དར་ཤིང་། Ι Prayer flags

ངོ་སྤྲོད།

དཔལ་ལྡན་འབྲུག་པའི་རྒྱལ་ཁབ་འདི་ ནང་པ་སངས་རྒྱས་པའི་ཆོས་ཀྱི་བསྟན་པ་དར་བའི་ རྒྱལ་ཁབ་ཅིག་འབད་ནི་འདི་གིས་ འདི་ནང་སྡོད་མི་མི་ཚུ་ཡང་ ཆོས་དང་མཐུན་པའི་ ལཱ་འབད་ནི་ལུ་ སྤྲོ་བ་ཡོད་མི་ཙང་ཙ་ཨིན། དགེ་བའི་ལཱ་ཚུ་གི་གྲལ་ལས་ མི་མང་ཤོས་ཅིག་གིས་ ཡོངས་གྲགས་སྦེ་འབད་མི་ གཅིགཔོ་དེ་མཐོ་བའི་གངས་རི་ཚུ་དང་། རླུང་མ་གཙང་ས། ས་གཙང་ཏོག་ཏོ་དང་། ལྷ་ཁང་དགོན་སྡེ། དེ་ལས་ རྫོང་གཞི་ཁག་ཚུ་ནང་ དར་འཕྱར་ནི་འདི་ཨིན་པས།

སྤྱིར་བཏང་ དར་འཕྱར་ནིའི་ལཱ་དེ་ བསོད་ནམས་བསགས་པའི་ གཞི་ཅིག་ཨིན་རུང་ ཚུལ་མཐུན་ལག་ལེན་འཐབ་མ་ཤེས་པ་ཅིན་ སྡིག་པའི་ལཱ་ལུ་ འགྱུར་ནི་དང་། བསོད་ནམས་ཟད་པའི་རྒྱུ་ཡང་ཨིན་པས། དེ་འབད་ནི་འདི་གིས་དར་འཕྱར་དགོ་པའི་ ཁུངས་དོན་དང་། དབྱེ་བ། དེ་ལས་ཕན་ཡོན་དང་། སྤང་དགོཔ་ཚུ་གི་སྐོར་ལས་མཁས་པ་ཚུ་གིས་བྲི་མི་ ཡིག་ཆ་ཚུ་ནང་བྲིས་ཡོད་མི་འདི་ཕུལ་ནི་ཨིན།

དར་འཕྱར་དགོ་པའི་ཁུངས་དོན།

དར་འཕྱར་དགོ་པའི་ཁུངས་དོད་གཙོ་བོ་ར་ སྤྱིར་ཁམས་གསུམ་འཁོར་བ་འདི་ནང་ཡོད་པའི་ སེམས་ཅན་ཚུ་ ཐར་པ་སངས་རྒྱས་ཀྱི་གོ་འཕང་ལུ་ འདྲེན་ནིའི་དོན་ལུ་དང་། ལྷག་པར་དུ་ མི་རང་རང་སོ་སོའི་ཚེ་དང་བསོད་ནམས། དབང་ཐང་དང་རླུང་རྟ་ཚུ་རྒྱས་ཏེ་ ཚེ་འདིའི་བར་ཆད་སེལ་ནི་དང་། ཕྱི་མ་དག་པའི་ཞིང་ཁམས་ལུ་ སྐྱེས་ཚུགསཔ་བཟོ་ནིའི་དོན་ལུ་ཨིན་པས།

དར་གྱི་དབྱེ་བ།

སྤྱིར་བཏང་ དར་ལུ་དབྱེ་བ་ལེ་ཤ་ཡོད་རུང་ ཚུར་བསྡུ་བ་ཅིན་ ལྷ་དར་དང་ཆོས་སྲུང་གི་དར། གསོན་པོ་དང་གཤིན་པོའི་དར་ཟེར་ དབྱེ་བ་བཞི་ཡོད་མི་དེ་ཡང་།

