སྟག་རྩེ་རིག་གཞུང་མཐོ་རིམ་སློབ་གྲྭ།
ཆོས་དང་ལམ་སྲོལ། གཞུང་སྐད་རྫོང་ཁ་འབྲི་ནི་དང་སླབ་ནི། སྒྲིག་ལམ་ཆོས་གསུམ་ཚུ་ མི་ཉམས་གོང་འཕེལ་དང་ཉམས་པ་སོར་ཆུད་ཀྱི་དོན་ལུ་དམིགས་ཏེ་གཞི་བཙུགས་གནང་ནུག། ལྷག་པར་དུ་ སྤུས་ཚད་ཅན་གྱི་སློབ་སྦྱོང་ལས་རིམ་ལས་བརྟེན་ཏེ་ རྒྱལ་ཁབ་ཀྱི་ན་གཞོན་སློབ་ཕྲུག་ཚུ་ལུ་ ནང་དོན་རིག་པའི་གཞུང་གཙོ་བོ་བཏོན་ཏེ་ ཤེས་ཡོན་དང་རིག་རྩལ་སྤྲོད་ཐབས་ལུ་དང་ རྒྱལ་ཡོངས་དགའ་སྐྱིད་དཔལ་འཛོམས་ཀྱི་དམིགས་ཡུལ་སྒྲུབ་ཐབས་ལུ་དམིགས་པ་བསྐྱེདཔ་ཨིན་པས། དེ་མ་ཚད་ན་གཞོན་ཚུ་གིས་ ཁྱད་རིག་དང་ལྡན་པའི་སྦྱོང་བརྡར་དང་ ཞིབ་འཚོལ་གྱི་ཤེས་ཡོན་ཚུ་རྒྱ་སྐྱེད་གཏང་ཐབས་ལུ་དམིགས་ཏེ་གཞི་བཙུགས་གནང་ནུག།”
དད་པའི་ས་བོན། (སྤྱི་ལོ་ ༢༠༡༥) ལས་ “རིག་གཞུང་མཐོ་རིམ་སྲོབ་གྲྭ་འདི་ སྤྱི་ལོ་ ༡༩༦༡ ལོ་ལུ་འབྲུག་གི་སྤྱི་ནོར་དམ་པ་ རྒྱལ་རབས་གསུམ་པ་ མི་དབང་འཇིགས་མེད་རྡོ་རྗེ་དབང་ཕྱུག་མཆོག་གི་བཀའ་བཞིན་དུ་ སྐྱབས་རྗེ་རྡོ་རྗེ་འཆང་ དིལ་མགོ་མཁྱེན་བརྩེ་ཐེག་མཆོག་བསྟན་པའི་རྒྱལ་མཚན་མཆོག་ དབུ་འཛིན་སྦེ་བསྐོས་ཐོག་ལས་ བྱིན་རླབས་ཅན་གྱི་གནས་ཆེན་དབང་འདུས་རྩེ་ལུ་ རིག་གནས་སློབ་གྲྭ་སྦེ་ གཞི་གཙུགས་གནང་པའི་ཤུལ་ལས་ དཔལ་འབྲུག་པ་རིན་པོ་ཆེ་ བླམ་ཞབས་དྲུང་ངག་དབང་རྣམ་རྒྱལ་མཆོག་གིས་བཞེངས་གནང་མི་ སེམས་རྟོགས་ཁ་རྗོང་ནང་ལུ་ སྤོ་བཤུད་མཛད་གནང་ནུག།” (ཤོག་གྲངས་ ༡༢༠།) ཡོངས་འབྲེལ་འཆར་སྒོ (ལོ་མེད།) སྟག་རྩེ་རིག་གཞུང་མཐོ་རིམ་སློབ་གྲྭ་ལས་ “སྤྱི་ལོ་ ༡༩༨༤ ལུ་ སེམས་རྟོགས་ཁ་རིག་གཞུང་སློབ་གྲྭ་འདི་ གཞུང་གྲྭ་ཚང་ལྷན་ཚོགས་ཀྱི་མངའ་འོག་ལུ་ ལོ་ ༢༧ གྱི་རྒྱབ་ལས་ སློབ་ཕྲུག་བུམོ་བསྡོམ་གྱི་ ༤༣ འཛུལ་ཞུགས་འབད་ཞིནམ་ལས་ རྩ་གཞུང་ལེགས་འགྱུར་དང་ སྐད་ཡིག་དང་ལམ་སྲོལ་གྱི་ཆོས་ཚན་ མང་རབས་ཅིག་གཞི་གཙུགས་གནང་སྟེ་ སྤྱི་ལོ་ ༡༩༩༧ ལུ་ སྐད་ཡིག་དང་ལམ་སྲོལ་མཐོ་རིམ་སློབ་གྲྭ་ལུ་ ཡར་སེང་མཛད་གནང་ནུག། རྒྱལ་རབས་ཅན་གྱི་ སྐད་ཡིག་དང་ལམ་སྲོལ་སློབ་གྲྭ་འདི་ སྤྱི་ལོ་ ༡༩༩༩ ལུ་ ལོ་ངོ་གསུམ་གྱི་གཙུག་ལག་གཞི་རིམ་རྫོང་ཁ་དང་ལམ་སྲོལ་སློབ་སྦྱོང་ གཞི་གཙུགས་གནངམ་དང་གྲས་ ཐོན་རིམ་དང་པའི་ ན་ཞོན་སློབ་ཕྲུག་ ༡༩ གིས་གྲལ་གཏོགས་འབད་ནུག། གནམ་ལོ་ ༢༠༠༤ སྤྱི་ཟླ་ ༤ པའི་ཚེས་ ༢༨ ལུ་ ཤེས་རིག་ལྷན་ཁག་གིས་ འབྲུག་རྒྱལ་འཛིན་གཙུག་ལག་སློབ་སྡེ་ལུ་ རྩིས་སྤྲོད་གནང་པའི་ཤུལ་ལུ་ ད་རེས་ནངས་པ་སྐད་ཡིག་དང་ལམ་སྲོལ་སློབ་གྲྭ་འདི་གལ་ཅན་ཅིག་ལུ་འགྱུར་ཏེ་ཡོདཔ་ཨིན།”
ཡོངས་འབྲེལ་ཡུ་ཊུབ་ (གནམ་ལོ་༢༠༡༧) འབྲུག་རྒྱལ་འཛིན་གཙུག་ལག་སློབ་སྡེའི་ ལས་རིམ་ནང་ལུ་བཤད་དོ་བཟུམ་འབད་བ་ཅིན་
“འབྲུག་རྒྱལ་ལྔ་པ་ དཔལ་མི་དབང་འཇིགས་མེད་གེ་སར་རྣམ་རྒྱལ་དབང་ཕྱུག་མཆོག་གིས་ ཐུགས་ཀྱི་དགོངས་བཞེད་ལྟར་དུ་ རྫོང་ཁག་ཆ་མཉམ་ལུ་ མི་སྡེ་དཔལ་འབྱོར་དང་ གོང་འཕེལ་འདྲ་མཉམ་གྱི་འཆར་གཞི་ཚུ་བརྩམ་པའི་སྐབས་ལུ་ ནང་དོན་རིག་པའི་གཞུང་གི་སློབ་གྲྭ་འདི་ཡང་ རྒྱ་སྐྱེད་འབད་དགོ་པའི་གྲོས་ཆོད་བྱུངམ་ད་ ས་ཁོངས་ཆུང་བའི་དཀའ་ངལ་ལས་བརྟེན་ཏེ་ འབྲུག་རྒྱལ་འཛིན་གཙུག་ལག་སློབ་སྡེའི་བཀའ་རྒྱ་དང་འཁྲིལ་ སྤྱི་ལོ་ ༢༠༡༡ སྤྱི་ཟླ་ ༨ པའི་ནང་ལུ་ སེམས་རྟོགས་ཁ་སྐད་ཡིག་དང་ལམ་སྲོལ་སློབ་གྲྭ་དེ་ ཀྲོང་གསར་རྫོང་ཁག་ལུ་སྤོ་བཤུད་མཛད་གནང་ནུག།”
