བསམ་རྩེ་ཤེས་རིག་མཐོ་རིམ་སློབ་གྲྭ།

Wikipedia ལས།

༉ འབྲུག་རྒྱལ་ཁབ་ནང་ མཐོ་རིམ་སློབ་གྲྭ་ ལེ་ཤ་ཡོད་པའི་གྲལ་ལས་ འབྲུག་རྒྱལ་འཛིན་གཙུག་ལག་སློབ་སྡེའི་ མངའ་འོག་ལུ་ཡོད་པའི་ བསམ་རྩེ་ཤེས་རིག་མཐོ་རིམ་སློབ་གྲྭ་འདི་ འབྲུག་རྒྱལ་ཁབ་ཀྱི་ གཙུག་སྡེ་གཉིས་པམ་ཨིན་མས། ཐབས་བྱུས་འཆར་གཞི་ (ལོ་མེད་ ༢༠༠༤-༢༠༡༢) ལྟར་དུ་འབད་བ་ཅིན་ བསམ་རྩེ་ཤེས་རིག་མཐོ་རིམ་སློབ་གྲྭ་འདི་ རྒྱལ་ཁབ་ཀྱི་འབྲིང་རིམ་སློབ་གྲྭ་དང་ གཞི་རིམ་སློབ་གྲྭའི་ སློབ་དཔོན་ཚུ་གི་སྦྱོང་བརྡར་བྱིན་ནིའི་དོན་ལུ་ ཨིན་ཟེར་བཀོད་ནུག། ད་རིས་ གཙུག་སྡེ་དེ་ནང་ སློབ་སྦྱོང་ལས་རིམ་ ཚུ་ཡང་ གཙུག་ལག་གཞི་རིམ་གྱི་ཤེས་ཚད་དང་ མཐོ་རིམ་གོང་མའི་ཤེས་ཚད་ དེ་ལས་ གཙུག་ལག་འོག་མའི་ ཤེས་ཚད་ལས་རིམ་བརྩིས་ཏེ་ ལས་རིམ་ཁ་མ་འདྲཝ་གསུམ་ཡོདཔ་ཨིན།

བསམ་རྩེ་ཤེས་རིག་མཐོ་རིམ་སློབ་གྲྭ་འདི་ མི་དབང་ཞིང་གཤེགས་ འབྲུག་རྒྱལ་གསུམ་པ་ དཔལ་འཇིགས་མེད་རྡོ་རྗེ་དབང་ཕྱུག་མཆོག་གིས་ སློམ་དཔོན་སྦྱོང་བརྡར་སྤེལ་ཁང་སྦེ་ སྤྱི་ལོ་ ༡༩༦༨ སྤྱི་ཟླ་ ༥ པའི་ སྤྱི་ཚེས་ ༢༩ ལུ་ གཞི་བཙུགས་མཛད་ནུག།  བསམ་རྩེ་ཤེས་རིག་མཐོ་རིམ་སློབ་གྲྭ་ (ལོ་མེད) https://www.sce.edu.bt ལྟར་དུ་འབད་བ་ཅིན་ དེ་བསྒང་ སློབ་ཕྲུག་ ༤༡ ལུ་ སློབ་དཔོན་དག་པ་ཅིག་གིས་ ཤེས་ཡོན་སློབ་སྟོན་གནང་སྟེ་ སློབ་ཕྲུག་ ༣༩ གིས་གཙུག་ལག་ཤེས་ཚད་ལེགས་ཤོམ་སྦེ་ མཐར་འཁྱོལཝ་ལས་ སློབ་དཔོན་དང་ སློབ་སྟོན་པ་ དེ་ལས་ ཤེས་རིག་གོང་འཕེལ་གྱི་དོན་ལུ་ ཕྱག་ལཱ་མཛད་ཡོདཔ་ད་ ད་ལྟོ་ཚུན་ཚོད་ མཐོ་རིམ་སློབ་གྲྭ་འདི་ནང་ ཤེས་ཡོན་སྦྱང་མི་སློབ་ཕྲུག་ སྟོང་ཕྲག་ ༥༠༠༠ དེ་ཅིག་གིས་ མཐོ་རིམ་ཤེས་ཚད་སྦྱང་སྦྱངས་ཨིན་མས།