༡.  ལྷ་དར།

ལྷ་དར།

 ལྷ་དར་འདི་མང་ཤོས་ཅིག་ རྫོང་གཞི་དང་ ལྷ་ཁང་གི་གདོང་ཁར་ འཕྱར་སྲོལ་ཡོདཔ་ཨིན། དེ་ཡང་ འབྲུག་གི་དངོས་མེད་ལམ་སྲོལ། (གནམ་ལོ་མེད། སྤྱི་ལོ་ ༢༠༡༥ ཤོག་གྲངས་ ༡༢༩) གིས་འབད་བ་ཅིན་ ལྷ་དར་གྱི་སྤྱི་ཏོ་གུ་ རྒྱལ་མཚན་གྱི་ཏོག་འོང་དགོཔ་དང་། དར་གུ་ཡང་སྟག་སེང་འཁྱུང་འབྲུག་གི་པར་ཚུ་འོང་དགོ་ཟེར་བཀོད་དེ་འདུག།

ལྷ་དར་དེ་རྫོང་གཞི་དང་ ལྷ་ཁང་ཚུ་གི་སྦོ་ལོགས་ཁར་ འཕྱར་དགོ་མི་དེ་ཡང་། འབྲུག་གི་དངོས་མེད་ལམ་སྲོལ། (གནམ་ལོ་མེད། སྤྱི་ལོ་ ༢༠༡༥ ཤོག་གྲངས་ ༡༢༩) གིས་འབད་བ་ཅིན་ དེའི་ནང་ན་ རྒྱལ་བའི་གསུང་རབས་ བཀའ་འགྱུར་དང་བསྟན་འགྱུར་ཚུ་བཞུགས་ཡོད་པའི་བརྡ་ཚོན་ཨིན་ཟེར་ བཀོད་དེ་འདུག།

ཨིན་རུང་ དཔེ་དེབ་དེ་ནང་ རྫོང་གཞི་དང་ ལྷ་ཁང་ག་ཏེ་ར་ཨིན་རུང་ དེ་གུ་སེར་ཏོག་ཡོད་པ་ཅིན་དེའི་རྩ་བར་ཡོད་པའི་ ལྷ་དར་གུ་རྒྱལ་མཚན་གྱི་ཏོག་འཐོབ་ཟེར་ བཀོད་དེ་ཡོད་རུང་ ལྷ་ཁང་གུ་སེར་ཏོག་མེད་པ་ཅིན་ ལྷ་དར་དེ་ ག་དེ་སྦེ་འཕྱར་དགོཔ་ཨིན་ན་ ཁ་གསལ་བཀོད་དེ་མིན་འདུག།

༢.  ཆོས་སྲུང་གྱི་དར།

ཆོས་སྲུང་གྱི་དར་ཟེར་མི་འདི་ རང་སྡོད་སའི་ཁྱིམ་ཐོག་གུར་འཕྱར་མི་ དར་གྱི་རིགས་ཅིག་ལུ་སླབ་ཨིན་པས། ཆོས་སྲུང་གི་དར་འདི་གཙོ་བོ་ རང་གི་ཕ་དང་མ་གིས་བསྟེན་པའི་ ལྷ་དང་སྲུང་མ་ཚུ་ལུ་ གུས་པའི་རྟགས་ཚན་ལུ་སྦེ་འཕྱརཝ་ཨིན་པས། ཆོས་སྲུང་གི་དར་འདི་ ང་བཅས་བཀྲ་ཤིས་གཡང་རྩེ་རྫོང་ཁག་ ཡ་ལང་རྒེད་འོག་ མེ་ལོང་མཁར་གཡུས་ཚན་ བཟུམ་ཅིག་ནང་ཨིན་པ་ཅིན་ གནམ་དགུན་ལོ་མཆོད་དང་འབྲེལ་ ཆོས་སྲུང་གསོལ་བའི་སྐབས་ དགུང་ལ་ཕན་ཟེར་སླབ་སྟེ་ འཕྱར་ནི་ཡོད།

