འབྲུག་བརྡ་བརྒྱུདཔ་མཐུན་ཚོགས།

༉ འབྲུག་བརྡ་བརྒྱུདཔ་མཐུན་ཚོགས་འདི་ སྤྱི་ལོ་ ༢༠༡༢ སྤྱི་ཟླ་ ༢ པའི་ནང་ལུ་ སྲིད་མིན་དང་ཁེ་མིན་ལས་ཚོགས་ཅིག་སྦེ་ལུགས་མཐུན་གྱི་སྒོ་ལས་འགོ་བཙུགས་གནང་ཡོདཔ་ཨིན་མས། དེ་ལས་ སྤྱི་ལོ་ ༢༠༡༤ སྤྱི་ཟླ་ ༡༡ པའི་སྤྱི་ཚེས་ ༡༠ ལུ་འབྲུག་གི་མི་སྡེ་ལས་ཚོགས་བཅའ་ཁྲིམས་ཀྱི་འོག་ལུ་ ཕན་ཚུན་ཕན་ཐོགས་པའི་མི་སྡེའི་ལས་ཚོགས་ཅིག་སྦེ་ཐོ་བཀོད་མཛད་གནང་ཡོདཔ་ཨིན་མས། ལས་ཚོགས་སོ་སོ་ལེ་ཤ་ཡོད་པའི་ནང་ལས་ འབྲུག་བརྡ་བརྒྱུདཔ་མཐུན་ཚོགས་ཀྱི་གལ་གནད་ཆེ་བའི་འགན་དབང་འདི་ཡང་ གསར་འགྱུར་ལཱ་གི་ས་གོ་ནང་ཁྱད་རིག་གི་ལཱ་ཡར་རྒྱས་གཏང་ནི་དང་། བསམ་བརྗོད་དང་གནས་ཚུལ་སྤེལ་ལམ་གྱི་རང་དབང་གཟུང་ནི། གནས་ཚུལ་བདེན་པ་ཡར་རྒྱས་གཏང་ནི་དང་བསྲུང་ནི། དེ་ལས་ གསར་འགྱུར་གྱི་ལཱ་གི་གཤིས་ལུགས་ལུ་ ཀུན་སྤྱོད་མཐོ་བའི་གནས་ཚད་ རྒྱུན་སྐྱོང་འབད་ནི་དང་ བརྡ་བརྒྱུདཔ་ཚུ་གནོད་ཉེན་དང་སྡུག་སྦྱོང་ དེ་ལས་ཁྲིམས་གཏུགས་འབདཝ་ལ་སོགས་པའི་ཉེན་ཁ་ཚུ་ལས་བསྲུང་ནི་འདི་ཨིན་མས།
འབྲུག་བརྡ་བརྒྱུདཔ་མཐུན་ཚོགས་ཀྱི་ཡིག་ཚང་འདི་ བཀོད་ཁྱབ་ མདོ་ཆེན་གྱིས་དབུ་གཙོས་ཏེ་དྲུང་ཆེན་ཡིག་ཚང་གིས་སྦེ་འཛིན་སྐྱོང་འབད་དོ་ཡོདཔ་དང་། དྲུང་ཆེན་ཡིག་ཚང་འདི་ བཀོད་ཚོགས་ཀྱི་ཁྲི་འཛིན་ཡང་ཨིན་མི་ སྲིད་འཛིན་གྱིས་དབུ་གཙོས་པའི་བཀོད་ཚོགས་མདོ་ཆེན་ཚུ་ལུ་སེལ་ཐབས་འབད་མི་ཅིག་ཨིན་དོ་ཡོདཔ་ཨིན་མས།
འབྲུག་བརྡ་བརྒྱུདཔ་མཐུན་ཚོགས་འདི་ འབྲུག་བརྡ་བརྒྱུད་གཞི་ཚོགས་དང་བརྡ་དོན་དང་བརྡ་བརྒྱུད་ལས་ཁུངས་ དེ་ལས་ བརྡ་བརྒྱུད་གོང་འཕེལ་གཏང་ནིའི་ནང་ལུ་ལཱ་འབད་མིའི་ལས་ཁུངས། གཞན་བརྡ་བརྒྱུད་དང་འབྲེལ་བ་ཡོད་པའི་ས་གནས་དང་རྒྱལ་སྤྱིའི་ལས་ཁུངས་དང་གཅིག་ཁར་མཉམ་འབྲེལ་ལས་བརྟེན་ཏེ་ མཁོ་སྒྲུབ་འབད་བའི་མ་དངུལ་ལུ་བརྟེན་དོ་ཡོདཔ་ཨིན་མས། ༼འབྲུག་བརྡ་བརྒྱུདཔ་མཐུན་ཚོགས། ༢༠༢༡༽ འབྲུག་བརྡ་བརྒྱུདཔ་མཐུན་ཚོགས་ཀྱི་དམིགས་ཡུལ་འདི་ རྒྱལ་ཁབ་ཀྱི་མི་སྡེ་དང་དཔལ་འབྱོར་ དེ་ལས་ སྲིད་དོན་ཡར་འཕེལ་གྱི་ནང་ལུ་ མི་སྡེའི་ཕན་ནུས་ཅན་གྱི་གསར་འགྱུར་ལཱ་གིས་ གལ་ཆེ་བའི་ལཱ་འགན་འབག་ནིའི་འཆར་གཞི་ཡོདཔ་དང་། བརྡ་བརྒྱུདཔ་ཚུ་ལུ་སྦྱོང་བརྡར་དང་ཤེས་ཡོན་བྱིན་ནི། དེ་ལས་ སྐུལ་ཁྱབ་བརྡ་སྤྲོད་ཚུ་འབད་དེ་ མི་སྡེ་གསར་འགྱུར་གྱི་ལཱ་ཁྱད་རིག་ཅན་ཅིག་དང་ རང་དབང་རང་བཙན་ཅིག་བཟོ་ནི་འདི་ ཨིན་མས།
