ར་རྒོད་གནས། Ι Ragoe Sacred Site

ངོ་སྤྲོད།

ར་རྒོད་གནས།

ར་རྒོད་གནས་འདི་ དུས་རབས་ ༨ པའི་ནང་བྱོན་མི་ སངས་རྒྱས་གཉིས་པ་ ཨོ་རྒྱན་གུ་རུ་རིན་པོ་ཆེའི་ སྦས་གནས་ཚུ་གི་གྲལ་ལས་ གཅིག་ཨིནམ་སྦེ་ ཡིད་ཆེས་སྐྱེདཔ་ཨིན། གནས་དེ་ སྤ་རོ་རྫོང་ཁག་ དོལ་སྟེང་རྒེད་འོག་ནང་ཡོད་པའི་ བྱག་སྦྱི་དང་། ཕུ་ནུབ་གཡུས་ཚན་གྱི་མགུ་ལུ་ ཆགས་ཏེ་འདུག། གནས་དེ་ནང་ ལྷོད་ནིའི་དོན་ལུ་སྤ་རོ་ཁྲོམ་ཁ་ལས་ དུས་ཡུན་ཆུ་ཚོད་ ༡ ལྷགཔ་ཅིག་ སྣུམ་འཁོར་ནང་ འགྱོ་དགོཔ་མ་ཚད། དོ་རུང་སྣུམ་འཁོར་ནང་ལས་ཐོན་ཏེ་ དུས་ཡུན་སྐར་མ་ ༢༠ ལྷགཔ་ཅིག་གི་རིང་ རྐང་ཐང་སྦེ་འགྱོ་དགོ་པས།

འགྲོ་ལམ་གྱི་སྐོར།

ར་རྒོད་གནས་དེ་ མཇལ་བ་འགྱོ་ནིའི་དོན་ལུ་ ལམ་ཁག་གཉིས་ཡོད་ལུགས་ བཤད་ནི་ཡོདཔ་དང་། དེ་ཡང་ གཅིག་སྤ་རོ་ཁྲོམ་ཁ་ལས་ ཤར་རི་གཡུས་ཚན་ཁ་ཐུག་འགྱོ་སའི་ཟམ་དེ་བརྒལ་ཏེ་ ལྟ་རྫོང་ཁ་ཐུག་མེན་པར་ རྡོལ་སྟེང་རྒེད་འོག་ཁ་ཐུག་ལུ་ འགྱོ་དགོ་པས། དེ་ལས་ རྡོལ་སྟེང་རྒེད་འོག་ནང་ཡོད་པའི་ སློབ་གྲྭར་འགྱོ་སའི་ སྣུམ་འཁོར་གསེབ་ལམ་བདའ་སྟེ་ བྱག་སྦྱི་དང་། ཕུ་ནུབ་གཡུས་ཚན་གཉིས་ནང་ཐོན་ཏེ་འགྱོཝ་ད་ ལྷོད་ཚུགས་པས། འདི་བཟུམ་སྦེ་ གཅིགཔོ་དེ་འབུམ་བྲག་གནས་ལས་ཐོན་ཏེ་ ཡོད་ལུགས་བཤད་ནི་འདུག། དད་པའི་ས་བོན། གླེག་བམ་དང་པ། (གནམ་ལོ་མེད། ཤོག་གྲངས་༩༧) གྱིས་འབད་བ་ཅིན་ འབུམ་བྲག་གནས་ལས་ར་རྒོད་གནས་ཁ་ཐུག་འོང་དགོ་པ་ཅིན་ དུས་ཡུན་ཆུ་ཚོད་ ༢ ལྷགཔ་ཅིག་འགོརཝ་ཨིན་ཟེར་ བཀོད་དེ་འདུག།