འབྲུག་རྒྱལ་ཁབ་ནང་ བསམ་རྩེ་ཤེས་རིག་མཐོ་རིམ་སློབ་གྲྭ་ལུ་ འགོ་ཐོག་དང་པ་ ཤེས་རིག་གི་དོན་ལུ་ མཐོ་རིམ་གོང་མའི་ལག་ཁྱེར་ བྱིན་ནིའི་དོན་ལུ་ གཙུག་ལག་སློབ་སྡེའི་ གཙུག་ལག་ཤེས་ཚད་ མཐར་འཁྱོལ་མི་ཚུ་གི་དོན་ལུ་ སྤྱི་ལོ་ ༡༩༨༩ ལུ་འགོ་བཙུགས་ནུག། དེ་ལས་ སྤྱི་ལོ་ ༡༩༩༣ གི་ལོ་ལུ་ ཤེས་རིག་གི་དོན་ལུ་ གཙུག་ལག་གཞི་རིམ་གྱི་ལས་ལིམ་ (B.Ed Primary) དང་ འབྲིང་རིམ་གོང་མའི་ གཙུག་ལག་ཤེས་ཚད་ མཐར་འཁྱོལ་མི་ཚུ་གི་དོན་ལུ་ འགོ་བཙུགསཔ་མ་ཚད་ སྤྱི་ལོ་ ༡༩༩༥ གི་ལོ་ལུ་ཡང་ གཡོག་གི་དོན་ལུ་ གཙུག་ལག་གཞི་རིམ་སྦྱང་མི་ཚུ་ སློབ་གྲྭ་ཆུང་བའི་ སློབ་དཔོན་སྦེ་བཏང་ནུག།

བསམ་རྩེ་ཤེས་རིག་མཐོ་རིམ་སློབ་གྲྭའི་ དམིགས་ཡུལ་འདི་འབད་བ་ཅིན་ ཤེས་རིག་གི་དོན་ལུ་ འབྲིང་རིམ་བར་མ་དང་ དུམ་རིམ་གསུམ་པའི་ གནས་ཚད་ཀྱི་དོན་ལུ་ སློབ་སྟོན་དང་ ཞིབ་འཚོལ་ལས་རིམ་ཚུ་ རྒྱལ་ཡོངས་དང་ རྒྱལ་སྤྱིའི་གཉིས་ཆ་ར་ལུ་ འབྲེལ་བ་ཡོདཔ་སྦེ་ བྱིན་ནི་དང་ མཁས་པ་སྦྱང་ནིའི་དོན་ལུ་ ལས་ལིམ་ཚུ་ཡང་ སྒོམ་རྐྱབ་ནི། བསླབ་སྟོན་བྱིན་ནི་དང་། མཐོ་རིམ་ཤེས་ཡོན་བྱིན་ནི།

དེ་ལས་ ཤེས་རིག་གི་སྤུས་ཚད་ཡོདཔ་ བཟོ་ནིའི་དོན་ལུ་ ཞིབ་འཚོལ་གྱི་ལས་སྣ་ཚུ་ སྦྱོང་བརྡར་འབད་དེ་ ཤེསཔ་བཟོ་ནི་དང་ འབྲུག་ལུ་ ཚན་རིག་དང་ རྩིས་ཀྱི་མཐོ་རིམ་ཤེས་ཡོན་གྱི་ སློབ་དཔོན་ཚུ་སྦྱོང་བརྡར་འབད་དེ་ སྤུས་ཚད་ཅན་བཟོ་ནི།  དེ་བཟུམ་སྦེ་ འབྲུག་ལུ་ ཤེས་རིག་གོང་འཕེལ་གྱི་དོན་ལུ་ དུས་རྒྱུན་དུ་ ཁྱད་རིག་གོང་འཕེལ་གྱི་ སྦྱོང་བརྡར་འགོ་འདྲེན་འཐབ་ནི་དང་ གཞུང་དང་སྒེར་སྡེ་གཉིས་ཆ་ར་ལུ་ སྲིད་བྱུས་དང་བསླབ་བྱ་ དེ་ལས་ ཞིབ་འཚོལ་གྱི་གྲོགས་རམ་ ཡོདཔ་བཟོ་ནི་དང་ མཉམ་འབྲེལ་གྱི་ཐོག་ལས་ རྒྱལ་སྤྱིའི་ ཞིབ་འཚོལ་འབད་དེ་ ཤེས་ཡོན་གསར་བཙུགས་མཛད་ནི་ཚུ་ ཨིན་མས།

རྒྱབ་རྟེན།

རྩོམ་པ་པོ་མེད། (ལོ་མེད ༢༠༠༤-༢༠༡༢) ཐབས་བྱུས་འཆར་གཞི།

བསམ་རྩེ་ཤེས་རིག་མཐོ་རིམ་སློབ་གྲྭ་ (ལོ་མེད) https://www.sce.edu.bt