་པ་ཞིག་དང༌། དཔེ་ཅན་ཡོན་ཏན་དམན་པ་གཉིས་ཀྱིས་བྱ་བ་རིགས་འདྲ་བ་གང་ཞིག་ཡིན་པ་ དེའི་རང་བཞིན་གཅིག་ཏུ་བསྡུས་ནས། ཕན་ཚུན་མཚུངས་པར་སྦྱོར་བ་ཞིག་ལ་མཚུངས་སྦྱོར་བྱི་དཔེ་ཞེས་བྱ།
_ དཔེ་ཡོན་ཏན་ལྷག་པ་དང་ དཔེ་ཅན་ཡོན་ཏན་དམན་པ་ཞིག་ཡོད་པ་གཞིར་བྱས་པ། _ དཔེ་དཔེ་ཅན་གྱི་ཡོན་ཏན་དམན་ལྷག་གྱི་ཁྱད་པར་སྒྲ་ཟིན་ལ་མི་ཐོན་པ། _ དེ་གཉིས་བྱ་བ་རིགས་འདྲ་བ་གཅིག་ཏུ་བསྡུས་པ། _ མཚུངས་པ་ཤུགས་ལ་སྟོན་པ། _ མཚུངས་གསལ་གྱི་སྒྲ་དངོས་སུ་སྦྱར་མི་དགོས་པ།
༣༢༽ དཔེ་ཅན་ལ་ཡོད་པའི་ཁྱད་ཆོས་དེའི་རྒྱུ་མཚན་སྔོན་ལ་བཀོད་དེ། དཔེ་ཅན་གྱི་ཁྱད་ཆོས་དེ་དང་མཚུངས་པའི་དཔེ་རྗེས་སུ་བསྟན་ནས། དཔེ་དང་དཔེ་ཅན་མཚུངས་པར་བརྗོད་པ་ལ་རྒྱུའི་དཔེ་ཞེས་བྱ།
_ དཔེ་ཅན་ལ་ཡོད་པའི་ཁྱད་ཆོས་དེའི་རྒྱུ་མཚན་སྔོན་དུ་བཀོད་པ། _ དེ་དང་མཚུངས་པའི་དཔེ་རྗེས་སུ་བསྟན་པ། _ དཔེ་དོན་མཚུངས་པར་བརྗོད་པ། _ མཚུངས་གསལ་གྱི་སྒྲ་ཡོད་པ།
དཔེ་དོན་སྦྱོར་ཚུལ་གྱི་སྐྱོན་ཡོན། རྟགས་ཐ་དད་པ་འདྲེས་པ། མང་ཚིག་དང་ཉུང་ཚིག་སྟེ་ཚིག་ཐ་དད་པ་འདྲེས་པ། དཔེ་དོན་མཆོག་དམན་ཆེ་བ།
མཚུངས་པ་གསལ་བྱེད་ཀྱི་སྒྲ། དཔེ་དང་དཔེ་ཅན་ཐ་དད་དུ་བྱས་ནས་ ཕན་ཚུན་མཚུངས་པར་སྦྱོར་བའིཚིག་ལ་ མཚུངས་པ་གསལ་བྱེད་ཀྱི་སྒྲ་ཞེས་བྱ། དེ་ལ་ _ ཤོང་སྤང་ལོ་ཙྭ་བ་རྣམ་གཉིས་ཀྱིས་ རྒྱ་སྐད་སོར་བཞག་མང་བས་ རྣམ་གྲངས་རེ་གསུམ་དུ་བཀྲལ།
