མར་ཆང་།
མར་ཆང་གི་སྐོར་ལས།[ཞུན་དག།]
མར་ཆང་བཀལ་ནི་འདི་ ཧེ་མའི་ལུགས་སྲོལ་ལྟར་དུ་འབད་བ་ཅིན་ མགྱོནམོ་འགོ་དང་པ་འབྱོནམ་ད་གདོང་ཆང་ཟེར་ ཆང་ངོ་མ་སྦེ་ དྲང་སྲོལ་ཡོདཔ་མ་ཚད་ གནས་པོའི་ཁ་ཐུག་ལས་འབད་བ་ཅིན་ ལྷག་བསམ་རྣམ་པར་དག་པའི་རྟེན་འབྲེལ་མཚོན་བྱེད་དང་ མགྱོནམོ་གི་སྐུ་ཚེ་དང་ མཛད་པ་ཕྲིན་ལས་ཚུ་ ཡར་ངོ་ཚེས་པའི་ཟླཝ་བཟུམ་སྦེ་ གོང་ལས་གོང་འཕེལ་འགྱོ་ནིའི་དོན་ལུ་མར་གྱི་ཡར་སྒྲོན་དང་བཅསཔ་སྦེ་ཕུལཝ་ཨིན།
དེ་མ་ཚད་ ཆོས་ཕྱོགས་ལས་འབད་རུང་ བདུད་རྩི་གསེར་སྐྱེམས་ཀྱི་མཆོད་པ་ཟེར་ ལཱ་ཁག་ཆེ་ཏོག་ཏོ་འགོ་བཙུགས་པའི་སྐབས་དང་ཐག་རིང་ས་ལུ་ ལམ་འགྲུལ་འབད་བའི་སྐབས་ལུ་ དང་པ་ར་ མགྲོན་བཞི་ལུ་ གསེར་སྐྱེམས་ཀྱི་མཆོད་པ་ཕུལ་ཏེ་ ཕྲིན་ལས་བཅོལ་སྲོལ་ཡོདཔ་བཟུམ་སྦེ་ སྲིད་ཀྱི་ལུགས་ནང་ཡང་མཛད་སྒོའི་རྟེན་འབྲེལ་འདི་ལུ་ བར་ཆད་མི་འབྱུང་ནི་དང་ སྐུ་མགྲོན་གཙོ་བོ་དེ་ལུ་ ལེགས་སྨོན་གྱི་མར་ཆང་ རྟེན་འབྲེལ་བརྩིས་བའི་སྲོལ་ཡོདཔ་ཨིན།
དེ་འབདཝ་ལས་ མཛད་སྒོའི་རྟེན་འབྲེལ་སྐབས་ལུ་ དཔལ་ལྡན་བླ་མ་དང་བརྒྱུད་སྡེ་བཞིའི་ལྷ་ཚོགས་ གནས་གསུམ་དཔའ་བོ་དང་མཁའ་འགྲོ་མ་ དུར་ཁྲོད་ཆེན་པོ་བརྒྱད་ལུ་གནས་པའི་ཕྱོགས་སྐྱོང་དང་ཞིང་སྐྱོང་གི་མཁའ་འགྲོ་མ་ལ་སོགས་པ་ཚུ་ལུ་བརྩམས་པའི་བྱ་བ་ཚུ་ བར་ཆད་མེད་པར་ རང་བཞིན་ལྷུན་གྱིས་འགྲུབ་པའི་ རྟེན་འབྲེལ་ལུ་དམིགས་ཏེ་ ཆང་མཆོད་ཚུ་ཕུལ་སྲོལ་ཡོདཔ་ཨིན། རྡོ་རྗེ་རྒྱལ་མཚན། (༡༩༩༩ ཤོགས་གྲངས་ ༢༣༢)
བཞེས་རྩམ།[ཞུན་དག།]
ཞབས་དྲུང་རིན་པོ་ཆེ་ སྐུ་འཁྲུངསམ་ཅིག་ར་ ཉིན་མ་ ཆུམ་གྱི་ལྟོ་ཁམ་རྡོག་གཅིག་མཆོད་པའི་ཚུལ་ཙམ་ཅིག་ཡང་མེད་རུང་ ནུབ་མོ་ག་གིས་ བསྐྱལཝ་ཨིན་ན་མ་ཤེས་པར་ ཆུམ་དཀར་པོའི་ལྟོ་ ལྗགས་ཀྱི་འོག་དང་ ཚེམས་ཀྱི་བར་ན་ལས་ ལོག་ཅི་ལོག་ཅི་ར་བྱུང་ནུག།