གནས་ཀྱི་མིང་གནས་སྐོར།

ས་གནས་དེ་ཁའི་གནས་ཀྱི་མིང་ལུ་ ར་རྒོད་གནས་ཟེར་ ཞུཝ་ཨིན་པས། དད་པའི་ས་བོན། གླེག་བམ་དང་པ། (གནམ་ལོ་མེད། ཤོག་གྲངས་༩༧) གྱིས་འབད་བ་ཅིན་ གནས་འདི་གི་ལམ་འགོ་དང་པ་ སྟོན་གནང་མི་དེ་ར་དང་ བྱ་རྒོད་གཉིས་འབད་ནི་འདི་གིས་ གནས་ཀྱི་མིང་ལུ་ ར་རྒོད་གནས་ཟེར་ བཏགས་ཡོད་ལུགས་ བཀོད་དེ་འདུག། ཨིན་རུང་ དེ་ཁའི་དཀོན་གཉེར་གྱིས་འབད་བ་ཅིན་ ར་རྒོད་གནས་ཟེར་ མིང་འཐོབ་དགོ་མི་དེ་ ད་ལྟོ་ལྷ་ཁང་འོག་མའི་ནང་ མཇལ་ཚུགས་མི་ གུ་རུ་མཚོ་སྐྱེ་རྡོ་རྗེའི་སྐུ་འདྲ་དེ་ར་དང་རྒོད་ཀྱིས་ དེ་ཁར་ ཞུ་བསྐྱལཝ་ལས་ གནས་ཀྱི་མིང་ལུ་ ར་རྒོད་གནས་ཟེར་བཏགས་ཡོད་ལུགས་ བཤད་ནི་འདུག། མ་གཞི་སྤྱིར་བཏང་ ར་ཚུ་གྱང་སྟེ་ ལ་ཁ་མཐོ་སར་སྡོད་ནི་ལུ་ ལཱ་ཁག་རྐྱབ་ཨིན་རུང་ གནས་དེ་ཁར་ར་ཕོ་མོ་ ༥ དེ་ཅིག་ ང་བཅས་ཚུ་གིས་ མཐོང་ཚུགསཔ་ལས་ ཧ་ལམ་ མིང་དང་དོན་མཐུན་ཨིནམ་ ཧ་གོ་ཚུགས་པས།  

ལྷ་ཁང་ ༡ པ། གོང་མའི་སྐོར།

གནས་དེ་ཁར་ལྷོདཔ་ད་ ག་ནི་བ་ བྱག་གཟར་དྲགས་གུར་ ལྷ་ཁང་གོང་འོག་གཉིས་ མཇལ་ཚུགས་པས། ལྷ་ཁང་དང་པ་དེ་འབད་བ་ཅིན་ ཧེ་མ་དུས་རབས་ ༡༧ པའི་ནང་ བཀྲ་ཤིས་གཡང་རྩེ་རྫོང་ཁག་སྟོང་ཞང་ལས་བྱོན་མི་ ཧེ་མའི་མཚན་སྒོམ་ཆེན་ཚེ་དབང་བསྟན་འཛིན། ཤུལ་ལས་གྲུབ་ཐོབ་ཚེ་དབང་བསྟན་འཛིན་ཟེར་ཞུ་མི་གིས་ གདན་ས་བཏབ་གནང་ཡོད་ལུགས་ བཤད་ནི་འདུག། དགེ་སློང་བསོད་ནམས་ལྷ་རྒྱལ་གྱིས་འབད་བ་ཅིན་ གྲུབ་ཐོབ་ཚེ་དབང་བསྟན་འཛིན་ཁོ་ར་ ཧེ་མ་གཡུས་ཁ་ལས་ཚུར་བྱོནམ་ད་ གནས་དེ་ཁར་མེན་པར་ ཆུམོ་ཕུག་གནས་ལུ་བྱོན་ནི་སྦེ་ བྱོན་ཡོདཔ་ཨིན་རུང་། ཤུལ་ལས་ལུང་བསྟན་གྱིས་འབད་ གནས་དེ་ཁར་ལྷོད་དེ་ གདན་ས་བཏབ་གནང་ཡོད་ལུགས་བཤད་ནི་འདུག།

