འཁྲབ་རྩེདཔ་ མགོནམ་རྡོ་རྗེ།
འབྲུག་རྒྱལ་ཁབ་མཐའ་དབུས་མེད་པར་ གཏམ་སྙན་གྲགས་ཁྱབ་སྟེ་ཡོད་པའི་འཁྲབ་རྩེདཔ་མགོནམ་རྡོ་རྗེ་འདི་ དབང་འདུས་ཕོ་བྲང་རྫོང་ཁག་ སྲས་ཕུ་རྒེད་འོག་ གཡུས་དབང་འདུས་མགོན་པ་ལས་ཨིན་མས། འཁྲབ་རྩེདཔ་ཁོ་གི་སློབ་རིམ་ཆུང་བའི་ཤེས་ཡོན་ཚུ་ ནུརབུ་ལྡིང་སློབ་གྲྭ་བར་མ་ལས་མཐར་འཁྱོལ་ནུག། དེ་ལས་ འབྲིང་རིམ་སློབ་གྲྭའི་ཤེས་ཡོནའདི་ སྤུ་ན་ཁ་ལས་སྐྱིད་ཐང་སློབ་གྲྭ་ནང་ལས་མཇུག་བསྡུ་ནུག། དེ་ལས་ མཐོ་རིམ་གོང་མའི་ཤེས་ཡོན་འདི་ཤེས་རབ་རྩེ་མཐོ་རིམ་སློབ་གྲྭ་ལས་ སྤྱི་ལོ་ ༡༩༩༤ ལུ་མཐར་འཁྱོལ་ནུག།
མགོནམ་རྡོ་རྗེ་ཁོ་ར་ འཁྲབ་རྩེད་འབད་ནིའི་ལྕོགས་གྲུབ་ཚུ་ ཆུང་ཀུ་སྦེ་སྡོད་པའི་བསྒང་ལས་ར་ཡོདཔ་སྦེ་བཤད་ནི་འུདག། དེ་ཡང་ ཁོ་ར་ནུརབུ་ལྡིང་སློབ་གྲྭ་བར་མ་ནང་ སློབ་རིམ་གཉིས་པ་སྦེ་སྡོདཔ་ད མར་ཅེནཊ་ ཨོཕ་ ཝི་ནའེསི་ (merchant of venice) ཟེར་མི་འཁྲབ་སྲུང་འདི་ནང་ལུ་བཅའ་མར་གཏོགས་ནུག། སྤྱི་ལོ་ ༡༩༨༩ གི་ལོ་ལུ་ ལས་སྐྱིད་ཐང་སློབ་གྲྭ་ནང་ལུ་ རྒྱལ་སྲས་དྲི་མེད་ཀུན་ལྡན་གྱི་འཁྲབ་སྲུང་གི་འཁྲབ་སྟོན་གྱི་འགོ་འདྲེན་པ་འབད་ཡོདཔ་མ་ཚད་ འཁྲབ་རྩེདཔ་སྦེ་ཡང་བརྩེས་ནུག། དེ་ལས་ ཤེས་རབ་རྩེ་མཐོ་རིམ་སློབ་གྲྭ་ནང་ལུ་སྡོདཔ་ད་ ཚོང་དཔོན་ནོར་བུ་བཟང་པོའི་འཁྲབ་སྟོན་ནང་ ཚོང་དཔོན་ནོར་བུ་བཟང་པོ་སྦེ་བརྩེས་ནུག། དེ་གི་ཤུལ་ལས་ རོ་མིའོ་དང་ཇུ་ལེཊ་ (Romeo and Juliet) ཟེར་མི་ ཕྱི་རྒྱལ་གྱི་སྐད་གྲགས་ཅན་གྱི་འཁྲབ་སྲུང་འདི་ རྫོང་ཁའི་ནང་སྐད་སྒྱུར་འབད་ནུག། དེ་ཡང་ ང་བཅས་རའི་འབྲུག་གི་སྐབས་དོན་ལྟར་དུ་ སྐད་སྒྱུར་འབད་མི་འདི་ དོན་ཚན་ རང་གྲོལ་དང་དབྱངས་སྒྲོན་ཟེར་བཞག་ནུག།ཁོ་གིས་ སྐད་སྒྱུར་འབད་ཡོད་པའི་འཁྲབ་སྲུང་འདི་སྤྱི་ལོ་ ༢༠༠༠ གྱི་ལོ་ལུ་ ནོར་གླིང་སྒྲ་དབྱངས་ཀྱིས་གློག་བརྙན་སྦེ་བཟོ་སྐྲུན་འབད་ནུག། སྤྱི་ལོ་ ༢༠༡༣ གྱི་ལོ་ལུ་ ནོར་གླིང་གིས་བཟོ་སྐྲུན་འབད་མི་ བྱ་བ་ཟེར་བའི་འཁྲབ་སྲུང་འདི་གི་ སྲུང་འབྲི་མི་དང་བཀོད་ཁྱབ་འབད་མི་ཅིག་ཨིན།
