ཐིམ་ཕུག་རྒྱལ་འཛིན་མཐོ་རིམ་སློབ་གྲྭ།
༉ འབྲུག་རྒྱལ་འཛིན་གཙུག་ལག་སློབ་སྡེའི་ མངའ་འོག་ལུ་ཡོད་པའི་ ཐིམ་ཕུག་རྒྱལ་འཛིན་མཐོ་རིམ་སྲོབ་གྲྭ་འདི་ སྤྱི་ལོ་ ༢༠༠༩ ལུ་གཞི་བཙུགས་གནང་ནུག། མཐོ་རིམ་སློབ་གྲྭ་འདི་ གཞི་བཙུགས་འབད་དགོ་མི་འདི་ཡང་ རྒྱལ་སྤྱིའི་གནས་ཚད་ནང་ དོ་འགྲན་ འབད་དེ་ སྤུས་ཚད་ཅན་གྱི་གཙུག་ལག་གཞི་རིམ་གྱི་ཤེས་ཡོན་སློབ་སྦྱོང་ བྱིན་ནིའི་དོན་ལུ་ཨིན་མས། མཐོ་རིམ་སློབ་གྲྭ་ནང་ལུ་ དུས་རྒྱུན་གྱི་སློབ་སྦྱོང་པ་ ༩༠༠ ལྷགཔ་ཅིག་ཡོདཔ་དང་ འཕྲོ་མཐུད་ཤེས་ཡོན་སྦྱང་མི་སློབ་ཕྲུག་ ༡༥༠ དེ་ཅིག་ཡོདཔ་ཨིན་མས།
ཐིམ་ཕུག་རྒྱལ་འཛིན་མཐོ་རིམ་སློབ་གྲྭ་འདི་ འབྲུག་རྒྱལ་ཁབ་ནང་ལུ་ སྒེར་གྱི་མཐོ་རིམ་སློབ་གྲྭ་ འགོ་དང་པ་ཨིན་མས། སྤྱི་ལོ་ ༢༠༡༢ ལུ མཐོ་རིམ་སློབ་གྲྭ་འདི་ནང་ལས་ ཐོན་རིམ་དང་པའི་སློབ་ཕྲུག་ཚུ་ མཐར་འཁྱོལ་ཡོདཔ་དང་ རྒྱལ་སྤྱིའི་སློབ་ཕྲུག་ཚུ་ཡང་ འཛུལ་ཞུགས་འབད་ཞིནམ་ལས་ མཐོ་རིམ་སློབ་གྲྭ་འདི་ སྔར་བ་ལྷགཔ་སྦེ་གོང་འཕེལ་སོང་ནུག། སྤྱི་ལོ་ ༢༠༡༣ ལུ་ འབྲུག་རྒྱལ་འཛིན་གཙུག་ལག་སློབ་སྡེ་ལས་ གནང་བ་དང་འཁྲིལ་ཏེ་ མཐོ་རིམ་སློབ་གྲྭ་ནང་ལུ་ འཕྲོ་མཐུད་ཤེས་ཡོན་སློབ་སྦྱོང་ལས་རིམ་ཡང་ འགོ་བཙུགས་གནང་ནུག།
མཐོ་རིམ་སློབ་གྲྭའི་འཕྲོ་མཐུད་ཤེས་ཡོན་ལས་རིམ་འདི་ དམིགས་བསལ་གྱི་སྤྲོ་བ་ཡོད་མི་ཚུ་གིས་རྒྱུད་ལུ་ ཤེས་ཡོན་གོང་འཕེལ་བཏང་ནིའི་ དོན་ལུ་ ཕྱི་རུ་ལྷབ་དོ་ཡོདཔ་ཨིན། དུས་རྒྱུན་གྱི་སློབ་སྦྱོང་པ་འདི་ཚུ་ གཙུག་ལག་ཤེས་ཚད་ ལོ་གསུམ་སློབ་སྦྱོང་འབད་དགོཔ་དང་ འཕྲོ་མཐུད་ ཤེས་ཡོན་སྦྱང་མི་ཚུ་གིས་ སློབ་སྡེ་རེ་རེ་ནང་ སློབ་ཚན་གསུམ་དང་ བཞི་རེ་སྦྱང་དོ་ཡོདཔ་ཨིན་མས།