ལྷ་ཁང་གོང་མའི་ནང་རྟེན།

ལྷ་ཁང་དེ་ ག་ནི་བ་བྱག་འདྲོག་སི་སི་ཅིག་གུ་ ཡ་མཚན་ཆེ་ཏོག་ཏོ་སྦེ་མཇལ་ཚུགསཔ་མ་ཚད་ ལྷ་ཁང་ནང་ན་ལུ་ནང་རྟེན་ཚུ་ཡང་ སྦུག་གུ་རུ་པདྨ་འབྱུང་གནས་དང་། གཡས་གྲུབ་ཐོབ་ཁོ་རའི་སྐུ་འདྲ། དེ་ལས་ གཡོན་བླ་མ་ཞབས་དྲུང་རིན་པོ་ཆེ་སྦེ་ གཟི་བརྗིད་ཆེ་ཏོག་ཏོ་སྦེ་ བཞུགས་ཏེ་འདུག། ལྷ་ཁང་འདི་གི་ དཀོན་གཉེར་གྱིས་འབད་བ་ཅིན་ ད་ལྟོ་ལྷ་ཁང་དེ་ནང་ མཇལ་སྲོལ་ཡོད་མི་རྟེན་ཚུ་ ས་གནས་དེ་ཁ་ལས་ སྐར་མ་དག་པ་ཅིག་གི་ས་ཁར་ཡོད་པའི་ བསིལ་ཆུ་ཕུག་གི་རྟེན་ཚུ་ཨིན་ཟེར་ བཤད་ནི་ཡོདཔ་དང་། དེ་ཡང་གྲུབ་ཐོབ་ཚེ་དབང་བསྟན་འཛིན་ལུ་ མ་འོངས་པར་བསིལ་ཆུ་ཕུག་གི་ལྷ་ཁང་དེ་ ཉམས་འགྱོ་ནི་ཨིན་པའི་ ལུང་བསྟན་འབྱུང་མི་དང་འཁྲིལ་ཏེ་ བསིལ་ཆུ་ཕུག་ལུ་ སྒྲུབ་པ་གནང་སྟེ་བཞུགས་མི་ ཁོ་རའི་ཆ་རོགས་ལུ་ཞུ་ཞིན་དུ་ ཆ་རོགས་ཀྱིས་ཡང་དེ་འཕྲོས་ལས་ ངོས་ལེན་མཛད་པའི་ཤུལ་གནས་དེ་ཁར་ ཞུ་ཡོད་ལུགས་བཤདཔ་ཨིན་པས།

ལྷ་ཁང་ ༢ པ། འོག་མའི་སྐོར།

ལྷ་ཁང་གོང་མ་ལས་ཁ་མར་ལྟག་འབབས་འོངམ་ད་ བྱག་འདྲོག་སི་སི་ཅིག་གུ་ ལྷ་ཁང་ཅིག་མཇལ་ནི་འདུག། ལྷ་ཁང་དེ་གི་དཀོན་གཉེར་ དགེ་སློང་པདྨ་ནོར་བུ་གིས་འབད་བ་ཅིན་ ལྷ་ཁང་དེ་དུས་རབས་ ༡༣ པའི་ནང་ གྲུབ་ཐོབ་ལྕགས་ཟམ་པའམ་ ཐང་སྟོང་རྒྱལ་པོ་གིས་ བཞེངས་ཡོད་ལུགས་བཤདཔ་མ་ཚད་ ལྷ་ཁང་བཞེངས་སའི་ས་གོ་དེ་ཡང་ རུས་སྦལ་ཉལ་སྡོད་སྡོད་པའི་རྐངམ་གཡསཔ་གུ་ཨིན་ཟེར་བཤད་ནི་འདུག། རུས་སྦལ་གྱི་རྐངམ་གཡོནམ་དེ་འབད་བ་ཅིན་ ཕུག་ཤར་ཟེར་སར་ཡོདཔ་དང་། དེ་གུ་ཡང་ ལྷ་ཁང་ཅིག་བཞེངས་ཡོད་ལུགས་ བཤད་ནི་འདུག། དེ་བཟུམ་སྦེ་ རུས་སྦལ་གྱི་མགུ་ཏོ་དེ་འབད་བ་ཅིན་ དེ་ཁ་ལས་ཁ་མར་འབབས་འོངམ་ད་ གཡུས་ཚན་ཅིག་ནང་ མཇལ་ཚུགས་མི་སྲིན་བུ་ལྷ་ཁང་དེ་ཨིན་ཟེར་ བཤད་ནི་འདུག།