དེ་བསྒང་ ཤིང་མགུ་ཏོ་ཡོད་མི་ ཕྲང་ཏང་ཏ་ཅིག་བཅད་འབག་འོངམ་ཞིན་ན་ ཞལ་ལག་ཚུ་ ལེགས་ཤོམ་སྦེ་སེལ། མགུ་ཏོ་ཨ་ཙི་ཅིག་བཞག་ཞིན་ན་ འདི་གུར་ སྔགས་དང་པར་གྱི་རིགས་ ག་ཅི་ཡང་མེད་པའི་ དར་དཀརཔོ་ཅིག་དཔྱངས། དེ་ལས་ ཆོས་སྲུང་གི་དོན་ལུ་བཙོ་སྟེ་ཡོད་པའི་ ཆང་སྐྱེ་དེ་ ཁ་འཕྱེ་ཞིན་ན་དར་ཤིང་བཙུགས། གཟར་རུ་གིས་ ཆང་སྐྱེས་ཀྱི་ཕུད་གཏོར། ཁ་ལས་ ལྷ་རྒྱལ་ལོ་ཟེར་ ཚར་གསུམ་སླབ་སྲོལ་ཡོད། སྤྱིར་བཏང་གནད་དོན་ཧ་ལམ་བཅུད་བསྡུ་སྟེ་བལྟཝ་ད་ འབྲུག་གི་དངོས་མེད་ལམ་སྲོལ། (གནམ་ལོ་མེད། སྤྱི་ལོ་ ༢༠༡༥ ཤོག་གྲངས་ ༡༢༩) ནང་ལུ་བཀོད་ཡོད་མི་ དར་ཅུང་ཟེར་མི་ དོན་ཚན་དང་ཆ་འདྲཝ་ལས་ ཆོས་སྲུང་གི་དར་ལུ་ མིང་གཞན་དར་ཅུང་ཟེར་ཡང་ སླབ་དོ་ཡོདཔ་འོང་ནི་ཨིན་པས།

༣.  གསོན་པོའི་དར།

གསོན་པོའི་དར།

གསོན་པོའི་དར་ཟེར་མི་འདི་མི་རང་རང་སོ་སོའི་ ཚེ་དང་བསོད་ནམས། དབང་ཐང་དང་རླུང་རྟ་ཚུ་ རྒྱས་ནི་གི་དོན་ལུ་འཕྱར་མི་དར་གྱི་རིགས་ལུ་སླབ་ཨིན་པས། གསོན་པོའི་དར་ལུ་ འཕྱར་ཐངས་མ་འདྲཝ་ལེ་ཤ་ཡོད་རུང་ ཡོངས་གྲགས་ལུ་ དྲྭ་དུམ་སྣ་ལྔ་སྦེ་བཟོ་ཞིན་ན་ ཕར་དང་ཚུར་དཔྱངས་ཏེ་ འཕྱར་སྲོལ་གཅིག་དང་། གཡུག་གཅིགམོ་སྣ་ཁག་གཅིག་སྦེ་ ཡར་དང་མར་ཤིང་གུ་འདབ་སྟེ་ འཕྱར་སྲོལ་དབྱེ་ཁག་གཉིས་དེ་ཅིག་མཐོང་ཚུགས་པས། ཨིན་རུང་ གཙོ་བོ་གོང་ལུ་བཀོད་དོ་བཟུམ་སྦེ་ མི་རང་རང་སོ་སོའི་ ཚེ་དང་བསོད་ནམས། དབང་ཐང་དང་རླུང་རྟ་ཚུ་ རྒྱས་ནི་གི་དོན་ལུ་ འབད་ནི་འདི་གིས་གསོན་པོའི་དར་འཕྱར་བའི་སྐབས་ལུ་ རླུང་རྟའི་ཚིག་དང་རླུང་རྟ་གི་པར། ཚེ་དཔག་མེད་ཀྱི་སྔགས་དང་ཚེ་དཔག་མེད་ཀྱི་པར། དེ་ལས་ རྒྱལ་མཚན་རྩེ་མོ་དཔུང་རྒྱན་ཚུ་འོང་དགོཔ་ཨིན་པས།