_ སྣར་ཐང་ལོ་ཙྭ་བ་སཾགྷ་ཤྲིས་ རྒྱ་སྐད་སུ་ཡོད་པ་ཡོངས་རྫོགས་བསྒྱུར་ནས་ བོད་ཀྱི་ཡི་གེ་དང་ཐ་སྙད་ལ་བསྟུན་ཏེ་ རྣམ་གྲངས་རེ་ལྔར་བཀྲལ། _ ཀུན་མཁྱེན་གོང་མའི་སྡོམ་དུ་ སྡེ་ཚན་གཉིས་པའི་མཇུག་གི་ཆོས་མཐུན་དང༌། ཆོས་ཐུན་མོང་བ། གྲིབ་མ་འདྲ་བ་གསུམ་སོ་སོར་བགྲངས་པས་ཉི་ཤུ་དང༌། སྡེ་ཚན་བཞི་པའི་རྗེས་སུ་འགྲོ་འཆིང་གཅིག་ཏུ་སྦྱར་ཏེ་དགུར་བགྲངས་པས་རེ་དྲུག་ཏུ་བཞེད།
དེ་དག་གྲངས་འདྲེན་རྒྱས་བསྡུས་ཙམ་མ་གཏོགས་ཐམས་ཅད་འདྲ།
ཡོངས་གྲགས་ལྟར་མཚུངས་གསལ་གྱི་སྒྲ་རེ་ལྔ་པོ་དེ།
_ སྔོན་གྱི་རྒྱ་འགྲེལ་གཉིས་ན་དེ་ཚན་གཉིས་སུ་ཕྱེ་ནས་བཤད་པ་དང༌། _ སྣར་ཐང་བ་དང་བོད་ཀྱི་མཁས་པ་དག་གིས་སྡེ་ཚན་བཞིར་ཕྱེ་སྟེ་བཤད།
སྡེ་ཚན་བཞི་ནི།
_ སྡེ་ཚན་དང་ངོ་ལ་དོན་གསལ་བར་བྱེད་པ་ཉེར་གཉིས། _ སྡེ་ཚན་གཉིས་པ་ལ་འདྲ་བའི་དོན་སོགས་གསལ་བར་བྱེད་པ་བཅོ་བརྒྱད། _ སྡེ་ཚན་གསུམ་པ་ལ་དཔེ་རྒྱན་གསལ་བྱེད་བཅོ་ལྔ། _ སྡེ་ཚན་བཞི་པ་ལ་དེ་ལྟ་བུ་ལ་སོགས་པའི་སྒྲ་བཅུའོ།།
གཟུགས་ཅན་གྱི་རྒྱན།
དཔེ་དང་དཔེ་ཅན་ཐ་དད་དུ་བཀོད་ནས་ དེ་གཉིས་འདྲ་བའམ་མཚུངས་པ་ཙམ་བརྗོད་པ་མ་ཡིན་པར། དཔེ་དང་དཔེ་ཅན་གཉིས་ཐ་དད་དུ་སྣང་བ་མིན་པ་སྟེ། དཔེ་དང་དཔེ་ཅན་གཉིས་སོ་སོར་མ་ཕྱེ་བར་དཔེ་ཅན་དེ་དཔེའི་གཟུགས་སུ་བཀོད་པའི་རྒྱན་ལ་གཟུགས་ཅན་གྱི་རྒྱན་ཞེས་བྱ།
༼དཔེ་དང་དཔེ་ཅན་ཐ་དད་དུ་བཀོད་ནས་དེ་གཉིས་འདྲ་བར་སྦྱོར་བ་དཔེ་རྒྱན། དཔེ་ཅན་དཔེའི་ངོ་བོར་བཀོད་ནས་དེ་གཉིས་གཅིག་ཏུ་སྒྲོ་བཏགས་པར་སྦྱོར་བ་གཟུགས་རྒྱན།༽
༡༽ དཔེ་དང་དཔེ་ཅན་གཉིས་ཀྱི་བར་གྱི་འབྲེལ་སྒྲ་བསྡུས་ཏེ་ དཔེ་ཅན་དཔེའི་གཟུགས་སུ་བཀོདཔ་ལ་བསྡུས་པའི་གཟུགས་ཅན་ཞེས་བྱ།
_ དཔེ་ཅན་དཔེའི་ངོ་བོར་བཀོད་པ། _ དཔེ་དོན་གཉིས་ཀྱི་བར་གྱི་འབྲེལ་སྒྲ་བསྡུས་པ།
