དངོས་གྲུབ་རྡོ་རྗེ།
ཡོན་ཏན་སྣ་མང་དང་ལྡན་པའི་འཁྲབ་རྩེདཔ་དངོས་གྲུབ་རྡོ་རྗེ་འདི་ ཀྲོང་གསར་ལས་ཨིནམ་དང་ ཁོ་རའི་འབྲི་རིམ་སློབ་གྲྭའི་ཤེས་ཡོན་འདི་སེམས་རྟོགས་ཁ་ལས་མཐར་འཁྱོལ་ནུག། ཁོ་ར་སློབ་རིམ་ ༡༢ པ་མཐར་འཁྱོལ་བའི་ཤུལ་ལས་འབྲུག་རྒྱང་གབསྒྲགས་ལས་འཛིན་ནང་འཛུལ་ཞུགས་འབད་ཡོད་རུང་ ལོ་ངོ་དག་པ་ཅིག་གི་རྒྱབ་ལས་ རྒྱང་བསྒྲགས་ནང་ལས་དགོངསམ་ཞུ་སྟེ་ སྒེར་གྱི་ལཱ་ཅིག་འགོ་བཙུགས་ནུག།
དངོས་གྲུབ་རྡོ་རྗེ་ཁོ་ར་འབྲུག་རྒྱལ་ཁབ་ནང་ལུ་སྐད་ཅན་མིང་ཅན་ཅིག་སྦེ་ མིང་འཐོན་ཚུགས་མི་འདི་ཡང་འབྲུག་རྒྱང་བསྒྲགསརེ་ཌེའོ་ནང་ལུ་ཞབས་ཁྲ་འཐེན་ནིའི་གོ་སྐབས་གནང་མི་ལས་ཚུར་ འགོ་བཙུགས་ཡོདཔ་ཨིན་མས། དངོས་གྲུབ་རྡོ་རྗེ་འདི་ འབྲུག་ལུ་སྐད་འཐེན་ནི་དང་ཞབས་ཁྲ་བརྩམ་ནིའི་ནང་ལུ་མཁས་མཆོག་ཅིག་འབདཝ་ལས་ འབྲུག་རྒྱལ་ཁབ་ནང་སྐད་འཐེན་མི་རྙིང་ཤོས་ཅིག་ཨིན་མས། ཤུལ་ལས་ཁོ་ར་ཞབས་ཁྲ་འཐེན་ནི་འདི་བཞག་སྟེ་ འབྲུག་ལུ་གསུང་སྐད་འགྲན་བསྡུར་གྱི་ལས་རིམ་ཅིག་འགོ་དང་པ་ཁོ་གིས་འགོ་འདྲེན་འཐབ་ནུག། འདི་བཟུམ་མའི་ལས་རིམ་འགོ་འདྲེན་འཐབ་དགོ་པའི་དམིགས་པ་འདི་ཡང་ འབྲུག་ལུ་སྐད་འཐེན་མི་གཞན་ལེ་ཤ་འཐོན་དོ་ཡོདཔ་ལས་ ཁོང་ཆ་ཁྱབ་ལུ་གོ་སྐབས་བྱིན་ཐབས་ལུ་དམིགས་ཏེ་ཨིན་པས།
སྤྱི་ལོ་ ༡༩༩༧ གྱི་ལོ་ལུ་དངོས་གྲུབ་རྡོ་རྗེ་གི་གློག་བརྙན་འགོ་དང་པ་ར་ དམ་ཚིག་དཔང་བཙུགས་ཟེར་མི་ནང་ལུ་ཕོ་འཁྲབ་རྩེདཔ་སྦེ་བརྩེས་ནུག། གློག་བརྙན་འདི་མ་བརྩེས་བའི་ཧེ་མ་ཁོ་གི་ནོར་གླིང་སྒྲ་དབྱངས་ཀྱི་བཟོ་སྐྲུན་འབད་ཡོད་པའི་ཚོང་འབྲེལ་གྱི་དུས་ཐུང་གློག་བརྙན་ཅིག་ནང་ལུ་བརྩེས་ནུག། དེ་བསྒང་ ཁོ་ར་འབྲུག་རྒྱང་བསྒྲགས་ནང་ལུ་ལཱ་འབད་དེ་ཡོདཔ་ལས་ ཁོ་ལུ་འཁྲབ་རྩེདཔ་སྦེ་བརྩེ་ནི་གི་གོ་སྐབས་གནང་མི་འདི་འབྲུག་རྒྱང་བསྒྲགས་ཨིན་ཟེར་བཤད་ཅི། དངོས་གྲུབ་རྡོ་རྗེ་ཁོ་ར་གློག་བརྙན་ནང་ལུ་རྣམ་འགྱུར་ག་ཅི་བཟུམ་ཅིག་སྟོན་དགོ་རུང་མཁས་མཆོག་ཅིག་འབདཝ་ལས་ འབྲུག་ལུ་གློག་བརྙན་ ༣༥ དེམ་ཅིག་བརྩེས་ཡོད་མི་ནང་ལུ་འཁྲབ་འགན་ག་ཅི་བཟུམ་ཅིག་ནང་ཡང་བཅའ་མར་གཏོགས་ཡོད་ས་ལས་ འབྲུག་གློགབརྙན་ཚོགས་པ་ནང་ལས་གསོལ་ར་ཡང་ལེ་ཤ་ར་ཐོབ་སྟེ་ཡོདཔ་ཨིན།
སྤྱི་ལོ་ ༢༠༡༧ ལུ་བུམ་བ་དར་ཅན་མི་རིན་འཛིན་ནང་ལས་འཁྲབ་རྩེདཔ་འགྲན་རྒོལ་དྲག་ཤོས་ཀྱི་གསོལ་ར།
སྤྱི་ལོ་ ༢༠༡༧ ལུ་བུམ་བ་ཐར་ཅན་མི་རིན་འཛིན་ནང་ལས་རིག་རྩལ་མདོ་ཆེན་དྲག་ཤོས་ཀྱི་གསོལ་ར།
སྤྱི་ལོ་ ༢༠༡༠ ལུ་འཁྲབ་རྩེདཔ་འགྲན་རྒོལ་དྲག་ཤོས་ཀྱི་གསོལ་ར།
སྤྱི་ལོ་ ༢༠༠༧ ལུ་འཁྲབ་རྩེདཔ་དྲག་ཤོས་ཀྱི་གསོལ་ར་ཐོབ་ནུག།
རྒྱབ་རྟེན།
འབྲུག་རྒྱང་གྲགས། (༢༠༡༤) ནང་གིས་གཏམ།https://www.bbs.com
འབྲུག་གི་གློག་བརྙན། (༢༠༡༧) དངོས་གྲུབ་རྡོ་རྫེ། https://www.movies.bt