མི་ཚེ་དོན་ལྡན་བཟོ་ཐབས་ཀྱི་ལམ་སྟོན། (གནམ་ལོ་མེད། སྤྱི་ལོ་༢༠༡༨ ཤོག་གྲངས་ ༡༢༣) གྱིས་འབད་བ་ཅིན་ སྤྱིར་བཏང་རླུང་དར་འཕྱར་བའི་སྐབས་རང་གི་ལོ་ཁམས་དང་བསྟུན་པའི་ ཁ་མདོག་ཚུ་བལྟ་སྟེ་ འཕྱར་དགོཔ་ཨིན་རུང་། ཁ་མདོག་སྣ་ལྔ་མེད་རུང་ཡང་ འཕྱར་བཏུབ་ཟེར་ བཀོད་དེ་འདུག། ཨིན་རུང་ ཁ་མདོག་སྣ་ལྔ་སྦེ་ འཕྱར་མི་ཚུ་གི་དོན་ལུ་ ཨིན་པ་ཅིན། ཚོས་གཞི་དཀརཔོ་དེ་ ལྕགས་ཁམས། ཚོས་གཞི་སེརཔོ་དེ་ སའི་ཁམས། ཚོས་གཞི་དམརཔོ་དེ་ མེ་ཁམས། ཚོས་གཞི་ལྗང་ཁུ་དེ་ ཤིང་ཁམས། ཚོས་གཞི་ཧོནམ་དེ་ ཆུའི་ཁམས་སྦེ་ བརྩིཝ་ཨིན་པས།

༤.  གཤིན་པོའི་དར།

གཤིན་པོའི་དར་ཟེར་མི་འདི་ མི་ཤི་མི་ཚུ་གི་དོན་ལུ་ འཕྱར་མི་དར་གྱི་རིགས་ལུ་ སླབ་ཨིན་པས། མི་གཤིན་པོ་ཚུ་གི་དོན་ལུ་ཨིན་པ་ཅིན་ དར་རས་དཀརཔོ་སྦེ་ འོང་དགོཔ་མ་ཚད། འདི་ནང་ལུ་ མ་ཎི་དང་། ཡིག་བརྒྱ། མི་འཁྲུགས་པ་ལ་སོགས་པའི་ གཟུངས་སྔགས་ཚུ་པར་བཏབ་སྟེ་ འཕྱར་དགོཔ་ཨིན་པས། གཤིན་པོ་ཚུ་གི་དོན་ལུ་ མ་ཎི་དང་། ཡིག་བརྒྱ། མི་འཁྲུགས་པའི་ གཟུངས་སྔགས་ཚུ་འོང་དགོ་པའི་ ར་ཁུངས་དེ་ཡང་ ངན་སོང་གསུམ་གྱི་སྡུག་བསྔལ་ལས་ འགྲོལ་ནིའི་དོན་ལུ་ཕན་སྦོམ་ཡོདཔ་ཨིན་པས།