༢༽ དཔེ་ཅན་གྱི་ཁྱད་གཞི་དང་ཁྱད་ཆོས་ དཔེའི་ཁྱད་གཞི་དང་ཁྱད་ཆོས་ཀྱི་ངོ་བོར་དབྱེར་མེད་དུ་བཀོད་ཅིང༌། དཔེ་དང་དཔེ་ཅན་གཉིས་ཀྱི་བར་གྱི་འབྲེལ་སྒྲ་མ་བསྡུས་པར་ དཔེ་ཅན་དཔེའི་གཟུགས་སུ་བཀོད་པ་ལ་མ་བསྡུས་པའི་གཟུགས་ཅན་ཞེས་བྱ།
_ དཔེ་ཅན་དཔེའི་གཟུགས་སུ་བཀོད་པ། _ དཔེ་དོན་བར་གྱི་འབྲེལ་སྒྲ་མ་བསྡུས་པ།
༣༽ དཔེ་དང་དཔེ་ཅན་གཉིས་ཀྱི་བར་གྱི་འབྲེལ་སྒྲ་བསྡུས་པ་དང་མ་བསྡུས་པ་གཉིས་ཀ་བསྲེས་ཏེ་ཡོད་པ་ལ་བསྡུས་ཤིང་མ་བསྡུས་པའི་གཟུགས་ཅན་ཞེས་བྱ།
_ དཔེ་ཅན་དཔེའི་ངོ་བོར་བཀོད་པ། _ དཔེ་དོན་བར་གྱི་འབྲེལ་སྒྲ་བསྲེས་ཏེ་ཡོད་པ།
༤༽ དཔེ་ཅན་གྱི་ཁྱད་གཞི་དང་ཁྱད་ཆོས་མཐའ་དག་ དཔེའི་ཁྱད་གཞི་དང་ཁྱད་ཆོས་ཀྱི་གཟུགས་སུ་བཀོད་དེ། དེ་གཉིས་ཀ་བཟུང་བར་འོས་པའི་གནས་གཅིག་མཚུངས་སུ་སྨོས་པ་ལ་མཐའ་དག་གཟུགས་ཅན་ཞེས་བྱ།
_ ཁྱད་གཞན་དང་ ཁྱད་ཆོས་མཐའ་དག་གི་སྒོ་ནས་དཔེ་ཅན་དཔེའི་གཟུགས་སུ་བཀོད་པ། _ དཔེ་དོན་གཉིས་ཀ་གཅིག་མཚུངས་སུ་སྨོས་པ།
༥༽ དཔེ་ཅན་གྱི་ཁྱད་ཆོས་གང་ཡིན་པ་དེའི་ཆ་ཤས་ཁོ་ན། དཔེའི་གཟུགས་སུ་བཀོད་པ་ལས། དཔེ་ཅན་གྱི་ཆ་ཤས་ཅན་གཟུགས་སུ་མ་བཀོད་པ་ལ་ཆ་ཤས་གཟུགས་ཅན་ཞེས་བྱ།
_ དཔེ་ཅན་གྱི་ཆ་ཤས་ཅན་དཔེའི་གཟུགས་སུ་མ་བཀོད་པ། _ དཔེ་ཅན་གྱི་ཆ་ཤས་དཔེའི་གཟུགས་སུ་བཀོད་པ། _ བྱེད་ལས་གཙོ་ཆེ་བ་དགོས།
༦༽ དཔེ་ཅན་གྱི་ཆ་ཤས་ཅན་ཁོ་ན་ དཔེའི་གཟུགས་སུ་བཀོད་པ་ལས། དཔེ་ཅན་དེའི་ཆ་ཤས་གང་ཡང་དཔེའི་གཟུགས་སུ་མ་བཀོད་པ་ལ་ཆ་ཤས་ཅན་གྱི་གཟུགས་ཅན་ཞེས་བྱ།
_ དཔེ་ཅན་གྱི་ཆ་ཤས་ཅན་ཁོ་ན་ དཔེའི་གཟུགས་སུ་བཀོད་པ། _ ཆ་ཤས་གཞན་དཔེའི་གཟུགས་སུ་མ་བཀོད་པ།
