ཤེས་རབ་ལྷ་མོ།
ཤེས་རབ་ལྷ་མོ་འདི་ འབྲུག་གློག་བརྙན་ཚོགས་པ་ནང་ལུ་གནམ་མེད་ས་མེད་ ཡོངས་གྲགས་ཡོད་མི་ མོ་འཁྲབ་རྩེདཔ་ཅིག་ཨིན། མོ་ བཀྲ་ཤིས་སྒང་རྫོང་ཁག་ནང་ལས་ཨིནམ་དང་ མོ་ར་ལྕོགས་གྲུབ་ཅན་གྱི་ཨམ་སྲུ་ཅིག་འབདཝ་ལས་ འབྲུག་མི་ཀུན་གྱིས་དགའ་མི་འཁྲབ་རྩེདཔ་ཅིག་ཨིན། མོ་ར་ ཐིམ་ཕུག་རྫོང་ཁག་ སྐལ་སྐྱིད་སློབ་གྲྭ་ཆེ་བ་ནང་ལས་ སློབ་རིམ་བཅུ་གཉིས་མཇུག་བསྡུ་སྟེ་ མཐོ་རིམ་ཤེས་ཚད་འདི་ འབྲུག་གི་ཉེ་འདབས་ཀྱི་རྒྱལ་ཁབ་རྒྱ་གར་ལུ་ལྷབ་ནུག། མཐོ་རིམ་ཤེས་ཚད་མཇུག་བསྡུ་བའི་ཤུལ་ལུ་ འབྲུག་གློག་བརྙན་ཚོགས་པ་ནང་ འགོ་དང་པ་སྒྲ་འཛིན་ལྷ་མོ་ཟེར་ འོད་ལྡན་གྱིས་བཟོ་སྐྲུན་གྱི་ཐོག་ལས་ བློ་བཟང་ཆོས་གྲགས་ཀྱིས་བཀོད་ཁྱབ་འབད་ཡོད་པའི་གློག་བརྙན་ནང་བརྩེས་ནུག། ཤེས་རབ་མོ་ར་ ཆུང་ཀུའི་བསྒང་ལས་ འཁྲབ་སྟོན་དང་རྣམ་འགྱུར་སྟོན་ནི་ལུ་ སྤྲོ་བ་དང་དང་འདོད་སྦོམ་ཡོད་པའི་མི་ངོམ་ཅིག་ཨིན། མོ་རའི་སྤྲོ་བ་དང་བསྟུན་ཏེ་ སྤྱི་ལོ་ ༢༠༡༣ ལུ་ འབྲུག་གློག་བརྙན་ཚོགས་པ་ནང་ལུ་ འཁྲབ་རྩེདཔ་གསརཔ་གི་འགན་ཁུར་ལེན་ནུག། སྒྲ་འཛིན་ལྷ་མོ་ཟེར་བའི གློག་བརྙན་དེ་གི་གཞི་དང་སྲུང་ལུ་བརྟེན་ཏེ་ འབྲུག་མི་ཀུན་གྱིས་དགའ་ཚུགས་པའི་གློག་བརྙན་ཅིག་ལུ་གྱུར་ཡོདཔ་ཨིན། དེ་གི་ནང་ལས་ཡང་ གློག་བརྙན་དེ་གི་ སྲུང་ཡང་ དགའ་མཐུན་གྱི་ཐོག་ལུ་བརྩེས་ཡོདཔ་ལས་ ག་བ་ལྷགཔ་སྦེ་ན་གཞོན་ཚུ་གིས་རྒྱབ་སྐྱོར་བྱིན་ཏེ་འདུག།
ཤེས་རབ་མོ་ར་ འབྲུག་གི་འཁྲབ་རྩེདཔ་ཚུ་གི་གྲས་ལས་ མཛེས་མའི་མིང་ཡང་ཐོབ་ཡོདཔ་མ་ཚད་ གཞན་ཡང་མོ་རའི་ལྕོགས་གྲུབ་དང་ རྣམ་འགྱུར་ལེགས་པའི་ཁྱད་ཆོས་ལུ་བརྟེན་ཏེ་ དུས་ཡུན་ཐུང་ཀུ་ཅིག་ནང་གནམ་མེད་ས་མེད་ཡོངས་གྲགས་ཐོན་ནུག། མོ་གི་གློག་བརྙན་ཚུ་ ལེགས་ཤོམ་འགྱོ་བའི་ཤུལ་ལུ་ གློག་བརྙན་ནང་ལུ་གོ་སྐབས་ཡང་ལེ་ཤ་ཐོབ་ནུག། སྤྱ་ལོ་ ༢༠༡༣ ལས་འགོ་བཟུང་སྟེ་ ད་ལྟོ་ཚུན་གྱི་རིང་ལུ་ ཤེས་རབ་ཀྱིས་ གློག་བརྙན་ ༢༠ དེ་ཅིག་ནང་བརྩེས་ཡོདཔ་དང་ དེ་ཚུ་གཅིག་བ་གཅིག་ཚོང་འབྲེལ་ལེགས་ཤོམ་སོང་ཡོད་མི་ཙང་ཙ་ར་ཨིན་མས།
ཤེས་རབ་ལྷ་མོ་གིས་བརྩེས་ཡོད་པའི་གློག་བརྙན་ཚུ་ཡང་ སྒྲ་འཛིན་ལྷ་མོ། ལོག་ཤོག། ལས་ཀྱི་རླུང། འབྲུག་སྒྲ་གླིང་པའི་བཀྲ་ཤིས། འབྲུག། ཡ་མཚན། ངེའི་རྩ་བའི་བླ་མ། ཁྱོད་ངེའི་འཛམ་གླིང་ ཟེར་མི་ཚུ་ཨིནམ་དང་ མི་ཚོད་མི་གིས་མི་མཐོང་ཟེར་ དགོནམ་རྡོ་རྗེ་གིས་བཟོ་སྐྲུན་དང་ དབང་ཕྱུག་རྟ་ལོགཔ་གིས་བཀོད་ཁྱབ་འབད་ཡོད་པའི གློག་བརྙན་ནང་ཡང་བརྩེས་ཏེ་འདུག། གློག་བརྙན་དེ་ ཚོང་འབྲེལ་གནམ་མེད་ས་མེད་ལེགས་ཤོམ་སོང་ཡོདཔ་དང་ འབྲུག་མི་ཀུན་གྱིས་ཡིད་ཆེས་ཚུགསཔ་ཅིག་ལུ་གྱུར་ནུག། ཤེས་རབ་ལྷ་མོ་གིས་ འབྲུག་གློག་བརྙན་ཚོགས་པ་ནང་ལུ་ ཐ་དམ་ཚིག་དཔང་བཙུགས་ཏེ་ ལོ་ ༡༠ དེ་ཅིག་ཕྱག་ཞུ་བའི་གྲུབ་འབྲས་ཡང་ སྤྱི་ལོ་ ༢༠༡༥ གི་ལོ་ལུ་ དབང་ཕྱུག་རྟ་ལོགཔ་གིས་བཀོད་ཁྱབ་འབད་ཡོད་པའི་གློག་བརྙན་ འབྲུག་སྒྲ་གླིང་པའི་བཀྲ་ཤིས་ནང་ལས་ མོ་འཁྲབ་རྩེདཔ་དྲག་ཤོས་ཀྱི་གསོལ་ར་དང་། དེ་གི་ཤུལ་ལས་ སྤྱི་ལོ་ ༢༠༡༧ ལུ་ དབང་ཕྱུག་རྟ་ལོགཔ་གིས་བཀོད་ཁྱབ་འབད་ཡོད་པའི གློག་བརྙན་ ཧམ་ཆེ་བའི་འཛམ་གླིང་ནང་ལས་ མོ་འཁྲབ་རྩེདཔ་རྒྱབ་སྐྱོར་པ་དྲག་ཤོས་ཀྱི་གསོལ་ར་ཡང་ཐོབ་ནུག། གཞན་ཡང་ཤེས་རབ་ལྷ་མོ་འདི་ དམིགས་བསལ་གྱི་བརྒྱུད་འཕྲིན་ལས་དོན་གྱི་ངོ་ཚབ་དང་། གཞན་ཡང་ཕྱིའི་ཚོང་འབྲེལ་ལས་དོན་ངོ་ཚབ། བདེ་བ་ཚོང་འབྲེལ་གྱི་ལས་དོན་ངོ་ཚབ་སྦེ་ཡང་ཕྱག་ཞུཝ་ཨིན་མས།
རྒྱབ་རྟེན།
འབྲུག་གློག་བརྙན་༼༢༠༢༠༽འབྲུག་གི་སྙན་གྲགས་ཅན་གྱི་མི་ངོམ། གདོང་དེབ།