མགོནམ་རྡོ་རྗེ་གི་འཁྲབ་སྲུང་གོ་དང་པ་ར་ ནོར་གླིང་སྒྲ་དབྱངས་ཀྱི་བཟོ་སྐྲུན་འབད་ཡོད་མིའི་འཁྲབ་སྟོན་ འཇིགས་བྲལ་ཟེར་མི་ནང་ལུ་བརྩེས་ནུག། དེ་ལས་ བཀོད་ཁྱབ་མདོ་ཆེན་འགོ་དང་པ་ར གློག་བརྙན་མཆོད་རྟེན་སྐོར་ར་ནང་ལུ་འབད་ཡོདཔ་དང་ ད་ལྟོ་ཚུན་ཚོད་ ཁོ་གིས་འཁྲབ་སྲུང་ ༢༢ བྲིས་ཡོདཔ་དང་ གློག་བརྙན་ ༧ གྱི་བཀོད་ཁྱབ་མདོ་ཆེན་དང་གློག་བརྙན་ ༣༨ ནང་ལུ་འཁྲབ་རྩེདཔ་སྦེ་བརྩེས་ཏེ་འདུག། སྤྱི་ལོ་ ༡༩༩༧ གྱི་ལོ་ལུ་ གློག་བརྙན་འགོ་དང་པ་ དམ་ཚིག་སྤང་བཙུགས་ཟེར་མི་ནང་ལུ་འཁྲབ་རྩེདཔ་གི་རྒྱབ་སྐྱོར་པ་སྦེ་བརྩེས་ཡོད་རུང་ གློག་བརྙན་གཅེས་པའི་བུ་ཟེར་མི་ནང་ལས་ ཡོངས་གྲགས་ཐོན་ཡོདཔ་མ་ཚད་ གློག་བརྙན་འདི་ནང་ལས་འཁྲབ་རྩེད་རྒྱབ་སྐྱོར་པ་དྲག་ཤོས་ཀྱི་རྟགས་མ་ཐོབ་ནུག།
འཁྲབ་རྩེདཔ་མགོནམ་རྡོ་རྗེ་གིས་ ད་ལྟོ་ཚུན་ཚོད་ཐོབ་མིའི་རྟགས་མའི་ཐོ་ཡང་། (Awards).
༡) འཁྲབ་སྲུང་དྲག་ཤོས་ཀྱི་གསལ་ར་བརྒྱད།
༢) འཁྲབ་རྩེདཔ་རྒྱབ་སྐྱོར་པ་དྲག་ཤོས་ཀྱི་གསོལ་ར་བཞི།
༣) འཁྲབ་རྩེདཔ་དྲག་ཤོས་ཀྱི་གསོལ་ར་གསུམ།
༤) བཟློག་མཆོག་འཁྲབ་རྕེདཔ་གི་གསོལ་རས་གསུམ།
༥) རྫོང་ཁ་སླབ་མི་དྲག་ཤོས་ཀྱི་གསོལ་ར་གསུམ།
༦) གློག་བརྙན་དྲག་ཤོས་ཀྱི་གསོལ་ར་གཉིས།
༧) བཀོད་ཁྱབ་མདོ་ཆེན་དྲག་ཤོས་ཀྱི་གསོལ་ར་གཅིག།
༨) དགོད་བྲ་སྒྱར་མི་འཁྲབ་རྩེདཔ་དྲག་ཤོས་ཀྱི་གསོལ་ར་གཅིག།
འཁྲབ་རྩེདཔ་མགོནམ་རྡོ་རྗེ་གིས་ འབྲུག་གི་སྤྱི་ཚོགས་དང་པ་ སྤྱི་ལོ་ ༢༠༠༨ ལས་ ༢༠༡༣ པའི་ནང་ཉི་གཤོར་སྲས་ཕུ་འདེམས་ཁོངས་ལས་ འབྲུག་ཕུན་སུམ་ཚོགས་པའི་རྒྱལ་ཡོངས་ཚོགས་འདུའི་འཐུས་མི་སྦེ་ཕྱག་ཞུ་ནུག། ད་རེས་ནངས་པ་ ཁོ་གིས་འབྲུག་གློག་བརྙན་ཚོགས་པའི་ནང་ གློག་བརྙན་མ་འདྲཝ་ཚུ་ནང་བཙའ་མར་གཏོགས་ཏེ་ར་ཡོདཔ་ཨིན་མས།
རྒྱབ་རྟེན། འབྲུག་གློག་བརྙན། (འབྲུག་གི་སྙན་གྲགས་ཅན་གྱི་མི) www.facebook.com