ལྷ་ཁང་འོག་མའི་ནང་རྟེན།

ལྷ་ཁང་དེ་ནང་ ནང་རྟེན་གཙོ་བོ་གུ་རུ་གསུང་བྱོནམ་འམ་ མཚོ་སྐྱེས་རྡོ་རྗེ་དང་། གཡས་གུ་རུ་བྲག་དམར། དེ་ལས་ གཡོན་ཞབས་དྲུང་རིན་པོ་ཆེ་སྦེ་མཇལ་ཚུགསཔ་མ་ཚད། གྱང་གུ་ལུ་ བསམ་པ་ལྷུན་གྲུབ་མའི་ལྡེབ་རིས་དང་། ཟངས་མདོག་དཔལ་རིའི་ ཞིང་ཁམས་ཀྱི་ལྡེབ་རིས་ཚུ་ཡང་ མཇལ་ཚུགས་པས། ལྷ་ཁང་དེའི་ནང་ན་ མཆོད་གཤམ་དང་སྒོ་གི་བར་ན་ བྱག་གུ་ལས་མར་ བདུད་རྩི་རྒྱུན་མ་ཆད་པར་ འབབས་ཏེ་འདུག། བདུད་རྩི་དེ་ ང་བཅས་ར་ཚུ་གིས་འཕྱག་ཞིན་ན་ རྐངམ་ལགཔ་དང་ གཟུགས་ཀྱི་ཚིག་ཏོ་ན་ས་ལུ་ དབུར་བ་ཅིན་སངམ་ཨིན་ཟེར་ བཤད་ནི་འདུག། ཧེ་མའི་ལྷ་ཁང་དེ་ སྟག་ཚང་མེ་མཆོད་བཞེས་པའི་དུས་མཉམ་ལུ་ བྱག་ཧྲམ་སྟེ་ ཕྱགས་མདའ་ཡོདཔ་དང་། ད་ལྟོ་ཡོད་མི་ལྷ་ཁང་དེ་ སྤྱི་ལོ་ ༢༠༠༡ ལུ་བཞེངས་ཡོད་ལུགས་བཤད་ནི་འདུག།