ཐིམ་ཕུག་རྒྱལ་འཛིན་མཐོ་རིམ་སློབ་གྲྭ་ (ལོ་མེད་) en.m.wikipedia.org ལྟར་དུ་འབད་བ་ཅིན་ མཐོ་རིམ་སློབ་གྲྭ་འདི་ ས་གནས་ སྔགས་པའི་ཕུག་ ཟེར་ས་ལུ་ ས་གཞི་ཨེ་ཀར་ ༢༥ དེམ་ཅིག་ཡོད་ས་ལུ་ ཆགས་ཏེ་ཡོདཔ་ཨིན་མས། དེ་ཡང་ མཐོ་རིམ་སློབ་གྲྭ་འདི་ ཐིམ་ཕུག་རྫོང་ཁག་གི་ ས་གནས་མཐའ་ཟུར་ཅིག་ལུ་ཡོདཔ་དང་ འབྲུག་གི་རྒྱལ་ས་ལྟེ་བ་ཐིམ་ཕུག་ལས་ ཀི་ལོ་མི་ཊར་ ༧ གི་ ས་ཁ་ལུ་ཡོདཔ་ཨིན་མས།
སྤྱི་ལོ་ ༢༠༡༥-༢༠༡༦ ཤེས་ཡོན་གྱི་ལོ་ལུ་ སློབ་སྦྱོང་ལས་རིམ་ཚུ་ཡང་ གཙུག་ལག་གཞི་རིམ་ཚོང་འབྲེལ་བདག་སྐྱོང་དང་ གཙུག་ལག་ གཞི་རིམ་ཚོང་རིག། དེ་ལས་ གཙུག་ལག་གཞི་རིམ་གྱི་རིག་རྩལ་ ཨིང་སྐད་དང་ རང་བཞིན་གནས་སྟངས་ཀྱི་སློབ་སྦྱོང་། གཙུག་ལག་གཞི་རིམ་སྒྱུ་རྩལ་གྱི་ཨིང་སྐད་དང་རྫོང་ཁ་ དེ་ལས་ གཙུག་ལག་གཞི་རིམ་གྱི་གློག་རིག་ཚུ་ཡོདཔ་ཨིན་མས།
ཐིམ་ཕུག་རྒྱལ་འཛིན་མཐོ་རིམ་སློབ་གྲྭ་ (ལོ་མེད་) https://www.rtc.bt/index.php/aboutrtc/mission-and-vision དེ་ནང་འབད་བ་ཅིན་ འབྲུག་ལུ་ཤེས་རིག་གི་སྤུས་ཚད་ ལེགས་ཤོམ་བཟོ་ནིའི་དོན་ལུ་ རྒྱལ་སྤྱིའི་སློབ་སྟོན་ཐབས་ཤེས་ལག་ལེན་ཐབས་ཏེ་ སློབ་ཕྲུག་ཚུ་གི་རྒྱུད་ལུ་ བློ་རིག་གོང་འཕེལ་བཏང་སྟེ་ མི་ཚེ་དོན་དང་ལྡན་ཡོདཔ་བཟོ་ནི། དེ་ལས་ གཙུག་སྡེ་དང་འབྲེལ་བའི་ལམ་སྲོལ་གསར་གཏོད་འབད་དེ་ ཞབས་ཏོག་ལེན་མི་ཚུ་ སྤུས་ཚད་ཅན་བཟོ་ནི་དང་། ཤེས་རིག་གི་ ཐབས་ཤེས་གསརཔ་འདི་ལུ་ སྙིང་སྟོབས་བསྐྱེད་དེ་ མི་ཚེ་ལེགས་བཅོས་འབད་དེ་ དགའ་སྐྱིད་དང་ལྡནམ་བཟོ་ནིའི་དོན་ལུ་ དམིགས་གཏད་བསྐྱེད་དོ་ཡོདཔ་ཨིན་མས། མཐོ་རིམ་སློབ་གྲྭའི་འཆར་སྣང་འདི་ སློབ་སྦྱོང་པ་ཚུ་གི་རྒྱུད་ལུ་ མཆོག་གྱུར་གྱི་ཤེས་ཡོན་ཐོབ་སྟེ་ མི་ཚེ་མཐར་འཁྱོལ་ཅན་དང་ རང་མགོ་རང་འདྲོང་སྡོད་ཚུགསཔ་བཟོ་སྟེ་ བློ་གཏད་ཚུགས་པའི་ མི་ཁུངས་གྱུར་ནི་ལུ་བརྩོན་དོ་ཡོདཔ་ཨིན་མས།
རྒྱབ་རྟེན།
ཐིམ་ཕུག་རྒྱལ་འཛིན་མཐོ་རིམ་སློབ་གྲྭ། (ལོ་མེད) en.m.wikipedia.org
ཐིམ་ཕུག་རྒྱལ་འཛིན་མཐོ་རིམ་སློབ་གྲྭ། (ལོ་མེད) https://www.rtc.bt/index.php/aboutrtc/mission-and-vision