རལ་གྲི་དང་འཁོར་ལོའི་སྐོར།

རལ་གྲི་དང་འཁོར་ལོ།

ང་བཅས་ར་ཚུ་གིས་ སྤྱིར་བཏང་ དར་ཤིང་འཕྱར་བའི་སྐབས་ དར་ཤིང་གི་མགུ་ཏོ་ཁར་ བཀལ་ནིའི་དོན་ལུ་ རལ་གྲི་དང་འཁོར་ལོ་ཟེར་ བཟོ་སྲོལ་ཡོད། རལ་གྲི་དེ་བཟོ་བའི་སྐབས་དང་པ་ར་ པདྨ་བཟོ། དེའི་གུ་ཟླཝ་བཟོ། དེའི་གུ་ཉི་མ་བཟོ། དེའི་གུ་རལ་གྲི་བཟོ་དགོཔ་ཨིན་པས། དེའི་བཟོ་དགོ་པའི་ར་ཁུངས་དེ་ཡང་ དཔལ་ལྡན་འབྲུག་པའི་ལུགས་ལས་འབྱུང་བའི་ དར་ཤིང་རལ་གྲི་སོགས་ཀྱི་བཤད་པ་ ཀཱ་མ་དྷེ་ནུ་ནང་བྲིས་ཏེ་འདུག། (གནམ་ལོ་མེད། སྤྱི་ལོ་༢༠༡༨ ཤོག་གྲངས་༦) སླབ་སྲོལ་སོ་སོར་ཅིག་ནང་ དར་ཤིང་གི་མགུ་ཏོ་གི་རལ་གྲི་འདི་ མཇུག་ལས་དང་པ་རང་དྲིལ་བུ། དེ་ལས་ཌ་མ་རུ། ཟླ་བ། ཉི་མ། རལ་གྲི་འབད་བཟོ་ནི་དང། འཁོར་ལོ་འདི་ཐད་སྒོར་སྒོ་སྦེ་ སྟེང་ཟླ་གདན་དང་ བར་ཉི་གདན་ དེ་ལས་འོག་པད་གདན་སྦེ་བཟོ་དོ་ཡོདཔ་ཨིན།

ཨང་	མཚོན་བྱེད།	མཚོན་བྱ།
༡	རལ་གྲི་ཧོནམ།	རྒྱལ་བ་མི་སྐྱོད་པའི་མཚོན་བྱ།
༢	ཉི་མ་དམརཔོ།	སངས་རྒྱས་སྣང་བ་མཐའ་ཡས།
༣	ཟླ་བ་དཀརཔོ།	སངས་རྒྱས་རྣམ་པར་སྣང་མཛད།
༤	ཌ་མ་རུའམ་ཅང་ཏེའུ་སེརཔོ།	སངས་རྒྱས་རིན་ཆེན་འབྱུང་ལྡན།
༥	དྲིལབུ་ལྗང་ཁུ།	སངས་རྒྱས་དོན་ཡོན་གྲུབ་པ།

དེ་འབད་ནི་འདི་གིས་ ང་བཅས་ར་ཚུ་གིས་ རལ་གྲི་གུ་ཚོན་བཏང་པའི་སྐབས་ལུ་ཡང་ གོང་གི་མཚོན་བྱ་དང་འཁྲིལ་ཏེ་བཏང་དགོཔ་ཨིན་པས། དེ་བཟུམ་སྦེ་འཁོར་ལོ་ལུ་ཡང་ སྟེང་ཟླ་བའི་གདན། བར་ཉི་མའི་གདན། འོག་པད་གདན་ཟེར་བརྩི་ཚུལ་ཚུ་ དཔལ་ལྡན་འབྲུག་པའི་ ལུགས་ལས་འབྱུང་བའི་ དར་ཤིང་རལ་གྲི་སོགས་ཀྱི་བཤད་པ་ཀཱ་མ་དྷེ་ནུ་ཞེས་བྱ་བ། (གནམ་ལོ་མེད། སྤྱི་ལོ་ ༢༠༡༨ ཤོག་གྲངས་ ༢) པ་ནང་ལུ་ པར་རིས་དང་སྦྲགས་ཏེ་ བཀོད་དེ་འདུག།