གུ་རུ་གསུང་བྱོནམ་ཟེར་བའི་ མཚན་གནས་ཀྱི་སྐོར།

དེ་ཡང་ ལྷ་ཁང་དེ་ནང་ཡོད་པའི་ གུ་རུ་མཚོ་སྐྱེས་རྡོ་རྗེའི་སྐུ་འདྲ་དེ་ ཧེ་མ་སྤུ་ན་ཁ་ཐང་རྫོང་ནང་ལུ་སྦེ་ བཟོ་བོ་པཉྩ་བདེ་བ་གིས་བཞེངས་ཡོདཔ་ཨིན་པས། སྤྱིར་བཏང་སྐུ་འདྲ་དེ་ ར་རྒོད་གནས་ལུ་མེན་པར་ དགོན་ཚེ་ཕུག་ལུ་ཞུ་ནི་སྦེ་ བཞེངས་ཡོད་རུང་། དེ་ཁར་ ཞུ་མ་ཚུགས་པར་ཕྱག་དང་ཞབས་ཚུ་ སོ་སོར་ཕྱེལ་ཏེ་ཞུ་དགོ་པས་ཟེར་ ཕྱག་དང་ཞབས་གུ་ མཚོན་ཆ་ཕུལ་ནི་འབདཝ་ད་སྐུ་འདྲ་གིས་ ངེའི་རྐངམ་ལགཔ་ཚུ་བཏོག་མིང་དགོ། ངེའི་ལུང་བསྟན་དེ་ནུབ་ཕྱོགས་ཁ་ཐུག་ཨིན་ཟེར་ གསུང་བྱོནམ་ཞིན་དུ་ དེ་ཁ་ལས་མི་བཞི་གིས་ཞུ་སྟེ་སྦྱེ་ལ་གཡུས་ཚན་ཚུན་བསྐྱལ་ཡོདཔ་ཨིན་པས། དེ་ལས་ སྦྱེ་ལ་གཡུས་ཚན་ནང་ལས་ བྱ་རྒོད་ཀྱིས་ཞུ་སྟེ་ ད་ལྟོའི་གནས་སྒོ་ཚུན་ བསྐྱལ་ཡོདཔ་དང་། འདི་ཁ་ལས་ར་གིས་ཞུ་སྟེ་ ལྷ་ཁང་ནང་འཛུལ་འགྱོཝ་ད་ གུ་རུའི་དབུ་སྒོ་ཁར་ཐོག་སྡོད་དེ་ རྩ་ལས་བཙུགས་མ་ཚུགས་པར་ དབུ་ཞྭ་ཆག་འགྱོ་ནི་གུ་ཐུག་སྟེ་ དོ་རུང་སྐུ་འདྲ་གིས་གཡས་ཟེར་གསུང་བྱོནམ་ལས་ མཚན་གུ་རུ་གསུང་བྱོནམ་ཟེར་ བཏགས་ཡོད་ལུགས་བཤད་ནི་འདུག། ང་བཅས་རའི་ དཔལ་ལྡན་འབྲུག་པའི་འབྲུག་རྒྱལ་ཁབ་འདི་ནང་ འདི་བཟུམ་མའི་ཡ་མཚན་ཅན་གྱི་གུ་རུའི་སྐུ་འདྲ་གསུམ་ཡོད་ལུགས་ བཤད་ནི་ཡོདཔ་དང་། དེ་ཡང་། ༡༽ སྤ་རོ་སྟག་ཚང་ལུ། ༢༽ དགོན་ཚེ་ཕུག་ལུ། ༣༽ ར་རྒོད་གནས་ལུ་ཨིན་པས། དགེ་སློང་པདྨ་ནོར་བུ་གིས་འབད་བ་ཅིན་ ད་ལྟོ་ར་རྒོད་གནས་ནང་བཞུགས་ཡོད་མི་ གུ་རུའི་སྐུ་འདྲ་དེ་གིས་ གསུང་ཚར་གསུམ་བྱོན་ནིའི་ ལུང་བསྟན་ཡོད་ལུགས་བཤདཔ་ཨིན་པས།