༧༽ དཔེ་ཅན་གྱི་ཡན་ལག་གཅིག་ དཔེའི་ཡན་ལག་གཅིག་གི་གཟུགས་སུ་བཀོད་ཅིང༌། དཔེ་ཅན་གྱི་ཡན་ལག་ལྷག་མ་རྣམས་དང༌། དཔེ་དེའི་ཡན་ལག་གང་གི་གཟུགས་སུའང་མ་བཀོད་པའི་རྒྱན་ལ་ཡན་ལག་གཅིག་གཟུགས་ཅན་ཞེས་བྱ།
_ དཔེ་ཅན་གྱི་ཡན་ལག་དུ་མ་བཀོད་པ། _ དཔེ་ཅན་གྱི་ཡན་ལག་ཅན་གཟུགས་སུ་མ་བཀོད་པ། _ དཔེ་ཅན་གྱི་ཡན་ལག་གཅིག་ཁོ་ན་ དཔེའི་ཡན་ལག་གཅིག་གི་གཟུགས་སུ་བཀོད་པ། _ དཔེ་ཅན་ཡན་ལག་ལྷག་མ་རྣམས་ དཔེའི་ཡན་ལག་གང་གི་གཟུགས་སུའང་མ་བཀོད་པ། _ བདག་པོའི་སྒྲ་སྦྱར་ནས་ ཆོས་ཅན་དེ་ལ་ཡན་ལག་ དེ་ལྡན་པའི་རྐྱེན་གསལ་པོར་ཡོད་པ་དགོས།
དཔེ་ཅན་གྱི་ཁྱད་གཞི་ལ་ ཁྱད་ཆོས་ལྔ་ཙམ་ཞིག་ཡོད་ན། དེའི་ནང་ནས་ཡན་ལག་གཉིས་ཙམ་ཞིག་ཁོ་ན་དཔེའི་གཟུགས་སུབཀོད་ཅིང༌། ཡན་ལག་ལྷག་མ་རྣམས་དང་ ཡན་ལག་ཅན་དེ་གང་གི་གཟུགས་སུའང་མ་བཀོད་པ་ལ་ ཡན་ལག་གཉིས་གཟུགས་ཅན་ཞེས་བྱ།
_ ཡན་ལག་ཅན་གཟུགས་སུ་མ་བཀོད་པ། _ དཔེ་ཅན་གྱི་ཡན་ལག་རྣམས་ལ་གཉིས་ཁོ་ན་གཟུག་སུ་བཀོད་པ། _ ཡན་ལག་ལྷག་མ་རྣམས་གང་གི་གཟུགས་སུའང་མ་བཀོད་པ།
དཔེ་ཅན་གྱི་ཡན་ལག་ལྔ་ཙམ་ཞིག་ལས་ གསུམ་ཙམ་ཞིག་དཔེའི་གཟུགས་སུ་བཀོད་ཅིང་ ཡན་ལག་ལྷག་མ་རྣམས་དང་ ཡན་ལག་ཅན་དེ་གང་གི་གཟུགས་སུའང་མ་བཀོད་པ་ལ་ཡན་ལག་གསུམ་གཟུགས་ཅན་ཞེས་བྱ།
_ དཔེ་ཅན་གྱི་ཡན་ལག་རྣམས་ལས་ གསུམ་ཁོ་ན་གཟུགས་སུ་བཀོད་པ། _ ཡན་ལག་ཅན་དང་ཡན་ལག་ལྷག་མ་རྣམས་གང་གི་གཟུགས་སུའང་མ་བཀོད་པ།
༼ཡན་ལག་གཟུགས་ཅན་ལ་་་་་་བདག་པོའི་(ཅན་)སྒྲ་སྦྱར་ནས་ ཆོས་ཅན་དེ་ལ་ཡན་ལག་དེ་ལྡན་པའི་རྐྱེན་གསལ་པོར་ཡོད་པ་དགོས། ཆ་ཤས་གཟུགས་ཅན་ལ་བྱེད་ལས་གཚོ་ཆེ་བ་དགོས།༽