དེ་འབདཝ་ལས་ ཞབས་དྲུང་རིན་པོ་ཆེ་ གོང་མའི་ལུང་བསྟན་ལྟར་ འབྲུག་གི་ཡུལ་ལྗོངས་ལུ་འབྱོན་ནིའི་སྔ་ལྟས་ལུ་ འབྲུག་པའི་ཡུལ་ལྷ་གཞི་བདག་ཚུ་གིས་དྲངས་པའི་རྟགས་སྟོན་དོ་བཟུམ་ དཔལ་ལྡན་འབྲུག་པའི་ཕུན་སུམ་ཚོགས་པའི་རྟེན༌འབྲེལ༌སྐབས༌ལུ༌ བཞེས་རྩམ་ལྟོ་དཀརཔོ་ དྲང་དགོ་མི་འདི་ དེ་ལས་བརྟེན་ཨིན་པས།
གསོལ་ཇ།[ཞུན་དག།]
གསོལ༌ཇ༌འདི༌ རང་ལུགས་དཔལ་ལྡན་འབྲུག་པའི་ཁྱད་ཆོས་ ཐུན་མོང་མ་ཡིན་པའི་ལུགས་སྲོལ་བཟང་པོ་ཅིག་ཨིན་མི་འདི་ཡང་ སྔོན་དང་ཕུ་བདག་ཅག་གི་སྟོན་པ་ སངས་རྒྱས་ཤཱཀྱ་ཐུབ་པ་ཞལ་བཞུགས་པའི་དུས་ལས་ར་ རང་གི་ཁྱིམ་ནང་ སྐུ་མགྲོན་ཆེ་འབྲིང་ཆུང་གསུམ་ ག་བྱོན་ཏེ་ར་འབད་རུང་གནས་པོའི་ཧོངས་ལས་ ལྷག་བསམ་རྣམ་དག་གི་སྒོ་ལས་ རྟེན་འབྲེལ་རྩི་བའི་བརྡ་མཚོན་དང་ ཁ་སངས་ཧིང་གསལ་གྱི་ཐོག་ལས་ མགྱོནམོ་ལུ་གདོང་ལེན་དང་བརྩི་བཀུར་ཆེ་བའི་བརྡ་སྟོནམ་ཨིན། མགྱོནམོ་གི་ཧོངས་ལས་ར་འབད་རུང་ འགལ་རྐྱེན་བར་ཆད་ཞི་ཞིང་ མཐུན་རྐྱེན་ཕུན་སུམ་ཚོགས་པའི་དོན་ལུ་ གསོལ་ཇ་འདི་མ་འཐུངས་པའི་ཧེ་མ་ ཡུལ་འདི་ནང་གི་གནས་བདག་དང་ གཞི་བདག་ ཆོས་སྐྱོང་སྲུང་མ་ཚུ་ལུ་ གསོལ་ཇའི་ཕུད་དང་བཅསཔ་སྦེ་སྐྱབས་འཚོལ་ནིའི་དོན་ལུ་ཨིན་མས། ་
དྲི་བཟང་།[ཞུན་དག།]
རང་ལུགས་དཔལ་ལྡན་འབྲུག་པའི་ཕུན་སུམ་ཚོགས་པའི་བཞུགས་གྲལ་གྱི་རིམ་པ་ལུ་ རྒྱས་བསྡུས་འབྲིང་གསུམ་སྦེ་ཚུད་པའི་ དྲི་བཟང་འདི་ སྔོན་མ་མཐུ་ཆེན་ཆོས་ཀྱི་རྒྱལ་པོ་ ཞབས་དྲུང་ངག་དབང་རྣམ་རྒྱལ་མཆོག་གིས་ བྱིན་གྱིས་བརླབས་པའི་བདུད་རྩི་ངོ་མ་ཅིག་ཨིན་མས།
དྲི་བཟང་འདི་ རང་གི་ལུས་ལུ་མྱོངས་པ་ཙམ་གྱིས་ ལུས་ངག་ཡིད་གསུམ་གྱི་སྡིག་སྒྲིབ་དང་ ཚེ་རབས་སྔ་མའི་བག་ཆགས་ངན་པ་ཚུ་ འཇོམས་ཚུགས་པའི་ནུས་པ་ཡོདཔ་མ་ཚད་ དྲི་བཟང་འདི་བདུད་རྩིའི་སྨན་ཅིག་འབདཝ་ལས་ སྐྱེ་རྒ་ན་འཆི་གི་སྒྲིབ་པ་ལ་སོགས་པ་ཚུ་ལས་ བཟློག་ཚུགས་པའི་ནུས་པ་ཡང་ཡོདཔ་ཨིན།
ཁུངས་གཏུག།[ཞུན་དག།]
རྡོ་རྗེ་རྒྱལ་མཚན། (༡༩༩༩) སྒྲིག་ལམ་རྣམ་གཞག་གི་དེབ་ཐེར་ནོར་བུའི་འཕྲེང་བ།