༼འབྲུག་བརྡ་བརྒྱུདཔ་མཐུན་ཚོགས།༽ འབྲུག་བརྡ་བརྒྱུདཔ་མཐུན་ཚོགས་ཀྱི་མཛད་སྒོ་ཚུ་ རིམ་པ་བཞིན་དུ་བཀོད་པ་ཅིན་ དང་པ་ གནས་ཚུལ་སྤེལ་ལམ་དང་བསམ་བརྗོད་ཀྱི་རང་དབང་དང་། རྩ་ཁྲིམས་དང་འབྲེལ་བའི་གནས་ཚུལ་བདེན་པ་ཚུ་རྒྱ་སྐྱེད་གཏང་ནི་དང་བསྲུང་ནི། དེ་ལས་ རྒྱལ་ཁབ་ནང་ལུ་ཁྱད་རིག་གི་སྒོ་ལས་སྦྱོང་བརྡར་འབད་དེ་ཡོད་པའི་བརྡ་བརྒྱུདཔ་གི་གྱངས་ཁ་ཡར་སེང་འགྱོ་མི་ཚུ་གསོ་སྐྱོང་འབད་ནི་འདི་ཨིན་མས། གཉིས་པ་ གལ་སྲིད་བརྡ་བརྒྱུདཔ་ག་འབད་རུང་ཅིག་ ལཱ་འགན་བཞེས་ཏེ་བཞུགས་པའི་སྐབས་ལུ་ ཚབས་ཆེན་སྦེ་རྨ་བཏོན་ནི་དང་ ཡང་ན་ རྒྱུན་དུ་དབང་པོ་ལུ་སྐྱོན་ཕོག་ནི་དང་བསད་དཔ་འདྲཝ་ཅིག་འབད་བ་ཅིན་ རྒུད་འཐུས་ཀྱི་གྲོགས་རམ་འབད་དེ་རྒྱབ་སྐྱོར་ཕུལ་ནི་ཡང་ཨིན་མས། གསུམ་པ་ལུ་ ལས་ཚོགས་འདི་ནང་གི་མཐུས་མི་གི་ཁྱད་རིག་གི་ལཱ་གོང་འཕེལ་གཏང་ནིའི་ཐབས་ཤེས་ཚུ་བརྗེ་སོར་དང་ཕན་ཚུན་འབྲེལ་བ་ཚུ་ཡར་རྒྱས་གཏང་ནི་འདི་ཨིན་མས། བཞི་པ་ བརྡ་བརྒྱུདཔ་ཚུ་གི་དོན་ལུ་ ཁྱད་རིག་གི་སློབ་སྦྱོང་ལས་རིམ་བྱིན་ནིའི་ནང་ལུ་མཉམ་རུབ་སྦེ་ མ་དངུལ་ཐོན་ཁུངས་འཚོལ་ཞིབ་འབད་ནི་འདི་ཨིན་མས། ལྔ་པ་ རྟགས་མ་དང་གྲོགས་རམ་ལས་བརྟེན་ བརྡ་བརྒྱུདཔ་ཚུ་ངོ་ཤེས་ནི་གི་ཐབས་ལམ་ཚུ་འགོ་བཙུགས་ནི་ཨིན་མས། དེ་ལས་མཇུག་ར་ དྲུག་པ་གྲོས་བསྡུར་ཞལ་འཛོམས་དང་གོ་བསྡུར་ཞལ་འཛོམས་ དེ་ལས་ གྲོས་བསྡུར་ལས་བརྟེན་ཏེ་ གལ་ཅན་གྲུབ་འབྲས་ཀྱི་ཐོག་ལུ་ སྙིང་སྟོབས་བསྐྱེད་བཅུག་ནི་དང་ཁྱད་རིག་གི་རྩོད་འགྲན་ཉམས་མ་བཅུག་པར་བཞག་ནི་འདི་ཨིན་མས། ༼འབྲུག་བརྡ་བརྒྱུདཔ་མཐུན་ཚོགས།༽

ཁུངས་གཏུག།

1. Journalist Association of Bhutan . (n.d.). About Us- JAB. Retrieved from Functions of JAB: http://www.jab.bt
2. Journalist Association of Bhutan. (n.d.). About Us- JAB. Retrieved from Vision and Mission: http://www.jab.bt
3. Journalists' Association of Bhutan. (2021). About Us- JAB. Retrieved from About- Journalist Association of Bhutan: http://www.jab.bt