རྡོ་ཕུང་དང་རྟགས་ཚན།

ས་གནས་དེ་ཁར་ ལྷ་ཁང་དང་ བྱིན་ཅན་གྱི་ནང་རྟེན་ དེ་ཚུ་གི་མ་ཚད་པར་གཞན་ཡང་ རྡོ་ཕུང་དང་བྱག་ ཡིད་ཆེ་ཏོག་ཏོ་ཚུ་ ལེ་ཤ་མཇལ་ཚུགས་པས། དེ་ཡང་ དང་པ་ར་བྱག་གི་རྩ་བའི་འོག་ལུ་ ༡༽ ར་དང་བྱ་རྒོད་ཀྱི་གཟུགས་དང་ཅོག་འཐད་པའི་ རྡོ་ཕུང་འདུག། ༢༽  རྡོ་སྦུལ་ཉལ་ས། ༣༽  རྡོའི་ལོགས་ལུ་དུང་དཀར་རང་བྱོན། ༤༽  མཁའ་འགྲོ་མའི་བྷ་ག། ༥༽  རྡོ་གུ་མཁའ་འགྲོ་ཡེ་ཤེས་མཚོ་རྒྱལ་གྱི་ཞབས་རྗེས། ༦༽ གུ་རུའི་དབུ་ཞྭ། ཕྱག་འཁར་མཚོ། ༧༽  གུ་རུའི་ཞབས་རྗེས། ༨༽ རྡོ་གུ་ཕུརཔ། ༩༽  དུར་ཁྲོད་བསིལ་བའི་ཚལ། ༡༠༽ མཁའ་འགྲོ་མ་ཚུ་བྲོ་གར་འཁྲབ་ས། ༡༡༽  རྡོ་རང་བྱུང་གི་རའི་མགུ་ཏོག། ༡༢༽  དབུ་ཞྭ། ༡༣༽  རྡོ་རང་བྱུང་གི་བྱ་རྒོད། ༡༤༽ གནས་ཀྱི་ལྡེ་མིག་དང་སྒོ་ལྕགས། ༡༥༽  གུ་རུའི་ལྷ་ཁང༌། ༡༦༽  བླ་མ་ནམ་མཁའི་སྙིང་པོའི་སྒྲུབ་ཕུག་དང་། མཁའ་འགྲོའི་གསང་ཕུག་སྒྲུབ་ཆུ་འབབ་ས། ༡༧༽  རྡོའི་ལོགས་ལུ་སྦུལམོ་ཆེ་བཏུལ་བཏུལཝ། རྡོ་གུ་སྲིན་པོའི་པགས་ཀོ་བརྡལ་བཞག་བཞགཔ། བདུད་བཏུལ་བའི་སྦུལ། རྟ་མཆོག་བྷ་ལ་ཧའི་ཞབས་རྗེས། གུ་རུའི་ཞབས་རྗེས། བདུད་བཏུལ་བཏུལཝ་ཚུ་མཇལ་ནི་འདུག། ༡༨༽ ལྷ་ཁང་གི་སྒོ་ཁར་བྱག་གི་ལོགས་ལུ་མཁའ་འགྲོའི་བརྡ་ཡིག། གཟིག་ དོམ་ སྟག་གི་ཞལ་ཚུ་ཡང་ མཇལ་ནི་འདུག། ༡༩༽  གུ་རུའི་ལྷ་ཁང་འོག་མ། འདི་གི་གཡོན་ཧོངས་ཀྱི་སྒྲུབ་ཆུ་ཡོད་སར་འགྱོཝ་ད་ བྱག་གི་རྐེད་པ་ལས་ཕར་འགྱོ་དགོ་ནི་འདི་གི་ཉེན་ཁ་སྦོམ་འདུག། ༢༠༽ ལྷ་ཁང་འདི་གི་འོག་ལུ་གད་པ་ལོགས་ལུ་ མཁའ་འགྲོ་ཡེ་ཤེས་མཚོ་རྒྱལ་གྱི་ཞབས་རྗེས། ༢༡༽  བྱག་གི་ལོགས་བླ་མ་ནམ་མཁའི་སྙིང་པོའི་སྒྲུབ་ཕུག། ༢༢༽  སྤྱན་རས་གཟིགས་ཀྱི་དཀྱིལ་འཁོར། ༢༣༽  རྡོ་རང་བྱུང་གི་མཆོད་རྟེན། ༢༤༽  ལྷ་ཁང་འདི་གི་གཡོན་ཧོངས་བྱག་གི་ལོགས་ལུ་ བྱ་ཁྱུང་དང་རྒྱལ་པོའི་ཤངས་ཨིན་ཟེར་མཇལ་ནི་འདུག། ལྷ་ཁང་གོང་མའི་ལྟག་ལས་ཡར་དུམ་གྲ་ཅིག་འགྱོཝ་ད་ ལས་དགེ་སྡིག་ཤན་འབྱེད་ས་དང་ སྒྲུབ་ཆུ་ཚུ་ཡོད་ཟེར་ འདི་ཁར་བཞུགས་མི་བླམ་དང་ དགེ་སློང་བསོད་ནམས་ལྷ་རྒྱལ། པདྨ་ནོར་བུ་ཚུ་གིས་བཤདཔ་ཨིན་པས། ལྷ་ཁང་གོང་འོག་གཉིས་ཀྱི་སྦུག་ལུ་ཡོད་པའི་ བྱག་གི་ལོགས་ཀྱི་ཧཱུཾ་ཡིག་དེ་ ང་བཅས་ཚུ་གིས་མཇལ་ཚུགས་པ་ཅིན་ ལས་སྒྲིབ་དག་པའི་རྟགས་མཚན་ཨིན་ཟེར་ བཤད་སྲོལ་ཡོད་དོ་བཟུམ་ བྱག་གི་ལོགས་ལུ་ཧཱུཾ་སྦོམ་དོད་རིལ་རི་ཅིག་ མཇལ་ནི་འདུག།