༨༽ དཔེ་ཅན་གང་གི་རྟེན་དང་བརྟེན་པ་གཉིས་ལྷན་ཅིག་ཏུ་འགྲོགས་པའམ་ལྡན་པ་དེ། དཔེའི་རྟེན་དང་བརྟེན་པ་གཉིས་ཀྱང་ ཕན་ཚུན་འགྲོགས་པའམ་ལྡན་པ་ཞིག་གི་གཟུགས་སུ་བཀོད་པས། དཔེ་ཅན་དེ་དག་ལྷན་ཅིག་ཏུ་གནས་པར་མ་ཟད། དཔེ་རྣམས་ཀྱང་ ལྷན་ཅིག་ཏུ་ལྡན་པའམ་འགྲོགས་པའི་གཟུགས་ཅན་ཞིག་ལ་ལྡན་པའི་གཟུགས་ཅན་ཞེས་བྱ།
_ དཔེ་ཅན་གི་རྟེན་དང་བརྟེན་པ་གཉིས་ཕན་ཚུན་དུ་འགྲོགས་པ། _ དཔེའི་རྟེན་དང་བརྟེན་པ་གཉིས་ཕན་ཚུན་འགྲོགས་པ། _ དཔེ་ཅན་གྱི་རྟེན་དང་བརྟེན་པ་གཉིས་ལྷན་ཅིག་ཏུ་གནས་པ་དེ་ དཔེའི་ལྷན་ཅིག་ཏུ་ལྡན་པའི་གཟུགས་སུ་བཀོད་པ།
༩༽ དཔེ་ཅན་གང་གི་རྟེན་དང་བརྟེན་པ་གཉིས་ དཔེའི་ངོ་བོ་མི་མཐུན་པའམ་ལྷན་ཅིག་ཏུ་མི་ལྡན་པའི་དངོས་པོ་གཉིས་ཀྱི་གཟུགས་སུ་བཀོད་པ་ལ་མི་ལྡན་པའི་གཟུགས་ཅན་ཞེས་བྱ།
_ དཔེ་ཅན་རྟེན་དང་བརྟེན་པའི་ཚུལ་དུ་ཡོད་པ། _ དཔེ་རྟེན་དང་བརྟེན་པར་མེད་པ། _ དཔེ་ཅན་གྱི་རྟེན་དང་བརྟེན་པ་གཉིས་པོ་ དཔེའི་ངོ་བོ་མི་མཐུན་པའམ་ལྷན་ཅིག་ཏུ་མི་ལྡན་པའི་དངོས་པོ་གཉིས་ཀྱི་གཟུགས་སུ་བཀོད་པ།
༡༠༽ ཆོས་གང་གི་རྟེན་ཡན་ལག་ཅན། དཔེའི་གཟུགས་སུ་བཀོད་ཅིང༌། དེ་གཟུགས་ཅན་འཕར་མར་བྱས་ཀྱང་རུང༌། བརྟེན་པ་ཡན་ལག་རྣམས་ཀྱི་འགའ་ཞིག་དཔེའི་གཟུགས་སུ་བཀོད་པར་མ་ཟད་གཟུགས་ཅན་འཕར་མར་ཡང་བཀོད། འགའ་ཞིག་གཟུགས་སུ་གཏན་ནས་མ་བཀོད་པ་ཞིག་ལ་ཡན་ལག་གམ། བརྟེན་པའི་ངོས་ནས་མི་མཉམ་པའམ། མཐོ་དམན་ཡོད་པ་ལྟ་བུ་ཡིན་པས་ན་བརྟེན་པ་མི་མཉམ་པའི་གཟུགས་ཅན་ཞེས་བྱ།