དར་ཤིང་གི་དོན་ལུ་ཤིང་འདི་འབད་བ་ཅིན་ འབྲུག་གི་དངོས་མེད་ལམ་སྲོལ། (གནམ་ལོ་མེད། སྤྱི་ལོ་ ༢༠༡༥ ཤོག་གྲངས་ ༡༢༩) གིས་འབད་བ་ཅིན་ ལྷ་ཤིང་གི་རིགས་དང་། ཤིང་གཞོནམ། རིངམོ་དང་ཕྲང་ཏང་ཏ་ཚུ་དགོ་ཟེར་བཀོད་དེ་ཡོད་རུང་། ད་རེས་ནངས་པ་ ཤིང་འདི་བཟུམ་འཐོབ་ནི་ལུ་ ལཱ་ཁག་ཡོདཔ་ལས་ འོས་འབབས་དང་འཁྲིལ་ཏེ་ ལག་ལེན་འཐབ་པ་ལུ་ མ་བཏུབ་མིན་འདུག། ཨིན་རུང་ ཤིང་འདི་ཚུ་ པགས་ཀོ་ལེགས་ཤོམ་འབད་བཤུབ་ཞིན་ན་ མཛེས་ཏོག་ཏོ་བཟོ་སྟེ་ འཕྱར་དགོཔ་ཁག་ཆེ།

དར་འཕྱར་ཐངས།

དར་ཤིང་འཕྱར་ཐངས་དེ་ཡང་། སློབ་དེབ་བརྒྱད་པ། གནམ་ལོ་མེད། (སྤྱི་ལོ་༡༩༩༡ ཤོག་གྲངས་ ༣༧) ནང་ལུ་ དར་ཤིང་འཕྱརཝ་ད་ དར་དབ་དང་ས་གི་བར་ན་ འདོམ་གང་གི་ཚད་ལས་ཐུང་སྟེ་ བཞག་ནི་མི་འོང་ཟེར་ ཨིནམ་དང་། རལ་གྲི་དང་དར་དབ་གྱི་བར་ན་ཡང་ འཁྱུ་གང་ལས་བརྒལ་ཏེ་ བཞག་ནི་མི་འོང་ཟེར་ བཀོད་དེ་འདུག།

སྤྱིར་བཏང་ དར་འདབ་དར་ཤིང་གུ་སྦྱར་ནིའི་དོན་ལུ་ རབ་འབྱུང་པ་ཅིན་ ལྕགས་གཟེར་དང་ ཤིང་གཞན་མེད་པར་ དར་ཤིང་ཁོ་རང་གིས་འཛེར་དེ་ར་ལག་ལེན་འཐབ་པ་ཅིན་ ལེགས་ཤོམ་ཨིན་པས། དར་ཤིང་འཕྱར་བའི་སྐབས་སེམས་ཁར་བཞག་དགོཔ་གཅིགཔོ་དེ་ གསོན་པོའི་རིམ་གྲོ་གི་དོན་ལུ་ཨིན་པ་ཅིན་ ཨོཾ་རླུང་ཁར་དང་། ཧཱུཾ་ཤིང་ཁར། དེ་བཟུམ་སྦེ་ གཤིན་པོའི་དོན་ལུ་ཨིན་པ་ཅིན་ ཧཱུཾ་རླུང་ཁར་དང་ ཨོཾ་ཤིང་ཁར་སྦྱར་དགོཔ་ཨིན་པས། དེ་མ་ཚད་ གསོན་པོའི་དོན་ལུ་ཨིན་པ་ཅིན་ རང་རང་སོ་སོའི་ལོ་འབྲི་ནི་དང་། གཤིན་པོའི་དོན་ལུ་ཨིན་པ་ཅིན་མིང་འབྲི་དགོཔ་ཨིན།

འདི་གི་ཤུལ་ལུ་ སྐུ་གསུང་ཐུགས་རྟེན་དང་ ཁང་ཁྱིམ་ལ་སོགས་པ་ ག་ཅི་ར་ཨིན་རུང་། གསར་བཞེངས་འབད་ཚར་ཞིནམ་ལས་ བླམ་དགེ་བའི་བཤེས་གཉེན་ཚུ་གིས་ རབ་ཏུ་གནས་པ་ཟེར་ བཀྲ་ཤིས་པའི་ཚིག་ཚུ་བརྗོད་དེ་ ཡུན་རིངམོ་སྦེ་གནས་ནི་གི་དོན་ལུ་ བྱིན་གྱིས་བརླབས་གནང་སྲོལ་ཡོད་དོ་བཟུམ་སྦེ་ར་ དར་ཤིང་གི་དོན་ལུ་ཡང་ རབ་གནས་གནང་ནི་ཡོདཔ་ཨིན། དེ་འབད་ནི་འདི་གིས་ རབ་གནས་མ་གནང་ཚུན་གནོད་པའི་དགྲ་བོ་ཚུ་གིས་ མི་གནོད་ནིའི་དོན་ལུ་དར་ཤིང་གུ་ རྩང་དཔྱངས་བཞག་སྲོལ་འདུག།

