ཨ་ཅོ་གདོང་དཀར།
༉ ཨ་ཅོ་གདོང་དཀར་འདི་ ཧི་མ་ལ་ཡའི་ཤར་ཕྱོགས་དང་ རྒྱ་ནག་གྱི་ལྷོ་ནུབ་ཁ་ཐུག་གི་ས་གནས་ཚུ་ནང་གནས་པའི་ གཅན་གཟན་གྱི་རིགས་ཅིག་ཨིན། གཅན་གཟན་འདི་ སྤུ་ཁ་དམར་སྨུག་ མཇུག་མ་རིངམ་སྦེ་ཡོདཔ་དང་ བཟོ་རྣམས་བྱི་ལི་བཟུམ་སྦེ་ཡོདཔ་ཨིན། སེམས་ཅན་འདི་ ཨོ་འཐུང་སེམས་ཅན་གྱི་རིགས་ནང་ཚུད་དོ་ཡོདཔ་དང་ འཛམ་གླིང་རི་དྭགས་སྲུང་སྐྱོབ་སྤྱི་ཚོགས་ཀྱིས་ འཛམ་གླིང་ནང་ལས་ཡལ་འགྱོ་ནིའི་ཉེན་ཁ་སྦོམ་ཡོད་པའི་སེམས་ཅན་གྱི་ཐོ་ནང་ མཚན་རྟགས་དམརཔོ་བཀོད་དེ་ཡོད་པའི་སེམས་ཅན་ཅིག་ཨིན། ད་རེས་སེམས་ཅན་འདི་ ཧི་མ་ལ་ཡ་ལུང་ཕྱོགས་རྒྱ་ནག་ བལ་བུ་ འབྲུག་དང་རྒྱ་གར་ལ་སོགས་པའི་རྒྱལ་ཁབ་ཀྱི་ས་གནས་ བསིལ་དྲོད་དང་ལྡན་མི་ཚུ་ནང་མཐོང་དོ་ཡོདཔ་ཨིན།
ཨ་ཅོ་གདོང་དཀར་འདི་ ཤིང་གུ་འཛེགས་ནི་ལུ་ རྩལ་དྲགས་ཡོད་པའི་སེམས་ཅན་ཅིག་ཨིནམ་ལས་ ཤིང་གི་འདབ་མ་དང་མེ་ཏོག་ དེ་ལས་ ཤིང་འབྲས་ཚུ་ཟ་དོ་ཡོདཔ་དང་ གཙོ་བོ་སྦ་གི་ལྕུག་གུ་ལུ་བརྟེན་ཏེ་སྡོད་དོ་ཡོདཔ་ཨིན། འདི་མ་ཚད་སྒོང་རྡོག་དང་ཤིང་གི་སྤགས་ཀོ་ འཕྲལ་འཕྲལ་བྱ་དང་སེམས་ཅན་ཆུང་ཀུའི་རིགས་དང་ ཉའི་རིགས་ཚུ་ཡང་བསད་དེ་ཟ་དོ་ཡོདཔ་ཨིན། གཞན་ཡང་ ཤ་མུ་དང་ཤིང་གི་ར་ཏོ་ ལྷོན་ལྡུམ་དང་རྩའི་རིགས་ཚུ་ཡང་ཟ་དོ་ཡོདཔ་ཨིན། ཨ་ཅོ་གདོང་དཀར་ཚུ་ ཤིང་གི་ཞལ་ལག་དང་ཤིང་སྡོང་ཚུ་ནང་སྡོད་དོ་ཡོདཔ་དང་ ཉིན་མ་བ་ནུབ་མོ་བྱེལ་བྱ་ཆེ་བའི་སེམས་ཅན་ཅིག་ཨིན། འདི་འབདཝ་ལས་ ཉིམ་ནུབ་ལུ་འཛུལ་ཁམས་ཅིག་ལས་ ལྟོ་འཚེལ་ནི་དང་རང་གི་སྡོད་གནས་ཚུ་སྐོར་སྲུང་འབད་ནི་ཚུ་འགོ་བཙུགས་དོ་ཡོདཔ་ཨིན། སྐོར་སྲུང་འབད་ཐངས་ཡང་ རོ་ཁྱི་བཟུམ་སྦེ་ ཆབ་གསང་བསྡུསཔ་བཏང་སྟེ་རྟགས་བཀལ་བཞག་དོ་ཡོདཔ་ཨིན།
ཨ་ཅོ་གདོང་དཀར་གྱི་ཚེ་ཚད་ ལོ་ ༨ དང་ ༡༠ གི་བར་ནང་ཨིནམ་དང་ ལ་ལུ་གིས་ལོ་ ༡༥ དེ་ཅིག་སྡོད་ཚུགས་དོ་ཡོདཔ་ཨིན། དེ་ལས་ སེམས་ཅན་འདི་གིས་ཕྱུག་གུ་འཚའ་ནི་ལུ་ དུས་ཡུན་ཟླཝ་ ༡༨ འགོར་དོ་ཡོདཔ་དང་ ཕྱུག་གུ་འཚའ་ཞིནམ་ལས་ ལོ་གཉིས་དེ་ཅིག་གི་རྒྱབ་ལས་ དྲནམ་ཁུག་སྟེ་ རང་གིས་ལྟོ་འཚོལ་ཏེ་ཟ་ཚུགསཔ་འགྱོ་དོ་ཡོདཔ་ཨིན།
འཛམ་གླིང་རི་དྭགས་སྲུང་སྐྱོབས་སྤྱི་ཚོགས་དང་འཁྲིལཝ་ད་ ཨ་ཅོ་གདོང་དཀར་གྱི་གྱངས་ཁ་འདི་ སྤྱི་ལོ་ ༢༠༠༨ ལུ་ སྟོང་ཕྲག་བཅུ་ཐམ་ དེ་ཅིག་ཡོདཔ་ཨིན་རུང་ ལོ་གཅིག་བ་ལོ་གཅིག་ གྱངས་ཁ་མར་ཉམས་འགྱོ་དོ་ཡོདཔ་ཨིན། འདི་ཡང་ འཛམ་གླིང་ས་གཤིས་འགྱུར་བ་དང་བསྟུན་ ཁོང་འཁྱམས་སའི་ས་ཁོངས་ཚུ་ལུ་གནོད་རྐྱེན་བྱུང་སྟེ་ གནམ་གཤིས་འཕྲོད་བསྟེན་དང་མ་མཐུན་པའི་རྐྱེན་གྱིས་ ཉམས་འགྱོ་དོ་ཡོདཔ་དང་ རྒྱུ་མཚན་གཅིགཔོ་འདི་ སེམས་ཅན་འདི་གི་སྤུ་ཁ་འཇའ་ཆི་ཆི་ཡོདཔ་ལས་ མི་ཚུ་གིས་ལྤགས་ཀོ་ཚོང་འབྲེལ་གྱི་དོན་ལུ་ བསད་དོ་ཡོདཔ་ཨིན། འདི་འབདཝ་ལས་ སེམས་ཅན་འདི་གི་རིགས་འདི་ མ་འོངས་པའི་ནང་མེདཔ་འགྱོ་ནིའི་ ཉེན་ཁ་སྦོམ་ཕོག་འདི་ཡོདཔ་ཨིན།
ཁུངས་གཏུག།
[ཞུན་དག]Wikipedia contributors. (2021).Red Panda. In Wikipedia, The Free Encyclopedia. Retrieved from https://en.wikipedia.org/wiki/Red_panda