སྟག་རྩེ་རིག་གཞུང་མཐོ་རིམ་སློབ་གྲྭ་འདི་ བྲག་སྟེང་རྒེད་འོག་ལུ་ ཀྲོང་གསར་ཁྲོམ་ལས་ཀི་ལོ་མི་ཊར་ ༢༣ གྱི་ས་ཁར་ཆགས་སྟེ་འདུག། སློབ་གྲྭ་འདི་ནང་ལུ་ནང་པའི་རིག་གཞུང་དང་ལམ་སྲོལ། སྒྲིག་ལམ་དང་ལྷན་ཐབས་ཀྱི་སློབ་ཚན་གཞན་ཚུ་ཡང་ གཞུང་སྐད་རྫོང་ཁ་དང་ཨིང་སྐད་གཉིས་ཆ་ར་ ཟུང་འབྲེལ་ཐོག་ལྷབ་སྦྱང་འབད་ཞིན་ཡོདཔ་ཨིན། ད་ལྟོ་འབད་བ་ཅིན་ རིག་གཞུང་མཐོ་རིམ་སློབ་གྲྭའི་གརྩོ་འཛིན་ ལུང་བསྟན་རྒྱ་མཚོ་བཅས་ ལེགས་སྦྱར་བ་ ༤༩ དང་ ཡིག་ཚང་ལས་བྱེདཔ་ 35 དེ་ཅིག་འདུག། སློབ་ཕྲུག་ཡོངས་བསྡོམས་ ༤༠༠ དེ་ཅིག་ལུ་ གཙུག་ལག་གཞི་རིམ་འབྲུག་དང་ཧི་་མ་ལ་ཡ་ ལོ་ངོ་ ༣། སྐད་ཡིག་དང་རྩོམ་རིག་ ལོ་ངོ་ ༣། རྫོང་ཁ་དང་ལམ་སྲོལ་སློབ་སྦྱོང་ ལོ་ངོ་བཞི། དེ་བཟུམ་སྦེ་ གཙུག་ལག་གོང་མའི་ རྒྱང་འབྲེལ་གྱི་སློབ་སྦྱོང་ ལོ་ངོ་ ༢ བཅས སློབ་སྦྱོང་ལས་རིམ་དབྱེ་ཁག་བཞི་དེ་ཅིག་ གཞི་གཙུགས་འབད་དེ་འདུག། དེ་མ་ཚད་ ན་གཞོན་ཚུ་ལུ་ དམིགས་གསལ་གྱི་ཤེས་ཡོན་སྤྲོད་ཐབས་ལུ་ དྭངས་གསལ་ཚོགས་ཕྲན། རིག་གཞུང་བྱང་ས་སེམས་ཅན་སྲོག་སྐྱབས་ཚོགས་པ། རིག་གཞུང་རྩོལ་སྒྲུབ་དང་འགོ་འདྲེན་ཚོགས་ཕྲན་དང་ རིག་གཞུང་སྨྱུག་སྡེ་ལ་སོགས་པའི་ ཚོགས་ཕྲན་ ༢༠ དེ་ཅིག་གཞི་གཙུགས་འབད་དེ་འདུག།
རྒྱབ་རྟེན།
ཀུན་བཟང་ཕྲིན་ལས། རིག་འཛིན་རྡོ་རྗེ། བསོད་ནམས་བསྟན་འཛིན། ཀརྨ་དབང་འདུས། རྟ་མགྲིན་ཕུན་ཚོགས། ཨྱོན་ཕུན་ཚོགས། རིག་འཛིན་དབང་ཕྱུག། (༢༠༡༥) དད་པའི་ས་བོན། འབྲུག། ཐིམ་ཕུ། ཀེ་ཨེམ་ཀྲི་དཔེ་སྐྲུན་ཁང་།
ཡོངས་འབྲེལ་ཡུ་ཊུབ་(སྤྱི་ལོ་༢༠༡༧)འབྲུག་རྒྱལ་འཛིན་གཙུག་ལག་སློབ་སྡེ།https://www.youtube.com/watch?v=XNz2EW0Yd
སྟག་རྩེ་རིག་གཞུང་མཐོ་རིམ་སློབ་གྲྭ(ལོ་མེད།གཞིས་ཁོངས་གནས་ཚུལ།https://www.clcs.edu.bt