དར་ཤིང་གི་གྱངས་ཁ་སྐོར།

སྤྱིར་བཏང་ དར་ཤིང་འཕྱར་བའི་སྐབས་ རབ་ཨིན་པ་ཅིན་ བརྒྱ་དང་རྩ་བརྒྱད། འབྲིང་ཉི་ཤུ་རྩ་གཅིག། ཐ་མ་བཅུ་གསུམ་འབད་ འཕྱར་དགོཔ་ཨིན་རུང་། རང་སོའི་དད་མོས་དང་འཁྲིལ་ཏེ་ འཕྱར་བཏུབ་ཨིན། དེ་སྦེ་ བརྒྱ་དང་རྩ་བརྒྱད་སྦེ་འཕྱར་དགོ་པའི་ ར་ཁུངས་དེ་ཡང་། རྒྱལ་བ་རིགས་བརྒྱའི་ལྷ་ཚོགས་ ཞི་བ་བཞི་བཅུ་ཞེ་གཉིས་དང་། ཁྲག་འཐུང་ལྔ་བཅུ་ང་བརྒྱད། ཉེ་བའི་སྲས་ཆེན་བརྒྱད་བཅས་ཀྱི་གྱངས་ཁ་ལུ་ གཞི་བཞག་སྟེ་ཨིན་པས།

དར་འཕྱར་བའི་ཕན་ཡོན།

སྤྱིར་བཏང་ལཱ་ག་ཅི་ར་ཨིན་རུང་ རང་གིས་ འབད་ཐངས་ཀྱི་རིམ་པ་དང་འཁྲིལ་ཏེ་ ཁེ་ཕན་ཚུ་འབྱུང་ནི་ཡོད་དོ་བཟུམ་སྦེ་ དར་ཤིང་འཕྱར་བའི་ཕན་ཡོན་ཡང་། ཚེ་འདིའི་བར་ཆད་སེལ་ཏེ་ བསམ་པའི་དོན་ཚུ་ རང་བཞིན་ལྷུན་གྱིས་གྲུབ་ནི་དང་། དཔལ་འབྱོར་ཕུན་སུམ་ཚོགས་ཏོག་ཏོ་འོང་ནི། ཚེ་ཕྱི་མར་ མཐར་ཐུག་སངས་རྒྱས་ཀྱི་ གོ་འཕང་འཐོབ་པའི་དགོས་པ་སྦོམ་འདུག་གོ།

སྤང་དགོཔ།

ང་བཅས་ར་ཚུ་གིས་ དགེ་བའི་ལཱ་ག་ཅི་ར་ཨིན་རུང་ དུས་ཚོད་བཟང་པོར་ འབད་དགོཔ་དང་། ངན་པར་འཛེམས་དགོཔ་ཡོད་དོ་བཟུམ་སྦེ་ དར་དེ་འཕྱར་བའི་སྐབས་ལུ་ཡང་ ས་བདག་བ་དན་ཁྲ་བོ་ཟེར་མི་དུས་ཚོད་དེ་འཕོགས་པའི་སྐབས་ སྤང་དགོཔ་མ་ཚད། དར་ཤིང་དེ་འཕྱར་བའི་སྐབས་རང་སྡོད་སའི་ཕྱོགས་ཤར་དང་ ནུབ་ཁ་ཐུག་ལུ་ཡང་ འཕྱར་མི་བཏུབ་ནི་ཨིན་པས། དེ་ལས་ རལ་གྲི་ཟུར་ཡང་ རང་སྡོད་སའི་ཁྱིམ་གུར་ བཞག་མི་བཏུབ་ཟེར་སླབ་སྲོལ་འདུག། ག་དེམ་ཅིག་སྦེ་ ང་བཅས་ར་ཚུ་གིས་ དར་དེ་ ས་བདག་བ་དན་ཁྲ་བོ་འཕོགས་པའི་ དུས་ཚོད་ལུ་འཕྱར་བ་ཅིན་ དར་གྱི་རས་མ་ཟད་ཚུན་ཚོད་ཀྱི་རིང་ལུ་ ང་བཅས་ར་ཚུ་ ལས་བསགསཔ་ཨིན་ཟེར་ བཤད་སྲོལ་འདུག་གོ།

