འབྲུག་གཞུང་འཕྲུལ་རིག་ལས་སྡེ། Ι GovTech Agency
འབྲུག་གི་ཞི་གཡོག་ལེགས་སྒྱུར་བཅའ་ཁྲིམས་༢༠༢༢ ཅན་མ་དང་ཞི་གཡོག་ལྷན་ཚོགས་ལས་ སྤྱི་ཚེས་༣༠/༡༢/༢༠༢༢ ལུ་གནང་བའི་བཀའ་དང་འཁྲིལ་ཏེ་ ལྷན་ཁག་ཚུ་ལྷན་ཁག་དགུའི་ནང་གཞི་སྒྱུར་འབད་དེ་ བསྡབས་ཡོདཔ་ཨིན། ཧེ་མ་ཡོད་མི་ བརྡ་དོན་དང་བརྒྱུད་འབྲེལ་ལྷན་ཁག་ མེདཔ་བཟོ་ཡོདཔ་ད་ དེ་ནང་ཡོད་པའི་ལས་ཁུངས་གང་རུང་ཡང་ན་ ལས་སྡེ་ཚུ་གོང་འཁོད་ཀྱི་ ལྷན་ཁག་ཚུ་གི་འོག་ལུ་བསྡབས་ཡོདཔ་ཨིན།
དེ་བཟུམ་སྦེ་ འབྲུག་གི་ཞི་གཡོག་ལེགས་སྒྱུར་བཅའ་ཁྲིམས་༢༠༢༢ དང་འཁྲིལ་ཏེ་ འབྲུག་གཞུང་འཕྲུལ་རིག་ལས་སྡེ་ གཞི་བཙུགས་ འབད་ཡོདཔ་ཨིན། བརྡ་དོན་འཕྲུལ་རིག་དང་བརྒྱུད་འཕྲིན་ལས་ཁུངས་འདི་ འབྲུག་གཞུང་འཕྲུལ་རིག་ལས་སྡེ་སྦེ་བརྩི་དགོཔ་ཨིནམ་ད་འབྲུག་གཞུང་འཕྲུལ་རིག་ལས་སྡེ་གིས་ སྲིད་བྱུས་བརྩམ་ནི་ བཅའ་ཡིག་ ཡང་ན་ སྒྲིག་གཞི་ཆ་འཇོག་འབད་ནི་དང་འབྲེལ་ཡོད་ཁྲིམས་ཚུ་གི་ ལག་ལེན་བརྩིས་པའི་ རྒྱལ་ཁབ་ནང་གི་བརྡ་དོན་བརྒྱུད་འབྲེལ་དང་ འཕྲུལ་རིག་དང་འབྲེལ་བའི་བྱ་སྒོ་ཚུ་བསྒྲུབ་དགོཔ་ཨིན་མས།
དམིགས་ཡུལ།[ཞུན་དག།]
འབྲུག་གཞུང་འཕྲུལ་རིག་ལས་སྡེའི་དམིགས་ཡུལ་འདི་ འཕྲུལ་རིག་གི་ཐད་ཁར་ གོང་འཕེལ་གྱི་རྒྱལ་ཁབ་ཅིག་འབད་ དབང་ཤུགས་ཡོད་པའི་མི་ཁུངས་དང་ དཔལ་འབྱོར་ཡར་རྒྱས་འགྱོ་མི་ཅིག་འབད་སྡོད་དགོཔ་ཨིན།
དམིགས་དོན།[ཞུན་དག།]
དམིགས་དོན་འབད་བ་ཅིན་ དང་པ་འཕྲུལ་རིག་གི་ཐད་ཁར་ གྲུབ་འབྲས་ཅན་དང་ཕན་ཐོགས་ཅན་ཡོད་མི་གཞུང་ཅིག་གཞི་བཙུགས་འབད་ནི། གཉིས་པ་མི་སེར་ཚུ་ལྟེ་བ་ལུ་བཞག་སྟེ་ མི་མང་གི་ཞབས་ཏོག་ཚུ་ འགྱུར་བཅོས་འབད་ནི། གསུམ་པ་ ཉེན་སྲུང་ཅན་སྦེ་དཔལ་འབྱོར་ཡར་རྒྱས་འགྱོཝ་བཟོ་ནི་ཚུ་ཨིན་པས།
འབྲུག་གཞུང་འཕྲུལ་རིག་ལས་སྡེ་འོག་ལུ་ བསྡོམས་ཀྱི་སྡེ་ཚན་༡༢ ཡོདཔ་ཨིན། དེ་ཚུ་ཡང་[ཞུན་དག།]
༡༽ གློག་རིག་ཉེན་སྲུང་གི་སྡེ་ཚན།
༢༽ འཕྲུལ་རིག་དང་བཟོ་གྲྭ་གོང་འཕེལ་སྡེ་ཚན།
༣༽ གནས་སྡུད་ཚན་རིག་བཟོ་བཀོད་རིག་པ་སྡེ་ཚན།
༤༽ གློག་འཕྲིན་དང་གནམ་གྲུའི་སྡེ་ཚན།
༥༽ སྤྲིན་གྱི་ཞབས་ཏོག་སྡེ་ཚན།
༦༽ གཞུང་སྐྱོང་གི་ཡོངས་འབྲེལ་སྡེ་ཚན།