_ རྟེན་པ་ཡན་ལག་ཅན་དེའི་གཟུགས་སུ་བཀོད་པ། _ དེ་གཟུགས་ཅན་འཕར་མར་བྱས་ཀྱང་རུང་མ་བྱས་ཀྱང་རུང་བ། _ བརྟེན་པ་ཡན་ལག་རྣམས་ཀྱི་འགའ་ཞིག་ དཔེའི་གཟུགས་སུ་བཀོད་པ། _ དེ་གཟུགས་ཅན་འཕར་མར་ཡང་བཀོད་པ། _ བརྟེན་པ་ཡན་ལག་ འགའ་ཞིག་གཟུགས་སུ་གཏན་ནས་མ་བཀོད་པ།
(འདིར་བོད་མཁས་པས་བཞེད་ཚུལ་ལ།
_ རྟེན་ཡན་ལག་གང་གིའང་གཟུགས་སུ་མ་བཀོད་པ། _ བརྟེན་པའམ་ཡན་ལག་གི་ཆ་འགའ་རེ་གཟུགས་ཅན་འཕར་མར་བཀོད་པས་ཆོག་པར་གསུངས།)
༡༡༽ དཔེ་ཅན་གྱི་དངོས་པོ་དེ། དཔེ་དངོས་པོ་ཁྱད་པར་ཅན་ཞིག་གི་གཟུགས་སུ་བཀོད་དེ། དེའི་དགོས་པའམ་བྱ་བ་ཁྱད་པར་ཅན་དང་ལྡན་པ་ཞིག་སྟོན་པ་ལ་ཁྱད་པར་དང་བཅས་པའི་གཟུགས་ཅན་ཞེས་བྱ།
_ དཔེ་ཅན་ དཔེའི་དངོས་པོ་ཁྱད་པར་ཅན་ཞིག་གི་གཟུགས་སུ་བཀོད་པ། _ དེའི་དགོས་པའམ་བྱ་བ་ཁྱད་པར་ཅན་ཞིག་སྟོན་པ།
༡༢༽ དཔེ་ཅན་གྱི་དངོས་པོ་ཞིག་ དཔེ་གང་ཡང་རུང་བ་ཞིག་གི་གཟུགས་སུ་བཀོད་དེ། དཔེ་དཔེ་ཅན་གྱིས་བྱ་བ་བྱེད་ཚུལ་འགལ་བར་སྟོན་པ་ཞིག་ལ་འགལ་བའི་གཟུགས་ཅན་ཞེས་བྱ།
_ དཔེ་ཅན་ དཔེ་ཞིག་གི་གཟུགས་སུ་བཀོད་པ། _ དཔེ་ཅན་དེས་དཔེའི་བྱ་བ་མི་བྱེད་པར་སྟོན་པ། _ དཔེ་དེས་དཔེ་ཅན་དེའི་བྱ་བ་མི་བྱེད་པར་སྟོན་པ། _ ཡང་ན་་་་དཔེ་དཔེ་ཅན་གྱི་བྱ་བ་འགལ་བར་བརྗོད་པ།
༡༣༽ དཔེ་ཅན་གྱི་དངོས་པོ་ལ་ཡོད་པའི་རང་གི་ཁྱད་ཆོས་རྣམས་ཀྱི་རྒྱུ་མཚན་དེ་ རང་དང་ཆོས་མཚུངས་པའི་དཔེ་གང་ཡང་རུང་བ་དག་གི་གཟུགས་སུ་བཀོད་པ་ལ་རྒྱུའི་གཟུགས་ཅན་ཞེས་བྱ།
_ དཔེ་ཅན་གྱི་ཁྱད་ཆོས་རྣམས་ཀྱི་རྒྱུ་མཚན་བཀོད་པ། _ རྒྱུ་མཚན་དེ་རང་དང་ཆོས་མཚུངས་པའི་དཔེ་ཞིག་གི་གཟུགས་སུ་བཀོད་པ། _ དཔེ་ཅན་གྱི་དངོས་པོའི་ཁྱད་ཆོས་རྣམས་ དཔེ་ཅན་རང་གི་ཁྱད་གཞི་གཙོ་བོ་གཅིག་པོ་དེ་ལ་འབྲེལ་བ་དགོས་པ། _ དཔེ་ལ་དངོས་པོ་གཅིག་གི་སྟེང་དུ་འབྲེལ་བ་དགོས་པའི་ངེས་པ་མེད།