བཅུད་དོན།

གོང་ལུ་ དར་ཤིང་འཕྱར་ཐངས་ཀྱི་སྐོར་ལས་ མཁས་པ་ཚུ་གི་རྩོམ་སྒྲིག་འབད་དེ་ཡོད་པའི་ ཁུངས་གཏུགས་ཀྱི་ཡིག་ཆ་ཚུ་ལུ་ གཞི་བཅོལ་ཏེ་བྲིས་མི་ དོན་ཚན་འདི་གིས་ འབྲུག་གི་དངོས་མེད་ལམ་སྲོལ་གྱི་ནང་ལས་ དར་འཕྱར་ཐངས་ཀྱི་སྐོར་ ཆུང་ཀུ་ཅིག་མི་མང་ལུ་ གོ་བ་བརྡ་སྤྲོད་འབད་ཚུགས་པའི་ རེ་བ་དང་གཅིག་ཁར་ མི་མང་གིས་ཡང་ དེ་སྦེ་ར་མཛད་ཚུགས་པའི་ རེ་བ་སྦོམ་ཡོད་ལགས།

༼རྩོམ་ཡིག་འདི་སྲོལ་འཛིན་དང་རྫོང་ཁ་གོང་འཕེལ་ལས་ཁུངས་ཀྱི་སྐད་ཡིག་ཞིབ་འཚོལ་དང་ལས་རིམ་སྡེ་ཚན་གྱི་ཞལ་འདེབས།༽

Source : Department of Culture and Dzongkha Development.

རྒྱབ་རྟེན་དཔེ་ཐོ།

༡༽   འབྲུག་གི་དངོས་མེད་ལམ་སྲོལ། (གནམ་ལོ་མེད། སྤྱི་ལོ་༢༠༡༥ ཤོག་གྲངས་༡༢༩) རྒྱལ་ཡོངས་དཔེ་མཛོད་དང་ཡིག་རིགས་གཏན་འཇོག་ཁང་།

༢༽   མི་ཚེ་དོན་ལྡན་བཟོ་ཐབས་ཀྱི་ལམ་སྟོན། (གནམ་ལོ་མེད། སྤྱི་ལོ་༢༠༡༨ ཤོག་གྲངས་༡༢༣)YT Publisher

༣༽   དཔལ་ལྡན་འབྲུག་པའི་ལུགས་ལས་འབྱུང་བའི་དར་ཤིང་རལ་གྲི་སོགས་ཀྱི་བཤད་པ་ཀཱ་མ་དྷེ་ནུ་ཞེས་བྱ་བ། (གནམ་ལོ་མེད། སྤྱི་ལོ་༢༠༡༨ ཤོག་གྲངས་ ༦)རྟ་མགོ་རྡོར་གདན་བཀྲ་ཤིས་ཐང་ནང་པའི་གཙུག་ལག་སློབ་གྲྭ་མཁས་པའི་འབྱུང་གནས།

༤༽   སློབ་དེབ་བརྒྱད་པ། གནམ་ལོ་མེད། (སྤྱི་ལོ་༡༩༩༡ ཤོག་གྲངས་༣༧) གསོ་བོ་དང་ཤེས་རིག་ལྷན་ཁག།