བཅུད་དོན།

སྤྱིར་བཏང་ ང་བཅས་རའི་འབྲུག་རྒྱལ་ཁབ་འདི་ནང་ སྔོན་བྱོན་རྒྱལ་བ་གོངམ་ཚུ་གིས་ མ་འོངས་པའི་སེམས་ཅན་ ང་བཅས་བཟུམ་ཚུ་གི་དོན་ལུ་ མཐོང་ཐོས་དྲན་རེག་ཙམ་གྱིས་ ངན་སོང་གསུམ་ལས་ ཐར་ཚུགས་པའི་ ཡ་མཚན་ཅན་གྱི་གནས་དང་འབྱིན་བརླབས་ཅན་གྱི་སྐུ་འདྲ་ལེ་ཤ་ཅིག་ བྱིན་གྱིས་བརླབས་གནང་རུང་། ར་རྒོད་གནས་ནང་ མཇལ་སྲོལ་ཡོད་དོ་བཟུམ་གྱི་ཡ་མཚན་ཆེ་ཏོག་ཏོ་དང་། འབྱིན་བརླབས་ཅན་གྱི་སྐུ་འདྲ་ཚུ་ གནས་གཞན་ཁར་མིན་འདུག། དེ་འབད་ནི་འདི་གིས་ ཁྱད་དུ་འཕགས་པའི་ གུ་རུའི་སྐུ་འདྲ་གསུང་བྱོནམ་དང་། བྱིན་བརླབས་ཅན་གྱི་གནས་ཚུ་མཇལ་ནིའི་ ཐུགས་འདོད་ཡོད་པ་ཅིན་ སྤ་རོ་ར་རྒོད་གནས་ལུ་བྱོན་གནང་།

༼རྩོམ་ཡིག་འདི་སྲོལ་འཛིན་དང་རྫོང་ཁ་གོང་འཕེལ་ལས་ཁུངས་ཀྱི་སྐད་ཡིག་ཞིབ་འཚོལ་དང་ལས་རིམ་སྡེ་ཚན་གྱི་ཞལ་འདེབས།༽

Source : Department of Culture and Dzongkha Development.

རྒྱབ་རྟེན་དཔོ་ཐོ།

༡༽   དད་པའི་ས་བོན། གླེག་བམ་དང་པ། (གནམ་ལོ་མེད། ཤོག་གྲངས་༩༧)

༢༽   ར་རྒོད་གནས། སྤྱིར་བཏང་གི་ལོ་རྒྱུས་གསུང་མི།

༣༽   དགེ་སློང་བསོད་ནམས་ལྷ་རྒྱལ། ལྷ་ཁང་༡ གོང་མའི་སྐོར་བཤད་མི།

༤༽   དགེ་སློང་པདྨ་ནོར་བུ། ལྷ་ཁང་༢ འོག་མའི་སྐོར་བཤད་མི།