༡༤༽ དཔེ་ཅན་གྱི་ཁྱད་གཞི་དེ། དཔེ་གང་ཡང་རུང་བ་ཞིག་གི་ཁྱད་གཞིའི་གཟུགས་སུ་བཀོད་ཅིང༌། དཔེ་དོན་གཉིས་ཀྱི་མཚུངས་ཆོས་འགའ་ཞིག་སྒྲ་ལ་སྦྱར། འགའ་ཞིག་དོན་ལ་སྦྱར་བའི་སྒོ་ནས་ དཔེ་དཔེ་ཅན་སོ་སོར་འགོད་དུ་ཡོད་པ་ལ་སྦྱར་བའི་གཟུགས་ཅན་ཞེས་བྱ།
_ དཔེ་ཅན་གྱི་ཁྱད་གཞི་ དཔེ་ཞིག་གི་ཁྱད་གཞིའི་གཟུགས་སུ་བཀོད་པ། _ དཔེ་དོན་གཉིས་ཀྱི་མཚུངས་ཆོས་འགའ་ཞིག་སྒྲ་དང་དོན་ལ་སྦྱར་བ། _ དཔེ་དོན་སོ་སོར་འགོད་དུ་ཡོད་པ།
༡༥༽ ཕལ་པ་དཔེ་ཅན་གྱི་ཁྱད་གཞི་དང་ གཙོ་བོ་དཔེའི་ཁྱད་གཞི་གཉིས་ཀ་ལ་ཡོད་པའི་ཁྱད་ཆོས་ཕན་ཚུན་མཐུན་པར་མཚུངས་པ་གསལ་བྱེད་ཀྱི་སྒྲ་དང་བཅས་གསལ་བར་བརྗོད་ནས། དཔེ་ཅན་དེ་དཔེའི་གཟུགས་སུ་ཡང་བཀོད་པ་ཞིག་ལ་དཔེའི་གཟུགས་ཅན་ཞེས་བྱ།
_ དཔེ་དང་དཔེ་ཅན་གཉིས་ཀ་ལ་ཡོད་པའི་ཁྱད་ཆོས་ མཐུན་པར་མཚུངས་གསལ་གྱི་སྒྲ་དང་བཅས་གསལ་བར་བརྗོད་པ། _ དཔེ་ཅན་དེ་དཔེའི་གཟུགས་སུ་བཀོད་པ།
༡༦༽ ཐོག་མར་དཔེ་ཅན་དེ་དཔེའི་གཟུགས་སུ་བཀོད་དེ། དཔེ་དཔེ་ཅན་གྱི་ཁྱད་གཞི་ཕན་ཚུན་འདྲ་མཚུངས་སུ་ཡོད་པ་ལྟར་བརྗོད་ནས། སླར་ཡང་ཁྱད་ཆོས་གཉིས་མི་མཐུན་པར་སོ་སོར་འབྱེད་བྱེད་ཀྱི་སྒྲ་བཀོད་དེ། མཚུངས་པ་ལས་ལྡོག་པར་བརྗོད་པ་ལ་ལྡོག་པ་ཅན་གྱི་གཟུགས་ཅན་ཞེས་བྱ།
_ དཔེ་ཅན་དཔེའི་གཟུགས་སུ་བཀོད་པ། _ ཁྱད་གཞི་ཕན་ཚུན་མཚུངས་པར་བརྗོད་པ། _ སླར་ཡང་ཁྱད་ཆོས་སོ་སོར་འབྱེད་པའི་སྒྲ་བཀོད་ནས་ མཚུངས་པ་ལས་ལྡོག་པར་བརྗོད་པ།
