ཧོན་སྟོད་བཟོ་ཐངས།

༉ འབྲུག་རྒྱལ་ཁབ་འདི་ སྔར་སློལ་གྱི་བཞེས་སྒོ་དང་རྫས་སྦྱོར་ལུ་ ཕྱུག་པའི་རྒྱལ་ཁབ་ཅིག་ཨིན། འདི་ཡང་དང་ཕུ་ལུང་ཕྱོགས་སོ་སོ་ལས་ཕར་ལམ་འགྲུལ་འབད་ནིའི་རྒྱུ་ཆ་ ད་རེས་ནངས་པ་བཟུམ་སྦེ་སྣུམ་འཁོར་གྱི་ལམ་མེདཔ་ལས་ ལུང་ཕྱོགས་རེ་ལུ་བརྡ་དོན་སྤྲོད་ལེན་འབད་ནིའི་ཁ་སྐད་སོ་སོ་འབྱུང་ཡོད་དོ་བཟུམ། བཞེས་སྒོ་གི་རིགས་ལུ་ཡང་ ལུང་ཕྱོགས་ཁག་གི་བར་ན་མ་འདྲཝ་འབྱུང་བའི་རྒྱུ་མཚན་ཡང་ འདི་ལས་བརྟེན་ཏེ་ཨིན་པས།

དང་པ་ ཧོན་སྟོད་ཟེར་མི་འདི་ཁ་མཐོ་སར་ རྒྱ་རེད་དང་བྱཱོ་གི་ལོ་ཐོག་འཚོ་སའི་ས་གནས་ འབྲུག་གི་རྫོང་ཁག་ཉི་ཤུ་ལས་ཧཱ་རྫོང་ཁག་ནང་ལུ་ སྔོན་དང་ཕུ་ལས་ར་ ཕམ་རྒན་ཤོས་ཚུ་གིས་ལོངས་སྤྱོད་དེ་ ཡོངས་གྲགས་ཡོད་པའི་བཞེས་སྒོ་གི་རིགས་ཅིག་ཨིན། ཧོན་སྟོད་གི་བཟོ་རྣམ་འདི་ མོ་མོ་བཟུམ་སྦེ་ཡོད་རུང་ བཟོ་ཐངས་སོ་སོ་ཡོདཔ་ཨིན།

ཧོན་སྟོད་བཟོ་བའི་སྐབས་ རྫས་སྦྱོར་ཚང་དགོཔ་ཚུ་ཡང་ གཡུང་རྡོག། ལོམ། དར་ཚི། ཐིང་ངེ་། སྒོགཔ། སྐྱ་སྒོགཔ། ས་སྒ། ཞིམ་རྩི། པད་ཀར་མར་ཁུ། སྟར་གོ། ཕྱེ།(བྱཱོ་དང་རྒྱ་རེད) ཨེ་ཕྱེ། ཚྭ་ཚུ་ཨིན།

ཤབ་བཟོ་ཐངས། ལོམ་ཕྱ་རུ་རུ་སྦེ་གཏུབ། དེ་དང་གཅིག་ཁར་ དར་ཚི་སྐྲུམ། ཨེ་ཕྱེ་ཁ་ཚ་པག་པ་བླུགས། ཐིང་ངེ་དང་སྐྱ་སྒོགཔ་ དེ་ལས་སྒོགཔ་ཕྱ་རུ་རུ་སྦེ་བཏོག་དགོ། དེ་གུར་ པད་ཀར་མར་ཁུ་བླུགས་ཏེ་ (སྟར་གོ་ཡོད་པ་ཅིན་ཞིམ་) ཚྭ་ཚུ་ག་ར་གཅིག་ཁར་སྦྱོར་དགོ།

བཟོ་ཐངས། གཡུང་རྡོག་པགས་ཀོ་ཤུབས་ཏེ་ ཨེན་བཤད་ལག་ལེན་ཐབས་ཏེ་ཟངས་གཞོང་སྦོམ་ཅིག་ནང་ལུ་བརྡར་དགོ། གཡུང་རྡོག་ལས་འཐོན་པའི་ཆུ་འདི་ཚུ་བཙིར་ཏེ་བཀོ་ནི་གི་དོན་ལུ་ ཕེད་ཙེ་ནང་ལུ་བཙུགས་ཏེ་རྡོ་ལེབ་གཉིས་ཀྱི་བར་ན་ཨེབ་སྟེ་ནུབམོ་གཅིག་བཞག་དགོ། དེ་ལས་ ཟངས་གཞོང་ནང་ལུ་ལོག་བླུགས་སྟེ་ རྫས་སྦྱོར་གཞན་ཚུ་བླུགས་སྟེ་སྦྱོར་དགོ། འདི་གུ་ལུ་ པད་ཀར་མར་ཁུ་ཙག་བཅད་དེ་བླུག་ཞིན་ན་སླ་བསྲེས་དགོ། དེ་གི་ཤུལ་ལས་ བྱཱོ་དང་རྒྱ་རེད་གཉིས་ཧོད་སོ་སོ་གཅིག་ནང་ལུ་ ཆུ་བླུགས་སྟེ་ལགཔ་གིས་བསྣད་དགོ། ཕྱེ་བསྣད་མི་འདི་ཚུ་ ལེབ་ཏག་ཏ་སྦེ་བཟོ་སྟེ་ སྦུག་ལས་གདོང་སྤེད་དེ་ རྫས་སྦྱོར་སླ་བསྲེས་མི་དེ་ཚུ་ ཐུརམ་གང་གི་རྩིས་བླུགས་སྟེ་ དབྱིབས་བྱ་ཆི་ཆི་སྦེ་བཟོ་དགོ། དེ་ལས་ཧོན་སྟོད་འདི་ཚུ་ རླངསམ་ཟིལ་གྱི་ཧོད་སྦ་གི་བཟོ་སྟེ་ཡོད་མི་ནང་ལུ་བཀང་སྟེ་བཙོ་དགོ། བཙོ་ཚརཝ་ད་ མར་ཁུ་ཙག་བཅད་མི་ནང་བསྔོ་ཞིནམ་ལས་ ཧོན་སྟོད་དེ་ཟ་ནིའི་དོན་ལུ་སྒྲ་སྒྲིག་འགྱོཝ་ཨིན།

དམིགས་བསལ་ཁྱད་ཆོས། ཧཱ་པའི་ཧོན་སྟོད་འདི་ གནམ་ལོ་གསརཔ་ཚེཔ་ད་ལུ་ ལུང་པའི་རྟེན་འབྲེལ་ ལོམ་བ་ཟེར་མི་འདི་བརྩི་སྲུང་འབདཝ་ད་ རང་གི་ཕམ་དང་སྤུན་ཆ་ གཉེན་ཉེཝ་ཚུ་གཅིག་ཁར་འཛོམས་ཏེ་ ཟ་སྲོལ་ཡོདཔ་མ་ཚད་ ས་གནས་གཞན་ཁར་ཡོད་པའི་ རང་གི་ཆ་རོགས་དང་སྤུན་ཆ་ཚུ་ལུ་ ལོ་གསརཔ་གི་ཁྱོསམ་སྦེ་བསྐྱེལ་གཏང་སྲོལ་ཡོདཔ་ཨིན་མས།

རྒྱབ་རྟེན།

National dish. (n.d.). Retrieved from http://bhutanesefoodworld.weebly.com/national-dish.html