༧༽ གསར་འགྱུར་འབྱུང་མི་འཕྲུལ་རིག་སྡེ་ཚན།
༨༽ ཨང་ཅན་འགྱུར་བཅོས་སྡེ་ཚན།
༩༽ ཨང་ཅན་ཞབས་ཏོག་འགྱུར་བཅོས་སྡེ་ཚན།
༡༠༽ ཨང་ཅན་ཞབས་ཏོག་ལག་ལེན་འཐབ་ནི་དང་བདག་སྐྱོང་སྡེ་ཚན།
༡༡༽ ཡིག་ཚང་དང་བདག་སྐྱོང་གྱི་ཞབས་ཏོག་སྡེ་ཚན།
༡༢༽ གཞུང་ཡོངས་རྫོགས་ཀྱི་གློག་རིག་ལམ་ལུགས་སྡེ་ཚན།
འབྲུག་གཞུང་འཕྲུལ་རིག་ལས་སྡེ་གི་ ལས་འགུལ་གརྩོབོ་གཅིག་འདི་ འབྲུག་གི་རྒྱལ་ཡོངས་ཨང་ཅན་ངོ་རྟགས་ཀྱི་ཕྱག་འགན་འདི་ཨིན། འཕྲུལ་རིག་ལག་ལེན་འཐབ་ཐོག་ རྒྱལ་ཡོངས་ཀྱི་དམིགས་གཏད་དང་ལྡན་པའི་ མི་སེར་གྱི་བདེ་ཐབས་ རྒྱལ་ཁབ་ཀྱི་ཡར་རྒྱས་དང་གོང་འཕེལ་བསྒྲུབ་ཐབས་ཀྱི་དོན་ལུ་ འབྲུག་གི་རྒྱལ་ཡོངས་ཨང་ཅན་ངོ་རྟགས་བཅའ་ཁྲིམས་ ༢༠༢༣ ཅན་མ་འདི་ཆ་འཇོག་མཛད་གྲུབ་ཨིན།
བཅའ་ཁྲིམས་འདི་ནང་གཙུག་སྡེའི་གཞི་བཀོད་འབད་བ་ཅིན་ འབྲུག་གཞུང་འཕྲུལ་རིག་ལས་སྡེ་འཛིན་སྐྱོང་འདུས་ཚོགས་ཀྱི་འཐུས་མི་ཡང་ མི་ངོམ་ལྔ་ལས་མ་ལྷགཔ་ཅིག་འོང་དགོཔ་ཨིན་མས། འཐུས་མི་འདི་ཚུ་ཡང་དང་པ་ འབྲུག་གཞུང་འཕྲུལ་རིག་ལས་སྡེའི་ འགོ་འཛིན་པ། གཉིས་པ་ལྷན་རྒྱས་གཞུང་ཚོགས་ཀྱིས་ བསྐོ་བཞག་འབད་ཡོད་པའི་ འབྲེལ་ཡོད་གཞུང་གི་ལས་སྡེ་ནང་ལས་ ཞི་གཡོགཔ་གཉིས། གསུམ་པ་འབྲུག་གཞུང་འཕྲུལ་རིག་ལས་སྡེ་གིས་ ཁྱད་རིག་ཉམས་མྱོང་དང་འབྲེལ་ཡོད་རིམ་ལུགས་ཀྱི་ མཁས་མཆོག་ལུ་གཞི་བཞག་ཐོག་ བསྐོ་བཞག་འབད་ཡོད་པའི་འཐུས་མི་གཉིས་ དགོཔ་འབད་ཡོདཔ་ཨིན།
འཛིན་སྐྱོང་འདུས་ཚོགས་ཀྱི་ལཱ་འགན་ ཡང་དང་པ་འཛིན་སྐྱོང་འདུས་ཚོགས་ཀྱིས་ རྒྱལ་ཡོངས་ཨང་ཅན་ངོ་རྟགས་འཛིན་སྐྱོང་གཞི་བཀོད་ཀྱི་གནང་བ་གནང་ནི། གཉིས་པ་ རྒྱལ་ཡོངས་ཨང་ཅན་ངོ་རྟགས་ཀྱི་ གཞི་རྟེན་མཁོ་ཆས་ཀྱི་གནང་བ་གནང་ནི། གསུམ་པ་ བདག་སྐྱོང་འདུས་ཚོགས་ཀྱི་མཐུན་ཕྱོགས་ ལྟ་རྟོག་འབད་ནི། བཞི་པ་ སྤྲོད་མི་དང་བདེན་སྦྱོར་འབད་མི་དེ་ལས་དེ་བཟུམ་གྱི་ལས་ཚན་གཞན་ཚུ་གིས་ གཅིག་བསྡོམས་འབད་ནིའི་དོན་ལུ་ གནང་བ་གནང་ནི་ཚུ་ཨིན་མས།
དེ་དང་གཅིག་ཁར་ འབྲུག་གཞུང་འཕྲུལ་རིག་ལས་སྡེ་གི་ ལས་འགུལ་སོར་སོ་ཚུ་ཡང་ བཤམ་བསལ་བལྟར་ ཡོད་མི་ཚུ་ཨིན།[ཞུན་དག།]
Ø ཡོངས་འབྲེལ་ཐོག་ལས་མཉམ་འབྲེལ་གྱི་འཆར་གཞི་དང་ལས་འགུལ།