༡༧༽ དཔེ་ཅན་གྱི་དངོས་པོ་ཞིག་ དཔེ་གང་གི་གཟུགས་སུ་བཀོད་པ་དེ་དགག་བྱ། དེ་འགོག་བྱེད་ནེ་དཔེ་ཅན་རང་གི་བྱ་བའམ་ཁྱད་ཆོས་དེ། དཔེ་དང་མི་མཐུན་པར་བརྗོད་ནས། གང་གི་གཟུགས་སུ་བཀོད་པ་ དེ་དང་མཚུངས་པ་འགོག་པར་བྱེད་པ་ཞིག་ལ་འགོག་པའི་གཟུགས་ཅན་ཞེས་བྱ།
_ དགག་བྱ་་་་་་དཔེ་ཅན་དཔེའི་གཟུགས་སུ་བཀོད་པ། _ འགོག་བྱེད་་་་དཔེ་ཅན་རང་གི་བྱ་བའམ་ཁྱད་ཆོས་བརྗོད་པ། _ དཔེ་དང་མི་མཐུན་པར་བརྗོད་པ། _ དཔེའི་གཟུགས་སུ་བཀོད་པ་འགོག་པ།
༡༨༽ དཔེ་ཅན་གང་ཞིག་ དཔེའི་གཟུགས་སུ་བཀོད་པ་དེས། རང་གི་ངང་ཚུལ་དང་མི་མཐུན་པའི་བྱ་བ་བྱེད་པར་འོས་མིན་གྱི་སྐྱོན་དང༌། བྱ་བའི་ཡུལ་ཉིད་ལ་ཡང་སྐབས་གང་ཡིན་གྱི་སྐྱོན་དང་བཅས་ཏེ། མདོར་ན་ཡུལ་དང་ཡུལ་ཅན་གཉིས་ཀ་ལ་སྐྱོན་ཡོད་པ་མཚུངས་པའམ་ མཉམ་དུ་སྟོན་པ་ལ་མཉམ་འཇོག་གི་གཟུགས་ཅན་ཞེས་བྱ།
_ དཔེ་ཅན་དཔེའི་གཟུགས་སུ་བཀོད་པ། _ ཡུལ་དང་ཡུལ་ཅན་གཉིས་ཀ་སྐྱོན་ཡོད་མཚུངས་པར་སྟོན་པ།
༡༩༽ དཔེ་ཅན་གྱི་དངོས་པོ་ཞིག་ དཔེའི་གཟུགས་སུ་བཀོད་ཅིང༌། དཔེ་དེ་ཉིད་ཀྱང་དཔེ་གཞན་གྱི་གཟུགས་སུ་སྦྱོར་བ་ལ་གཟུགས་ཅན་གྱི་གཟུགས་ཅན་ཞེས་བྱ།
_ དཔེ་ཅན་དཔེའི་གཟུགས་སུ་བཀོད་པ། _ དཔེ་ཡང་དཔེ་གཞན་ཞིག་གི་གཟུགས་སུ་བཀོད་པ།
༢༠༽ དཔེ་ཅན་གྱི་དངོས་པོ་དེར། མངོན་སུམ་དུ་བསྙོན་དོར་ནས། དཔེ་ཉིད་ཡིན་པར་བརྗོད་དེ། དཔེ་དང་ངོ་བོ་གཅིག་ཏུ་བྱས་ཤིང་དོན་ལ་དཔེ་ཅན་ཁྱད་འཕགས་སུ་བྱས་ནས་སྟོན་པ་ལ་བསྙོན་དོར་གཟུགས་ཅན་ཞེས་བྱ།
_ དཔེ་ཅན་ལ་བསྙོན་དོར་བ། _ དཔེ་ཉིད་ཡིན་པར་བརྗོད་པ། _ དོན་ལ་དཔེ་ཅན་ཁྱད་འཕགས་སྟོན་པ།