Ø གཞུང་ལས་གཞུང་གྱི་འཕྲུལ་ཆས་ལག་ལེན་འཐབ་པའི་ལས་འགུལ་ཚུ་ འཕྲུལ་ཆས་ལག་ལེན་འཐབ་ཐོག་བཟོ་ནི།
Ø ཐིམ་ཕུག་གི་ས་ཁོངས་རྒྱ་ཆེ་བའི་ཡོངས་འབྲེལ་གྱི་ལས་འགུལ་དང་འཆར་གཞི།
Ø ནང་འཁོད་ཡོངས་འབྲེལ་གྱི་ལས་འགུལ་དང་འཆར་གཞི།
Ø གནས་སྡུད་ལྟེ་བ་ལས་འགུལ་དང་འཆར་གཞི།
Ø བརྡ་དོན་ཉེན་སྲུང་ལས་འགུལ་དང་འཆར་གཞི།
Ø གློག་རིག་གི་ ཕྱགས་སྙིགས་འཛིན་སྐྱོང་ལས་འགུལ་དང་འཆར་གཞི།
Ø གློག་བརྙན་ཚོགས་པའི་ལམ་ལུགས་ཞལ་འཛོམས་ཀྱི་ལས་འགུལ་དང་འཆར་གཞི།
Ø ནང་འཁོད་ཡོངས་འབྲེལ་གྱི་བརྗེ་སོར་ལས་འགུལ་དང་འཆར་གཞི།
Ø སློབ་གྲྭ་དང་སྨན་ཁང་ལུ་ཡོངས་འབྲེལ་མཐུད་འབྲེལ་ལས་འགུལ་དང་འཆར་གཞི།
Ø གློག་འཕྲིན་གྱི་སློབ་སྦྱོང་ལས་འགུལ་དང་འཆར་གཞི།
འབྲུག་གཞུང་འཕྲུལ་རིག་ལས་སྡེ་གི་དྲུང་ཆེན་དང་པ་འདི་འཇིགས་མེད་བསྟན་འཛིན་་བསྐོ་བཞག་གནང་ནུག།
༼རྩོམ་ཡིག་འདི་སྲོལ་འཛིན་དང་རྫོང་ཁ་གོང་འཕེལ་ལས་ཁུངས་ཀྱི་སྐད་ཡིག་ཞིབ་འཚོལ་དང་ལས་རིམ་སྡེ་ཚན་གྱི་ཞལ་འདེབས།༽
Source : Department of Culture and Dzongkha Development.
རྒྱབ་རྟེན་དཔེ་ཐོ།[ཞུན་དག།]
༡༽ འབྲུག་གཞུང་འཕྲུལ་རིག་ལས་སྡེ། https://tech.gov.bt/projects
༢༽ རྒྱལ་གཞུང་ཞི་གཡོག་ལྷན་ཚོགས། https://www.ecb.bt/elections/
༣༽ འབྲུག་གི་སྤྱི་ཚོགས།༼གནམ་ལོ་མེད་༢༠༢༣༽ འབྲུག་གི་རྒྱལ་ཡོངས་ཨང་ཅན་ངོ་རྟགས་བཅའ་ཁྲིམས་༢༠༢༣ ཅན་མ། https://web.archive.org/web/20240329043536/https://www.nab.gov.bt/assets/uploads/docs/acts/2023/National_Digital_Identity_Act_of_Bhutan_2023F.pdf
༤༽ འབྲུག་གི་སྤྱི་ཚོགས།༼གནམ་ལོ་མེད་༢༠༢༢༽ འབྲུག་གི་ཞི་གཡོག་ལེགས་སྒྱུར་བཅའ་ཁྲིམས་༢༠༢༢ ཅན་མ། https://www.rcsc.gov.bt/wp-content/uploads/2022/12/Civil-Service-Reform-Act-of-Bhutan-2022.pdf
༥༽ བརྡ་དོན་བརྒྱུད་འབྲེལ་དང་བརྡ་བརྒྱུད་དབང་འཛིན༼གནམ་ལོ་མེད་༢༠༡༨༽ འབྲུག་གི་བརྡ་དོན་བརྒྱུད་འབྲེལ་དང་བརྡ་བརྒྱུད་བཅའ་ཁྲིམས་༢༠༡༨ ཅན་མ། https://www.bicma.gov.bt/bicmanew/data/publications/act/+BICM_Act_2018_English.pdf